Markus 3

Yesus nadiꞌak nola ema moras baa loron hanawa serwisu

(Mateus 12:9-14; Lukas 6:6-11)

1Hotu, Yesus baa nikar uma hamulak. Iha nia, noo ema ida mak liman matek. 2Iha nia moos, noo ema naꞌin hira mak buka dalan atu nasalak Yesus. Sia namoo matan baa Yesus atu nodi natene naꞌak, Nia nadiꞌak nola ema moras baa loron hanawa serwisu ka, lale.

3Mais Yesus bolu nola ema liman matek nia, nodi naꞌak, “Mariik baa oin neꞌe!”

4Hotu, Yesus nusu baa ema nia sia hotu-hotu naꞌak, “Tuir itakaan ukun-badu, ita bele halo saa kona baa loron hanawa serwisu? Ita bele halo lia diꞌak ka, keta? Ita bele hadiꞌak hola ema ka, ita hoꞌo ema?” Mais sia hotu-hotu no-nook dei.

5Naree nunia, Yesus laran moras tebes, tan ema nia sia naliku loos siakaan ukun-badu dei; la naliku ema liman matek nia. Yesus moos nawan saꞌe nodi mana baa-mai baa ema nia sia. Hotu, Nia katak baa ema moras nia naꞌak, “Lolo o liman mai!” Ema nia lolo liman baa. Laku matan dei, liman diꞌak kedas. 6Naree nunia, ema Farisi sia sai nela uma hamulak nia, baa dale kabuar lia fuan no ema partee politik Herodes, atu buka dalan noꞌo Yesus.

Yesus nadiꞌak nola ema lear iha debu boot Galilea tehen

7-8Baa loron ida, Yesus no Niakaan maktuir sia laꞌo tenik baa debu boot Galilea tehen. Ema waꞌin mai nosi leo-leo atu tuir Yesus, tan sia rona tiꞌan saa mak Nia nalo. Sia mai nosi rai Galilea, rai Yudea, no rai Idumea. Ema balu moos mai nosi kota Yerusalem, leo Sidon, no leo Tirus. Balu tenik mai nosi mota Yordan lorosaꞌe. Sia hotu-hotu mai buka Yesus. 9Tan ema nia sia waꞌin basuk, Yesus naruka Niakaan maktuir sia nadiꞌa bero ida bodik Nia. Nia atu nanorin nosi bero leten, nebee ema keta sara Nia, no ema hotu-hotu bele rona.

10Ema moras sia mai sesu malu atu koko Yesus tan sia rona Yesus nadiꞌak nola ema waꞌin tiꞌan.#Markus 4:1; Lukas 5:1-3 11Oras ema mak kona diabu tekar naree Yesus, sia nakloti tabarakat aan iha Yesus oin, tan nataꞌuk. Sia nahii naꞌak, “Ita Boot neꞌe, Naꞌi Maromak Oan tebes!”

12Mais, Yesus nakahik makaꞌas sia naꞌak, “Keta hasara baa ema haꞌak, Haꞌu neꞌe, see.”

Yesus boi nola ema naꞌin sanulu resin rua dadi baa maktuir

(Mateus 10:1-4; Lukas 6:12-16)

13Hotu, Yesus saꞌe baa foho ida. Nia bolu nola ema naꞌin hira mak kona baa Niakaan neon. Sia moos tuir Nia. 14Toꞌo baa, Nia boi nola ema naꞌin sanulu resin rua, nodi katak baa sia naꞌak, “Haꞌu kboi kola emi atu dadi baa Haꞌukaan maktuir. Haꞌu atu karuka emi baa keke lema Naꞌi Maromak Manfatin. 15Haꞌu moos atu klatan beran baa emi, nebee emi bele teꞌur sai diabu.”

16-19Ema naꞌin sanulu resin rua nia, naran mak neꞌe:

Simon (Yesus moos nanaran nia naꞌak, Petrus),

Yakobus,

Yohanis (Yohanis no maun Yakobus ohin nia, Sebadeus oan. Yesus moos nanaran sia naꞌak ‘Boanerges.’ Neꞌe naꞌak ‘hanesan kokur.’)#3:16-19a: Hakerek Moon lia Yunani naꞌak ‘kokur oan’. Lia neꞌe naꞌak, ‘lisan hanesan kokur’. Ema matenek hira naꞌak falik, Yakobus no Yohanis lian, hanesan kokur lian makaꞌas. Lale, sia nakanas nuꞌu kokur lian.

