Matie 5
5
PƐƐKU YEESU PƐƐKU VANNDA O PEMBEI COO-O (5-7)
Dɛnɛ kɛndɛ kpeekpeiyo
1Yeesu cɔu sɛ́lɛ́ bɛndoo, mó hel o pembei coo, mó cal. Mí kaandeŋaa ndɔa sɔɔnguu ndu ikɛi.
2Mó cua sɔɛi le nda pɛɛkoo, mó dimi aa:
Dɛnɛ kɛndɛ kpeekpeiyo
(Luke 6.20-23)
3«Dɛnɛ kɛndɔɔ co le vanaa tuisin tootoo o kɔlta ndalan nin-nda,
kani masale halataala len le co le nda.
4Dɛnɛ kɛndɔɔ co le vanaa co caŋndo-a,
kani a sɔlanin ɲɔɔloo.
5Dɛnɛ kɛndɔɔ co le vanaa vi kɔltan-nda,
kani a sɔlanin lɛŋnden kɛ́ɔ.
6Dɛnɛ kɛndɔɔ co le vanaa yeemɛi bii
le dɛnɛ sandaa mɛɛ yiaan
a kolɔɔ bii vana nuaa yɛ-a,
kani a pumnin.
7Dɛnɛ kɛndɔɔ co le vanaa tuinun vannda iɲíí-a,
kani a sɔlanin ɲííye tuinɔnndo.
8Dɛnɛ kɛndɔɔ co le vanaa dendu kɔltan-nda,
kani a canin Hala.
9Dɛnɛ kɛndɔɔ co le vanaa yɔngu kɔlɲuloo-a,
kani a sɔlanin veeloo aa cuavaa Hala-a.
10Dɛnɛ kɛndɔɔ co le vanaa nda co yɛlen tollo le dɛnɛ sandaa-a,
kani masale halataala len le co le nda.
11Dɛnɛ kɛndɔɔ vanin le niaa, telen nda yeownin niaa, mà tol niaa yɛlen, mà hɛɛnduu niaa sɔɔn vɔɔŋun súú-súù ka coo le ya-o. 12La naŋ kɔl mì la dɔwnun ɲaale, kani vɔ̀ngɔ̀ niaa vanin o bɔɔ o halataala. Kani lende nda tol vanaa-tɛɛngaa-diom Hala-a hiow niaa laci-a yɛlen ni.»
Hɛlle a ɲɛ-tengaa o ceendo coo
(Marke 9.50, Luke 14.34-35)
13«Hɛlle niaa co o lɛŋnden coo ni. Kɛ te yeelaa fula pɛ hɛlle, vɛ̀ɛ̀ vana mingi yɛ ndi yeeliaa? I niŋ ndɛ le ɲɛ-ɲɛ le, fɔ le ndi viovɔɔ o bɛ́ɛ̀, mì vannda nɛw ndi.
14Ɲɛ-tengaa ceendo niaa co ni. Kobi co o pembei coo-o nɔla vionnɔnndo le. 15Vana mɛndul fitinaa le ndu kumbɔɔ le, kɛ le ndu kɛsio o ɲɛ kɛsiaa lafitinaa coo, haliko mo teengiaa cɛiyo lenin le vanaa co lenin-nda kpow. 16Ɲɛ-tengaa niaa bɛnda mò tenga lende vannda o hɔl, haliko ma ce dɛnnda niaala kɛndɛlan, o kon mà biilu fuɲa niaa co o halataala-o.»
Peelɔn tɔŋndo
17«La yiyan tei maa tɔŋndo, te kon te sɔɔn vanaa-tɛɛngaa-diom Hala-a ya hin tɛɛmbuu ni. I hin le mun tɛɛmbuu le, kɛ le mun peeloo. 18I co niaa toɲaa dimul, te halataalaa a lɛŋnden le co vɔ pɛ, hali diomnde hiow dɔɔnanndo len, te kon te sɛva hiow dɔɔnanndo-o faŋannin o tɔŋndo coo le, háá mì mɛɛlula ɲɛ-ɲɛ la tiiya. 19Vana-vana tɛɛmbuu pɛ tɔŋ hiow dɔɔnanndo o tɔŋndan ndan tɛɛn-ndo o pilɛ, mò pɛɛku vannda tosaa maa ndu, vana kon ndu hiawnin dɔɔnanndo o masale halataala len nin ni. Kɛ vana kela pɛ lecoo, mò pɛɛku vannda lan biyɔɔ, ndu vanin vana bɛndoo o masale halataala len nin. 20Kani mì dimul niaa, te dɛnɛ niaa sandaa hiw dɛnɛ sandaa vanaa pɛɛkaa latɔŋnda a Faliisia le, mɛɛ la lueinin o masale halataala len nin te.»
