Nsaŋ 16

1Mí Yeesu hiaw laci a nda dimullo aa: «Mun kpow niaa dimullo, haliko la mal nɛiyo le. 2A solinin niaa o cɛila lekaanndan nin. Hiovɔɔ o kon coo, telenndo pum tiiyanin, vanaa vanin niaa diwvo-a vanin yiyanndo maa baala Hala-o nda vanin tosa kon lende ni. 3A tosanin ken le tùú nda kɛɛ ya a Pua sinaa-o. 4I co niaa ndi dimul, haliko te telen kon hun tiiya pɛ, la loonun maa yáà cii nin niaa ndi dimul.»

Vali Hala Kɔl-Diandaa

«I yala niaa ndi dimul kabi o tasendɔ le, kani ya pila va niaa ikɛi. 5Nihau, o vana vem ya-o lo ya co kɔnndan ni, vana-vana co yɛ dɔ́ɔ́ ɲuna le nɛɛ ya co kɔlan-nda le! 6Kɛ le mɛɛ ya dimul niaa lende yɛ kɔlta niaalan la co o sangaa nin ni. 7Kɛ nduyɛ, toɲaa ya co niaa dimullo ni: o co fisa le niaa mì kɔɛ, kani te i koe le, vana ɲɔɔlaa hinnin o niaa lo le, kɛ te i kɔɛ pɛ, i kɔ yɔŋ niaa ndu. 8Telen o hunnin-ndo, o cɔmnin vanndacieea o ceendo ho coo maa a co o pɔwlan nin a dɛnɛ hakio o kɔɔ, a dɛnɛ sandei o kɔɔ a á dɛnɛ yamɛi kiolɔɔ o kɔɔ. 9A dɛnɛ hakio o kɔɔ, kani a laalan ya le. 10A co vɛlɛ o pɔwlan nin a sandei o kɔɔ, kani o Pua lo ya co kɔlan ni, la ci lɛnin ya le. 11A co o pɔwlan nin a yamɛi o kɔɔ, kani yamɛi vana co masalen tosaa o ceendo ho coo-o cuu kiolɔɔ.

12I nɔ vɔ sɔɔn taw le niaa dimullo, kɛ la nɔla vɔ mun bila biyɔɔ sunsun te. 13Telen Kɔl toɲaa hunnin-ndo, o cɔmnin niaa dɛnndan kpow o toɲaa nin, kani sɔɔn o diminin-ndon fulanin o ndu pila nin te, kɛ o dimulnin niaa sɔɔn o tuɛinin-ndon kpede, mò dimul niaa dɛnnda hun tosannin-ndan. 14O biilunin ya, kani sɔɔn o sɔlanin ya o ba-on o tɛɛngulnin niaa ni. 15Ɲɛ-ɲɛ Pua nɔ, le ya o co ni, lelan ya dimi ni maa sɔɔn o tuɛinin ya o sondo-on o tɛɛngulnin niaa ni.»

Mɔnɛi siŋnunnin ɲaaloo

16Mí Yeesu dimul vɛlɛ kaandeŋaa ndɔa aa: «O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.» 17Mí kaandeŋaa ndɔa pum dimulan aa: «Ɔ́ɔ̀ kɔlɔ sɔɛi ndɔɛi he aa: ‹O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.› Te kon te aa: ‹I co lakɔ o Pua lo›. 18Kɔlɔ yɛɛ co yɛ ‹ɲɛ-pɔmbɔ› o co kon dimio-o? N co sɔɛi ndɔɛi he bila biyɔɔ le few!» 19Yeesu sinaa maa a yeema le ndu ɲunaa, mó dimul nda aa: «Mò va maa o sɔɛi ya dimi-e coo niaa co ɲuunianndo le kɔlɔɔ sinaa nuaa ni: ‹O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.› 20I co niaa toɲaa dimul kpendekele, la caŋnin mì la cɛɛŋun, mì ceendo ndu dɔwnun ɲaale. Mɔnɛi biinin niaa, kɛ mɔnɛi niɛi ken siŋnunnin ɲaaloo. 21Telen vialaa tiiya pɛ le vanalanɔɔ, mɔnɛi bii ndu le telen ndɔ tiiya-o, kɛ te o velu pɛ hɔ́ɔ̀, o loonun ndɛ a ɲɛ nɛyaa kei ndu coo-o le. Kani o co va a ɲaaloo le vanaciee yoomaa o velu-o. 22Lende koni, niaa bɛɛ, mɔnɛi co niaa o lakɔl sunsun, kɛ i canin niaa vɛlɛ, mì kɔlta niaalan la dɔwnun ɲaale, vana-vana nɔlanin ɲaale niaa poonda le.

23Paale len, la ɲuna lɛnin ya isɔɔ oo isɔɔ le. I co niaa toɲaa dimul kpendekele, ɲɛ niaa piɛinin Pua o diola nilan-ndo, o kenin niaa ndu. 24Haa hau, la piɛi-yɔ ɲɛ-ɲɛ o diola nilan te. La piɛi mì la sɔla, haliko mi ɲaale niaa peelun.»

Yeesu nɔla ceendo

25O talelan nin ya soo o niaa lo ni. Kɛ telen co tiiya, i suu lɛnin o niaa lo o latale nin te, kɛ i dimulnin niaa sɔɔn a Pua o kɔɔ kpendekele. 26Paale len, la piɛinin Pua o diola nilan, i dimi lɛnin maa i co Pua piɛi le niaa le, 27kani Pua pila kaola niaa le kaola niaa kaola ya, mí la laalan maa o Pua lo ya fula ni-o. 28O Pua lo ya fula ni, mì hun o ceendo coo. Sunsun, i co faŋan o ceendo coo, mì muungu o Pua lo. 29O kon mí kaandeŋaa ndɔa dimul ndu aa: «A soo nihau válán o naa lo, a suu o latale nin te. 30N síná nihau maa a sínà dɛnndan kpow, hali mi vana ɲuna lɛhau nɔm te, lelan n laalan maa o Hala lo n fula ni.» 31Mí Yeesu ɲuna nda aa: «Vɛ̀ɛ̀ la laalan nihau? 32Telen co hunɔɔ tiiya, o cuu yɛnin bɛɛ tiiya, mì la sɛŋin, mì vana-vana kɔɛ kpengii ndɔ, mì la mɛi ya ya pilɛ kpé. Kɛ i co ya pilɛ le, kani Pua co ya ikɛi. 33Hee kpede niaa dimullo, haliko mi la sɔla kɔlɲuloo o ya nin. La sɔlanin sangaa o ceendo coo, kɛ la vu n'dial te, ya, i nɔla ceendo.»

Currently Selected:

Nsaŋ 16: BKG

Highlight

Copy