Proverbs 31
31
Siḷġiqsruutit Umialigmun
1Uvva ukua uqaluich Umialguruam Lemuel aakaŋata qaitchaŋich ilaanun:
2“Ilvich iġñiġigikpiñ piqpagnaqtuatiin, kiggutauruatiin aŋaayyutimnun.
Sumik uqallautiniaqpigiñ?
3Suaŋŋatin iluqaan atuġnagu aġnaqtuġutin
naagga iluqaan maniiñ atuġlugu aġnanun; maqutchiŋarut umialignik.
4Naalaġniiñ, Lemuel—
Umialguruat imiqtuksrauŋitchut wine-mik
naagga taaŋŋaqtuġuksiulutik.
5Taaŋŋaġamik piiguġuugaich pitqurat
aasii suli iñuich piiḷḷiuqtuat piiguqługich.
6Taaŋŋaq una imiksrautaat iñuich tuquniugaqtuat,
iñuich qanuqsausiiqsuat.
7Iliŋich taaŋŋaġlich aasii piiguġlugich piiḷḷiuġniqtiglu
quviasuutaiññiqtiglu.
8Uqaqtaugguiñ iñugnun inmignik piyumiñaitchuanun.
Qaunagilugi atunim pigiraksraŋi ikayuġuminaitchuat inmignun.
9Uqaqtaugguiñ iliŋiññun suli iluaqtuakun isivġiiraugguiñ.
Qaunagilugi atunim pigiraksraŋi iliappaiḷḷu piiḷḷiuqtuallu.”
Sunigliqaa Surġallavluni Nuliaguruaq
10Qanutun siġġaġnaqtigiva paqinniaġniq supayaamik suraġallaruamik nuliaksramik!
Ilaa akisułhaaqtuq uyaġagiksuaniñ!
11Uiŋata nalupqigiŋitkaa sullatilaaŋanik,
tavraasii susuksiuyumiñaitchuq.
12Iñuuniqtutilaaŋatun nuliaŋata aŋalatkaa uiñi iluatun
suli anniaŋitkaa.
13Aptatigiraġigai savaaġivlugi kalikuliaksrat.
14Aggisuurrivḷuni niqinik uŋasiksuaniñ,
maniññagniaqtit umiaqpaŋisitun.
15Makittaqtuq uvluŋaiñŋaan unnii
niqiksriuġukługi iḷani
suli aġnat savaktini savaaksraŋiññik uqautisukługi.
16Naliġakługu nuna tauqsiaġiraġigaa,
aasii maniññaktaamiñik nautchiivḷuni siiġñaksranik.
17Savvaqturuq, saŋŋiruq
suli iqaitchuq.
18Iḷisimagai savaaġmi akisutilaaŋat,
suli savagaqtuq unnuamunaglaan.
19Ilimiñik ivaluliuġuuruq kalikuliuqłuniḷu.
20Sigñatisuitkaich piiḷḷiuqtuallu suqaġuksiuruallu.
21Isumaaluyuitchuq qannigman,
qanukkii iḷaŋich niġummaaktuanik annuġaaqaqtut.
22Tuŋiutit qaliġualiuġuugai
suli annuġaaġiguuruq tigluuraaqtaanik ukiłhaagiksuanik.
23Tuvaaqataa iñuich iḷisimagaat,
aullarriñun iḷauvluni.
24Annuġarriuġuuruq tavsiksraniglu,
aasii tunivḷugi tauqsiġñiaqtinun.
25Tuniqturuq suli iñuich qiksigigaat
suli sivuuġagiŋitkaa tikitchaġiaq.
26Uqaġami pił̣ł̣aktautaitchuq
suli isumaturuq.
27Aptaŋaiyuitchuq
suli iḷani qaunagisuugaich suqaqtuksraummata.
28Miqłiqtuŋisa quyyatiktik iḷisimapkaġaat,
suli tuvaaqataata nanġaġuugaa.
29Inna uqallakłuni, “Iñugiaktuat aġnat tuvaaqataulluatausuurut,
aglaan ilvich nakuuniqsraurutin iliŋiññiñ.”
30Pisuqsaaġniq iḷumun inŋitchuq suli qiññaġigñiq piiġuuruq,
aglaan aġnaq qiksiksraqtuaq Ataniġmik nanġaaksrauruq.
31Iḷisimanaqtilli savaapayaaŋisigun.
Qiksigirauruksrauruq iñupayaaniñ.
Currently Selected:
Proverbs 31: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
