2 Thessalonians 3
3
Aŋaiyyutisigut
1Tavraliasii, aniqatiit, aŋaiyyutiraġutigut. Aŋaiyyulusi Atanġum uqalua qilamik siamitqulugu, suli iñuich annaurrautqulugich akuqtuġlugu uqaluk, ilivsisuttauq. 2Aŋaiyyutilutalusuli, uvagut annausimatquluta tamatkunaŋŋa sagluturuaniñ pigiitchuaniḷḷu iñuŋniñ, qanuq iñuich iḷaŋich ukpiġutaitchut. 3Ataniq ukpiġnapiaqtuq. Ilaan suaŋŋasiġñiaġaasi suli qaunagilusi pigiitchuamiñ. 4Suli Atanġum nalupqisuŋisitkaatigut ilivsi kamaksriñivḷusi kamaksrisuŋaiññaġniaġnivḷusiḷu kamagilugich uvagut pitqutivut ilivsiññun. 5Atanġuptuq iḷitchuġisaiññaqtillisi kiikaa God-im piviuttaqqutaanik, Christ-lu manimmiḷgutaanik.
Savaktuksraupiaqtugut
6Aniqatiit, paŋmapak piraksriġivsi ataniġnaqutaagun Atanipta Jesus Christ, niguaqtuqsiuŋ iñuk kiñaliqaa ukpiqtuaguvluni ataramik iḷatchiqsuaq, kamagigaluaġnagu iḷisaurrutikput ilivsiññun. 7Ilivsi ilivsiññi iḷisimarusi tuvrautiruksrautilaavsiññik uvaptiŋnun. Iḷatchiqsuaguŋaitchugut nayuutikapta ilivsiññun. 8Niġiugaqsiññaŋiñmiugut kialiqaa niqautaanik akiḷiġaluaġnagu, aglaan siġġaqivluta savaŋarugut unnuami uvlumiḷu naŋniutausuŋił̣ł̣uta nallipayaavsiññun. 9Killuliqinayaiñmiugut pamatitkupta ilivsiññun, aglaan tainna piŋaitchugut. Tuvraaksriqsaŋagivsi pamaġivluta uvaptiŋnik, qanuġli ilivsi atausiullaalusi akiññagniaqtuksrautilaavsiññik iñuuniḷuutiksravsiññik. 10Nayuŋŋavsiunnii uvagut piraksriŋagivsi inna, Iñuk kiñaliqaa savagulaitchuaq, niġiŋaiḷḷi. 11Uvagut tusaaŋarugut iḷasi iñuunivḷugich iḷatchiqsuaqsiññaqłutiŋ, iḷaksiayugaqsiññaqługich allat iñuich, suuramikunnii savaŋniaġnatiŋ. 12Tavra iluqata atausiŋŋuqatauŋakapta Ataniġmun Jesus Christ-mun, piraksriġivut siḷġiqsuqługiḷḷu iḷatchiqsiññaqtuat iñuich iḷaksianniŋaiġḷutiŋ savaksiññaquvlugich, akiññagniḷuglutiŋ iñuuniutiksramiŋnik. 13Aniqatiit, piḷaiġutinagu iluaqtualiqiniq. 14Kiñaliqaa kamaksrisuŋitpan uqaluptiŋnik ukunani tuyuutini, nalunaiġumagiksi taamna iñuk, iḷaksianagu sumikunnii, kanŋutchakkumauq. 15Iḷiuġnagu uumigiritun, aglaan siḷġiqsuġlugu aniqatiginiqavsiuŋ.
Uqallaguiqsaaġutit
16Paŋmapaktuq Atanġum tutqiutiqaqtitchiruam ilaata tainnatuttauq tutqiutiqaqtillisi ataramik qanusipayaami. Atanġum itqatigilisi iluqasi. 17Uvaŋa Paul aglakkitka ukua paġlatit uvamnik. Tavra tainna nalunaiñŋutaŋat uvaŋa tuyuutipayaaġma, tainnaittuq aglausiġa. 18Nagliktuutiqpaŋatatuq Atanipta Jesus Christ itqatigilisi iluqasi.
Currently Selected:
2 Thessalonians 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
