Psalms 33
33
Atuutaa Nanġautim
1Iluġavsi iluaġniaqtuaguruasii,
qasalaaġutigisiuŋ quviasuuttaġilugu Atanġum savaaŋa;
nanġaqsiuŋ, kamaksripayaaqtuasii Ilaanik.
2Quyanaaqsiuŋ Ataniq atuqtuuraġusi nuqaqtilignik.
Atuġlusi nuqaqtilignik atuqtuurautigillaan.
3Atuutilugu Ilaa atuutitchauramik,
nuqaqtilik nivliraqtilluataġlugu quvianaq qasalaaġutigiuŋ!
4Uqaluŋi Atanġum iḷumun ittuagurut,
savaapayaaŋiḷḷu ukpiġnaqtut.
5Atanġum nakuaġigaa iluaġniaqtuaq iḷumutuuqtuaġlu;
nuŋulaitchuam nakuaqqutaan nuna siḷivinŋagaa.
6Atanġum inillaktuaŋagai qiḷaich piraksriqsuunmigun,
siqiñiq, tatqiq, uvluġiallu uqallaunmigun.
7Katillaammivḷugich taġiut atautchimun;
tutquqługich taġium itiruaŋich tutquqsivigñun.
8Qiksigisiuŋ Ataniq, nunapayaaguruasii!
Qutchiksiḷiqsiuŋ, iñuuruasii nunapayaurami!
9Uqallagman, nuna savaaguŋaruq;
piraksriimman sunapayaaq niptaŋaruq.
10Atanġum alavriḷḷagai sivunniutikkaluaŋich nunaqpauruat;
Ilaan nutqaqtiłługich sivunniutiŋich.
11Ilaataliaglaan sivunniutai igḷutuutillarut isuitchuamun;
sivuniġiraŋich uummanmiñi isuitchuamun ittut.
12Quviasugli nunaqpak God-iqaqtuaq Ataniġmik;
quviasuglich iñuksraqtaaġikkaŋi inmiñun!
13Ataniq anmun qiñiqtuq qiḷagmiñ
qiñiġaich iñupayaat.
14Atanniqsuivigmiñiñ, anmun qiñiqtuq
iñuggutiqapayaaqtuanun.
15Isummiġuugaich
iḷisimagaiḷḷu supayaaġmata.
16Umialik una akimanġaŋitchuq iñugiagniŋigun aŋuyaktiŋisa;
aŋuyakti akimalaitchuq suaŋŋatiġruiññamigun.
17Tuttuqpaich aŋuyaunnat anniqsuutauŋitchut akimmanmun;
suaŋŋatiŋisa annautiniaŋitkaich.
18Atanġum naipiqtuġai Inmiñik kamaksriruat,
tamatkua nalupqisuutaitchuat isuitchuamun nakuaqqutaanun.
19Ilaan annautisuugai tuqqunmiñ;
iñuurivḷugich pannayugmata.
20Niġiugaqaqtugut Ataniġmun;
Ilaa munaqsrikput suli ikayuqtikput.
21Quviasuutiqaqtitkaatigut Ilaan;
nalupqigiŋitkikput Ilaan salumaruaq atqa.
22Nakuaqqutivittuq isuiḷaam nayuġlisigut, Ataniiq,
niġiukkutikput iliŋnun tutinnaptigu.
Currently Selected:
Psalms 33: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
