Isauyedi 34

Mosese gileu beabeadi kaivaudi kailuqa imaiedi Iave waineye

1Iave ivesipupu Mosese waineye ivo, “Gileu kailuqa kugusudi mesaida base kutawedi itutubagaledi, we Yau vonanidiavo aigilili-vaituqanidi mesaida base. 2Kawakawaie kivalabubuna kilagama Koya Sainai tabwaneye kibabanegu.”

4Beqa Mosese gileu beabeadi kailuqa igusudi mesaida base we kawakawaiotoqe ikavaladi ilagavedi Koya Sainai waineye mesaida Iave ivoneni. 5Matautauda Iave waumana naqeneye iobuma Mosese taiauda itovoi, Kanawavaqa ikinanai ivo, “Yau Iave.” 6Iave Mosese mataneye itauya ibala iveqoleluguaqeta ivo,

“Iave, Iave!

Yau tovenua'ina'inaqe.

Guvenua'ina'inaqe'eqa avavalabubuna giagiamai waimie.

Yau kagukapoka ge idaedimadimana.

Guvenapwayewa ada'adaqina ge menasivilavila tomo'otoqa waidie we komi kwaivetumaqanegumo.

7We guvenapwayewa ge menasivilavila inakeno-vaqata ge inakakava,

we divalabubuna kapoidi, divaqataqona wete tokapoina veboqi ainuataqonidi.

We Yau gumanidiavo ivedumwekaikaiegu aikaimatavuloqidi.

Kaimatavuloqanina aiveledi inadamana natudiavo, tubudiavo wete yaitediavo waidie.”

8Tutuyanina Iave ivesipupu ikakava vedimadimanaeqa Mosese isobwanu pwayepwayeye Yaubada ididigeni 9ivesipupu ivo, “O Iave, kago kudamwasanegu aelaukui komu me Isileli taiauda tadanaqo. We mwaqitana tomo'otoqa debadi pakalidi, we mavalabubuna kapoidi wete makapoina kudanuataqonidi. Aelaukui kudakewama kima mutomo'otoqavo vesivesinuama.”

10We Iave ibaivila ivo, “Kuvevaneneqa! Yau vonadabadaba avavalabubuni me Isileli taiauda. Matamie kabanuavilele aivalabubunidi, ge tamo aitoi base idakiseni kabaloina tamoqana tamoqana waidie wete pwayapwaya matatabuna waineye. Paina Yau Iave dede sakunidiavo avalabubunidi paipaimi, beqa tupwaidiavo tomo'otoqa inakiseni nuadi inavilele.”

28We Mosese Iave taiauda imiamia kaiata 40 wete lovana 40. Ge tamo beledi idakani wete ge tamo bwasi idayemu. We Iave gileu beabeadi waidie navonadabadaba igililidi—loina kanabou 10.

Mosese maiqina inamanamali

29Mosese Koya Sainai waineye'eqa iobuma, vonadabadaba kanagileu beabeadi kailuqa ikavikavinidi dimaneye wete maiqina inamanamali paina Yaubada taiauda iesipupu, we ge idayagovi. 30Eloni wete me Isileli Mosese maiqina ikiseni inamanamali beqa igololo ge idamai vivineye. 31We Mosese iveqole Eloni wete me Isileli kaditogumetavo waidie imai waineye, we ivesipupu waidie. 32Matautauda me Isileli matatabudi imai vivineye, we Mosese loina matatabudi igiavemaqetadi Iave ivoneni Koya Sainai waineye.

33Tutuyanina Mosese ivesipupu waidie ikakava, kaleko yalayalana beqa maiqina itumuya. 34Tutuyanina inanaqo Iave taiauda inavesipupu Ukweta Maqemaqetana waineye kanakalekonina inakewayavuleni. Mulineye inasauyeni, Iave naloinavo me Isileli inavonedi. 35Me Isileli maiqina namanamalina inakiseni. Matautauda Mosese maiqina kaleko beqa itumuya kanaketoava inavila inanaqo Iave taiauda inavesipupu.

Currently Selected:

Isauyedi 34: mzz

Highlight

Copy