Osee 1
1
1Sɔɛi Mɛlɛka dimul Osee po Beeri-o-e yɔŋnun hee ni. O telen kon Osias, Yotam, Ahas a Esekia kei masalen tosaa o tàndá Yuda-o coo ni. Mí Yeroboam po Yoas-o ndu va masalen tosaa Israɛl.
Yungule vana-tɛɛngaa-diom Hala-o
2Nuaa Mɛlɛka kei a Osee ni mó kandu sɔɛi o vana ndɔa lo. Mí ndu Mɛlɛka dimul Osee aa:
«Kɔ yil vanalanɔ suundɛiyo o nɔ̀u nin,
cuavaa niaa vialunin niaa ndu-a,
cuavaa vanalanɔ suundɛiya nda vanin ni.
Kani vannda ha o lɛŋnden nden nin,
a luɛi o suunda soolaa n'piɔmndo,
má mulul ya Mɛlɛka kɔɔ.»
3O kon, mí Osee kɔa, mó yil Komɛr cua Diblaim-ndo o nɔ̀u nin. Mó vilul ndu hɔ́ɔ́ piaandoo. 4Mí Mɛlɛka dimul Osee aa:
«Ke ndu diolan aa Yisreɛl.
Kani o lo ɲɛ-pɔmbɔ cobe mì cɛn a yungu Yehu-o,
le vanaa nda diw Yisreɛl-la,
mì tɛɛmbuu masalen Israɛl kpow.
5Paale len, i tɛɛmbuunin kpaaya
vanaa cɔwva Israɛl o bóllo Yisreɛl nin.»
6Mí Komɛr cua vɛlɛ folio, mó vialu hɔ́ɔ́ laandoo. Mí Mɛlɛka dimul Osee aa:
«Ke ndu diolan aa Lo-Ruhama (kon co dimio ni aa «Kaolan te»).
Kani i lonin cuavaa Israɛlla koalaa tuŋ te,
i ve lɛnin nda hakio malɔɔ tuŋ te!
7Kɛ i lonin Yudaa kaolaa tei, mì ciindiaa nda, ya Mɛlɛka Hala ndaa. O venin a kpaasiaa le, o venin a mɔɛi cɔw le, o venin a cɔw le, o venin a n'so, o venin vɛlɛ a vanaa ɲaanun o soa coo-a le ya ciindiaanin nda.»
8Mɛɛ nda hiwnun Lo-Ruhama («Kaolan te») labɛngu, mí Komɛr cua vɛlɛ folio, mó vialu hɔ́ɔ́ piaandoo. 9Mí Mɛlɛka dimul Osee aa:
«Ke ndu diolan aa Lo-Ammi (kon co dimio ni aa «Co-Yungu-Ni-Le»).
Kani niaa Israɛlla, la co lɛ yungu ni le,
ya bɛɛ, i ve lɛnin ɲɛ-ɲɛ niaa le.»
Currently Selected:
Osee 1: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
