Isauyedi 32
32
Me Isileli goula beqa bulumakau mwanewauna ivalabubuni
1 #
Aposi 7:40
Tutuyanina tomo'otoqa ikiseni Mosese giladi iemumuna koya waineye. Beqa matatabudi imai Eloni waineye ivo, “Kutovoi yaubadavo kuvalabubunidi inakedagumetema. Paina Mosese Itipitaeqa ikewaluguaqeteda we ge tadayagovi oge vakai isauyeni waineye.”
2Beqa Eloni ivesipupu waidie ivo, “Mwanemiavo, natumiavo lamoqidiavo wete vevinediavo kadikomwakomwa goula kwaigiatakidi kwaimaiedi waigue!”
3Matautauda tomo'otoqa matatabudi kadikomwakomwa taniqadie igiatakidi imaiedi Eloni waineye. 4#Aposi 7:41We goulanidiavo ikewadi igabunidi idewaya beqa ivalabubuni bulumakau lamoqina mwanewauna kanakisa wete kanatalaqa mesaida. Tutuyanina tomo'otoqa ikiseni ibwau ivo, “Ee me Isileli, dede dayaubadanina Itipitaeqa ikewaluguaqeteda.”
5We tutuyanina Eloni tomo'otoqa divalabubuna ikisedi bulumakau mwanewauna mataneye, didiqa ilauqi velomu kabakanigabu we ivemataluana ivo, “Kawaie Iave waineye kani taivalabubuni.”
6Ikawananaqai kawakawaie tomo'otoqa dikaisayavo imaiedi divelomu igabunidi wete veiaiana kanavelomu ivalabubunidi. Mulineye imiabui ikani wete iyemu, we iyemupalapalala nuadi iqau beqa kapoina sulina sulina ivalabubunidi.
7Iave Mosese ivoneni ivo, “Kuobu paina tomo'otoqanidiavo Itipitaeqa kumaiedi gunabeida ikapoina-otoqa. 8Valabubuna giamaina wete maqemaqetana kedanina aloinedi inavemulieni gunabeida ivedumwekaikaieni. Beqa goula igabuni bulumakau mwanewauna ivalabubuni waineye isobwasobwanu wete ielomu we ivesipupu ivo, ‘Dede dayaubada gumanina Itipitaeqa ikewaluguaqeteda.”
9We Iave giladi Mosese waineye iesipupu ivo, “Gunabeida ayagovidi tomo'otoqanidiavo debadi pakalaotoqidi. 10Sideqoina kubailegu kagukapoka inalupwa-otoqa waidie aikavekapoidi. Katupai komu wete tubuleleleqimwavo aikavepuemi wete kamukabeida mikabaloina inavebwaiga.”
11We Mosese nuaobueqa Iave waineye ivesipupu ivo, “Oo Iave, muvelulunaeqa mutomo'otoqavo Itipitaeqa kukewaluguaqetedi no lamunanina ge kamukapoka inaoqala-otoqa mutomo'otoqa kikavekapoidi! 12Kago mesaida kivalabubunedi me Itipita inavo, ‘Me Isileli di Yaubada ikatupwaiedi tutuyanina ikewaluguaqetedi inawedi koya waineye wayaqina inaleo-kakavadi pwayapwaya waineye'eqa.’ Beqa Iave nuamu inaniwalova ge mutomo'otoqavo kileo-kakavadi! 13#Kaba 22:16, 17; 17:8Kunuani mutolituqavo Ebelamo, Aisake wete Iakobo muvonadabadaba kamuwavaqaeqa kuveledi. Kuvonadabadaba kuvo, ‘Tubuleleleqimiavo aikavepue-otoqidi mesaida mwatuia abame, wete dede pwayapwayanina matatabuna aiveledi dipwayapwaya ge menakabakakava.” 14Beqa Iave nanuanuana isivilai ge me Isileli idaleo-kakavadi.
15Matautauda Mosese gileu kailuqa beabeadi ikewadi itunuvilai koya waineye'eqa iobu. Iave naloinavo igililidi manawadie wete mulidie. 16Gileunidiavo beabeadi Iave ivalabubunidi wete Taunina naloina igililidi waidie.
