Yon 6

Yeesus mua tausen ikur maa enowa wienakek

(Matiu 14.13-21, Mak 6.30-44, Luk 9.10-17)

1Aria iir oko-pa Yeesus Galili eka saawirinowa maneka nain kame okaiwi ekak. Eka nain unuma oko Taiberias naimik. 2O maa miililina onami wi napum mua wia saliwak nain wi urufap yakeyak maneka ookam-miemik. 3Wi ekap ona teeria onaiya urupep ema muuna-pa pokamik. 4Iir nain wi Yuuda Pasowa maapora pun mamaiyarek. 5-6Pokap ikok Yeesus mokoka wuak-na yakeyak maneka wiokap urupem-ikaiwkin wia urufak. Naap wia urufap Filip akimekam naep nokarek, “Nee, i maa enowa kaanek sesenarep wienakiyen noma?” Ne ikoka kamenap onowa nain amisarep ikua. 7Naeya Filip-ke maakek, “I maamuma andet erup naap emer ikowa sesenarep wienakiyen-na wia pepek erinon-i? Wi wu-wuepap pote pote enimikuan pun me pepek,” naap maek. 8Ne ona teeria mua oko unuma Andru naimik, Saimon Pita weepe-ke. Os-ke maek, 9“Takir oko emer ikowa ikur ne mera gelemuta erup wiar ikaeya urufamik. Sa, teeria maneka faa, wienakowa pepek-i?” 10Naeya wia maakek, “Wi wia maakiwkin sipira-pa pokomakuk.” Ne wia maakiwkin pokamik. Yakeyak maneka nain mua muutiw wia tuunamik. Wia tuunamik nain tausen ikur (5,000) naap.

11Wi pokap ikaiwkin Yeesus emer ikowa ikur nain aawep Mua Maneka sira eliwa naakep-puap wu-wuepap sererkap wieya enemik. Ne mera pun sira naapiw onak. Wi enemik enemik wia, maa enowa-keriw arek. 12Wi enep pepek eriwkin ona teeria wia maakek, “Maa enakiwa kiromakek nain baliweka, me wesusikua.” 13Emer ikowa enakiwa kireya fiirimemik nain inera ten kuisow nainiw erup taanek.

14Ne Yeesus maa miililina naap imeneya wi unowa nain naap urufap maemik, “Aa pepek, Mua Maneka profet miiwa orowa maek nain mua maken akena fanek!” 15Ne Yeesus kema wiar amisarek, oko wis-ke kekanemi wiena owow saria maneka efa wuikuan, naap naep baurarep ona waisow nainiw ema urupok.

Yeesus eka iinan-pa soomar-ikiwok

(Matiu 14.22-33, Mak 6.45-52)

16-17Aria urer akena Yeesus ona teeria wiisow Galili eka pona orop wi kiikir aasa aawep kame okaiwi Kapeneam ekam-ikemik. Epa kokomarek, nain Yeesus me kererowa ikua. 18Wi aasa-pa ekam-ikaiwkin ewar maneka wuunemi ifer umukut onaiya wuam-ikua. 19Wi ikiwep gone-pa ariwkin Yeesus wiokami ifer iinan-pa soomar-ikim-ikaeya urufap keker opamik. 20Keker opiwkin wia maakek, “Ni me keker opaka, yos-ke!” 21Naap maeya wi kemelami o opap purup aasa-pa wuamik. Wuiwkin ewur kuisow kame okaiwi-pa fuunemik.

