Isauyedi 40

Matautauda Mosese tomo'otoqa ivonedi kalaqeimaimaiqa inamaiedi beqa Ukweta Maqemaqetana inayoqoni wete kanasakuvo, we tovelomuvo kadikaleko maqemaqetadi inavalabubunidi. Tomo'otoqa saku giamaidi pueotoqidi imaedi. Mulineye Mosese tupwaidiavo tolituqa ivonedi dede sakunidiavo matatabudi inavalabubunidi mesaida Yaubada iveveni. Tolituqanidiavo Bisaleli Iuda manuqa waineye'eqa wete Onoliabi Dani manuqa waineye'eqa, we puepuedi tonuauya kaditokaivaisavo, tomoqovo wete vevine.

Ukweta Maqemaqetana ivetovoia

1We Iave Mosese waineye ivesipupu ivo, 2“Wetaki gumegumetana kanakaiata gumegumetana waineye Ukweta Maqemaqetana kuvetovoia. 3We Guvonadabadaba Kanadedewaga kuyatoi naqeneye, gumanina loina 10 kanagileu beabeadi naqeneye, we kaleko badubaduna kulautauleni mataneye Tutudaba Maqemaqetana'otoqina kututubodai. 4We somala kumaieni naqeneye we kanasakuvo kuyatodi tabwaneye. Wete lamupa kabavetovoi kumaieni kuvetovoia wete kanalamupa kuyatodi waineye.

5“Matautauda goula didiqa vane kabakanigabu paipaina kumaieni kuyatoi Vonadabadaba Kanadedewaga mataneye we kaleko kulautauleni Ukweta kana'awa kututubodai. 6We didiqa velomu kabakanigabu Ukweta kana'awa mataneye kuyatoi. 7We takula kabakailegwa kuyatoi Ukweta wete didiqa velomu kabakanigabu gamwaneye we bwasi ku'iwaqi kuveadaqi. 8Ukweta Maqemaqetana matatabuna kaleko beqa kukalai inavelauvivila we kaleko kulautauleni Ukweta kanakala kana'awa inatutubodai.

9“Matautauda olibe bunama kaba'iwaqa kukewai Ukweta ku'iwaqi kavagi kanasakuvo matatabuna naqeneye kuyatokedi inavemaqeta Yau paipaigu. 10Matautauda bunama ku'iwaqi didiqa velomu kabakanigabu wete kanasakuvo matatabuna. Kuyatokedi inavemaqeta Yau paipaigu. 11We bunama ku'iwaqi takula kabakailegwa waineye wete kanakailagana taiauda kuyatokedi inavemaqeta Yau paipaigu.

12“Eloni menatunavo kumaiedi Ukweta Maqemaqetana kana'awa waineye bwasieqa kulegwadi. 13Matautauda Eloni kuvaiqavuya kaleko maqemaqetanaeqa wete ku'iwaqi bunamaeqa, kuyatokeni beqa inavetovelomu inalitulituqa paipaigu. 14Wete natunavo kumaiedi kuvaiqavudi tovelomuvo kadikaleko beqa. 15Bunamaeqa ku'iwaqidi mesaida tamadi ku'iwaqi, vagi inavetovelomu inalitulituqa paipaigu. Gumanidiavo wete tubuleleleqidiavo gutovelomuvo ge menakabakakava.” 16Vakai Iave naloina matatabuna Mosese ivoneni ivalabubunidi.

17We diqaba kanaveluqa wetaki gumegumetana kanakaiata gumegumetana waineye, Ukweta ivetovoia. 18Mosese koqala dikabatovoi bwegabwegadi iyatodi, waidie koqala isivetovoidi. Mulineye kanatokaivaisavo taiauda lulubiama veluvelulunidi iyatodi. 19Matautauda Ukweta Maqemaqetana itumuya tamo kaleko giamaina beqa, mulineye tabwaneye kaisaya bunudi beqa itumuya kaia mesaida Iave ivoneni.

20Matautauda Mosese gileu beabeadi kailuqa ikewadi iyatodi Vonadabadaba Kanadedewaga naqeneye, gileunidiavo waidie Iave vonadabadaba igililidi. We kaipapula kadikabasinawe waidie isinawedi, we kanatutuboda iyatoi—no waineye Iave tomo'otoqa dikapoina inakukukumidi. 21Matautauda dedewaganina ikavalai iluguveni Ukweta Maqemaqetana naqeneye we kaleko ilautauleni itutubodai, beqa ge tamo aitoi Vonadabadaba Kanadedewaga inakiseni, kaia mesaida Iave ivoneni.

22We somala ikavalai iluguveni Ukweta Maqemaqetana naqeneye, we tutudaba gumegumetana waineye iyatoi kotala (noti) waineye kalekonina mataneye 23we beledi iyatodi somala tabwaneye Iave mataneye, kaia mesaida Iave ivoneni.

24Lamupa kabavetovoi iluguveni Ukweta kwaiboga (sauti) waineye iyatoi we somala gunabeida kotala (noti) waineye iyatoi ikenokeno 25we lamupa igabunidi Iave mataneye, kaia mesaida Iave ivoneni.

26Goula didiqa vane kabakanigabu iyatoi kaleko badubadunanina mataneye 27we vane maqaidi giamaidi igabunidi, kaia mesaida Iave ivoneni. 28Matautauda kaleko ilautauleni Ukweta kana'awa inatutubodai.

29Didiqa velomu kabakanigabu iyatoi Ukweta kana'awa mataneye. Tabwaneye kaisaya wete pwalawa inavelomuyedi, kaia mesaida Iave ivoneni.

30Takula kabakailegwa iyatoi Ukweta wete didiqa velomu kabakanigabu gamwaneye, we bwasi iveadaqi tovelomu dikabakailegwa. 31Mosese, Eloni menatunavo lamoqidiavo bwasinina waineye dimadi wete kaqedi inalegwadi. 32Kago tovelomuvo wayaqidi inanaqo didiqa velomu kabakanigabu vivineye o inalugu Ukweta Maqemaqetana waineye naqaida inakailegwa, kaia mesaida Iave ivoneni.

33We Ukweta Maqemaqetana wete didiqa velomu kabakanigabu kanavikai kaleko beqa ikalai ivelauvivila, we kaleko ilautauleni Ukweta kanakala kana'awa itutubodai. Beqa lituqa matatabuna ivekakavai.

Iave mata'udu'udulina Ukweta Maqemaqetana iveadaqi

34Matautauda waumana Ukweta Maqemaqetana iumai, we Iave mata'udu'udulina iveadaqi. 35Mosese ge kanasala inalugu naqeneye paina waumana iobuma matatabuna iumai wete Iave mata'udu'udulina iveadaqi.

36Tutuyanina waumana ivila ilaga Ukweta waineye'eqa, me Isileli ivelamu itauya inanaqo tamo vikai waineye. 37We kago waumana ge inalaga ge inatauya. 38Kaiate me Isileli matatabudi Iave kanawaumana ikisekiseni Ukweta Maqemaqetana tabwaneye, we lovane kai ikalakalata waumananina naqeneye me Isileli matatabudi ikisekiseni. Tutuya matatabuna disasala waidie waumana wete kai ikalakalata ikisekisedi.

Currently Selected:

Isauyedi 40: mzz

Highlight

Copy