Pɛɛkoo a kɔltuwvo o kɔɔ
21«La tuei maa mí ndíì dimulun sindɛ fuɲaa naa mamaa aa: ‹Dii vana le›, vana dii pɛ vanacieo, a kelu ndu iyama. 22Kɛ ya, i co niaa dimul: vana-vana tuulu pɛ kɔl a puapilɛ ndɔɔ, a kiolu ndu iyama. Vana dimul pɛ puapilɛ ndɔɔ aa: ‹A kindu kɔl te›, vanaa bɛndua kialu yaman lelɛŋndon-nda bɛnda mà cal o sɔɛi ndɔɛi coo. Vana dimul pɛ puapilɛ ndɔɔ aa: ‹Diɔmndo n co ni›, ndu bɛnda mò kɔɛ o ɲánndávàà. 23Lelan taa hin pɛ a sálà nɔmndo o fonda-loamaa-lasálàá, mà lo lon, mà yiyan maa puapilɛ nɔmndo nɔ tɛɛ nɔmndo o kɔl, 24mɛɛ mɛi-yɔ sálà nɔm kon o fonda-loamaa-lasálàá hɔl-ndɔ, mà kɔ toosiaa sɔɛi co nɔm ken tɛɛn niaa puapilɛ nɔm kon-nde. O kon kɔɔli, a hun soli niko sálà nɔmndo.
25Keleŋá sɛɛngian co nɔm tɛɛn niaa vanndo-o toosiaa telen niaa co vɔ nɛi-tɛɛn-ndo, yɔŋii o kɔ mal nɔm vana kialaa n'yamaa o ba, mì ndu hivi nɔm o kpalilnɔɔ lo, mì kpalilnɔɔ kɔ mal nɔm o kaasoo. 26A toɲa, mì dimul nɔm, hali tààngáà ndu pilɛ bɛɛ lonin yondo le fula nɔmndo lon te.»
Pɛɛkoo a suundaa o kɔɔ
27«La tuei maa mí ndíì dimin aa: ‹Suunda le.› 28Kɛ ya, i co niaa dimul: vana-vana tofa pɛ vanalanɔɔ tofa yeemɛi vɔɔndo, mɛɛ ndu cii suunda a vanalanɔ kon o kɔl ndɔɔ nin. 29Te hɔlte nɔmnde ba kɛndɛlen le co tosa ni ma del o pɔwlan nin, mɛɛ kala len, ma viow len polon. Kani o co fisa mi dialii nɔmnde ndii pilɛ i tambu a nɔm pila kpow viownɔnndo o ɲánndávàà. 30Te ba kɛndɛ nɔmndo co tosa ni ma del o pɔwlan nin, mɛɛ kiolu ndu, ma viow ndu polon. Kani o co fisa mi dialii nɔmnde ndii pilɛ i tambu, a nɔm pila kpow kɔlan o ɲánndávàà.»
Pɛɛkoo a nɔ piɔlɛiyo o kɔɔ
(Matie 19.9, Marke 10.11-12, Luke 16.18)
31«Mí ndíì dimin maa vana kɛɛ pɛ laa ndɔ, mɛɛ o yɔngu ndu sɛbɛ pialaa nɔu. 32Kɛ ya, i co niaa dimul: vana-vana kɛɛ pɛ laa ndɔ, te o co yɛ mò suunda le, ndu vem laa ndɔ kon suundaa. Vana cua yɛ pɛ vanalanɔ kɛyan nda pɔnɔ ndɔ-o o nɔ̀u nin, mɛɛ vana kon suunda.»
