Malasi 2
2
Haláá laa həli nuą di wɔ kili pu ɉu ka
1Ə həli kɛa kaa, kaai ɓaa ɉaláá laa həli nuą. Gáá ka kili pui ɉu, gɛ́ kaa: 2Ɲą́ą́ Yai-Laa Mɛ̨nį Kəlee ŋą Hééɓomun, ka wala ka wəli tɔɔ, ka hvo gɛ pələ kwɛli mą, ka hvo náá mąąwiɛ mɛ̨nį həɠə a ka lii kəlee, gáá pai mɛ̨nį ɲąąnwąnąą laai kaa, mɛ̨inɛ̨ɛ̨ɠaai wɔlɔ ŋą́ naakwɛlanmo kaa, ŋą́ mąą pənə a nɛ̨ŋɛ̨n naa; ŋą́ gɛ tii, mąąhɔlɔɓo, ka hva mɛ̨nį ta kɛ a gɛ pələ. 3Yii hu, gáá mą́ą́pamąi ka huwu hu nuą diɛ. Yii ɓaa ka wɛi, daatɛlɛɛɠaai kpɔ kaa gələn ka wɔ hɛli pu pələ tɛitɛi kəlee hu, gáá pai nuwui tii kəlee taɠai ka ɲɛ̨ilaai, di ka diɛni ka kələn.
4Nąąlɔwai, ka gbaɠala kaa, kaa diɛ: Mɛ̨nįi ŋą́ mo káá, yili ə kɛ tii, ɛlɛɛ, nwóói ŋą́ gwɛlɛ Levi da ɉuwu hu nuą diɛ, gaa ni mą. Ɲą́ą́ Yai-Laa Mɛ̨nį Kəlee ŋą Hééɓomun, nwóó li.
5Mįnɛ̨i tii gaa kwa diɛni ku lɔwai, mąą mɛ̨nį ɓa, ŋą́ yɛnɛ̨ɛ̨ kpɛɛ hvo mą da yeela hvólóon gɛ diɛ, ŋą́ mąąwiɛ too di hu, di nwóó hon, diɛ ɲɔw náá ɓa. 6Tɛ̨ą mɛ̨nį ɓə kɛ di la diɛ nuą mąąkwɛli la, da mɛ̨nį haŋąą, di hvo lɛ́ɛ́ tɔ̨nɔ̨ kpɛli kɛ. Kwa diɛni ku yee lɔɔ kɛ gee hu, mɛ̨nį haŋąą kɛɛ hu. Di nu tamąą kilaa pɔ̨nɔ̨, yiliɠaa di lənə mɛ̨nį ɲɔ̨n ma. 7A tɛ̨ą, haláá laa həli mun gɛ kólo ɓaa, ə nuą mąąkwɛli a Yálá kɔ́lɔn mɛ̨nį, yaa tii ɓə nuą da pa bɔ, diɛ mąąnįn kɛ a kpaaləi mąąnɛ̨ɛ̨ di hiɛ la. Mąąhɔlɔɓo, ya ɓə gaa a Yai-Laa Mɛ̨nį Kəlee ŋą Hééɓomun laawoo laa həli mun nuą diɛ. 8Kɛlaa, ka wɛi, kaa diɓoi tii lɛɛ laa. Kaa nu tamąą lan ka wɔ nuą kalan bələ hu, kaa Levi nwɔ mįnɛ̨i kala. Ɲą́ą́ Yai-Laa Mɛ̨nį Kəlee ŋą Hééɓomun, nwóó li. 9Yili ɓa, ɲą́ą́ gbɛli, gáá Israɛlə nuą lii muhəɠə, ə gɛ, di ka ɓɛlɛkpɛɛ kaa, di ɓáá kulɔ káá, di ka hviiɓo. Mąąhɔlɔɓo, ka hvo nííɓa pɔ, ɛlɛɛ, káá mɛ̨nį hutɔɔ a ɲɛ̨ikɔlɔn.
