Acts 2
2
Ilitqusiġiksuaq Qairuq
1 #
Lv 23.15-21; Dt 16.9-11. Tavra uvlua Pentecost-liqivium tikiñman, iluqaġmiŋ ukpiqtuat kasimaŋarut inimi atautchimi. 2Tavraŋŋatchiaq qiḷaŋmiñ qaiŋaruq sukpaluk anuqsraallaviñaqtuatun, aasii immiŋagaa iluqaan igluqpak kasimaviat. 3Tavra tautuŋarut qiññaqaqtuanik uqqatun igniġnik siamittuanik inmiŋnun, aasii iñullaa aksiuŋagaa uqqatun ittuam. 4Aasii iluqaġmiŋ immiqsauŋarut Ilitqusiġiksuamik, aasii uqaaqsivḷutiŋ allanik uqautchiñik naluramiŋnik, Ilitqusiġiksuam suaŋŋasiġmatiŋ uqaġumiñaqsivḷugich.
5Tavra Jerusalem-mi iñuuniaqtuaqaŋaruq Jew-nik, God-iliqiruanik iñuŋnik, qairuanik nunapayauraniñ. 6Tavra tusaakamirruŋ taamna piruaq, iñusalaich katinŋarut atautchimun. Aasii tuavaallaŋarut, qanuq iñullaam tusaaŋagaich ukpiqtuat uqaqtuat ilaisa uqausiḷḷaamiktun. 7Kamasualavlutiŋ aliuqłutiglu uqallaŋarut, Uvvaukua iluqaġmiŋ uqaqtuat Galilee-ġmiugurut. 8Aasii qanuqłutiŋ tusaavisigik uqaqtuat uvagut uqausiḷḷaaptigun? 9Uvagut uvva Parthian-miut Mede-miullu Elamite-miullu iñuŋiḷḷu Mesopotamia-m Judea-vlu Cappadocia-vlu Pontus-lu Asia-vlu, 10Phrygia-miḷḷu Pamphylia-miḷḷu Egypt-miḷḷu nunaŋiñiḷḷu Libya-m qanittuam Cyrene-mun, iḷavullu piruat Rome-miñ, 11iluqaġmiŋ Jew-llu, Jew-guŋitchuallu ukpiliŋaruat Jew-guruatun, iḷavut suli qaiŋaruat Crete-miñ Arabia-miḷḷu. Tamarra iluqaisa tusaagivut uqaqtuat uvagut nanmiñiq uqausivsiktun, uqautigivlugich kamanaqtuat sut God-im piŋaraŋi. 12Tavra iñuich kamasuŋarullu kaŋiqsiḷḷaiŋarullu, apiqsruqtuutivlutiŋ avanmun, Sumik taamna sivuniqaqpa? 13Aglaalli allat kipakłiqł̣utiŋ ukpiqtuanik uqaŋarut, Uvvaukua iñuich imiŋasiñiqsut.
Peter-m Alġaqsruutaa
14Tavra Peter, makitqatauvluni qulit atautchimun tilirauruanun, nipatusivḷuni uqautirraqsiŋagai iñusalaich uqaqłuni, Jew-guqatitkaa, iluqavsiḷu iñuuruasii Jerusalem-mi, naalaġnisiŋa uqallautiksrautimnik. 15Aŋutit ukua imiŋasiŋaitchut tainna isummatigikkasi, qanuq uvva nainukłaaqpaalluktuq uvlaami. 16Aglaan taamna taŋŋiutauruq uqaqtaata God-im Joel uqaluanun inna,
17 #
Jl 2.28-32. “God uqallaŋaruq, Tavra aqulliġñi uvluni inna piñiaqtuŋa.
Kuviñiaġiga Ilitqusiġiksuaġa iñupayaanun.
Igñisiḷu panisiḷu uqaqtiġuġlugich uvamnun,
suli nukatpiasi qiñiqtuuraaqtitauniaqtut pisuutimnik,
suli utuqqanaasi siññaktuqtitaulutiŋ pisuutimnik.
