Nsaŋ 9

Yeesu síngí vana velun o sumɛiyo-o

1Yeesu lo hiovɔɔ, mó ca langbanɔɔ pum, o sumɛiyo o velun ni. 2Mí kaandeŋaa ndɔa ɲuna ndu aa: «Kɔɔfa, le yɛɛ nɛ langbanɔɔ ho velun yɛ o sumɛiyo? Mò va maa le haki vanaa velu ndu-a o suma ni baa le haki ndu pila tosa-o?» 3Mí Yeesu muli aa: «O co le haki ndɔ ndu pila, te kon te le haki vanaa velu ndu-a le o suma le, kɛ haliko mi kpaaya Hala-o cɔmnun o ceen ndɔɔ nin. 4Mɛɛ mì n tosa baala vana vem ya-o telen paalen le co vɔ-o. Ɲumndan ma tol pɛ, vana nɔla baalaa le. 5Telen ya co o ceendo coo-o, ya co ɲɛ-tengaa ceendo ni.» 6Ndóò ciiyo dimio lende, mó tufu lɔluan lɛŋ, mó linda puuloo a man. O kon mó sui vana sumɛi kon looli kalaa o hɔltan coo, 7mó dimul ndu aa: «Kɔ pulun o fonda mamɛnndo Siloe». Siloe kon co dimio ni aa: «Viomɔɔ». Mí vana sumɛi kon kɔa lon, mó kɔ pulun, telen o va muungoo-o, mó ca. 8Mí vanaa nda cal nɛɛ pilɛ-a a vanaa ce ndu paandu ɲɔɔn piɛiyo-a va ɲunaa aa: «O co langbanɔɔ ho le ndóò cal le vannda ɲɔɔn piɛiyo le?» 9Mí a pum va dimio aa: «Ndu kpeekpei co hoo ni!» Mí a tiŋ nda va sɛɛngiaa aa: «O co ndu le, velanndo ni.» Kɛ mí vana sumɛiyo pila va dimio aa: «Ya kpeekpei ni!» 10O kon má ɲuna ndu niko aa: «Vɛ̀ɛ̀ hɔltan la looku yɛ nɔm kumbin?» 11Mó muli aa: «Langbanɔ nda veelu hoo aa Yeesu-o linda puuloo ni, mó sui ya o hɔl, mó dimul-la maa ya kɔ pulun Siloe. Mí kɔa lon, mí pulun, o kon ya ce nuaa ni.» 12Má dimul ndu aa: «Kuɛɛ langbanɔ kalaa co yɛ?» Mó muli aa: «I sina le.»

Faliisia ɲuna langbanɔ sengu kon-ndo

13Má kɔa a langbanɔ sɔla kon siongɔɔ-o o Faliisia lo. 14Nduyɛ, o paale pɛngiaalen coo Yeesu ndóò linda puuloo lende ni, mó kumbi langbanɔɔ hɔltan. 15Mí Faliisia bɛɛ ɲuna ndu mɛɛ o looku cɔ yɛ. Mó dimul nda aa: «Loolio o sui ya o hɔltan coo ni, mí pulun, mí ca.» 16Mí vannda pum a va dimio Faliisia tɛɛn aa: «Langbanɔɔ ho co vana Hala le, kani o ke paale pɛngiaalen lebɛɛ le.» Mí a pum nda va dimio aa: «Vɛ̀ɛ̀ vana lahakio ndu looku yɛnin dɛnnda kaamaala vaa nuaa tosa?» 17O kon má muungu, má ɲuna vɛlɛ vana va kon o sumɛiyo-o aa: «Nɔm niko, vɛ̀ɛ́ n yiyan yɛ a langbanɔ kumbi nɔm hoo hɔltan-ndo?» Mó muli aa: «Vana-tɛɛngaa-diom Hala-o o co ni.»

