Nsaŋ 8

1Mí Yeesu kɔa o Pembii Oliviei coo. 2Kɛ paalen siɔu dɔ́ɔ́, mó muungu o Cɛi-Hala-o nin, mí vannda kpow a hun o ndu lo. Mó cal le nda pɛɛkoo. 3O kon mí vanaa pɛɛkaa latɔŋnda a Faliisia hun a vuɛɛn nda bii o suundaa-o, 4má simi ndu vannda o hɔl, má dimul Yeesu aa: «Kɔɔfa, o suundaa nda bii cuaa hoo ni. 5Nduyɛ o tɔŋndo nin, Moise dimul naa le vanalanɔ vaa nuaa lou viiyo a powtan háá mo vi: kɛ nɔm yɛ, vɛ̀ɛ́ n yiyan yɛ?»

6Le ndu kɔlɔɔ solio nda va dimi kon ni, le mɛɛ ndáà kɔɔsa a ndu o lasondo yɛ. Kɛ mí Yeesu tundun, mó va sɛvaa lɛŋ a isu. 7Le tùú nda va ndu baŋnɔnndo ɲunaa-o, mó cua hɔlla, mó dimul nda aa: «Vana co niaa tɛɛn o nɔ haki loo cua pow tasoo mò vɛ ndu.» 8O kon kɔɔli, mó tundun vɛlɛ sɛvaa lɛŋ. 9Ndáà tueyɔɔ lende, má muungun a pilɛn-pilɛn, kandɔɔ a kaasonnda. Mí Yeesu lo nda vuɛɛn kon kpé, vuɛɛndo va isisi o lawvo tɛɛn. 10O kon mí Yeesu can, mó ɲuna ndu aa: «Vuɛɛndo, ɔ́ɔ̀ vanaa lɔlu nɔm-nda? Vana-vana yaala nɔm te?» 11Mó muli aa: «Vana bɛɛ Maalii.» Mí Yeesu dimul ndu aa: «Ya bɛɛ, i yaalanin nɔm te, kɔnnun, kɛ kɔ tosa lɛ haki le.»

Yeesu co ɲɛ-tengaa le ceendo ni

12Mí Yeesu soaa vɛlɛ o nda lo, mó dimul nda aa: «Ya co ɲɛ-tengaa ceendo ni, vana del-la kɔɔli pɛ, ndu kela o maɲum nin te, kɛ o sɔla ɲɛ-tengaa cindaa.» 13O ken coo Faliisia dimul ndu ni aa: «Le nɔm pila kínɛí n co seilen tɛndaa ni, nduyɛ ɲɛ n co vannda pɛɛkoo-o co toɲa le.» 14Mí Yeesu mulul nda aa: «O va bɛɛ aa seile nile ya pila len ya co tɛndaa ni, toɲaa le co ni, kani i sina ba ya fula-o, i sina nɛɛ ya co kɔlan-nda. Kɛ niaa yɛ, la sina nɛɛ ya fula-a le, la sina vɛlɛ nɛɛ ya co kɔlan-nda le. 15Niaa, o vanacieeyɛi nin kínɛí niaa co vannda yamɛi kiolɔɔ ni. Kɛ ya yɛ, i co vana-vana iyama kiolɔɔ le. 16Te i kelu yɛ pɛ yamɛi, yamɛi toɲɛi ya kialu ni, kani i co ya pilɛ le, kɛ Pua vem ya-o co ya ikɛi. 17O co o sɛvaa o tɔŋ niaa nin maa seile vanaa ŋiɔn le tiw. 18Ya, i co seilen timbio a ya pila o kɔɔ, mì Pua vem ya-o va seilen timbio a ya o kɔɔ.» 19O kon má dimul ndu aa: «Kuɛɛ Fuɲa nɔm co yɛ?» Mí Yeesu muli aa: «La sina ya le, la sina vɛlɛ Fuɲa nuu le. Te niáà sina ya pɛ, la va Fuɲa nuu sina.»

20Telen Yeesu va vannda pɛɛkoo o Cɛi-Hala-o nin-ndo o dimi sɔɔn mun ni, nɛɛ nda vow bolofaa-a. Vana-vana bii ndu le, kani telen ndɔɔ ndóò tiiya vɔ le.

