1 Samuel 1
1
Elkanah-lu Iḷaniḷu Shiloh-miinmata
1Aŋun iñuumaruq atiqaqtuaq Elkanah-mik, maŋŋuqaqtuaq Ephraim-mik, iñuuniaqtuaq Ramah-mi qimiġaŋiññi Ephraim-gum. Iġñiġimagaa Jeroham-gum suli tutaalugivlugu Elihu-m, nanmiñiq iḷauvluni Tohu-tkunnun, iḷauruanun iñuŋiññun Zuph-kut. 2Elkanah malġugnik nuliaqaqsimaruq, Hannah-miglu Peninnah-miglu. Peninnah miqłiqtuqaġniqsuq aglaan Hannah miqłiqtuitchuq. 3Ukiutuaġman Elkanah Ramah-muguumaruq aŋaiyyuyyaqłuni suli aitchuiyyaqłuni ikipkautinik Ataniġmun Sapiġñaqtuaq Shiloh-mi, Hophni-ḷu Phinehas-lu, iġñiŋik Eli-m, tavrani aŋaiyyuliqsiqpaumaruk Ataniġmun. 4Elkanah ikipkaivḷuni aitchuituaġami, autaaqasiġuumagaa niqipiamik Peninnah suli tainnaptauq aitchuqługich iluqaisa miqłiqtuŋi. 5Hannah aitchuġuumagaa malġuułługu aitchuutini qanukkii nakuaġiłhaaqługu, Atanġum miqłiqsipkaŋaisimagaa. 6Peninnah-m, akiḷḷiata, nagliksaaqtitchuumagaa anmuqsruqługu, pisigivlugu Ataniġmun miqłiqsipkaŋaiññiŋa. 7Ukiutuaġman tavra tainnasuŋaiññaq, igluanutuaġamik Atanġum, Peninnah-m iluiḷḷiuqtitpaił̣ł̣ugu Hannah qiaraqtuq suli niġisunġiqhuni. 8Uiŋata Elkanah-m apiqsruġuugaa, “Hannah, summan qiavich? Summan niġisuŋitpich? Summan ipiqtususuŋaiññaġuuvich? Uvaŋa nuimałhaaŋitpik iliŋni quliniñ iġñiġuruaniñ?”
Hannah-lu Eli-ḷu
9-10Atautchimi imma, niġianikkamik igluani Atanġum Shiloh-mi, Hannah makittuq. Iłuiḷḷiuqpakłuni qirruktuq aŋaiyyullaġmi Ataniġmun. Aŋaiyyuliqsiqpak Eli aquppimaruq inikaamiñi upkuam saniġaani. 11#Nu 6.5.Hannah uummanmiñiñ unniqsuqłiiruq: “Ataniiq Suaŋaruatiin, qiñiŋŋa, uvaŋa kivgan! Qiñiġuŋ iłuirrutiga aasii itqaumasaġiŋma! Piiguġnaŋa! Iġñiksritkumŋa, unniqsuqłiiruŋa iliŋnun qaiññiaġiga pigitqulugu iñuuniqtutilaaŋani suli nusani kivraqtilġataġniaŋitkai.”
12Hannah aŋaiyyusugruŋaruq Ataniġmun, aasii Eli-m qiñiġniġaa qaqłuŋa. 13Aŋaiyyuruq nipaiḷaqłuni; qaqłuŋa aulagaluaqtuq, aglaan nipanŋitchuq. Tavraasii Eli-m imiŋanasugimagaa, 14aasii uqallautivlugu, “Imiŋalutin tainna qiñiqtinŋaiġiñ! Taaŋŋaŋaiġiñ qaurisiññaġiñ!”
15“Naumi, imiŋaŋitchuŋa, aŋutii,” ilaan kiugaa. “Taaŋŋaŋaitchuŋa! Iluiḷḷiuqtuŋauvva, aasiuvva aŋaiyyuuqtuŋa, qaił̣ł̣ugich iluiḷḷiuġutitka Ataniġmun. 16Isummatiginaŋa piuŋiḷauniḷuŋa. Tainna tavra aŋaiyyuuqtuŋa qanukkii nagliksaaqtuŋa.”
17“Aullaġiñ tutqigutin,” Eli uqallaktuq, “aasii God-iŋata Israel qaiḷḷiuŋ apiqsrisigiran ilaaniñ.”
18“Iviġaumagisuŋaiññaquyumaruŋa iliŋnun,” Hannah-m kiugaa. Aullaŋaruq aasii niġivḷuni suli ipiqtusuŋaiqł̣uni.
Samuel-gum Aniñiŋalu Ilaaguaqtauniŋalu
19Uvlaakumman Elkanah-lu iḷaniḷu makittut uvlaatchaurami, aasii aŋaiyyuvigiqqaaqługu Ataniq, aiŋarut Ramah-mun. Elkanah-m tuttaaqasiŋagaa nuliani Hannah, aasii Atanġum kiuŋagaa Hannah-m aŋaiyyutaa. 20Tavraasii siŋaiyauŋaruq aasii iġñivḷuni aŋutaiyaamik. Atchiŋagaa Samuel-mik#1.20 Samuel tairuni innaitkavsakhuni “apiqsriaġiŋaraġa God-miñ” Hebrew-t uqaluŋani. innaqłuni, “Apiqsriaġiŋaraġa Ataniġmiñ.”
21Tikiḷgitchuq piviksraq Elkanah-lu iḷaniḷu Shiloh-mugutik aitchuiyyaġviksraŋat Ataniġmun ukiutuaġman pisuuraqtik suli ilaaguaqtauŋaruaq taamna aitchuutiksraq unniqsuqłiisigiŋarani. 22Aglaan tavrani Hannah aullaŋaitchuq. Uiñi uqallautivlugu inna, “Miqłiqtuuraq una miluŋaipqaqpan, igluanuutiniaġiga Atanġum, tavraniinniaqtuq iñuuniqtutilaamisun.”
23Elkanah-m kiugaa, “Kiami, iluaġnasugiraqtun piiñ; aimmiiñ milullaiġataqtillugu. Aasii Atanġum unniqsuqłiisin taŋŋiġḷiuŋ.” Tavraasii Hannah aimmiŋaruq miqłiqtuurani milullaiġataqtillugu.
24Miluŋaiqsinnamiuŋ Shiloh-muutiŋagaa, kaluqłuni pamiqsaamik ukiuqaqtigiruamik piŋasutun aŋusallumik, palauvagmik bushel-tun aktigiruamik, suli qisigmiñ puuliaq imaligaaq wine-mik. Aullautiŋagaa Samuel, mikigaluaŋŋaan igluanun Atanġum Shiloh-mi. 25Tuqutanikkamirruŋ aŋusalluq pamiqsaaq, miqłiqtuq Eli-muutiŋagaat. 26Hannah-m uqallautigaa, “Aŋuun, itqaumaviŋa? Uvaŋauvva aġnaq iḷumun uqaqtuŋa iñuuñikkun uvani tautuŋaraġma makitavluŋa aŋaiyyuruaŋa Ataniġmun. 27Apiqsruŋaraġa uumiŋa miqłiqtuqaġukłuŋa aasii kiuŋagaaŋa. 28Tavraasii qaiññiaġiga Ataniġmun. Iñuuniqtutilaaŋatun Atanġum piginiaġaa.”
Tavra nanġaqługu aŋaiyyuvigiŋagaat Ataniq tavrani.
Currently Selected:
1 Samuel 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
