Daniɛl 12

Dɛnɛ yɔŋnunnin o palɛi mɛɛlɛi-yo

1«O telen kon nin, Misɛl cannin, Misɛl kon pɛɛn, o co kuubanɔ mɛlɛkaa-o, o co yungu nɔmndo ikɛi le nda mandaa-o. Palɛi ken vanin bɔɔ palɛi sanga bɛnduei. Kabi vanacieo cɔwnun, háá telen kon, sanga vaa lende yɔŋnun-ndɔ le. Kɛ yungu nɔmndo sɔlanin baŋaa. Vanaa diola ndalan la co lasɛvaalan o sɛbɔɔ nin-nda cindanin. 2Vanaa co o lɔan o sɛilan nin-nda taw a tendulnin. A pum le yoomu fɛɛn-fɛɛndo, a tɔ̀a le siɛmbulan a sanga bɛɛ tambɛi fɛɛn-fɛɛndo. 3Vanaa hiow kɔlkaloo-a tenganin a naŋɔɔ mɛɛ halataalaa tenga nuaa yɛ. Vanaa cɔm vannda nɛi dɛnɛ sandaa ma pɛɛku nda ndu-a diandunin le fɛɛn a fɛɛn maa loeon o halataala.

4Nɔm Daniɛl-lɛ, mandan sɔɔn mun o kɔl kpíŋ mà kinda sɛbɔɔ, mà yikpa ndu kpiliki háá o palɛi mɛɛlɛi. Vannda taw a pɛɛkunin ndu, mì dɛnɛ nda sinaa kui taw.»

Sɔɛi viannan-nde

5«Ya Daniɛl, i va tofaa, mí ca mí vanaa celen fula nda ŋiɔn, a va isisi o kɔngɔla tiɔnnda pee bɛndoo coo. 6Mí o pilɔɔ ɲuna langbanɔ va a kola keesoo lekɔɔ mó va isisi o peo coo kɛ o pilan mɛnndan too aa: ‹Lɔ́ɔ́ kuɛɛ dɛnnda kɔndɔfiltan-ndan la cuu yɛnin?› 7Mí langbanɔ va kon a kola keesoo lekɔɔ-o heelu balan coo, mó mɛnan o diola Vana co yoomu le fɛɛn a fɛɛn-ndo lan, mó dimi aa: ‹Dɛnndan-ndan la viawnin háá le vɔsilan tan yáá a tálá. Lɔ́ɔ́ kpaaya vanaa diandaa cuunin itambu-o, la cuunin ni.›

8Ya Daniɛl, mí tuɛi sɔɔn mun, kɛ i bii mun bila le. Lelan, mí ɲuna aa: ‹Maalii nuu, vɛ̀ɛ̀ sɔɔn mun n mɛɛlu yɛnin?› 9Mó mulul-la aa: ‹Daniɛl, kɔ! Sɔɔn mun n lonin n'viannanndon háá o telen mɛɛlaa. 10Vannda taw a tɔaanunnin, mà siŋnun a humbu, mà dendu mɛɛ yinnden le dindi ɲɔɔ yɛ. Vanaa kɔlvesɛiya biinin ɲɛ-ɲɛ bila le, a vanin hiovɔɔ laci a yɔŋ vɔɔndo tosaa. Kɛ vanaa hiow kɔlkaloo-a biinin bila. 11Kandɔɔ o telen nda kuuna sálàla nda solul Mɛlɛka lepalaa-lepala-o lan-ndo kɔlan biyɔɔ háá a telen nda kɛsi ɲɛ lamàà tɛɛmbua o cɛi-diandaa nin-ndo, palɛi vanin vàá pilɛ kɛmɛ lediin a belaŋɔmahiɔɔlu. 12Dɛnɛ kɛndɔɔ co le vana kon, vana lonin lecoo mò bii kpáŋ mì palɛi tiiya vàá pilɛ kɛmɛ leyáá beleyaa a iŋuɛɛnu-o. 13Nɔm Daniɛl-lɛ, lo lecoo háá ma kɔ pɛngi ciee-piɔ́m. O kon kɔɔli, a tendulnin o telen mɛɛlaa le vɔ̀ngɔ̀ nɔmndo a kɛ́ nɔmndo sɔlaa.›»

Currently Selected:

Daniɛl 12: BKG

Highlight

Copy