O Kandɔɔ 38

Dɛnɛ Tamar nda Yuda-o

1O telen pilɛ kon bɛngu, mí Yuda faŋan puapilɛa ndɔa ikɛi, mó kɔ calnun Adulam langbanