Gɔwɔ tɔɔi 8
8
Noe kulɔ mɛ̨nį gələn ɉu
1Noe nąą kili ə too Yálá ŋą, da ɉɛnŋaa kpɔ tii kɛ Noe pɔ gələn ɉu. Yálá ə hvaŋą kɛnɛ̨ ta tɛɛ lɔi mɛ̨i, ɲáɠaa mąą yɛ yɛɛ. 2Yələkɔlɔn naa ə kpulu, tulɔ hvo kɛa kɛi pu, ɲátonŋaa laa ə kpulu. 3Ɲá yɛ kɛa kpala lɔi mɛ̨i tiikpə-tiikpə. Ɲá hvɛɛ tii ə hvóló nwun dɔ̨nɔ̨ hvóló pow lɔɔli kɛ lɔi mɛ̨i, mąą yɛ kɛa yɛɛ. 4Ɲąnin mɛ̨ihveelɛ nwɔ hvóló pow kɔ́w mɛ̨ihveelɛ yələ, gələn ə yɛɛ, ə hee Araratə yee tona. 5Ɲá ə lɛɛ kpɔ kpalai, ə lɛɛ ɉu, ɲąnin bow nąą ə ɉəli; ɲąnin bow nwɔ hvóló dɔlɔɔ yələ, ɲeeɠaa tona yɛ kulɔ ɲá mu.
6Hvóló pow nąąn dɛɛ pulu, Noe ə gələn vinɛtɛlɛ laa ɓo. 7Ə gwąą-gwąą tɔ̨nɔ̨ kulɔ, yili ə li, ə pənə kpɔlɔ tii ə pa, mąąhɔlɔɓo, ɲá hvo ni kɛ kpala li lɔi mɛ̨i. 8Yili pulu, ə tonwələn dɔ̨nɔ̨ kulɔ vinɛtɛlɛ la, ə ɓo mą, əgɛ, ə gaa a kɛ ɲá aa kpala lɔi mɛ̨i. 9Kɛlaa, nwɛ̨ni tii hvo kɛɛnąą ta hɔlɔɓo ɓɛi a hee laa, mąąhɔlɔɓo, yá ə kɛ ni lɔi mɛ̨i. Ə pənə ə pa, Noe ə ɉon ə nɔ gələn ɉu. 10Lɔwɔ tɔ̨nɔ̨ tɛɛ pulu, ə pənə nwɔ̨nɔ̨ ə ɓo mą. 11Lii ə mo, yələwulii pɔ ɓə ə paa la, olivə tɛlin ə ɓo naa ɓa. Nąąlɔwai, Noe ə gɔlɔn gɛa yɛ ɲáɠaa daa too di kwənąn ɉu. 12Ə pənə nwɔ̨nɔ̨ ə nąą mąąkpɔn, lɔwɔ tɔ̨nɔ̨ tɛɛ pulu, ə ɓo nwɔ̨nɔ̨ donwələn tii ɓa, ə li, hvo kɛa pənə hvo pa.
13Noe kaa kwɛlan ə kɛ a kwɛlan nwun mɛ̨ida, kwɛlan dɔ̨nɔ̨, gwɛlan tii nwɔ ɲąnin dɔlɔɔ, voló dɔlɔɔ yələ, ɲá ə kpala kpɔ kɛa lɔi mɛ̨i tɛ̨ɛ̨tɛ̨ɛ̨. Noe ə gələn don ɉəɠə mɛ̨i, ə ɲɛ̨i hee lɔi mɛ̨i, nąą kəlee kpalaa. 14Ɲąnįn veelɛ nwɔ hvóló pow hveelɛ kɔ́w mɛ̨ihveelɛ yələ, lɔi mɛ̨i kpalaa kpɔ kɛa kɛ tɛ̨ɛ̨tɛ̨ɛ̨.
15Nąąlɔwai, Yálá yɛ Noe ɓa: 16«'Kulɔ kɛa gələn ɉu, yɛ́, ə́ nɛ̨ą, ə́ lon ɉinąą da di nɛ̨ąni. 17Ɉuwɔɠaa da nwɛ̨niɠaai kpɔ kɛ ə́ pɔ gələn ɉu, gəlee kulɔ di hala lɔi mɛ̨i nąą kəlee, di di kaa, di huwu ə ɓɛlɛ.» 18Noe ə kulɔ gələn ɉu, nɛ̨ą ə kulɔ, non ɉinąą di kulɔ da di nɛ̨ąni. 19Yili pulu, huwɔ kəlee ɉilɛ da ɉaa di kulɔ, da yiiɠaai kpɔ di kaa lɔi mɛ̨i.
20Noe ə haláá kulɔi ta pɛli Yai-Laa ɓa. Ə taatɛlɛɛ mąąhəɠɛɛɠaa da nwɛ̨ni mąąhəɠɛɛɠaa kəlee, da həɠə, ə gulɔ Yai-Laa ɓa a haláái da gəlee kələn. 21Ɉaláá tii Noe ə gulɔ ə nɛ̨ɛ̨, ə Yai-Laa liilaa. Yai-Laa yɛ gbɔwɔ ɓa: «Və́ kɛa pai lɔi nɛ̨ŋɛ̨n naai nu kan dúwɔ́ pələ mąą mɛ̨nį ɓa. Bələi mąn kpɛli di wɔ kiliŋąhiɛ hva kɛ la a nɛlɛɛ, ə gɔwɔ tɔɔ di lokolo yələ ɓa. Ɛlɛɛ, və́ kɛa pai yɛnɛ̨ɛ̨ nwun na pilii yɛ bələi ŋɛ̨i ŋį́ gɛ́ lai.
22«Bələi lɔ yɛnɛ̨ɛ̨ kaa pai lamui la,
tíi kɛɛ da mɔ̨nun deɛ,
wə́leen da kwɛlɛ,
hvóló laa teɛ da hamą lɔɔ,
yələ pɔɔ da, kpinį,
di hva kpɛɛ.»
Currently Selected:
Gɔwɔ tɔɔi 8: BKPG
Highlight
Share
Copy
Want to have your highlights saved across all your devices? Sign up or sign in