Pɛɛkoo a mɛnanndo o kɔɔ
33«Mí la tuɛi vɛlɛ maa mí ndíì dimulun fuɲaa naa mamaa aa: ‹Mɛnan te! Kɛ kɛɛ le sɔɛi n mɛnan coo-e peeloo le.› 34Kɛ ya, i co niaa dimul: la mɛnan te. La mɛnan a halataalaa le, kani lon co ɲɛ-calaa lemasa Hala-o ni. 35La mɛnan a lɛŋnden te, kani len le co ɲɛ kɛsiaa n'pelu ndɔɔ ni. La mɛnan a Yerusalɛm te, kani kobi masa bɛndoo co kon ni. 36La mɛnan vɛlɛ a bolle niaalen te, kani la tiwba yiinnde niaalen lepilɛ bɛɛ mingio lehumbu, te kon te le tiŋi le. 37Sɔɛi niaa cɛl pɛ aa ‹Oi› ndi lo lende, i niaa dimi pɛ aa ‹Ɛ-ɛ› ndi lo vɛlɛ lende. I kɛ́-kɛ̀ vana handu nin pɛ o kon kɔɔli, Vana vɔɔndo o ba ken fula ni.»
Pɛɛkoo a màá dɛnɛ vɔɔndo mingio o kɔɔ
(Luke 6.29-30)
38«La tuei maa mí ndíì dimin aa: ‹Te vanndo pɛl pɛ vanndo hɔlten, ndu bɛɛ a piɔl ndu hɔlten. Te vanndo bɛŋi pɛ vanndo ciŋnde, ndu bɛɛ a bɛŋi ndu ciŋnde.› 39Kɛ ya, i co niaa dimul: la simul vanaa kɔlvesɛiya le. Te vanndo lɔɔ pɛ nɔm kpaŋii ba kɛndɛi, mulul ndu vɛlɛ kpaŋnde pilɛi. 40Te vanndo yeema pɛ le kɔɔsɔɔ a nɔm le doma nɔm lebɛngoo cuaa, mal ndu mò cua vɛlɛ doma nɔm bɛndoo. 41Te vanndo baŋ pɛ nɔm le kɔla piasa vàá pilɛ niaa ndu, mɛɛ cɛl mì la kɔɛ kɔla piasa vàála tiɔn. 42Ke vana piɛi nɔm-ndo, tuŋ vana yeema le nɔm ɲɔɔ yowvo o ba-o le.»
Le yaamɔɔa kaolaa
(Luke 6.27-28,32-36)
43«La tuei maa mí ndíì dimin aa: ‹Kaola vana kaola nɔm-ndo, mà tol vana tol nɔm yɛlen-ndo leyɛ.› 44Kɛ ya, i co niaa dimul: la kaola yaamɔaa niaa, la piɛi Hala le vanaa co niaa saangiaa a niaa yɛlen tollo-a#5.44 Sɛbɛlan lapum la cɔɔlu diomndan ndan fondaa ho: «la dɔw vanaa co niaa mɛɛniaa-a duaa, la tosal vanaa niaa nɛinun-nda dɛnɛ kɛndɔɔ». 45O kon, la vanin cuavaa fuɲa niaa co o halataala-o-a. Kani o soli paalen le vanaa vɔɔnda a le vanaa kɛndɛa, mó tuisi piɔɔ le vanaa sandaa a le vanaa sendu le-a. 46Kani te la kaola pɛ vanaa kaola niaa-a daama, vɔ̀ngɔ̀ yɛɛ nɛ niaa sɔ̀là yɛnin o kon? Vɛ̀ɛ̀ o co lende le vanaa biyaa mulua bɛɛ tosa le? 47Te o va pɛ maa puapilɛa niaa daama niaa yìl ni, ɔ́ɔ̀ dɛnɛ bɛndu niaa tosa o kon-ndo? Vɛ̀ɛ̀ o co lende le vanaa sina Hala le-a bɛɛ a tosa le? 48Lelan, niaa la peelun mɛɛ fuɲa niaa co o halataala-o peelun yɛ.»
Currently Selected:
Matie 5: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