Bələi nwɔ̨nɔ̨ da kɛ Yálá ɓowowi la
10Akɛtii, ku kəlee ku nąn hvə mɔ̨ɔ̨ tanɔ̨n? Kɛlɛi ku pɛli Yálá kaa lɔ tanɔ̨n-ee? Akɛtii, lə mɛ̨nį ɓa, ku kwəi hvo kwələ li ku kee ɓa, ɛlɛɛ, mįnɛ̨i wɔlɔ Yálá da ku kalaɓɔlɔni di ɉəɠə, kuɔ gala? 11Ɉuda nu huwu aa nwɔ liɛwooi lɛɛ, daa túwɔ́ pələ ɲɔ̨n gɛnɛ̨ kɛ Ɉerusalɛmə daai, ə mą kɛ, Israɛlə lɔi hu nąą kəlee. Yaan, kɛɛnąąi kɛ a Yálá nwɔ nąą, mąą mɛ̨nį nwąnąą Yálá ɓa, daa mɛlɛkpɛɛ mą. Hvo lɛɛ a yili, daa nɛ̨ąą həɠə, yiiɠaai da kwɛli hvilɛn haliɠaa diɛ. 12Nui lɔpee a túwɔ́ tii, ə mą kɛ Ɉakɔbə nu huwu lɔwai, mąą nu, ə mą kɛ, mąnin bulu mąninŋąą kəlee, ə mą kɛ mąą nu a kɛ kɔ́ hɛnŋaa tɛɛ Yai-Laa Mɛ̨nį Kəlee ŋą Hééɓomun pɔ, gɛ́, Yai-Laa, ə mąą nu laa kulɔ lɔi mɛ̨i.
13Yii nwɔ̨nɔ̨ ka kɛ gɛi, ya ka: Ɓɛi ŋɛ̨i ka ɉaláá kulɔ laa, ka nąą yɔwɔ a ka ɲɛ̨iyá, káá ka woolaa. Mąąhɔlɔɓo, Yálá hvo kɛa ɲɛ̨i heei ka wɔ haláá hɛnŋaai diɛ, hvo kpɛli gaai a hɛn da. 14Ka kɛ mąąnįn kɛ kɛi, kaa kɛ mą: Lə mɛ̨nį ɓa, Yálá hvo kɛa bɔ? Mąąhɔlɔɓo, ká ká woo kwɛlɛ ka láŋą nɛ̨ɛ̨ ɓa, Yálá kaa a kɛla ká yaa ka lɔwai; Ya pa, yáá kpįnįi ɓə ɉəɠə ɉu, ə kɛ a ə́ nɛ̨ą, a ə́ hiɛ gee pulu. Kɛlaa ya ka, yáá vulu, yáá nɛɛ. 15Kɛlɛi, Yálá ɓə ka nɛ̨ɛ̨nui tii ka kɛ a nu tɔ̨nɔ̨, ə ka kɔ́lɔ da ka lii pɛlɛ gee ɓa-ee? Gɛ ɉu tɔ̨nɔ̨ laa tii, lə ɓə gaa bɔ? Kɛlɛi, gaa bɔ Yálá ə lon dɛɛ bɔ-ee? 'Ka ká kpɔwɔ mɛ̨i kaa, nɛ̨ɛ̨nui ŋɛ̨i ka ɉəɠə a ka hulɔnon ɲələ, ka hvo gbɛ. 16Mąąhɔlɔɓo, ɲą́ą́ Yai-Laa Mɛ̨nį Kəlee ŋą Hééɓomun, Israɛlə nwɔ Yálá, gɛ́ diɛ, nui a nɛ̨ą kpɛ, mąą nu wɛli kpɛɛi mą́ą́ tɛ-tɛ, yɛ pələi nwąnąlɔ mun nwɛli kpɛɛi la mą́ą́. Ka gɛ a nɛlɛɛ, mįnɛ̨i ká ɉəɠə, ká hvo gala.
Yálá kaa pai nwɔ wɛlɛɛɓo mun dɔɔi
17Ka wɔ woo hukulɔ tamąą a kɛ Yálá hvįikpɛɛi. Kɛlaa, a kɛ lɔi tii, kaa kɛ mą: «Lə mɛ̨nį ɓə kwa kɛ viikpɛɛi ɉu?» Kɛi ŋɛ̨i ka mo mą: «Yálá ɲɛ̨i lɛlɛɛ hee mɛ̨nį, mɛ̨nį ɲɔ̨n gɛ mun ma, yɛ nu taaləi tii mąątɛ̨nɛ̨.» Káá kɛ nwɔ̨nɔ̨ mą: «Tələnmo Yálá wɔɔ?»
Currently Selected:
Malasi 2: BKPG
Highlight
Share
Copy
Want to have your highlights saved across all your devices? Sign up or sign in
