Gɔwɔ tɔɔi 9
9
Yálá ə nwoo kwɛlɛ Noe ɓa
1Yálá ə lúwɔ́ too Noe da non ɉinąą diɛ, yɛ diɛ: «Ka ka káá, ka lɔi mɛ̨i laa hvɛɛ. 2Lɔi mɛ̨i huwɔɠaa da yələi nwɛ̨niɠaa kəlee, di kaa pai kɛi ɲɔwi kaa, ə mą kɛ tala huwɔɠaa kəlee da hɔwɔleeɠaa kəlee.
3«Nɔ̨ɔ̨-nɔ̨ɔ̨ hɛnŋąąi kpɔ di kaa lɔi mɛ̨i, gəlee kaa a ka kɔ̨nɔ̨n, ŋą́ą́ yiliɠaai kəlee tɛɛ ka pɔ, yɛ pələi ŋį́ kala nwunŋąą kəlee tɛɛ la, gəlee kaa nwɔ̨nɔ̨ a ka wɔɔ. 4Kɛlaa, ka hvə huwɔ ta nɔ̨ɔ̨ lɛɛ ɉu, ka hvo mį́i, yili mukulaa ɓaa: Ka hvo huwɔ ɲąmą mį́i. 5Yii hvilɛn na ka ɲąmą mąą mɛ̨nį ɓa, ka tinąą yili gwɛlan mo kɛ mą́ą́. Huwɔi a nu paa, mąą huwɔi a tinąą nui tii ə ɓaa, ɲąmą gwɛlan mo kɛ. Pələ lɔ ɓə a tinąą kɛ la, nui a mɛlan baa, mąą mɛ̨nį hu. Kwɛlanmo kaa tinąą laa, nu nįį mąą mɛ̨nį ɓa.
6«Nui a mɛlan ɲąmą pu, nu lɔ ɓə a mąą nu ɲąmą pu,
mąąhɔlɔɓo, Yálá ə nu pɛli Yálá kpinį mąą nįnįn ɉu.
7«Ka wɛi, ka ka káá, ka huwu ə ɓɛlɛ, ka lɔi mɛ̨i laahvɛɛ.»
8Yálá ə pənə nwɔ̨nɔ̨ yɛ Noe da non ɉinąą diɛ: 9«Gáá nwóó kwɛlɛi kaa, ka ka huwuhu nuą, 10Ka nɔ̨ɔ̨nɔ̨ɔ̨ ɉɛnŋaa kəlee: nwɛ̨niɠaa, taa huwɔɠaa da lɔwɔ huwɔɠaa, diɛi ka diɛni ka kulɔ gələn ɉu, da yiiɠaa pai yɛnɛ̨ɛ̨ kɛi lɔi mɛ̨i. 11Mįnɛ̨i gáá naai gwa gaa ni gu lɔwai, ya ɓaa yii, gɛ́ diɛ: Yánwąną hvo kɛa pai lɔi mɛ̨i nuą nwun na pilii.» 12Yálá yɛ nwɔ̨nɔ̨ diɛ: «Mįnɛ̨i tii kɔ́lɔn ɉɛn gaa mą, gwa kaa ni gu lɔwai, kwa nu kanŋaa ku lɔwai di yii hvóló kəlee yee mu, kpəla pələi hvo mą, ya ka:
13«Gáá nwɔ́ gbəi-mįlįįn naai yələ kwəi, yili ɓə pai kɛi a mįnɛ̨i ŋɛ̨i kwa yɛnɛ̨ɛ̨ nuą ku lɔwai, gili kɔ́lɔn ɉɛn. 14Ɓɛlɔwai lɔpee tulɔ a dɛ la lɔi mɛ̨i, gbəi-mįlįįn a laa ɉu, 15mįnɛ̨i gaa gwa kaa ni gu lɔwai, kwa nɔ̨ɔ̨-nɔ̨ɔ̨ hɛn gəlee, ŋį́ giliŋąhiɛ yili ɓa; yánwąną tɔ̨nɔ̨ kpɛli hvo kɛa pai kulɔi, hvo yɛnɛ̨ɛ̨ nwun na pili. 16Gbəi-mįlįįn gaa pai kɛi yələ kwəi, ŋą́ gaa, mįnɛ̨i ŋɛ̨i gaa, ɲą́ą́ kwa nɔ̨ɔ̨nɔ̨ɔ̨ ɉɛnŋaa kəlee ku lɔwai, nąą kili a too ŋą́.» 17Yálá ə pənə nwɔ̨nɔ̨, ə mɛ̨nį tɔ̨nɔ̨i tii ɓo Noe ɓa yɛ mą: «Gbəi-mįlįįn mə pai kɛi a mįnɛ̨, kwa nɔ̨ɔ̨nɔ̨ɔ̨ ɉɛnŋaa kəlee ku lɔwai.»
