2 Thessalonians 2
2
Iñuk Piḷupiaġataqtuaq
1 #
1 Th 4.15-17. Paŋmapak tuyuġivsi aglaŋnik sivuniġivlugu qaiñiksraŋa Atanipta Jesus Christ, uvagullu katinniksraptigun paaqsaġlugu ilaa. 2Aniqatiit, nalupqitchaquŋipiaġivsi naagga iłuiḷḷiuġutiginagu isummiġḷusi Atanġum isivġiiviksrautaa isagutisaaniŋniḷugu. Taamna tuniqsimaŋaiġutiginagu kiñaliqaa uqaġaluaqpan uqaluksriusiaqaġniḷuni Ilitqusiġiksuamiñ, naagga uvaptiŋniñ uqaluksriusiaqaġniḷuni, naagga tuyuutitigun aglaaġipkaqtitaġlugich uvaptiŋnun, Atanġum isivġiiviksrautaa isagutianiŋniḷugu. 3Kimulliqaa qanupayaaq sagluqipkaġnasi. Sivuani isivġiġviksrautim kamanapiaqtuaq paaqsaaŋŋan God-mun iḷiñiaqtuq, aasii taavrumaŋŋa iñukpalliġḷuni iñuk piḷupiaġataqtuaq, iñuk nalupqinaitchuamik isuitchuamun suksraunġiqsauniaqtuaq. 4#Dn 11.36; Ez 28.2.Taamna iñuk akiḷḷiḷiqsuiñiaqtuq qanusipayauramik god-mik, naagga supayaamik iñuich aŋaiyyuvigikkaŋannik, inmiñun kamanałhaaqtualiuġluni tamatkunaŋŋa. Inmiñik unnii kamanałhaaqtualiñiaqtuq God-miñ, aquppiḷuniḷu God-im aŋaiyyuvikpaŋani, uqavigaaġutigiluni inmiñik God-auniḷuni. 5Nalupqigiŋitkiga itqaumatilaaqsi taavrumuuna uqautimnik ilivsiññun nayuŋŋavsi. 6Aasii itqaġumiñaqtusi sumun pitchaiḷiraqtilaaŋanik paŋmapak salapqiġñiksraŋa sivuani salapqiġviksrautaata. 7Qanuq uvva qiñiġnaitchuaq suaŋŋataa pigiitchuam savaksaaniŋagaluaqtillugu, taamna paŋmapak pitchaiḷiraġniktuaq piñaiḷutchiqsuiñiaqtuq suli piiqsauniġmiñunaglaan. 8#Is 11.4.Taamna piñaiḷutchiqsuiruaq piiqpan, tavrani satqummiġñiaqtuq iñuk piḷupiaġataqtuaq. Aasii taamna iñuk Atanġum Jesus tuqunniaġaa aniġniġmiñik, suksraunġiġḷugu qaumaniġmiñik qaigumi. 9#Mt 24.24.Taamna piḷupiaġataqtuaq iñuk qaiñiaqtuq suaŋŋatiqaġluni Satan suaŋŋataanik, nalupqinaiyaġlugu suaŋŋatiqaqtilaani aliuġnaqtualiqiluni sagluqqutinik iñuŋnun. 10Ilaan pigiitchuakun sagluqiniaġai tamatkiġḷugich suksrauyumaaqtuat, qanuq iliŋisa piviuttaġiŋaitkaat iḷumun ittuaq annautiksraġaluaqtiŋ. 11Aasii ukpiġisuŋiñmarruŋ iḷumun ittuaq, God-im sagluqiraupkaġniaġai, taimmaasii iliŋisa ukpiġilipiallaglugu iḷumun inŋitchuaq. 12Aasii taamna pisigilugu iliŋich suksraunġiqsauniaqtut, iluqaġmiŋ tamatkua ukpiqsraŋitchuat iḷumun ittuamik God-ikun, aglaan iñuuruat aliitkutigivlugu piḷuun.
Piksraqtaagurusi Annaquvlusi
13Aglaalli uvagut ataramik quyyatiqaqtuksraupiaqtugut God-mun quyyatigilusi, aniqatiit Atanġum piviuttaġikkaŋasi, qanuq taimaŋŋaqaŋa God-im piksraqtaaġiŋagaasi annaurrautquvlusi, ilaaguaqłusi inmiñun Ilitqusiġiksuakun, ukpiġiliqavsiuŋ iḷumun ittuaq. 14God-im ququaŋagaasi annaurrautquvlusi tusaayugaaġiksuakun alġaqsruutigikkaptigun, ilivsi piqatautquvlusi kamanaqtuami qaumanġani Atanipta Jesus Christ. 15Taamna pisigilugu, aniqatiit, asiñuurraunasi. Tuniqsimavigisigik ukpiġilugich iḷisaurrutivut ilivsiññun nayuŋŋavsi, ami tuyuutivullu. 16Paŋmapaktuq qapiŋaisaaġusiaqaġitchi Ataniptiŋniñ Jesus Christ-miñ God-miḷḷu aapaptiŋniñ, piviuttaqsriŋaruaŋniñ uvaptiŋnik tilivḷugu Iġñini annautitquvluta, qapiŋaisaaqtuaqtiptiŋniñ ataramik, suli piyummatiqaqtitchiruaŋniñ quvianaqtuamik iliŋikta nagliktuutiqpaŋmikkun. 17Iliŋiktatuq qapiŋaisaaġlisi uummativsiññi, suli ikayuġlusiḷu iluqaiññi savaavsiññi uqaluvsiññiḷu nakuurualiqipkaġlusi.
Currently Selected:
2 Thessalonians 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