19Tutuyanina Mosese imai baekwa vivineye bulumakau mwanewauna ikiseni wete tomo'otoqa ikisedi isuyasuya, kanakapoka ioqala gileu beabeadi kailuqa itawedi iobu pwayepwayeye. Itutubagabagaledi koya lamuneye. 20We bulumakaunina mwanewauna ikewai kai waineye igabuni idewaya. Matautauda itutugudagudai ivekaupapa itaweni iobu bwasie we me Isileli iloinedi iyemuya.
21Matautauda Mosese Eloni ivelautolieni ivo, “Dede tomo'otoqanidiavo vakai ivaimu, beqa kukedagumetedi ikapoina-otoqa?”
22We Eloni ibaivila ivo, “Mosese, ge kamukapoka inaoqala. Komu dede tomo'otoqanidiavo dinuanuana kuyagovidi wayaqidi kapoina inavalabubuni. 23Beqa ivonegu ivo, ‘Kuvalabubunidi yaubadavo inakekedagumetema. We Mosese gumanina ikewaluguaqeteda Itipita waineye'eqa, ge tadayagovi vakai isauyeni waineye.’ 24Beqa avonedi avo, ‘Kamivaiqavu goula kwaigiatakidi.’ Tutuyanina ivelegu atawedi iobu kaie dede bulumakaunina isauyeni!”
25We Mosese iyagovi tomo'otoqanidiavo mesaida tolaudebalagava we Eloni ge kanasala inavekuniqedi beqa ikapoina, we kadiqaviavo divalabubuna ikisedi isasaidibiedi. 26Matautauda Mosese itovoi baekwa kawaneye ibwau ivo, “Aitoi Iave navikai waineye, kumai waigue!” We Libai manuqa tomoqovo iyoko ivelauvivili.
27We Mosese ivonedi ivo, “Iave Isileli na Yaubada ivesipupu dede mesaida ivo, ‘Matatabumi kepata kwaikewadi kwainaqo baekwa matatabuna vikaineye wete inanaqo vikaineye waidie gumanidiavo bulumakaunina waineye isobwasobwanu kwailuvewapadi—tatamiavo, taimiavo, emiavo wete kamimialatuma matatabudi.” 28We Libai natomoqovo Mosese naloina ivekimataneni, kaiatanina waineye tomo'otoqa 3,000 iluvewapadi.
29Mosese ivesipupu Libai tomoqovo waidie ivo, “Dede kaiatanina Iave naloina kwavekimataneni, ge natumiavo wete emiavo paipaidi kwadanuanuana we kwaluvewapadi. Beqa Iave ivonavenapwayewemi iyatokemi komi natovelomuvo.”
30We ikawananaqai kawakawaie Mosese ivesipupu tomo'otoqa waidie ivo, “Komi kapoina bwaigiotoqina kwavalabubuni, ailaga Iave waineye oge mikapoina aikukumidi.”
31Matautauda Mosese ivila ilaga Iave waineye ivesipupu ivo, “Aioi, dede tomo'otoqanidiavo kapoina bwaigiotoqina ivalabubuni. We taunidi diyaubada goula beqa ivalabubuni waineye isobwasobwanu. 32Beqa deqoina dikapoina kudanuataqonidi? We kago gebuka, kaguwavaqa mubuki naqeneye kikewayavuleni, mubukinina mutomo'otoqavo vesivesinuadi kadiwavaqa kugililidi waineye.”
33We Iave ibaivila ivo, “Aitoi ikapoina waigue, gumanina kanawavaqa aikewayavuleni gubuki naqeneye. 34Deqoina kunaqo gutomo'otoqavo kikedagumetedi vikainina avonemu waineye. We gu'anelose inakedagumetemu. Kamukabeida baivila kanatutuya inamai, matautauda aikaimatavuloqidi dikapoina paipaina.”
35Beqa Iave tomo'otoqa ikaimatavuloqidi viqa bwaigiotoqina beqa, paina bulumakau Eloni ivalabubuni waineye isobwanu.
Currently Selected:
Isauyedi 32: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
