Kabavelamu 41

Pelo ikenokisakisa

1Diqaba kailuqa ikakava, mulineye Pelo ikenokisakisa. Kanakenokisakisa waineye dede mesaida, nigo itovotovoi Bwasi Naili doleneye. 2Tutuyanina waineye bulumakau 7 kadikisa giamaidi wete tubutubuqidi bwasie'eqa ilagaqeta, libinidiavo bwasi doleneye igugudayabuyabu. 3Matautauda Nailieqa bulumakau 7 kadikisa kapoidi wete lumalumadi ilagama mulidie'eqa we itovoi tupwaidiavo bulumakau viladie bwasi doleneye. 4We bulumakau kadikisa kapoidi wete lumalumadi bulumakau 7 kadikisa giamaidi wete tubutubuqidi ikanidi. Matautauda Pelo itovoi.

5We Pelo ikeno-vaituqana wete ikenokisakisa. Kanakenokisakisa kanaveluqa waineye dede mesaida, no witi walo 7 talobwa tamoqana waineye itabwa ilaga vuadi tubutubuqidi wete giamaidi. 6Matautauda wete witi walo 7 itabwa ilaga mulidie, vuadi imwatu yaqina bolimanaeqa (isiti) imai gunabeida igauvekokolidi. 7Witi walo 7 bidodi itovoi witi walo 7 giamaidi wete tubutubuqidi itononidi. Matautauda Pelo kenoeqa itovoi iyagovi ikenokisakisa.

8We kawakawaie Pelo nuana ikapo kenokisakisanidiavo paipaidi. Beqa vona ivetuneni me Itipita kenokisakisa kanatogiavemaqetavo matatabudi wete gumanidiavo nuanuauyadi matatabudi inamai waineye. We Pelo kanakenokisakisa ivesipupuyedi waidie. Kailuqa kenokisakisanidiavo kadinuakawananaqai ge tamo aitoi idagiavemaqetadi waineye.

9Matautauda oine kanatokalaqei Pelo waineye ivesipupu ivo, “Kasiotoqa guvalabubuna kapoidi anuanidi. 10We base tutuyanina kamukapoka ioqala yau waigue wete tokanigabu waineye, kuyatoma deli naqeneye. 11We tamo lovana waineye kamakailuqa kakenokisakisa, we kenokisakisanidiavo kadinuakawananaqai sulidi. 12We Isileli tomoqo tubuauna taiauda, gumanina deli kanatogumeta natolituqa. Tolituqanina waineye kamakenokisakisa kavoneni kadinuakawananaqai igiavemaqetadi waimeye. 13Kaia mesaida ivesipupuyedi isauyedi. Komu kuyato-vaituqanigu gukabalituqa waineye, matautauda mutolauqaviavo kuvonedi tokanigabu kodona igusuya vovona ilautauleni welavi tabwaneye.”

14Matautauda Pelo vona ivetuneni wayaqina Iosepa inamai waineye, we vedimadimanaeqa deli waineye'eqa ikewaluguaqeteni. Mulineye kanakumi italadaba wete kanakaleko kaivaudi isilagaidi, matautauda imaseagai imaieni Pelo waineye.

15We Pelo Iosepa waineye ivesipupu ivo, “Lovane akenokisakisa, we ge tamo aitoi kanasala kenokisakisanina kananuakawananaqai inagiavemaqetai waigue. We tomo'otoqa ivo kago komu kenokisakisa kinoqaidi komu kamusala kadinuakawananaqai kigiavemaqetadi.”

16Iosepa ibaivila ivo, “Yau ge kagusala, we Yaubada Pelo nabaivila giamaina inaveleni.”

25-32Matautauda Iosepa vekimatanaeqa ivesipupu Pelo waineye ivo, “O Pelo, kenokisakisanidiavo kailuqa kadinuakawananaqai tamoqana. We Yaubada gunabeida nanuanua mesaida beqa kenokisakisaeqa ivevemu vakai saiqanaqa inasauyeni. We ge kanasala nanuanuana inasivilai, beqa no lamunina kenokisakisa kailuqa ivevemu.

“We vakai inasauyeni kaia mesaida avonemu. Bulumakau 7 tubutubuqidi wete witi giamaidi walo 7 kadinuakawananaqai diqaba 7 imaimai tavi bwaigina Itipita pwayapwaya kanamatatabu waineye.

“Bulumakau lumalumadi 7 wete witi bidodi 7 kadinuakawananaqai diqaba 7 lase bwaigina. Mulineye diqabanina 7 waidie tavi bwaigina, diqaba 7 inamai lase bwaigina no waineye. Dede lase kapoiotoqina beqa tomo'otoqa Itipita naqeneye tavi bwaigina kanatutuya nuadi inavulu. Lasenina tanoqa inavekakavadi.