Andreas,

Filipus,

Bartolomeus,

Mateus,

Tomas,

Yakobus (Alfeus oan),

Tadeus,

Simon (nia neꞌe mak tuir Partee Selot),#3:16-19b: Ema partee Selot neꞌe buka dalan atu nabuꞌa sai ukunrai Roma nosi siakaan rai Yahudi. Tan baa nia, sia moos nanaran partee neꞌe naꞌak, partee ‘meo ulun’.

Yudas Iskariot (nia neꞌe mak atu faꞌan lakon Yesus).

Manorik ukun Yahudi sia naꞌak, diabu ulun mak latan beran baa Yesus

(Mateus 12:22-32; Lukas 11:14-23, 12:10)

20Hotu, Yesus no Niakaan maktuir sia tuun nikar nosi foho nia, tama baa uma ida laran. La kleur, ema waꞌin mai baa Nia, toꞌo la no leet atu naa. 21Naree nunia, ema naꞌak, “Yesus neꞌe, ema oin saa? Nia naluꞌa tiꞌan isin lolon duꞌuk.” Oras Yesus familin sia rona nola nunia, sia moos mai atu nodi Nia fila.

22Baa oras nia, manorik ukun Yahudi sia moos mai nosi kota Yerusalem. Sia katak baa ema hotu-hotu naꞌak, “Hoi! Emi keta tuir Yesus nia. Nia bele teꞌur sai diabu waꞌin nunia, tan nola beran nosi diabu ulun, mak naran Baalsebul.”#Mateus 9:34, 10:25

23Rona nola nunia, Yesus bolu sia nodi katak naꞌak, “La tama kakutak! Oin nunabee diabu ulun naꞌin teꞌur duꞌuk aan?!” Hotu Yesus foo lia hatetek naꞌak, 24“Kalo ema fohorai ida funu malu, oin nunabee fohorai nia bele manek toꞌo kleur?! La bele! 25Kalo ema uma kain ida la kona malu, oin nunabee sia bele moris namutuk toꞌo kleur?! La bele! 26Nunia moos, kalo diabu sia funu malu, sia nanis keen karin malu toꞌo dodok welon!

27Kalo ema beer nanaꞌo iha ema biit ida uman, nia kesi uluk uma naꞌin lai, foin nia bele nola naha.#3:27Hodi lia nunia, Yesus nalore naꞌak, Nia biit liu diabu ulun.

28Rona, tan Haꞌukaan dalen neꞌe, tebes no loos! Naꞌi Maromak nanis kasu ema raiklaran salan. Kalo ema dale nahaat ema seluk, Naꞌi Maromak sei kasu siakaan salan. 29Mais kalo ema dale nahaat Maromak Kmalar Lulik, Naꞌi Maromak la kasu sala nia, toꞌo rai falu fila.”#Lukas 12:10

30Yesus katak nunia, tan sia tula sala baa Nia naꞌak: “Ema nia, diabu kaer!”

See mak Yesus familin malolok?

(Mateus 12:46-50; Lukas 8:19-21)

31Hotu, Yesus inan no Yesus alin sia mai iha uma nia atu nasoru Nia. Toꞌo baa, sia nariik iha luan dei, nodi naruka ema bolu Nia. 32Yesus sei tuur nodi nanorin ema waꞌin, ema mai nasee nia naꞌak, “Ama! Itakaan inan no Itakaan alin sia iha luan. Itakaan familin sia beer atu nasoru Ama.”

33Mais Yesus nataa naꞌak, “Haꞌukaan familin malolok, mak see?”

34Hotu, Nia titu baa-mai baa ema mak tuur satan Nia. Nia moos katak naꞌak, “Emi hotu-hotu neꞌe, mak Haꞌukaan familin malolok. 35Tan ema mak nalo tuir Naꞌi Maromak hakaran, sia mak Haꞌukaan familin malolok.”

Currently Selected:

Markus 3: tetNTPO

Highlight

Copy