Markus 4

Yesus foo lia hatetek nosi fini mak monu baa rai oi-oik

(Mateus 13:1-9; Lukas 8:4-8)

1Baa loron ida, Yesus fila baa debu boot Galilea. Ema waꞌin moos mai kabuun nola Nia. Hotu, Nia saꞌe baa bero ida mak nanawa iha nia, nebee ema hotu-hotu iha rai bele rona Nia. 2Nia nanorin lia waꞌin baa sia, nodi lia hatetek naꞌak,#Lukas 5:1-3

3“Rona diꞌa-diꞌak! Noo ema mahalo toꞌos ida baa kari fini iha toꞌos. 4Baa oras kari, fini balu monu baa dalan. Hotu, manu ai leten sia mai tutu nola mohu. 5Fini balu monu baa rai fatuk. Fini nia sia tubu lai-lais tan kona rai isin niꞌis. 6Mais oras loro kona, tubun nia naklaik hotu mate, tan abut la tama leꞌan.

7Fini balu tenik, monu baa ai tarak laran. Fini nia sia tubu buras, mais ai tarak neti nola toꞌo la nafua. 8Fini balu tenik, monu baa rai isin. Fini nia sia tubu toꞌo boot no nafua waꞌin. Oras kuꞌu, balu foo nikar folin toꞌo isin tolu nulu, balu toꞌo isin neen nulu, balu tenik toꞌo isin atus ida.

9See mak noo tilun, rona diꞌa-diꞌak!”

Tan saa Yesus dale nodi lia hatetek?

(Mateus 13:10-17; Lukas 8:9-10)

10Baa oras Yesus tuur mesan, Niakaan maktuir naꞌin sanulu resin rua no ema seluk mak rona tiꞌan lia hatetek nosi fini nia, sia mai nusu lia nia isin baa Yesus. 11Yesus nataa naꞌak, “Tan emi neꞌe beer hatene tebe-tebes Naꞌi Maromak ukun, Haꞌu kloke malorek lia hatetek nia isin baa emi. Mais kalo ema seluk mak la noꞌuk natene, Haꞌu kanorin kodi lia hatetek dei. 12Maromak makoꞌan ida nakerek nela kedan kona baa ema hanesan sia naꞌak:

‘Sia naree tiꞌan, mais la noꞌuk natene.

Sia rona tiꞌan, mais la noꞌuk rai baa neon.

Dadi habusik baa, nebee sia lalika fiar baa Naꞌi Maromak,

nebee Naꞌi Maromak moos lalika kasu siakaan salan.’ ”#Yesaya 6:9-10

Yesus nalore lia isin nosi lia hatetek fini nia

(Mateus 13:18-23; Lukas 8:11-15)

13Hotu, Yesus katak tenik naꞌak, “Kalo emi sei la kohi dauk lia hatetek nia isin, nunabee tenik baa lia hatetek seluk sia? 14Nuneꞌe: Ema mak kari fini nia, hanesan ema mak katak keke Naꞌi Maromak Manfatin. 15Fini mak monu baa dalan nia, mak manu ai leten tutu nola, hanesan ema mak rona Naꞌi Maromak Manfatin, mais nia la rai diꞌa-diꞌak baa neon. Hotu, diabu ulun mai foti nola. 16Fini mak monu baa rai fatuk, hanesan ema mak rona tiꞌan Naꞌi Maromak Manfatin, hotu nia simu diꞌa-diꞌak nodi neon no laran. 17Mais Manfatin nia la nahabut, tan ema nia la rai diꞌa-diꞌak baa neon. Baa oras ema seluk nasusar nia tan nia simu Manfatin nia, nia nataꞌuk, toꞌo nabusik nela Manfatin nia. 18Fini mak monu baa ai tarak laran, hanesan ema mak rona nola Manfatin nia, 19mais nia nalai baa-mai buka soi no moris furak, toꞌo naluꞌa Manfatin nia. 20Mais fini mak monu baa rai isin, hanesan ema mak taꞌan tilun nodi simu Manfatin nia. Hotu, nia moris tuir Naꞌi Maromak hakaran. Nia moos nalo lia diꞌak, hanesan fini mak nafua waꞌin, toꞌo isin tolu nulu, isin neen nulu, no isin atus ida.”

Keta taka badut hodi hanek

(Lukas 8:16-18)

21Hotu, Yesus nanorin natutan tenik nosi bero nia, nodi lia hatetek ida seluk naꞌak, “Kalo ita sunu badut, ita taka hodi hanek ka? Lale, ita rai iha koi ohak ka? Lale! Kalo nunia, badut nanis la nakroma ona. Ita rai baa fatin aas, nebee laka naroma fatin nia.#Mateus 5:15; Lukas 11:33 22Nunia moos, lia hotu-hotu mak sei nakfunin baa oras neꞌe, atu naksain. Lia hotu-hotu mak ema sei la hatene baa oras neꞌe, ema atu natene.#Mateus 10:26; Lukas 12:2 23See mak no tilun, rona diꞌa-diꞌak!”

