Psalms 94
94
God Isivġiqsuiruq Iluqaiññun
1Ataniiq God, akisaurrisuuruatiin,
qiñiqtirruŋ qinnautin.
2Isivġiqsaurutin iluqaptinnun nunami;
makillutin tatavsakkich arguaŋaruat!
3Qakuguaglaan sivisutigiruamik, Ataniiq,
qakuguaglaan sivisutigiruamik pigiiḷḷiqirauruat kamaniraagniaqpat?
4Qanutun sivisutigiruamik pigiiḷḷiqirit arguaŋaaġniaqpat
kamasaaġutigiaqsiḷugich aasii killukun savaatiŋ?
5Anmuksruġaich iñuktin, Atanġuruatiin;
nagliksaaqtitaġigaich ilvich nanmiñiq iñuktin.
6Iñuaqtuqtut uiḷgaŋaruanik iglaaguruaniglu;
iñuaqtuqtut aŋayuqaagitchuanik.
7Uqaġaqtut, “Atanġum tautulaitkaatigut;
God-iŋata Israel-gum qaunagiŋitkaatigut.”
8Iñugiramaaŋ, qanuqłusiimña isumalluaġiisigivisi?
Qakuguimña isumatusiñiaqpisi?
9God-im siutiliuŋaraatigut—tusaayumiñaitpa?
Irivut ilaata savaaġiŋammigaich—tautukkumiñaitpa?
10Natqiksruiḷḷaruaq nunaqpagnik—tatavsautiqaġumiñaitpa?
Iḷisaurriuruaq iñupayaanun—iḷisimmataitpa?
11 #
1 Co 3.20. Atanġum iḷisimagaich isumagiravut;
iḷisimaruq asiḷiqqutautilaaŋat isumalaaġutigirapta.
12Ataniiq, qanutun quviasuktigiva iñuk natqiksruqtan,
suli iḷisautiran pitquraġnik!
13Unaŋuiqsiaġviqaqtittaġigitin isumaaluutiŋiññiñ
nivaanigataqtillugich iḷuqsramik pisaġisaġlugich pigiiḷḷiqirauruat.
14Atanġum ayyaktuġniaŋitkai iñuni;
ilaata suksraaġniaŋitkaich ilaan iñuni.
15Pitqiksiġautairrun iḷitqigñiaqtuq isivġiġvigñi,
suli nalaunŋarualiqiraupayaaqtuat tunulliḷiqsuġniaġaat.
16Kia makilluni ikayuġniaqpaŋa akiḷḷiqsruġupkich pigiiḷḷiqirauruat?
Kia piqasiqsuġniaqpaŋa akiḷḷiġigupkich piḷuktuat iñuich?
17Atanġum ikayuŋaisuaqpaŋa,
akkupaiññaq nipaiŋagayaqtuŋa tuqqunmi.
18Uqallakkama, “Kataaqsiruŋa”;
nakuaqqutikpich ittuam ataramik makitapkaġaġigaaŋa, Ataniiq.
19Uŋiarikama suli isumaalukłuŋa,
araguugigma aasii quviatchaktiłłuŋa.
20Iḷḷatisuitchutin isivġiqsirinun maqutchiruanun,
iluaqtuaguŋitchuat pitquraġuqługich,
21atautchimunmukłutiŋ akiḷḷiġiraġigaich iluaqtualiqiruat
aasiiñ tatavsaqtaksriuqługich tuqqunmun patchisaitchuat.
22Aglaan Ataniq qaunaksriga;
suli God uyaġauruaq annaksaġvigisuugiga.
23Tatavsaġniaġaich pisigilugu piḷuktualiqiniŋat;
suksraunġiġḷugich piḷuutiŋich pisigilugich;
Atanġum God-ipta suksraunġiġñiaġaich.
Currently Selected:
Psalms 94: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