33“Beqa komu tomoqo nuanuauyana wete nanuanua kawananaqaina kivesinueni kiyatoi Itipita kanamatatabu inaloineni. 34Beqa komu tupwaidiavo guyau kivesinuedi kiyatodi pwayapwaya kanatovekisabodaboda. Tutuyanina 7 diqaba tavi bwaigina Itipita naqeneye gumanidiavo kanikani matatabudi inakaigwagwa bou dimanina—bou pulina tomo'otoqa paipaidi we bou tamoqana yatobala paipaina. 35We dede guyaunidiavo kanikani matatabudi inagwagwadi tutuya tavi bwaigina waineye. We komu muloinaeqa kanikani inakaigwagwa inaveboudi taoni tamoqana tamoqana waidie wete inamimiagamatadi. 36Dede kanikaninidiavo yatobala inakenokeno tomo'otoqa paipaidi tutuyanina diqaba 7 lase inasauyeni Itipita naqeneye. Beqa me Itipita ge kanasala inalase wete inawapa.”

Iosepa Itipita kanatogumeta bwaigina

37Beqa Pelo wete natolituqavo bwaigidi nuanuananina ikawagiagiamaieni. 38We Pelo ivesipupu waidie ivo, “Mwaqitanaotoqa Yaubada Vaitabuna dede tomoqo Iosepa waineye, kida ge kadasala tomoqo tamo menanuauya dede mesaida taibabaneni.”

39Matautauda Iosepa waineye ivesipupu ivo, “Yaubada dede sakunidiavo ivevemu, we ge tamo aitoi nanuauya wete nanuakawananaqai komu mesaida. 40#Aposi 7:10Komu gukabaloina kiloineni wete gutomo'otoqavo matatabudi muvona inanoqai inavekimatanemu. Kaia yau kaguwavaqa bwaigina matautauda komu, paina yau Pelo.”

41Matautauda Pelo Iosepa ivoneni ivo, “Giamaina, komu ayatomu kivetoloina Itipita matatabuna naqeneye.” 42We taunina kanadimakwasila dimaneye isitakia Iosepa dimaneye iyatoi. Wete kaleko kanatutula bwaigina beqa ivekalekoi, we kodokodo goula kodoneye iyatoi.

45-46Matautauda Pelo Iosepa kanawavaqa iqoleni Itipita kadiwavaqaeqa Apenati-panei. Wete tamo vavine iveleni mwanena kadiwavaqa Asenati gumanidi Patipela natuna, no gumanina tovelomu Oni#41:45-46 Oni tamo taoni kanawavaqa tamo Eliopolisi. No waineye tomo'otoqa isobwasobwanu valavala waineye. waineye. Beqa Iosepa Itipita kanatoloina.

Tutuyanina Pelo Iosepa iyatoi ivetoloina kanadiqaba 30. Matautauda Iosepa Pelo ikiaweni isauyeni inaqo Itipita pwayapwaya kanamatatabu waineye. 47Tutuyanina diqaba 7 giamaidi me Itipita dibagula waineye kanikani bwaigina itavia. 48No diqabanidiavo 7 naqedie, Iosepa tomo'otoqa ivonedi kanikani yatobala paipaina inakaigwagwa Itipita pwayapwaya naqeneye, we taoni naqeneye inayatodi. Vanuqa balasi tamoqana tamoqana kanikani yatobala paipaina iyatodi waidie, tanoqanidiavo vividie waidie igwagwadi. 49We witi vuadi kadibou iboulagai ilaga-otoqa mesaida magama kwadeweye kadibou beqa Iosepa ge kanasala inawawadi.

53We diqaba 7 giamaidi Itipita naqeneye ikakava. 54#Aposi 7:11Matautauda diqaba 7 lase ivelamu kaia mesaida Iosepa ivesipupuyediqa. We lase isauyeni kabaloina bwaigidi tamoqana tamoqana waidie, we vikai tamoqana tamoqana Itipita pwayapwayana naqeneye kanikani ikenokeno. 55Kaiatanina me Itipita ilase bwaigina, Pelo ivelaukuieni kanikani inaveledi. Matautauda Pelo ivesipupu waidie ivo, “Kwanaqo Iosepa waineye. Vakai inavonemi kwavalabubuni.”

56We lase vikai tamoqana tamoqana waidie, we Itipita pwayapwayana naqeneye bwaigiotoqina beqa Iosepa kanikani kananala iyavuya Itipita tomo'otoqa waidie ivegimwaneyedi. 57We dede mesaida lase kabaloina tamoqana tamoqana ikavekapoidi, beqa tomo'otoqa no vikainidiavo waidie imai Itipita waineye kanikani igimwagimwane Iosepa waineye.

Currently Selected:

Kabavelamu 41: mzz

Highlight

Copy