Kabavelamu 40
40
Iosepa kenokisakisa kailuqa igiavemaqetadi
1We tamo kaiata oine kanatokalaqeivo kaditogumeta wete beledi kanatokanigabuvo kaditogumeta tamo kapoina ivalabubuni Pelo waineye. 2We Pelo kanakapoka ioqala natolituqavo kadikailuqa bwaigidi waidie 3beqa Pelo iyatodi ivepilisina delinina waineye Iosepa imiamia. 4We delinina kanatogumeta Iosepa ivoneni iekisabodebodedi. Kadikailuqa imiamia deli waineye tutuya kaniakwanina.
5Tamo lovana waineye kadikailuqa ikenomataiva ikenokisakisa. Ikenokisakisa we kadikenokisakisa kailuqa kadinuakawananaqai sulidi.
6Kawakawaie Iosepa inaqo waidie ikisedi nuadi ikapo. 7Beqa ivelautoliedi ivo, “Uvale maiqimi kadikisa mesaida nuakapo kasiotoqa?”
8We ibaivila ivo, “Lovane kamakailuqa kakenokisakisa, we no ge tamo aitoi inagiavemaqetadi kamakenokisakisavo kadinuakawananaqai.”
Matautauda Iosepa ivo, “Kaia Yaubada kaisena kanasala inakaivaiseda kadakenokisakisa taigiavemaqetadi. Kamikenokisakisanidiavo kwavonegu.”
9Beqa oine kanatokalaqei kanakenokisakisa Iosepa ivoneni ivo, “Kagukenokisakisa waineye akiseni oine bulavina matague, 10we oine bulavina dimana laqalaqadi kaitonu. We tutuyanina lugudi iyatodi vedimadimanaeqa idia we waidie vuadi iyatodi ibwabwaku. 11We Yau Pelo kanavedi akakavikavini, beqa vuadi agadidi we abibidi bwasidi iobu Pelo kanavedi waineye, matautauda kanavedi dimaneye ayatoi.”
12Matautauda Iosepa ivesipupu waineye ivo, “Kamukenokisakisa kanagiavemaqeta dede mesaida: Dima kaitonu kananuakawananaqai kaiata kaitonu. 13Kaiata kaitonu inakakava waineye Pelo inakewaluguaqetemu deli waineye'eqa we inayatomu mukabatovoi waineye kulitulituqa, we komu Pelo kanavedi dimaneye kiyatoi kaia base mesaida kuvavalabubunedi tutuyanina komu oine kanatokalaqeivo kaditogumeta. 14We Yau nuamu ge inavulu tutuyanina kabamiana giamaina waineye kimiamia, we kanasala Pelo kivoneni paipaigu kikaivaisegu deli waineye aisauyegu. 15Paina tomo'otoqa ivainaqogu Isileli pwayapwayana waineye'eqa ikewagu imaiegu. Yau ge tamo kapoina adavalabubuni dede waineye, we deli naqeneye iyatogu.”
16Tutuyanina tokanigabu inoqai kenokisakisa gumegumetana kanagiavemaqeta giamaiotoqina ivoneni ivo, “Yau wete akenokisakisa. Kagukenokisakisanina dede mesaida: Yau beledi meginaedi kaitonu aqabaqabadi kunukunugue. 17We ginae waidie kanikani giamaidi gabugabunidi sulidi sulidi Pelo paipaina, we manuqa imai ginae tabwaotoqineye kunukunugue ikanikanidi.”
18Iosepa ibaivila ivo, “Kamukenokisakisa kanagiavemaqeta dede mesaida: Ginae kaitonu kananuakawananaqai kaiata kaitonu. 19Kaiata kaitonu inakakava Pelo inakewaluguaqetemu natolauqaviavo inavonedi kunukunumu inagusuya, we welavi waineye vovomu inalautauleni. We manuqa inamai vaiqomu inakania.”
20Kaiata kaitonu ikakava Pelo nakaiata tubuqa. Beqa kani bwaigina ivalabubuni natolituqavo bwaigidi paipaidi. We no waineye Pelo natolauqaviavo ivonedi oine kanatokalaqei wete tokanigabu ikewaluguaqetedi. 21We oine kanatokalaqei iyatoi nakabalituqa waineye. 22Matautauda natolauqaviavo ivonedi tokanigabu kunukununa inagusuya we vovona inalautauleni welavi waineye. Iosepa kadikenokisakisa igiavemaqetadi kaia mesaida isauyedi.
23We oine kanatokalaqei Iosepa ge idanuani paipaina idavesipupu Pelo waineye, nuana ivulu beqa Iosepa giladi deli waineye imiamiana.
Currently Selected:
Kabavelamu 40: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