18Kɛ Yuifia laalan maa o sumɛi le langbanɔ kon va mó ca le few. Le hee, má veelu vanaa po kalaa, 19má ɲuna nda aa: «Vɛ̀ɛ̀ po niaa dimi maa o sumɛiyo niaa velu ndu ni-o co hoo ni? Vɛɛ o looku yɛ niko cɔu?» 20Mí yungu po kon a muli aa: «Naa n sina maa po naa ni, o sumɛiyo o velun ni. 21Kɛ n sina mɛɛ o looku cɔ yɛ le, hali vana kumbi ndu hɔltan-ndo, n sina ndu le. La ɲuna ndu pila, o co lɛ cuaambɔ le o co le, o cɔmnin niaa mɛɛ dɛnɔɔ tosalan ndu yɛ.» 22Vanaa po kon a suu lende fondo le, kani ndáà nɔ siòònde a Yuifia, kani mí Yuifia ndáà cɛlan maa vana-vana dimi pɛ kpendekele maa Yeesu co Krista ni, a soli ndu o cɛi lekaando nin. 23Lelan vanaa ndɔa dimi ni aa: «La ɲuna ndu pila, o co lɛ cuaambɔ le.»

24Mí Faliisia veelu vɛlɛ langbanɔ va kon paandu o sumɛiyo-o, má dimul ndu aa: «Naa n sina maa vana lahakio vana singi nɔm kon-ndo co ni, lelan dimul naa toɲaa le Hala.» 25Mó mulul nda aa: «Ya ya, i sina le te vana lahakio o co ni. Sɔɛi ndii pilɛ kpé ya sina ni: vana sumɛiyo ya va paandu ni, kɛ nihau, i co cɔu.» 26Má ɲuna ndu aa: «Yɛɛ o yɔŋ yɛ nɔm? Vɛɛ o looku yɛ nɔm hɔltan kumbi?» 27Mó mulul nda aa: «I dimul nihau niaa ndi, la yeŋ ya lani le. Le yɛɛ niaa yeema yɛ vɛlɛ ndi tueyɔɔ? Mò va maa yeemɛi niaa bɛɛ nɔ le siŋnɔnndo kaandeŋaa ndɔa ni?» 28Má yeow ndu, má dimi aa: «Nɔm co kaandennɔ ndɔɔ ni. Naa naa, kaandeŋaa Moise-a naa n co ni. 29N sina maa mí Hala ndóò soaa o Moise lo, kɛ hoo ndu, n sina nɛɛ o fula le!» 30Mí langbanɔɔ mulul nda aa: «Ken kpeekpei co dɛnɛ kɔndɔfillo ni, la sina nɛɛ o fula le. Nduyɛ, ndu kumbi ya hɔltan ni. 31N sina maa Hala mulul vanaa lahakia piɛilen te. Kɛ vana biilu Hala pɛ mo tosa hɛnan ndɔɔ, o mulul vana kon piɛilen. 32Lepilɛ bɛɛ n tui-yɔ maa vanndo kumbi vana velun o sumɛiyo-o hɔltan te. 33Te langbanɔɔ ho ndóò ve vana Hala-o le, ndóò nɔla nin ɲɛ-ɲɛ tosaa le.» 34Má mulul ndu aa: «Nɔm pila kpow, o hakio nin n velun ni, nɔm kon hun naa pɛɛkoo ni!» Má ɲindu ndu o bɛ́ɛ̀.

Suma kɔllo

35Mɛɛ Yeesu tuɛi maa a cii ndu soli o bɛ́ɛ̀, mó komal ndu, mó ɲuna ndu aa: «A laalan pá Po vanacieo?» 36Mí langbanɔɔ muli aa: «Nɛ̀ɛ́-nɛ̀ kon Maalii, haliko mi laalan ndu.» 37Mí Yeesu dimul ndu aa: «A ce ndu, ndu co hoo sɔɛi o nɔm ndo ni.» 38Mó dimi aa: «I laalan, Maalii». O kon, mó baŋ vulan Yeesu o labɛngunin. 39Mí Yeesu dimul ndu aa: «I hin le yamɛi kiolɔɔ o ceendo ho coo, haliko mi vanaa sumɛiya ce, mì vanaa co cɔu-va suma.» 40Faliisia va ndu ikɛi-ya pum tueyɔɔ sɔɔn mun, má ɲuna ndu aa: «Mò va maa naa bɛɛ vanaa sumɛiya naa n co ni?» 41Mí Yeesu mulul nda aa: «Te niáà va pɛ vanaa sumɛiya, niáà nɔnin haki le. Kɛ la co nin dimio aa: ‹N co cɔu:› lelan hakio co niaa kuee.»

Currently Selected:

Nsaŋ 9: BKG

Highlight

Copy