Matthew 2
2
Iḷitchiruat Qairut Paaŋŋamiñ
1Jesus aniŋaruq Bethlehem-mi Judea-miittuami, Herod umialgumman. Tavra Iḷitchiruat iñuich paaŋŋamiñ tikiññamiŋ Jerusalem-mun, apiqsriŋarut. 2Sumi imma aniva umialgat Jews? Tautuŋagikput uvluġiaŋa paaniinŋapta, aasiuvva qairugut sitquġvigiyaqtuqługu nanġaġukługu. 3Herod-gum umialgum tusaakamiuŋ taamna, isumaaluliŋaruq iluqaġmiglu iñuŋi Jerusalem. 4Aasii katitiłługich iluqaisa aŋaiyyuliqsiqpaich, iḷisaurriḷḷu pitquranik, apiqsruqtupiaŋagai sumi Christ aniyumaaġmagaan. 5Ilaisa kiuŋagaat, nunaaqqimi Bethlehem-mi Judea-miittuami, qanuq God-im uqaqtaata aglaaġiŋagaa uqalua God-im inna,
6 #
Mic 5.2. “Aasii ilivsi, Bethlehem-miut,
nunaŋani Judea-m,
iñukiññiqsraugaluaqłusi akunġanni
nunaaqqiŋisa Judah-m;
iḷisimanaqsił̣haaġniaqtusi,
qanuq ilivsiññiñ iḷari
qaiñiaqtuq atanauraq
atanniqsimannigniaqtuaq iñumnik.”
7Tavraasii Herod qaitquŋagai iḷitchiruat nalunautchivḷuni apiqsruqtummaġiksaaŋagai nalupqinaimmaġiksisukługu qanuq iḷimman uvluġiaq niptaqtilaaŋanik. 8Aasii ilaan tiliŋagai Bethlehem-mun, uqaqłuni, Aullaġlusi ivapiaġataġiaqsiuŋ miqłiqtuuraq. Aasii paqitanikkuvsiuŋ iḷitchuġipkaġumagivsiŋa, uvaŋaptauq ullakkumagiga sitquġvigiyaqtuġlugu. 9Taavrumiŋa umialgum uqallautianiŋmatiŋ, aullaŋarut. Sua taamna, uvluġiaq tautuaġiŋakkaŋat paaniinnamiŋ aullarrigiŋagaat, nutqaġataqtillugu qulaanun miqłiqtum irviata. 10Tautukamirruŋ uvluġiaq, quviasupiaġataŋarut. 11Aasii isiqłutiŋ iglumun tautuŋagaat miqłiqtuuraq aakaŋalu Mary, aasii sitquqłutiŋ nanġaŋagaat. Tavra aŋmaqługich suġalitiŋ, aitchuŋagaat aitchuutinik, manigñik kaviqsuanik, tivraġiksuaniglu, myrrh-niglu.
12Aasii kiliktauvlutiŋ siññaktukun utiquŋił̣ł̣ugich Herod-mun, utiqsaŋarut nunamiŋnun allakun apqutikun.
Pigruġniŋat Egypt-mun
13Tavra iḷitchiruat aullaaniŋmata, isaġulga Atanġum niptaŋaruq Joseph-mun siññaktukun, aasii uqallautivlugu, Makittin. Pigruutikkik miqłiqtuq aakaŋalu Egypt-mun, aasii taamaniitchumausi uvamnun aullaqutchiaġilusi taamaŋŋa. Qanuq Herod ivaqłiayumalliqsuq miqłiqtumik tuqutchukługu. 14Aasii unnuakun Joseph makinŋaruq pigruutivlugik miqłiqtuġlu aakaŋalu, aasii aullaqłutiŋ Egypt-mun. 15#Ho 11.1.Tavraniinŋarut Herod tuquniŋanunaglaan. Taamna taŋŋiutauŋaruq Atanġum uqalugiŋakkaŋanun ilaan uqaqtimigun, “Egypt-miñ qaitquŋagiga Iġñiġa.”
Miqłiqtut Tuquġaqtaurut
16Tavra Herod, iḷitchuġikami sagluqitilaamiñik iḷitchiruanun, qinnalipiaġataŋaruq. Aasii piraksriiŋaruq tuquġaquvlugich iluqaisa aŋugaurat ukiuqaqtuat malġugnik naagga inuŋallaktuamik Bethlehem-miittuat iluqaaniḷu tamattumani nunami, miksrautchaqługu taimani nalupqinaiyaani iḷitchiruaniñ.
17Tavrani taŋŋiqsauŋaruq Jeremiah-m God-im uqaqtaata uqautigiŋakkaŋa inna,
18 #
Jr 31.15. “Nipit tusaġnaqtut nunaaqqimi Ramah-mi,
qiaqpaktuat isumaaqpakłutiŋ.
Aakauruat isumaaqpaktut
maŋŋuġmiktun Rachel-tun,
qirratigivlugich miqłiqtutiŋ.
Isumaaqpaił̣ł̣utiŋ quviasaaġnaiñŋarut,
qanuq miqłiqtuŋich iluqaġmiŋ tuquŋarut.”
19Tavra Herod tuqumman, isaġulga Atanġum niptaŋaruq siññaktukun Joseph-mun Egypt-mi uqaqłuni, 20Makittin. Aullautikkik miqłiqtuġlu aakaŋalu nunaŋannun Israel. Taipkua tuqutchiyumaruat miqłiqtumik tuquŋarut. 21Tavra ilaa makinŋaruq, aasii aullautivlugik miqłiqtuġlu aakaŋalu nunaŋannun Israel.
22Tavra tusaakamiuŋ Archelaus umialgutilaaŋanik Judea-mi, inaani aapami Herod tuquŋaruam, tavruŋaqsausiiñŋaruq, aasii kiliktauvluni siññaktukun, aullaŋaruq nunaŋiññun Galilee-m. 23#Mk 1.24; Lk 2.39; Jn 1.45.Aasii iñuurraqsiŋaruq iniqpaŋani Nazareth, taamnaptauq uqautigiŋakkaŋat miqłiqtukun uqaqtiŋisa God-im taŋŋiqsauŋaruq inna, “Ilaa tairauniaqtuq Nazareth-miumik.”
Currently Selected:
Matthew 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
