Acts 3
3
Pisualaitchuaq Iñuk Iłuaqsirauruq
1Tavra Peter-lu John-lu aŋaiyyuvikpaŋmuŋaruk aŋaiyyunaqsimman piŋasunuŋman. 2Tavra tavrani aŋaiyyuvikpaum paaqpaŋani atiqaqtuam Piññaġnaqtuamik iñuk inŋaruq pisualaitchuaq aniñiġmiñiñqaŋa. Uvlutuaġman akigaġayuŋniġaat taavrumuŋa paaqpaŋmun maniŋñik piatchiaqtaquvlugu isiqtuaniñ aŋaiyyuvikpaŋmun. 3Tautukługik Peter-lu John-lu isiqsaqtuak aŋaiyyuvikpaŋmun, apiqsriŋaruq nagliktuusiaksranik. 4Tavra iluqatik takunnaŋagaak, aasii Peter-m uqallautiŋagaa, Qiñiqtiguk. 5Tavra takunnaŋagik niġiukłuni aitchuusiaksramiñik iliŋiŋniñ. 6Tavra Peter-m uqallautiŋagaa, Maniitchuŋa suuramik-unnii, aglaan aitchuġniaġikpiñ pigikkamnik, ataniġnaqutaagun Jesus Christ Nazareth-mium pisuaqugikpiñ. 7Tavra Peter-m tiguŋagaa taliqpiagun, aasii makitiłługu. Tavra tavrauvvaa isigaŋi siŋiġñiŋiḷu suaŋŋasiqsauŋarut. 8Aasii minŋiqłuni makinŋaruq, pisuaqłuniḷu, aasii isiqasiqł̣ugik aŋaiyyuvikpaŋmun, pisuaqłuni minŋiqtaqłuniḷu, suli nanġaqługu God. 9Tavra iñupayaat tautuŋagaat pisuaqługu, nanġaġmagulu God, 10iḷisaġivlugulu taimña aquppisuuruaq nagliktuusiaksrat pisigivlugich Piññaġnaqtuami, Paaqpaŋani aŋaiyyuvikpaum, suli iliŋich kamasupiaġataŋarut iłuaqsiraumman.
Peter Alġaqsruiruq Aŋaiyyuvikpaŋmi
11Iñuk iłuaqsirauruaq tigummipkaqtillugu Peter-miglu John-miglu iñuich iluqaġmiŋ kamasualavlutiŋ aqpamik katinŋarut ilaiññun, taġġisimaaġviŋmi atiqaqtuami Solomon pianik. 12Tavra Peter-m tautukkamigich iñuich, uqallautiŋagai, Iñuich Israel-guruasii, Summan kamasuuttaġivisiuŋ taamna? Summan takunnaqpisigut? Isumavisi uvaguk suaŋŋatiptiŋnun naagga god-tiliqiniptiŋnun una iñuk pisuallasipkaġasugalugu? 13#Ex 3.15.God-tiŋata Abraham Isaac-guvlu Jacob-lu, God-iŋata maŋŋuupta kamanaqsiḷiŋagaa kivgani Jesus. Ilivsi aitchuutigiŋagiksi ataniġnaqutiqaqtuanun, pisuŋił̣ł̣ugulu Pilate takkuani, ilaan tigutaaqtauŋaiqsitchukkaluaġmagu. 14#Mt 27.15-23; Mk 15.6-14; Lk 23.13-23; Jn 19.12-15.Aasii ilivsi piiḷaaġiŋagiksi Jesus Piḷuutaitchuaq, Nalaunŋaruaġlu, aasii apiqsriaġiłhaaqługu Pilate-mun iñuaqti tigutaaqtauŋaiqsitquvlugu. 15Aasii ilivsi iñuktaġivlugu Iñuggutiqaqtitchiruaq. Aglaan God-im aŋipkaŋagaa tuqqunmiñ. Aasii uvagut tautuŋavlugu quliaqtuaġigikput. 16Taamna Jesus taamnauruq ukpiġivlugu ataniġnaqutaa uqautigikkaqput. Ilaan iłuaqsiŋagaa una iñuk iḷisimakkaqsi. Qanuq taamna iñuk ukpiliŋaruq Jesus-mun, aasii ukpiġutaata iłuaqsipkaġaa surruiqł̣ugu, aasii iluqasi tautukkiksi.
17Aasii paŋmapak aniqatiit, iḷisimaruŋa taamna pikkaqsi Jesus-mun, ilivsiḷu umialiŋnasiḷu piŋagiksi naluvlusi. 18God-im, sivuani taamna piŋaiñŋaan, uqautigiŋagaa uqaqtimigun iluqaisigun ilaan Christ-ni nagliksaaqtuksraunivḷugu, aasii ilaan taŋŋiqsinŋagaa tainna. 19Isumalitqigitchi, suli God-mun saallusi, ilaan piiġumagai piḷuutisi, 20aitchuusiaqaġumausi Ataniġmiñ ilitqutchivsi suaŋŋatiksraŋanik, quviasuunmiglu, suli ilaan tiliyumagaa Jesus Annaurriksraqtaani ilivsiññun. 21Taamna Jesus qiḷaŋmiinniaqtuq tikitchiaġilugu supayaat nutaaġuġniksraŋat, God-im uqausiatun sivuani ilaaguaqtauŋaruatigun uqaqtimigun iŋiḷġaan. 22#Dt 18.15, 18.Moses uqallaŋaruq inna, “Ataniq God-iksi tilisiñiaqtuq ilivsiññun, uqaqtimik aniqatiivsiññiñ uvamniktauq tilisiŋammatun. Ilivsi naalaġniraksraġigiksi supayaanik uqallautikpasi. 23#Dt 18.19.Aasii kiñaliqaa naalaġniŋitchuaq taavruma uqaqtaata God-im uqaluŋiñik piiqsauniaqtuq God-im iñuŋiñiñ, aasii suksraunġiqsauluni.” 24Aasiivsauq uqaqtiŋi God-im, taputivlugich Samuel-lu taipkualu iñuuruat aquagun, iluqaġmiŋ uqaluksraqaŋaruat uqautigiŋammigaich makua paŋmapak uvlut. 25#Gn 22.18.God-im unniqsuqłiisiŋi uqaqtimigun ilivsiññun ittut, aasii iḷaŋiutivlusi sivunniuġutiŋiñun God-im maŋŋuuvsiññun, uqallausiġmisun Abraham-mun inna, “Ilivich kiŋunipkun uvaŋa anniqsuġniaġitka iñupayaurat nunami.” 26Tavraasii God piksraŋaruq, aasii tilivḷugu kivgani ilivsiññun, sivulliġivlusi anniqsuġukłusi iluqasi isumalitqiksillusi piḷuktuaniñ piḷġusivsiññiñ.
Currently Selected:
Acts 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
