Psalms 84
84
Inuġruvigivlugu God-im Iglua
Atuqtit aullarriŋannun. Gittith-kuaqługu. Iḷaŋisa Korah-m. Psalm.
1Qanutun piññaġnaqtigiva Aŋaiyyuvikpagiran, Atanġuruatiin Sapiġñaqtuaguvlutin!
2Qanutun tavraniitchummiiġaluaqtuŋa!
Atanġum Aŋaiyyuvikpaŋanun inuqsralipiallaktuŋa.
Iluġaaqługu irrusiġa atuqtuŋa quviasuunmi
iñuuruaguruamun God-mun.
3Tamatkua unnii tiŋmiaġruich ugluliuġaqtut,
suli tiŋmiaġruurat ugluqaġuummiut;
ivvaviksramignik qanillutiŋ ikipkaivigiraġni,
Ataniiq Sapiġñaqtuaguruatiin, umialigiraqpiñ suli God-igivlutin.
4Qanutun quviasuktigivat tamatkua iñuuruat aŋaiyyuvikpagni,
atułhaiññaġuurut nanġautinik iliŋnun.
5Quviasuglich iliŋich suaŋŋatiqaqtuat iliŋniñ,
sivunniŋaruat uummatimigni iglausukłutiŋ Mount Zion-mun.
6Paliumaruatigun natiġnaŋisiguaqamiŋ Baca-m,
suvlikłutiŋ maqsraluktuat iḷiŋarut tavrani;
ukiaksraam sialuŋisa immiŋagaich imaqsuurat.
7Suaŋŋaksaiññaŋarut iglaullaġmiŋ;
tautugniaġaat God-iŋat god-auruat Zion-mi.
8Tusaagguuŋ aŋaiyyutiga, Ataniiq God-auruatiin Sapiġñaqtuaguvlutin.
Naalaġniiñ, God-auruatiin Jacob-mun!
9Tautuguŋ sapunniaġutikput, ilvit, God-auruatiin,
umialik ilvich naliġaaġiŋaran.
10Atausimi uvliḷḷaktuni Aŋaiyyuvikpagiraġni
nakuułhaaqtuaguruq 1,000-tun iñugiaktigiruani allaniinniġmiñ;
Qaunaksrauguma paaŋanik God-igma igluata iviġaumaġiłhaaġayaġiga
iñuuniġmiñ igluŋiñi pigiiḷḷiqirauruat.
11Ataniq munaqsrigigikput aullarrigivlugulu.
Quviasaaġuugaatigut nakuuniġmiñik qutchiksiḷiġunmiglu.
Nakuuruamik aitchuŋiññiaŋitkaich
nalaunŋarualiqirauruat.
12Ataniiq Sapiġñaqtuaguruatiin, qanutun quviasuktigivat ukpiqsraqtuat iliŋnik!
Currently Selected:
Psalms 84: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
