Malasi 3
3
1Yai-Laa Mɛ̨nį Kəlee ŋą Hééɓomun kaa kɛi káá: Gáá nwɔ́ wɛlɛɛ ɓomu dɔɔi dɔ́wɔ́, ə pələ laa ɓo. Yálái ŋɛ̨i ka káá gwɛlii, gaa pai ɉee pɛlɛ́ mu, ɉu hvo kwɛa li. Nwɛlɛɛ ɓomu ŋɛ̨i ka káá mąąkpɔn ɉi, gaa pai nwɔ́ mįnɛ̨i laa həlii kaa. Gaa bələ ɓa, yɛ pa. 2Akɛtii, voló tii gaa pai pai la, nu ta kaa pai lɛɛi yɛnɛ̨ɛ̨ ɓəi? Akɛtii, nu taɠaa kaa pai lɛɛi tɔɔni ɓəi, ɓɛlɔwai gaa pai kulɔi la pɔ̨nɔ̨ŋą? Gaa pai kɛi yɛ: nwɔ̨n da kwɛli həɠeen na, diɛ bu. Gɛ pələ a kɛ yɛ: haahvinɛ̨i gbolo-kɔw kɛnɛ̨i ɉu. 3Gaa pai heei, ə gɛ, ə liɓi da nɔ̨nwɔ̨ di waa. Bələi tii da hɛni da wali kwɛli di waa la a nwɔ̨n, bələ ɓə gaa pai Levi nu huwu mąą həɠəi la. Nąąlɔwai tii ɓə, haláá laa həli nuą da Yálá kɔ́ hɛn naa həli la Yai-Laa ɓa a ɉaŋąą, yɛ bələi bɛliɛi la ɉu. 4A kɛ tii, Yai-Laa a ɲee lɛlɛɛ hee Ɉuda nu huwu da Ɉerusalɛmə nuą di wɔ Yálá kɔ́ hɛnŋąą mu, yɛ bələi wɔlɔ ə kɛ la. 5A tɛ̨ą, Yai-Laa Mɛ̨nį Kəlee ŋą Hééɓomun nwoo ka, yɛ diɛ: Ŋą́ pa, ŋą́ hee ka lɔwai, ŋą́ ka mąą mɛ̨nįɠaa hutɔɔ. Ŋą́ haŋą həɠə-hɛn nąmįną diɛ a mąą hulaa; diɛi da kɛ wɛli hon ɉi, diɛ di kwɛla a lɛɛ, diɛ kólo kɛ nuą hvɛla kulɔ di yəi, diɛ too təlilɛa da galaninŋaa mɛ̨i, diɛ nwɛ̨ąą yee kpɛlaan, diɛ hɛn gulɔ di yəi; ɛlɛɛ, da nuąi di hva ɲɔw mą́ą́.
'Ká pənə ká pa Yálá pɔ
6Ɲą́ą́ Yai-Laa, mą́ą́ hva hvalin. Káái a Ɉakɔbə nu huwu, ka káá kpɔ a nonnii leelee ka túwɔ́ pələ hu. 7Ə həɠə kpɔ ka kalaɓɔlɔni diɛ, ə həli la káá, kaa ká pulu tɔɔ nwɔ́ liɛwooɠaai diɛ, ka hvo ɉon ni. 'Ká pənə ka pa bɔ́, ŋą́ pənə ŋą́ pa ka pɔ. Ɲą́ą́ Yai-Laa Mɛ̨nį Kəlee ŋą Hééɓomun nwóó li. Kɛlaa, yii ka kɛ moi, ya ka, káá kɛ mą: «Kwá pa pələ kɛ ləi?»
8Gáá ka woo pulu pənəi: Akɛtii, nu a pɛli Yálá ɓowoi? Kɛlɛi, ka kɛ mówoi! Kaa kɛ mą: «Lə mɛ̨nį ɓə ku ə́ ɓowo ɉu?»
Yii ká kɛ mówoi ɉu, ya ka: Ka wɔ hɛn bownąą kulɔ pələ ɓə ká mówo ɉu, da ka wɔ Yálá kɔ́ hɛn dɛɛ pələ hu. 9Nɛ̨ŋɛ̨n naa ka tii ka káá mu, mąąhɔlɔɓo, kaai kpɔ a nɔi nuą ka kəlee, ka kɛ mówoi. 10'Ká pa a ká hɔlɔɓo hɛnŋąą kəlee bownąą ɉéé pɛlɛ́ mu, ə gɛ, kɔ̨nɔ̨n ə kɛ ɲə́i bɛlɛ́n. Ká yili kɛ tii, ka ɉúkɔɔn; ɲą́ą́ Yai-Laa Mɛ̨nį Kəlee ŋą Hééɓomun, akɛ vá yələkɔlɔn naa ɓo, və́ lúwɔ́ yɛɛ ka mɛ̨i a gbulu kɛnɛ̨. 11Akɛ tii, vá kɛa hvaa mą, koon-goon ɉɛnŋąą di hvo ka wɔ hihɛnŋąąi má kala, ka wɔ viɲə yɛaɠaai da ɓá a nɛlɛɛ. Ɲą́ą́ ɓə yili laakwɛlanmoi káá. 12Lɔi takpɛliɠaa kaa pai kɛi káá: Ká wɔ lɔi kaa a lúwɔ́ lɔi, mąąhɔlɔɓo, ka káá ka nɛ̨ɛ̨ hu ka pɔ lɔi. Ɲą́ą́ Yai-Laa Mɛ̨nį Kəlee ŋą Hééɓomun, wóó li.