18Aaŋ, uvluni taipkunani siaminniaġiga Ilitqusiġiksuaġa kivgamnun,
aŋutikkaluanun aġnanullu, aasii iliŋisa uqautiginiaġaat pisuutigikkaġa.
19Suli qiñiqtinniaġitka nunamiittuanun tatamaatchagnaqtuat qiḷaŋmi pamani.
Suli aliuġnaqtuat nalupqinaiyautit suaŋŋatiqaqtilaamnun maani nunami.
Auk maqipkaqtauluni, igniġlu, puyuġruaġlu.
20Siqiñiq taaqsiñiaqtuq, suli tatqiq kaviqsiñiaqtuq auktun
sivuani Atanġum isivġiiviksrautaata
qaiñiksraŋan kamanaqtuaq, naluruuraaġnaġumiñaitchuaġlu.
21Aasii kiñaliqaa ikayuqtaiḷiqiruaq Ataniġmun annaurrauniaqtuq.”
22Iñuŋi Israel, tusaasigik ukua uqaluich. Ilivsiññun God-im ukpiġnaqsiḷiŋagaa Jesus Nazareth-miu ilaan piksraqtaaġiŋatilaaŋanik, savakłuni ilaagun kamanaqtuanik, aliuġnaqtuaniglu. Taamna iḷisimagiksi, qanuq tamatkua piŋagai akunnavsiññi. 23#Mt 27.35; Mk 15.24; Lk 23.33; Jn 19.18.God-im ilaan pisuutigivlugu, iḷisimavluniḷu, sivunniutianiŋagaa Jesus aitchuutautquvlugu ilivsiññun. Aasii ilivsi tuqunŋagiksi, piḷuusiqirinun kikiaktuutipkaqługu aŋarrauramun. 24#Mt 28.5, 6; Mk 16.6; Lk 24.5.Aasii God-im aŋipkaŋagaa tuqqunmiñ, pilluktiłługu suaŋŋataaniñ tuqqutim, qanuq tuqqutim tigutaaqtaġiyumiñaiñŋagaa. 25#Ps 16.8-11.David aglaŋaruq Bible-ni sivuniġivlugu Jesus inna,
“Iḷisimaruŋa Atanġum itqatigigaaŋa ataramik.
Ił̣uiḷḷiuġniaŋitchuŋa, qanuq ilaa saniqqamniittuq taliqpiŋma tuŋaani.
26Taamna pisigivlugu quviasukpaktuŋa,
suli uqaluktuŋa nanġautinik ilaanun.
Suli uvaŋa tuquyumaaġaluaqłuŋa nalupqisuŋitchuŋa iñuutqigñiaqtilaamnik.
27Qanuq ilivich God suksraaġniaŋitkiñ ilitqusiġa inaannun tuquŋaruat,
naaggaunnii Piḷuutaitchuat aupkaġniaŋitkiñ.
28Iḷisautiŋagiŋma apqunmik kaŋiḷḷiññaqtuamik iñuggunmun,
aasii nayuqłuŋa quviasuutiqpaqaqtinniaġiŋma.”
29Aniqatiit, uqaqtuksrauruŋa ilivsiññun kaŋiqsiñaqsiḷugu maŋŋuptigun David-kun, ilaa tuquŋaruq, iḷuvġuruġlu, aasii iḷuvvivian nayuġaatigut uvlupaŋmun-aglaan. 30#Ps 132.11; 2 S 7.12, 13.David God-im uqaqtigiŋagaa, suli iḷisimaŋaruq God-im unniqsuqłiisaanik inmiñun. God-im unniqsuqłiiŋagaa David iḷaŋat kiŋuniŋisa umialiguqtinniaġnivḷugu ilaatuttauq. 31David puttuqsripkaqtauŋaruq qanuq piyumaaqtilaaŋanik God-im, aasii uqallausiġiŋagaa aŋiyumaaqtilaaŋa Christ, aasii uqallakłuni inna, “Ilaa suksraaqtauniaŋitchuq nunaŋannun tuquŋaruat. Ilaan timaa auniaŋitchuq.” 32Taamna Jesus God-im aŋipkaŋagaa, aasii taavrumuuna uvagut iluqata ukpiqtuat iḷisimaraurugut. 33Ilaa mayuurrauŋaruq taliqpiata tuŋaanun God-im, aitchuusiaqaqłuni ilaaniñ Ilitqusiġiksuamik, Aapami unniqsuqłiisaatun. Aasii taamna paŋmapak tautukkaqsi tusaakkaqsiḷu ilaan aitchuutaa, kuvikkaŋa uvaptiŋnun. 34#Ps 110.1.David mayuurrauŋaitchuq qiḷaŋmun Christ-tun, aglaan inmiñik uqallaksiññaŋaruq inna,
“Ataniq uqallaŋaruq Atanimnun,
Aquvittin uvuŋa taliqpiŋma tuŋaanun
35uumigiritin uvamnun akiiḷitchiaġilugich.”