22Ne uurik ona wi teeria eka kame okaiwi-pa ikemik nain wi kema naap maemik, iiriw aasa kuisow muuta fan ikua nain ona teeria-ke aawemik. Ne o me wiokak, wi wiisow ikiwemik, naap maemik. 23Ne aasa papako Taiberias piipuap ikiwep epa nan urupep ikemik. Epa eena inon fan yiena Maneka Mua Maneka sira eliwa naakep maa wienakek nain. 24Yakeyak maneka Yeesus ona teeria onaiya nan me wia urufap o akupami aasa nain wiar irap Kapeneam ekamik. 25Ekap nan imenap nokaremik, “Nee, somek mua, no kamenap ekapon?” 26Ne wia maakek, “Yo makena nia maakiyem, ni me yo maa miililina onamkun yo efa kema suuwap kema fufurarep nain kookalep efa akupiman, weetak. Ni maa enep uroma taanow muuta nain yo efa akupam-miawiman. 27Nain ni maa enowa ewur samorariya nain me senam kema suuwap uufuneka. Mua Muuka opora nia maakiya nain ni ookami anane epa eliwa-pa ikowen. Nain maa enowa saarik kookalep aawem-ikeka. Moram Auwa Maneka ona uuwowa nain Muuka iwemi kekanowa onaiya iwok.” 28Ne wis-ke maakemik, “I sira kamenap onap Mua Maneka uuwowa onomiyen?” 29Ne wia maakek, “Mua Maneka uuwowa feenap, mua eena sesekak nain opora wiar opaka.”

30Naeya maakemik, “Naapeya-na no maa miililina-ko oneya i urufap makena naep no opora nefar opiyen. No maa miililina sira kain oninan? 31Iiriw yiena nembesir epa asia nomon manekiw nan ikiwem-ikok Moses-ke Mua Maneka fareya maa enowa maana naimik nain wia sesekomaya enem-ikemik, eena Mua Maneka opora maek naap,

‘Os-ke maa enowa owow iinan-pa wia sesekomaya enemik.’” (Eksodas 16.4, Someka 78.24)

Naap maakemik. 32Ne Yeesus-ke wia maakek, “Yo makena nia maakiyem, enowa nain me Moses-ke wienakek, weetak. Yena Auwa-ke maa enowa akena owow iinan-pa ikua nain nia sesekomiya. 33Mua Maneka maa enowa feenap nain nia sesekomiya, maa enowa eena iinan-pa orok nain ni miiw mua enep anane eliwa ikowen.” 34Naeya maakemik, “Aa-na, i maa enowa naap nain yienakem-ike.” 35Ne wia maakek, “Maa enowa nain makena yos, eena enep anane eliwa ikowa nain. Wi mua yo efar ekapimik nain wi wuailowa marew. Ne yo opora efar opimik nain kema enekarowa marew. 36Nain yo iiriw nia maakem, ni efa urufiman fain, yo opora me efar opiman. 37Wi mua eena Auwa-ke yiiya nain yo efar epikuan, yo me wia iirarinen. 38Moram, yo miiwa orom nain me yena kookalowa ookowa nain orom, o eena efa sesekak nain kookalowa wiar ookowa naep orom. 39Ne ona kookalowa nain feenap, emeria mua unowa yiiya nain yo mua kuisow-ko me piipuinen. Ikoka miiwa weeserow epa-pa unowiya wia iikirowinen. 40Yena Auwa kookaliya nain feenap, wi Muuka urufap opora wiar opimik nain anane eliwa ikaikuan. Ne wiimar miiwa weeserow epa-pa yena wia iikirowinen.”

41-42Aria Yeesus-ke naap wame maeya wi Yuuda-ke nain miimap murarow opora onami maemik, “O Yeesus-ke, Yosep muuka-ke. I wiawi onak wiar amisaremik. Ne moram ‘Yo owow iinan-pa orom’ naiya!”

43Naap aakunem-ikaiwkin wia maakek, “Ni naap efa maiman nain neek ikainok. 44Mua kuisow onaiw yo me efar ekapinon, weetak. Auwa efa sesekak nain-ke mua wia mufeya yo efar ekapikuan. Ne miiwa weeserow epa-pa yena wia iikirowinen. 45Ne wi profet-ke maiwkin siisimep-puamik, feenap,

‘Wi unowa nain ikoka Mua Maneka-ke amisa wiinon.’ (Aisaiya 54.13)

O mua eena Auwa opora wiar miimap amisa wiar aawiya nain-ke yo efar ekapinon.

