Jonah-m 1
1
Jonah-m Kamagiŋitkaa Ataniq
1 #
2 K 14.25. Uvlut iḷaŋanni Atanġum uqallautigaa Jonah iġñiŋa Amittai-m. 2Uqaqhuni, “Aullaġiñ Ninevah-mun, iniqpagmun, kiliktuġlugich; Iḷisimatilaamnik uvva qanutun pigiiḷḷiqirautilaaŋiññik iñuŋich.” 3Aglaan Jonah, qimaaŋaruq Tarshishmun unitchaqługu Ataniq. Spain-muŋaruq, paqiłłuniasii umiaqpagmik Tarshish-muksaqtuamik. Akiḷiqł̣ugu ikkutiksrani ikuŋaruq, aullaqatigisaqługich Tarshish-mun, qimaummiyumiñaqsivḷuni ATANIĠ-miñ.
4Aglaan Ataniq aullaqtitchiŋaruq suaŋaruamik anuġimik taġiumun, anuġiqłuk suaŋavaił̣ł̣uni anayanniuliŋarut umiaqpaiyaiġniaġniġmun. 5Umiaqpagaqtit iqsiññiulipiaġataŋarut suli ququulavlutiŋ ikayuquvlutiŋ nanmiñiq God-igillaaramignun. Tavraasii anayanniuŋaipayaaqsaqłutiŋ, iginŋagaich usiatiŋ. Tainna pipkaqługich, Jonah atqaŋaruq alliġmun, aasii nallaqhuni siquvluni.
6Qaukłiŋata Umiaqpaum paqitkaa, aasii apiqsruqługu, “Summan immaimña siñiktuaqpich? Makillutin aŋaiyyuiñ God-ignun ikayuqulutin. Iḷaanni nagligiluta annautiviaġaatigut.”
7Umiaqpagaqtit avanmun uqaaqsiñiqsut, “Saaptaġluta, iḷitchuġiyumaugut kiña patchisautilaaŋa anayanniuġniptigni.” Tavraasii tainna piŋarut, aasii Jonah-m atqa amuŋagaat. 8Tavra uqallautigaat, “Ki, aasii, uqallautisigut! Kiña imña patchisauva? Suliqivich imña maani? Kisumiñ nunamiñ qairuatin? Sumiuyaaguvich?”
9“Hebrew-guruŋa,” Jonah-m kiugai. “Qiksiksrautiqaqtuŋa ATANIĠ-mun, God-iŋanun qiḷaum, savaŋaruam nunamiglu taġiumiglu.” 10Jonah-m uqallautiniġai qimaatilaamiñik ATANIĠ-miñ. Tavraasii umiaqpagaqtit iqsiḷipiaġataŋarut, aasii uqallautivlugu, “Uvva iłuaŋipiaġataqtuq tainna piñiqavich!” suli apiġivlugu, “Summan uvva qimaaruatin tainna?”
11Siḷaqłuk suamasisaiññaŋaruq, aasii umiaqpagaqtit apiġigaat, “Qanuq imña piñiaġniqpisigiñ siḷaqłiuŋaiġumaugut?”
12Jonah-m kiugai, “Igitchiñŋa taġiumun, anuġaiġumauq. Iḷisimaruŋa patchisautilaamnik uvva siḷaqłukpaguutimmasi.”
13Aglaan, aŋutit tulautiniatanagutiŋagaat umiaqpak, aŋualgutilaamiktun. Aglaan anuġi iŋattaqsisaiññaqhuni, payyiñŋagaat. 14Tainnamik ququulanagutiŋarut ATANIĠ-mun, “Ataniiq, tatavsaġnasigut tuqqunmik uuma iñuum iñuggutaa pisigilugu! Ilvich, Ataniiq, aŋalatkiñ tamanna; ilvich savaaġigiñ.” 15Tavraasii tiguvlugu Jonah siŋitkaat taġiumun, aasii qaiḷḷiiqsautigillaaŋaruq. 16Umiaqpagaqtit tavrani qiksiksralipiallaŋarut ATANIĠ-mik, aasii qaitchivḷutiŋ aitchuunmik suli unniqsuqłiivḷugu savautiniaġnivḷugu.
17 #
Mt 12.40. Ataniq piraksriimman aŋiruam iqaluum iiñiġaa Jonah, aasii iḷuaniinŋaruq iqaluum piŋasuni uvluni suli piŋasuni unnuani.
Currently Selected:
Jonah-m 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
