Wambeela 34

Owana ni athu oXikemu mwaha wa Dina

1Nlabo nimohi Dina, mwaana Liya ambaleliiye Yakobo, ahidhowaga waweeddela ahiyana a elabo elene. 2Xikemu, mwaana a Hamori muHevi mpogo a elabo elene, ahimoonaga, ahimwihiddelaga, omugonana moomurabuliha. 3Vevale murima waaye wahijeya ni namwali ole, mwaana a Yakobo, ahixixaga omuwogana madhu oodhivela. 4Mowindo Xikemu ahiwogaga ni ababe Hamori: <<Mugiwogelena namwali ole wi gimutele!>>#34.1-4 Dhoodhiveliwa dheehu enofuneya naang'anelege wi dhinaadhe dhibale yoothega. Muneba woweela ononikamihedha ni waang'anela woovilela namuloba Mulugu ononikamihedha.

5Yakobo ahiiwaga wi mwaanaye Dina ohutakalihiwa ni Xikemu mbwenye kaawogileve yego ofiyedha anaaye yaali woolapela egawelile waajihigiisu aneenyama. 6Hamori, babe a Xikemu, ahidhowaga othapanyedha dha mavevo ni Yakobo.

7Ahima a Yakobo egawelilewo okokolani, egeewile eyene yeereyilege, yahukuuwaga ni otakaleliwa vowi Xikemu ahaathegela ni waapudha aEzarayeli. Eyene yeeriliiye ni Dina yaali yoohurumeedheya. 8Hamori ahiwogaga ni aliwa, wiira: <<Mwaanaga Xikemu ohutthabwa omfuna namwali ola. Ginowuulobani wi mmwihiye amutele. 9Nisasanye waandana: Hiyo naatelege aniinyu, nyoovo mwaatelege ahima eehu. 10Nyoovo mmage ni hiyo. Mukalege mwiilaboni mweehu wona anamurala, mmage mwemu, mmweeddegemo nagooso eenyu, mugulegemo mburo dheenyu>>.

11Xikemu ahaalobaga ababe ni arogora a Dina, wiira: <<Ginowuulobani wi mwaakulele! Ginorumeedhela wuuvahani dhaatedhene dhinafunigiinyu. 12Naari mugalobile dhooreela dhijinji ni pethe ya mutheengo wookwima, ginowuuvahani, mwarumeedhela wi gimutele oliye>>.

13Ahima a Yakobo yahaareyelaga musapa a Hamori ni Xikemu va mwaha ola woomutakaliha murogoriwa Dina. Yahimwaakulaga, wiira: 14<<Wa hiyo omuteliha murogorihu ni mulobwana oohiineliwa, kanneeregena. Mwa hiyo sookaliha manyazo. 15Mwa ela nnorumeedhela yoowoga yeenyu mweerana ela baahi: Murumeedhele wawiinela alobwana eenyu aatene wona hiyo dhineeriihu. 16Ndo nneerege waahiya ahima eehu wi mwaatelege, hiyo teto nneerege waatela aniinyu. Nnoodha nimage ni nyo, nnoodha nikale athu a nlogo nimohive. 17Mwahirumeedha yowiineliwaga nnoomuthukula mwaanihu, nimudhowegena>>.

18Yoowoga ele yahimudhivelaga Hamori vamohi ni mwaanaye Xikemu. 19Mowaaguva Xikemu ahisasanyedhaga dhaatedhene dhalobiligiisu mwaha woonfunesa mwaana a Yakobo. Xikemu aali ooriiheyesesa mwa emudhi ya ababe. 20Mowindo Hamori ni mwaanaye Xikemu yahidhowaga owoga ni alobwana a muluwani mule. Yahitugumanaga vamohi, wiira: 21<<Athu ala eli mmurenddeleni ni hiyo. Mwaahiye wi emage ni hiyo mwiilaboni mweehu, emwiiregena nagooso eewa mwemu vowi elabo ehitthabwa wunnuwa. Naatelege aniiwa, aliwa teto yaatelege eehu. 22Aliwa enarumeedha omaga ni hiyo wi nikale athu a nlogo nimohive, neerana ela: <Nawiinela alobwana eehu aatene>, wona aliwa vawiineleliiwa. 23Aneenyama eewa ni dhooreela dheewa, nnoona wi dhineere dhikale dheehu! Narumeedhela wi ekalege ni hiyo>>.

24Alobwana aatene a nluwa ndde yaanda owana koddo, yahirumeedha yoowoga ya Hamori ni Xikemu, aatene yahiineliwa.

25Mmuroddoni mwiwa, ebulelaga ndale, ahima abiili a Yakobo, Simiyoni ni Leevi, arogora a Dina, yahithukulaga mmohi ni mukwaaye masupaadda eewa ovolowa muluwani mule mugali moopwaasa, waapa alobwana aatene alene. 26Yahimpaga ni supaadda Hamori ni mwaanaye Xikemu, yahimuthukulaga Dina, omudhowagana. 27Vevale ahima amohi a Yakobo yahivolowaga muluwani mule, enyingalaga miruthu, othukulamo dhooreela dhaatedhene dha nluwa ndde mwatakalihiwege murogoriwa. 28Yahithukulagawo mabila, ng'ombe, abuuru ni dhendo dhafwanyiliisu muluwani ni mmiddani mwene. 29Yahithukulaga dhooreela dhaatedhene ni dhimohi dhaali mmamba, vamohi ni ahima ni ahiyana waadhowagana.#34.25-29 Eli yapama ofuna oharihamo mbwenye mooligana ni Poroveribiyo 20.22 enofuneya nihiye oharihamo wu mmadani mwa Mulugu nihaawelihedhege ale enaniirela dhootakala. Simiyoni ni Leevi yahithega varathiliiwa wa alobwana oXikemu vano yaapa. Babiiwa ahaadduba mwaha wa dhowiira dhedhi. Moone Wambeela 49.5-7.

30Yakobo ahiiraga wa Simiyoni ni Leevi: <<Nyo muhugitatamulela otadhiwa ni onukwa yuudde. Muhaaliga anya a elabo ela, aKanani ni aPerezi wi egisayelege miyo. Munowoona wi miyo ginna alobwana vang'ono. Yiira egumanela egidheela ogiliga, enogipa ni ahima aaga aatene>>. 31Aliwa yahimwaakulaga, wiira: <<Enorumeedheya wi murogorihu eeriwe wona namararuwa?>>

Currently Selected:

Wambeela 34: tke

Highlight

Copy