Acts 4
4
Peter-lu John-lu Apiqsruqtuġaich Uqaqsitaaġviŋmi
1Tavra Peter-lu John-lu uqaġataviksillugik iñuŋnun aŋaiyyuliqsiqpaich, atanauraŋallu aŋaiyyuvikpaum munaqsriŋisa, Sadducees-lu ullaŋagaich, 2qanuqpaaŋavlutiŋ pisigivlugu iḷisaurriñiŋat iñuŋnik quliaqtuaġivlugu Jesus aŋiñivḷugu tuqqunmiñ, ukpiġnaqsivḷugu iñuich aŋipkaqtauniaġniŋat tuqqunmiñ. 3Tavra tigutaaŋagaich, suli inillakługik tigutaaġviŋmun uvlaakutchiaqsaqługu, unnugruiññaġman. 4Aglaalli tamatkua iñugiaktuat tusaaruat uqaluŋmik ukpiliŋarut, aasii iñugiaktilaavalliat iñuich ukpiliqsuat 5,000.
5Uvlaakumman Jew-guruat atanauraŋiḷḷu, umialiŋnaŋiḷḷu, iḷisaurriḷḷu pitquranik katinŋarut atautchimun Jerusalem-mi, 6kasimaqatigivlugich aŋaiyyuliqsiqpaich qaukłiat Annas, Caiaphas-lu John-lu Alexander-lu, allallu iḷauruat aŋaiyyuliqsiqpaich qaukłiata nanmiñiq iḷaŋiñun. 7Tavra inillaanikamisigik Peter-lu John-lu sivuqqamiŋnun apiġiŋagaich, Qanuqłutiŋ taimña iñuk iłuaqsiŋavitku? Sumik suaŋŋatiqaqpisik? Kia ataniġnaqutaagun taamna piŋavitku? 8Tavra Peter, Ilitqusiġiksuam aŋalałługu kiuŋagai, Atanaurauruasii, iñuŋnun umialiŋnauvlusiḷu, 9uvaguk qanuqitilaaqtaugumnuk uvlupak pisigilugu savaaġiksuaq pirauruaq pisualaitchuamun iñuŋmun qanuġlu iłuaqsirautilaaŋa, 10iḷisimaruksraurusi iluqasi, iluqaġmiglu iñuich Israel-guruat iḷisimaruksraummiut, una iñuk makitaruaq sivuqqavsiññi iłuaqsiraupiaġataŋaruq suaŋŋataagun Jesus Christ Nazareth-mium, ilivsi kikiaktuutiŋakkaqsi aŋarrauramun, aasiiḷi God-im aŋipkakkaŋa tuqqunmiñ. 11#Ps 118.22.Jesus uyaġagruatun ittuq Bible uqautigikkaŋat inna,
“Kaŋiġalluŋmi uyaġagruaq, piitchuiññiqsrapiaq igluqpiñiġmi,
ilivsi igluqpirit iginŋagiksi.”
12Iñuitchuq allamik annaurriksraptiŋnik, qanuq allamik iñuitchuq iluqaani nunami God-im atchiŋakkaŋanik uvagut annaurrigiyumiñakkaptiŋnik.
13Tavra uqaqsitaaqtitchirit iḷitchuġikamiŋ Peter-lu John-lu taluqsraŋisilaaŋaŋnik, suli iḷisaŋaisilaaŋaŋnik iñugruiññauvlutiglu, kamasuliŋarut. Tavra iḷitchuġiŋarut piqatauŋatilaaŋaŋnik Jesus-mun. 14Tavra tautuaġivlugu iñuk iłuaqsirauŋaruaq makitaruaq saniġaaŋni, akiḷḷiḷiqsuutiksraiñŋarut. 15Tavra aqpigiqqaaqługik uqaqsitaaġviŋmiñ uqaqatigiirraqsiŋarut avanmun, 16uqaqłutiŋ, Qanuġniaqpisigik apkuak iññuk? Qanuq-uvva iñupayaat iñuuruat Jerusalem-mi iḷisimagaat suqpauruaq aliuġnaqtuaq savaaŋak taamapkuak, aasii piiḷaaġiyumiñaitkikput. 17Aglaan siamitinŋaiqsaġlugu iñuŋnun tavraŋŋaaglaan kiliglavut sivuuġasaaġlugik uqautigiŋaiqulugu Jesus iñuŋmun kimulliqaa. 18Tavra ququatqiŋagaich, aasii piraksriqł̣ugik suuramikunnii uqaŋaiquvlugik, iḷisaurriŋaiġḷugiglu Jesus-kun.