Noe lon ɉinąą haaɓai
18Noe lon ɉinąą haaɓai da diɛni di kulɔ gələn ɉu, diɛ ɓaa: Sɛmə da Kamə da Ɉafɛtə. Kamə ɓə kɛ a Kanaan nąn. 19Noe lon ɉinąą haaɓai tii ɓə di lonnii di lɔi mɛ̨i kəlee laa hvɛɛ. 20Noe ə kɛ a hihɛn ɉi mun. Ə viɲə yɛa laa. 21Ə viɲə lɔɔ ta kpələ a hvóló ta, nɔɔ ə ɉon, ə gbuwulu ɓo, ə tɛɛ ə laa ɲəi ɉəɠə pɛlɛ́ mu. 22Kanaan nąn Kamə, ə lɔ, ə nąn gbuwulu kaa, ə ɉukulɔ nąn nonnii hveelɛi tii diɛ ɲɛnɛ̨ɛ̨. 23Nąąlɔwai, Sɛmə da Ɉafɛtə di həɠə kɛnɛ̨ ta həɠə, nu tɔ̨nɔ̨ ə ɉon ŋɛ̨i, di bɛlɛ́ di kalan bulu, diɛ li la bɛlɛ́n a di pulu pələ, di bɛlɛ di nąn mɛ̨i, di hvo di nąn gbuwulu kaa, di lɛɛ di ɲɛ̨i tɔwɔ di kulɔ.
24Ɓɛlɔwai nɔɔ ə tee la Noe ɲɛ̨i, mɛ̨nįi tii non ə gɛ la, di ɉukulɔ mą. 25Nąąlɔwai, Noe yɛ diɛ:
«Kanaan nɛ̨ŋɛ̨n naai!
Gaa pai kɛi a gaayɔwɔɠaa di wɔ luwɔ pulu luwɔ.»
26Yili pulu, yɛ diɛ:
«Mąąwiɛ ə kɛ Yai-Laa ɓa, yii gaa a Sɛmə nwɔ Yálá,
gɛ́ Kanaan ə kɛ a Sɛmə nwɔ luwɔ.
27Gɛ́ Yálá ə Ɉafɛtə yee kɔ́nwɔ̨n ɉu ɓɛlɛ,
Kɛlaa, ə kɛ Sɛmə kwɛlɛ,
Kanaan ə kɛ a Ɉafɛtə nwɔ luwɔ.»
28Ɲánwąną tɛɛ pulu, Noe ə kwɛlan nwun-ɉaaɓa kwɛlan bow lɔɔli kɛ lɔi mɛ̨i. 29Noe kaa kwɛlan gəlee pɛlɛɛ gee ɓa, ə kɛ a kwɛlan nwun-mɛ̨inąąn kwɛlan bow lɔɔli. Yili pulu ə haa.
Currently Selected:
Gɔwɔ tɔɔi 9: BKPG
Highlight
Share
Copy
Want to have your highlights saved across all your devices? Sign up or sign in