«La nɔla kɔlan nɛɛ ya co kɔlan-nda le»

21Mí Yeesu dimul nda vɛlɛ aa: «I co lakɔnnɔn mì la koma nuwviaa ya, mì la vi o haki niaa nin. La nɔla kɔlan nɛɛ ya co kɔlan-nda le.» 22Mí Yuifia dimi aa: «Mò va maa ndu pila co diinɔn ni, kani o co dimio maa la nɔla hunɔɔ nɛɛ ya co kɔlan-nda le?» 23Mí Yeesu mulul nda aa: «Lɛŋ nanu niaa fula ni, ya yɛ, coocoo ya fula ni. O ceendo ho nin niaa fula ni, ya yɛ i fula o ceendo ho nin te. 24Lelan ya dimi ni maa la vunin o hakila niaalan nin. Kani te la laalan maa Ya co le, la vi o hakila niaalan nin.» 25Má ɲuna ndu aa: «Nɛ̀ɛ́ n co yɛ?» Mí Yeesu mulul nda aa: «Kabi o tasendɔ, vana ya dimul niaa maa ndu ya co ni-o, ndu ya co ni. 26I nɔ sɔɔn taw le dimio a yaman bɔɔ-bɔɔ kiolɔɔ a niaa o kɔɔ. Kɛ vana toɲaa vana vem ya-o co ni, sɔɔn ya tuei ndu o sondo-on, mun ya co ceendo tiiyallo ni.»

27A bii bila maa a Pua o kɔɔ le o va nda dimul kon te. 28O kon mí Yeesu dimul nda aa: «Telen niaa heelunin Po vanacieo-vo, la sinanin vana ya co-o, mì la sina maa i co ɲɛ-ɲɛ tosa a ba ni le, kɛ mì la sina maa sɔɔn Pua pɛɛku ya-on ya co dimio ni. 29Vana vem ya-o co ya ikɛi, o mel-la ya pilɛ kpé le, kani ɲɛ hɛnan ndu-o ya co tosaa lɔ́ɔ́-lɔ́ɔ̀ ni.» 30Telen Yeesu va kon sɔɛi-yo, mí vannda taw a laalan ndu.

Vanaa co o ba ndaa coo-a a cɛa

31O kon mí Yeesu dimul Yuifia ndáà laalan ndu-a aa: «Te la lo pɛ sɔɛi nii biyɔɔ, mɛɛ kaandeŋaa nia lekɛ́ndɛi niaa co ni, 32la sinanin toɲaa, mì toɲaa soli niaa o cɛlen nin.» 33Má mulul ndu aa: «Cuavaa-imamaa Abraham-nda naa n co ni, lepilɛ bɛɛ n tosa lecɛ vana o ba le, le yɛɛ n co yɛ naa dimullo maa mì n fula o cɛlen nin?» 34Mí Yeesu mulul nda aa: «I co niaa toɲaa dimul kpendekele, vana-vana tosa pɛ hakio, ndu siŋnun cɛ hakio. 35Nduyɛ, cɛɔ lò o yungulen nin le lɔ́ɔ́-lɔ́ɔ̀ le, po vialaa yɛ ndu, mò lo lon le lɔ́ɔ́-lɔ́ɔ̀. 36Lelan te Poo soli pɛ niaa o cɛlen nin, la sɔla hɔ́ɔ́yɛi kpeekpei-ye. 37I sina maa cuavaa-imamaa Abraham-nda niaa co ni, kɛ la co nɛilan nuwviaa le ya diyɔɔ, kani sɔɔn nun co niaa hɛnan te. 38Nduyɛ, ɲɛ ya ce o Pua lo-o, ndu ya co niaa dimullo ni. Kɛ sɔɔn niaa tuei o fuɲa niaa lo-on niaa co tosaa ni.» 39Má mulul ndu aa: «Abraham co fuɲa naa ni.» Mí Yeesu dimul nda aa: «Te cuavaa Abraham-nda niaa co ni, mɛɛ la tosa dɛnndan maa Abraham. 40Kɛ mɛɛ niaa cɛn nin nɛilan nuwviaa le ya diyɔɔ nuaa yɛ, ya vana co niaa toɲa ya tuei o Hala lo-o dimullo-o. Abraham tosa dɔ́ɔ́ sɔɛi vaa lende le! 41Dɛnnda fuɲa nia lan niaa co tosaa ni.» Má dimul ndu aa: «N co cuavaa sámá le. Fuɲa ndu pilɛ kpé naa n nɔ ni, Hala pɛɛn.» 42Mí Yeesu dimul nda aa: «Te ndóò va pɛ maa Hala co Fuɲa nia ni, la va ya kaola, kani o Hala nin ya fula ni mí hun. O co a ba ni le ya hin te, ndu vem ya ni. 43Le yɛɛ niaa co yɛ kɛɔ sɔɛi nii bila biyɔɔ? Kani la yeema mì la tuei sɔɔn nun te. 44Masa ɲinaa vɔɔnda co fuɲa nia ni, nduyɛ hɛnan fuɲa niaa-o niaa yeema tosaa ni. Kabi o tasendɔ, vana diuvaa n'vanndo o yɔŋnun ni, o sim lɔ́ɔ́-lɔ́ɔ̀ o toɲaa coo le, kani toɲa co ndu nin te. O va pɛ keiyo còòlan dimio, ken vil vana celen te, kani vana lacòòvaa a fuɲaa còòlan o co ni. 45Ya niko, le tùú ya co toɲaa dimio-o niaa co ya kɛɔ laalanndo ni. 46O niaa tɛɛn, nɛ̀ɛ́ cɔm yɛ ya maa i tosa hakio? Te toɲaa ya co yɛ dimio ni, le yɛɛ niaa co yɛ niko ya kɛɔ laalanndo? 47Vana co vana Hala-o-o, nilan o yaŋ o sɔɛi Hala-e ni. Niaa la yeŋ lani le, kani la co vanaa Hala le.»

