Psalms 139
139
Naamaruak God-im Iḷisimmataalu Qaunakkutaalu
Atuqtit aullarriŋannun. Psalm aglaaŋa David-gum.
1Ataniiq, qanuqinmagaaŋagiŋma iḷisimagigmalu.
2Iḷisimasuurutin aquvinnama suli makinnama;
kaŋiqsimagitin isummatigiratka uŋasikkaluaqtuamiñ.
3Tautullagiŋma aniiġaluaqama nalauraaġaluaqamaunnii;
iḷisimalluataġitin suraġausipayaatka.
4Uqallaŋaisilluŋaunnii,
iḷisimaaniguurutin qanuq uqallagniaqtilaamnik.
5Avanŋagigma suŋnamipayaaq;
qaunagigigma suaŋŋatignik.
6Iḷisimmatin uvapkun aliuġnaqtuq;
qaaŋiumavaił̣ł̣uni uvaŋa kaŋiqsiḷaitkiga.
7Sumun aullaġumiñaqpik Ilitqusiġñiñ?
Sumun qimaayumiñaqpik ilvich takkuġniñ?
8Qiḷaŋmukkaluaġuma tavraniittutin;
Nagliksaaġvigmukkaluaġumaunnii, tavraniittutin.
9Tiŋigaluaġuma qavuŋanmun,
naaggaunnii iñuuniaġaluaġuma uŋasigñiqsraŋanni init ualiñaami,
10tavra tavraniunnii argakpich aullatiniaġaanŋa,
taliqpikpich tigummiñiaġaanŋa.
11Uqallakkuma taaqtuamun iriquluŋa
naakkaunnii qaummaġiksuaq unnuatun iḷitqulugu,
12aglaan taaqtuaqunnii taaŋitchuq iliŋni,
suli unnuaq qaummaġiktigisuuruq uvlutun.
Taaqtuaġlu qaummaġisuaġlu atiruk iliŋni.
13Ilvich savaŋagiñ sulliñipayauraġa;
savaaġiŋagigma aakaa illiaŋani.
14Nanġaġniaġikpiñ;
qiksigñaqtuakun aliuġnaqtuakullu savaaguŋaruŋa.
Savaatin aliuġnaqtuagurut, iḷisimalluataġiga taamna.
15Qiñiqtuaŋagigma savaagukama nalunaqtuami;
naunmuktuqama aakaa illiaŋani.
16Irrakpich qiñiŋagaak naanŋaiñŋaan timiga.
Iluqaġmiŋ uvluksrautitka agliusimaŋarut makpiġaaġiraġni,
nalliat unnii aullaqisaaŋaiñŋaan.
17Qanutun piññaġnaqtigivat uvamnun isummatitin, God-auruatiin,
qanutun taimma iñugiaktigivat!
18Kisisaaqsaġaluaġupkich, iñugiałhaaġayaqtut qaviamiñ.
Iqiiqama, tavrasuli itqatigigikpiñ.
19God-auruatiin, tuqutquyumagaluaġitka pigiiḷḷiqirauruat iliŋnun!
Aullaġitchi uvamniñ, iñuaqtuġumasuuruasii!
20Uqaġuurut pigiipiaġataqtuanik sivuniqaqłutiŋ ilikkun;
akiḷḷiqpich uqamaqłuutigisuuġaat ilvich atqiñ.
21Atanġuruatiin, qanutun uumigipiaġataġitka uumikłiqsuat iliŋnik!
Suuŋiḷaġipiaġataġitka paaqłaktuat iliŋnik!
22Uumigigitka uumigipiaġataqługich;
Isummatigigitka uvaŋaptauq akiḷiqsruġivlugich.
23Qanuqitilaaŋŋa, God-auruatiin, iḷitchuġilugulu uummatiga;
uuktuŋŋa, suli iḷitchuġilluataġlugich isumaaġutitka.
24Iḷitchuġisaġiñ pigiitchuaqaġmagaaġma,
aullatiluŋalu allaŋŋulaitchuakun iglauyaakun.
Currently Selected:
Psalms 139: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