46Makena, mua kuisow Auwa-ko me urufak, weetak. O mua eena Wiawi mamaiya-pa ikok ekapok nain makena, Mua Maneka urufak. 47Yo makena nia maakiyem, mua eena yo opora efar opiya nain anane eliwa ikainon. 48Anane eliwa ikowa onoma yos, nain maa enowa makena-ke naiyem. 49Makena, niena nembesir unowa epa asia nomon manekiw nan yiawem-ikok wuailep maana enemik, nain wi iiriw umemik. 50Ne maa enowa oko maem fain iinan-pa orok, mua eena maa enowa fain enep me uminok naep. 51Enowa fain enep anane eliwa ikowa nain, makena yos, maa enowa eena owow iinan-pa orok nain. Wi maa enowa fain enimimik nain, wi anane eliwa ikaikuan. Maa enowa nain yena mia yame maiyem, miiw mua unowa eliwa ikauk naep yena yame wuami uminen,” naap wia maakek.

52Naeya wi Yuuda-ke wi-wieniw oporiw irakemi maemik, “Nee, mua fain ona mia oposia enowa yia maakiya nain kamenap noma?”

53Naeya wia maakek, “Yo makena nia maakiyem, ni Mua Muuka mia oposia ne aka me wiar enimowen-na ni anane eliwa ikowa nain naap me ikowen. 54Ne wi mua yo mia oposia ne aka efar enimimik nain wi anane eliwa ikaikuan, ne wiimar miiwa weeserow epa-pa yena wia iikirowinen. 55Moram, yena mia oposia-na maa enowa akena-ke ne yena aka pun eka makena-ke. 56Mua eena yo mia oposia ne aka efar enimiya nain yo efamiya ikaiya, ne yo o wameiya ikaiyem. 57Feenap, Mua Maneka anane ikaiya nain-ke efa sesekak. Ne os-ke ikaeya yo ikem. Nain kakeniw naap, yo ikem, naapeya mua eena yo mia oposia efa enimiya nain os pun ikainon. 58Enowa fain makena, owow iinan-pa orok. Iiriw yiena nembesir unowa maa enowa maana naimik nain enemik, nain umurumemik. Ne enowa fain maiyem nain makena-ke, ne wi enimimik nain anane eliwa ikaikuan.” 59Kapeneam lotu koora-pa suule wiemi opora naap wia maakem-ikua.

Mua papako Yeesus ookam-ikok piipuamik

60Aria ona teeria maneka nain wi mua unowa-ke naap miimap maemik, “Nee, opora naap-ko ikua-i ya? Aa, i opora eliw marew nain moram wiar miimiyen? Kama yia mikiya.” 61Wi naap maemi muninem-ikemik nain, Yeesus wiar amisarek. Ne wia maakek, “Ni opora nain-ke uroma nia mikeya opora eliw marew efar naiman. 62Ne Mua Muuka ona iiriw ikua neeke kiiriw urupeya urufap ni kamenap-ko maowen-yon? 63Ewar Eliwa kekanowa-pa Mua Maneka wameiya ikok anane eliwa ikaikuan. Wi mua wieniw me pepek. Opora eena yo nia maakem nain Ewar onaiya ikua, ne anane eliwa ikowa nain aawowa-ke. 64Nain ni mua papako opora me efar opiman.” Naap maek, moram wi mua eena opora me wiar opamik nain o uuwowa onoma wuak nain iiriw naap wia amisarek. Ne pun mua eena wi iiwua wapena-pa wiar wuowa nain amisarek. 65Ne wia maakek, “Yo naapeya nia maakem, mua wieniw yo efar ekapowa me pepek, makena, Auwa ona kekanowa wieya eliw yo efar ekapikuan.” 66Ne naap wia maakeya mua unowa o ookam-miemik nain iir nain piipuamik. 67Wi ikiwiwkin ona teeria mua ten kuisow erup nain wia nokarek, “Ne nis pun efa piipu naep-i?” 68Naeya Saimon Pita-ke maakek, “Sa, Maneka, i mua naarew wiar ikiwiyen? Anane eliwa ikowa opora onoma nos. 69I opora iiriw nefar opamik ne pun i amisaremik, makena no Mua Maneka-ke nefa pepekimep nefa sesekeya ekapon.” 70Naeya maek, “Makena, yo mua ten kuisow erup nia aawem. Nain mua kuisow Satan-ke ikua!” 71O Yuudas maemi naap maek. Yuudas-na Saimon Iskariot muuka-ke. Ikoka os-ke Yeesus wi iiwua wapena-pa wiar wuinon.

Currently Selected:

Yon 6: mhlNT

Highlight

Copy