19Tavra Peter-vlu John-lu kiuŋagaich, Ilivsiññik isivġiqsiuŋ nalliak nalaunŋatilaaŋa God-im takkuani kamaksrigumnuk, ilivsiññik naagga God-mik. 20Qanuq uqautigiŋaiġumiñaitkikput uvagut uvaptiŋnik tautuŋakkaqput, tusaaŋakkaqpullu. 21Tavra uqaqsitaaqtitchirit sivuuġasaavsaaqqaaqługik Peter-lu John-lu aullaqtinŋagaich. Iliŋich iḷitchuġiŋaitchut tatavsautauyumiñaqtuamik iliŋiŋnun, qanuq iñupayaat nanġaŋagaat God taavrumuuna piruakun. 22Taamna iñuk iłuaqsirauruaq aliuġnaqtuakun ukiuqaŋaruq sippiqł̣ugu malġukipiaq.
Ukpiqtuat Aŋaiyyurut Taluqsrautaitchukłutiŋ
23Tavra Peter-lu John-lu anipkaġmatiŋ aullaŋaruk avilaitqanmiŋnun, aasii quliaqtuaqłutiŋ qanuq aŋaiyyuliqsiqpaiḷḷu umialiŋnallu uqautiŋiññik inmiŋnun. 24#Ex 20.11; Ne 9.6; Ps 146.6.Tavra tusaakamirruŋ taamna, iluqaġmiŋ aŋaiyyuqatigiirraqsiŋarut God-mun, uqallakłutiŋ, Sapiġñaqtuaq Ataniq, savaŋaruatiin qiḷaŋmik, nunamiglu, taġiumiglu, suli supayaanik imaġikkaŋiññik, 25#Ps 2.1, 2.ilivich David kivgan maŋŋuqput ilitqusiġiksuakkun uqaqtinŋagiñ uqallaŋman inna,
“Summan Jew-guŋitchuat makivsaallakpat akiḷḷiḷiutivlutiŋ Ataniġmun,
isumavlutiŋ akiḷḷiḷiqsuutitiŋ taŋŋiġñiaġasugalugich pivigiruaguŋitchullu?
26Umialgiḷḷu atanaurallu nunami kasimasuurut atautchimi itqanaiyaqłutiŋ
akiḷḷiḷiqsuġuqługu Ataniq Christ-ŋalu.”
27 #
Lk 23.7-11;
Mt 27.1, 2; Mk 15.1; Lk 23.1; Jn 18.28, 29. Tavra tainnatun iḷumun Herod-lu Pontius Pilate-lu kasimaŋaruk atautchimi uumani iniqpaŋmi, piqatigivlugich Jew-guŋitchuallu Israel-guruallu akiḷḷiḷiqł̣ugu Jesus, Piḷuutaitchuaq kivgan, Christ-guqtinŋaran. 28Katinŋarut atautchimun pisukłutiŋ, nalugaluaŋŋaan ilivich suaŋŋatipkun pisuutipkullu sivunniutigianiŋakkan piyumaaqługu. 29Aasii paŋmapak, Ataniiq, naluruuraaġnagu sivuuġasaaġutaat, aasii taluqsraŋaiġḷuta uvagut ilivich kivgatin uqaġumiñaqsiḷuta ilivich uqaluŋnik. 30Iliviḷḷi Ataniiq, suaŋŋatipkun iłuaqsiḷugich naŋittuat, suli aliuġnaqtuat nalupqinaiyautauruat uqalupta iḷumun itilaaŋannik pipkaġlugich ataniġnaqutaagun piḷuutaitchuam kivgaqpich Jesus. 31Tavra aŋaiyyuaniŋmata ini kasimaviat aulaŋaruq, suli iluqaġmiŋ immiqsauŋarut Ilitqusiġiksuamik suli uqautigiŋagaat uqalua God-im taluqsraŋaiqł̣utiŋ.
Atunim Pigigaich Supayaat
32 #
Ac 2.44, 45. Tavra atautchiiŋŋuqtuat piqatigiiksiłłutiŋ ukpiqtuat atipiaġataŋarut supayaakun. Kiñaliqaa uqallaŋaitchuq sunapayaaq ilaan piñi pimaaqtuġlugu, aglaan piqaŋarut supayaanik atunim. 33Tavra kamanaqtuakun suaŋŋatikun tiliraunikun iḷitchitqurat quliaqtuaġiŋagaat aŋiñiŋa Atanġum Jesus, suli God-im atqunaqługu ikayuŋagai iluqaisa. 34Iñuiñŋaruq piiḷḷiuqtuamik iñuŋmik akunġanni, qanuq iñugiaktilaamiktun nunaqaŋaruat naagga igluqpaqaŋaruat tuniŋagaich, aasii qaġġisivlugich akiŋich tuniamiŋ, 35aasii qaił̣ł̣ugich tiliraunikun iḷitchitquranun, aasii autaaġaġigaich iñullaanun piqaqtuksraġuġaġimmata.
36Tavra Joseph, Levite-guruaq aniŋavluni Cyprus-mi, tiliraunikun iḷitchitqurat atchiŋaraŋat Barnabas-mik (sivuniqaqtuamik qapiŋaisaaqtimik), 37tunisiŋaruq nautchiaqaġviŋmiñik, aasii maniich qaił̣ł̣ugich tiliraunikun iḷitchitquranun.
Currently Selected:
Acts 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