36Iluqapayauraġmiŋ Israel-guruat iḷisimaruksraurut nalupqisuŋaiġḷutiŋ, taamna Jesus kikiaktuutiraqsi aŋarrauramun God-im ataniġuqtitkaa, Christ-guqługulu.
37Tavra iñuich tusaakamirruŋ taamna qanuqpisiiḷḷirauŋarut, aasii uqallakłutiŋ Peter-mun iḷitchitquranullu tilirauruanun, Aniqatiit, suniaqpisa? 38Tavra Peter-m uqallautiŋagai, Isumalitqigitchi, paptaiqsaulusiḷu iluqapayauravsi, atqagun Jesus Christ, God-im suliqutigiŋaiġumagai piḷuutisi itqaumayumiñaiġḷugich, aasii aitchuusiaqaġniaqtusi ilaan aitchuutaanik Ilitqusiġiksuamik. 39Qanuq God unniqsuqłiiŋaruq taavrumiŋa ilivsiññun, miqłiqtuvsiññullu, iluqaiññullu uŋasikpakkaluaqtuanun, iñupayaanun Atanġum God-ipta ququaqtaŋiñun inmiñun.
40Peter-m piyumasaapiaŋagai allaniglu uqaluŋnik, siḷġiqsuqługiḷḷu, uqaqłuni, Annaksaġitchi tatavsausiaksrautaanniñ ukua piḷuktuat iñuich. 41Tavra tamatkua ukpiqtuat Peter-m uqaluanik paptaiqsauŋarut, aasii iḷḷatiruat taavrumani uvlumi 3,000 iñuich. 42Aasii taapkua iñuich atuŋagaat piviksraqtiŋ iḷisaqłutiŋ tiliraunikun iḷitchitqurauruaniñ, piqatauvlutiŋ kasimammata, niġimmatalu Atanġum nullautchiġviani, aŋaiyyummatalu.
Ukpiqtuat Iñuuniaġusiat
43Tavra iḷitchitqurat piŋarut iñugiaktuanik aliuġnaqtuanik nalupqinaiyautinik God-mun tiliŋatilaamiŋnik. Aasii iñupayaat qiksiksrautiqaŋarut. 44#Ac 4.32-35.Suli iluqaġmiŋ ukpiliqsuat atautchimiinŋarut, supayaatiŋ pigivlugich atunim. 45Suli tuniuqqaŋagaich nunatiŋ suġauttatiglu, aasii autaaqługich iluqaiññun ukpiqtuanun, kiñapayaaq piqaqtuksraġuġaġimman. 46Suli uvlumiñ uvlumun aŋaiyyuliaqtaqatigiikł̣utiŋ aŋaiyyuvikpaŋmun, suli niġiqatigiikł̣utiŋ atautchimi aimaaġviḷḷaamiŋni, niġivḷutiŋ quyyatiqaqłutiŋ, killuqsrautaił̣ł̣utiglu, 47nanġaqługu God suli iviġaumakkutiqaqłutiŋ iñupayaallu. Aasiiñ Atanġum uvlutuaġman iñugiaksiḷaaġaġigai iḷḷativlugich tamatkua annaurrausaqtuat.
Currently Selected:
Acts 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