24Hotu, Yesus katak tenik naꞌak, “Hanoin diꞌa-diꞌak lia neꞌe! Kalo emi sukat ema seluk, ema moos sukat fila emi. Naꞌi Maromak moos atu sukat emi. Mais Niakaan sasukat, todan liu tenik.#Mateus 7:2; Lukas 6:38

25Ema mak beer tebe-tebes atu natene Naꞌi Maromak hakaran, nia hetak natene. Mais ema mak la noꞌuk natene Naꞌi Maromak hakaran, nia hetak beik.”#Mateus 13:12, 25:29; Lukas 19:26

Yesus foo lia hatetek nosi fini mak tubu duꞌuk

26Hotu, Yesus nalore tenik naꞌak, “Naꞌi Maromak hutun-renun hanesan fini mak ema kari iha toꞌos laran. 27Kari hotu, ema nia fila nikar, toba-nadeer, la nanoin tenik fini nia. Masik nunia moos, fini nia tubu duꞌuk toꞌo boot. 28Hotu nataha, nasorun, nafuna, nafua, toꞌo noo isin. 29Oras naktuuk tiꞌan, foin ema nia mai kuꞌu. Nunia moos Naꞌi Maromak hutun-renun sia. Sia moris tan Naꞌi Maromak mak foo moris baa sia. Lahoos ema raiklaran.”#Yoel 3:13

Yesus foo lia hatetek nosi fini mak kiꞌik oan basuk

(Mateus 13:31-32,34; Lukas 13:18-19)

30Hotu, Yesus katak tenik naꞌak, “Haꞌu tuꞌan tenik lia hatetek ida, nebee emi bele hatene oin nunabee Naꞌi Maromak dadi Naꞌin bodik ema lear. Uluk fohon, Naꞌi Maromak renun naꞌin hira dei, mais kleu-leur hetak waꞌin tuꞌan. 31Sia nahuu hanesan ai fuan musan mak kiꞌik oan basuk.#4:31Hakerek Moon lia Yunani naꞌak, “masik emi fiar hanesan ai musan σίναπι (sinapi).” Sinapi nia, ai musan mak kiꞌik oan, mais nia tubu boot toꞌo aas roꞌa tolu. Ai oik nia la noo iha rai Timor. 32Mais kalo kuda baa rai tiꞌan, nia moris dadi ai huun boot, toꞌo manu ai leten mai rani baa, no nalo knuuk iha sorun.”

33Hodi nunia, Yesus nanorin ema tuir siakaan babelen. 34Kalo nanorin ema waꞌin, Nia nodi lia hatetek dei. Mais kalo nanorin Niakaan maktuir sia duꞌuk, Nia nalore lia hatetek isin sia hotu-hotu.

Yesus nakahik anin dadurus

(Mateus 8:23-27; Lukas 8:22-25)

35Yesus nanorin ema nia sia nosi bero nia, toꞌo loro malirin. Hotu, Nia tene Niakaan maktuir sia naꞌak, “Mai ita baa balu baa.”

36Rona nola nunia, Niakaan maktuir sia saꞌe tuir baa bero. Hotu, sia laꞌo nela ema waꞌin nia, mais ema balu tuir nodi bero seluk. 37-38Baa oras laꞌo, Yesus toba luni kluni toꞌo dukur iha bero ikun. La kleur, anin dadurus mai. Laloran moos basak natama wee baa bero laran, toꞌo kreꞌis nakonu. Yesus Niakaan maktuir sia nataꞌuk tebes. Hotu, sia fuꞌa nadeer Nia naꞌak, “Ama! Madeer lai! Ama la madomi ami ka?! Ita atu mate mout ona!”

39Rona nola nunia, Yesus nadeer, hotu nakahik anin nia naꞌak, “Makmatek!” Nia moos naruka debu boot nia naꞌak, “Noo-nook ona!” Hotu, anin nia nanawa kedas. Nunia moos, laloran iha debu nia nakmatek kedas. 40Hotu Yesus nasee Niakaan maktuir sia naꞌak, “Tan saa emi hataꞌuk nunia? Emi sei la fiar baa Haꞌu ka?”

41Mais sia hotu-hotu nataꞌuk no blaar. Sia namaas baa malu naꞌak, “Nia neꞌe see? Toꞌo anin no laloran moos rona baa Nia!”

Currently Selected:

Markus 4: tetNTPO

Highlight

Copy