Volói Yálá kaa pai nwɔ mɛ̨nį haŋąą kɛi la
13Yai-Laa yɛ diɛ: Ká kɛ woo ɲɔ̨nŋąą ɓoi mą́ą́, yili pulu, káá kɛ mą: «Lə mɛ̨nį ɓə ku mo a ɲɔ̨nwɔ̨ɔ̨ ku kee lɔwai, yɛ hvilɛn na yɛ́?»
14Mɛ̨nįi ka kɛ moi ya ka, káá kɛ mą: «Nu kɛɛ tíi Yálá ɓa kaa lɔ a kpɛli kɛɛ. Dɔnŋąąi ə ɉee, kwaa yiliɠaa hon, ɛlɛɛ, kuɔ mąąwɛli hee ɓo, ə gɛ, Yai-Laa Mɛ̨nį Kəlee ŋą Hééɓomun, ə ɲɛ̨i lɛlɛɛ hee kuɔ. Kɛlaa, tɔlɔ lɔpee ta hvo kulɔ li ɉu, hvo həli kuɔ. 15Kwaa gbaɠala kaa kɛa, nuąi da hilɛwoo tee, diɛ ɓə a lúwɔ́ lonnii. Nuąi da mɛ̨nį ɲɔ̨n gɛ, diɛ ɓə di yee la a hvólóon. Ə mą kɛ, di ka Yálá nwąną kɛi, mɛ̨nį ta hva kɛ a diɛ.»
16A kɛ tii, nuą da di kpɔwɔ mąą yɛɛ Yai-Laa yee mu, diɛ kpɛli, da da ɓo di kee lɔwai. Yai-Laa a nwəli tɔɔ, ə di woo mɛ̨n. Di mɛ̨nįi tii pɛ̨ɛ̨ ɉɛɓɛ́ hu, ɓɛi nuąi da ɲɔw Yálá ɓa, diɛ mąąwiɛ di laa kaa laa. 17Yili pulu, Yai-Laa Mɛ̨nį Kəlee ŋą Hééɓomun ə mo, yɛ: Volói gáá pai nwɔ́ huwalawalaa kulɔi la pɔ̨nɔ̨ŋą, mąą hvólói tii, ŋą́ nuąi tii həɠə ɉu, di kɛ a nwɔ́ nuą, diɛ ɓə ŋą́ di kwɛdɛn. Ŋą́ di ɲɛ̨imąąwɛli kaa, yɛ bələi lon yii a tí nąn ma, nąn a ɲɛ̨imąąwɛli kaa la. 18Nąąlɔwai tii hu, ka gaa, bələi ɓɛla ɓo kaa la nu haŋąą da nwąnąlɔ mun di lɔwai a nįnɛ̨. Ɓɛla ɓoi gaa, nuąi da tí Yálá ɓa, da nuąi di hva tí mą di lɔwai. 19Ɲą́ą́ Yai-Laa Mɛ̨nį Kəlee ŋą Hééɓomun, gɛ́ diɛ: Nwɔ́ liiɲąnwąną hvólói gaa pai, gɛ pələ kaa yɛ nwɔ̨n gbɔlu kɛnɛ̨. Mąą yələi tii, hilɛwoo tee nuą, mɛ̨nį ɲɔ̨n gɛ nuą, da kələn yɛ dɛɛkpalan; da lɔpee hva lɛɛ. 20Kɛlaa, kaa ŋɛ̨i ka mąąwiɛ tɛɛ náá pɔ, nwɔ́ nwun mąąɓo nwɔ huwalawala a kulɔ ka mɛ̨i yɛ hvóló, gbaalənŋaa diɛ pa a kɔ́lɔi pɔ̨nɔ̨ ka pɔ. Ka kɛ ka kpɔwɔ ɓa, kaa pili yələi a kwəinɛ̨ɛ̨, yɛ da gala laa ɓo nįŋɛ̨ lon dɔwɔ. 21Ɲələi gáá pai nwɔ́ huwalawala kulɔi la pɔ̨nɔ̨ŋą, ká mɔlɔɔn nwąnąlɔ nuą mɛ̨i, ká di hu hunwɔ̨, di kɛ ka kɔ́wɔ mu yɛ muluun gbala. Ɲą́ą́ Yai-Laa Mɛ̨nį Kəlee ŋą Hééɓomun, nwóó li.
Eli pa mɛ̨nį
22Dɔ́n ŋɛ̨i ŋą́ dɛɛ nwɔ́ tímun Moisə pɔ, Horɛbə yee ɓa, a Israɛlə nuą kəlee di wɔɔ, yaai ə ka liɛwoo kɛ a ɉon bələ, ka ká kili lɛɛ ɉu.
23Gɛɛ Yai-Laa nwɔ hvóló mąą ɲɔwɔ hvo kɛ pai həli, gáá pai gwə́i mɛ̨nį hukulɔ mun Eli tɔɔi. 24Gaa pai lon da gaamun di yee lɔi gee hu. A kɛ tii, vá kɛa ka wɔ lɔi kulɔ a haláá.
Currently Selected:
Malasi 3: BKPG
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in