Yeesu nda Abraham

48Mí Yuifia mulul ndu aa: «N nɔ manɔa di le dimio maa Samarinɔɔ le n co, mì ɲina vɔɔndo va nɔm nin te?» 49Mí Yeesu muli aa: «Ɲina vɔɔn co ya nin te, kɛ Fuɲa nuu ya co bɛɛlen keo ni, mì niaa va ya bɛ̀ɛ̀lan tɛɛmbuuo. 50Ya, o co biilu ni ya pila le ya co nuwviaa le, vana pum co ndu nuwviaa ni, ndu kialu yamɛi ni. 51I co niaa toɲaa dimul kpendekele, vana bii pɛ sɔɔn nun, ndu vi le.»

52Mí Yuifia dimul ndu aa: «N sina nihau maa ɲina vɔɔndo co nɔm nin ni. Abraham vi, vanaa-tɛɛngaa-diom Hala-a bɛɛ co hau ciee-piɔ́m, nɔm hin naa dimullo maa vana bii pɛ sɔɔn nɔmndon, o vinin te. 53Mò va maa nɔm hiow Abraham fuɲa naa vi-o ni? Vanaa-tɛɛngaa-diom Hala-a bɛɛ a vi. Nɛ̀ɛ̀ nɔm pila co yɛ niko cɔnnɔnndo?» 54Mí Yeesu muli aa: «Te ya pila sangalan pɛ, mɛɛ biilu nuu co ɲɛ-ɲɛ le. Fuɲa nuu bɛnda le ya biiloo ni, o niaa co kon dimio maa ndu co Hala niaa ni-o pɛɛn! 55Kɛ la sina ndu le. Ya yɛ, i sina ndu. Te i dimi pɛ maa i sina ndu le, i siŋnun ɲɛ pilɔɔ naa niaa, vana lacòòvaa pɛɛn. Kɛ i sina ndu, i co sɔɛi ndɔɛi biyɔɔ. 56Mí Abraham fuɲa nia dɔawnun ɲaale, kani ndóò nɔ o kɔl maa ndóò canin paale ya va hunɔɔ len, nduyɛ mó ca len, mó dɔawnun ɲaale taw.» 57Mí Yuifia dimul ndu aa: «A nɔ vɔ bɛɛ vɔsila beleŋuɛɛnu le, a dimi aa má ca Abraham?» 58Mí Yeesu dimul nda aa: «I co niaa toɲaa dimul kpendekele, lɔ́ɔ́ pá mi Abraham fula, ya i va nin.» 59O kon, má cua powtan le ndu viiyo. Kɛ mí Yeesu viannun, mó fula o Cɛi-Hala-o nin.

Currently Selected:

Nsaŋ 8: BKG

Highlight

Copy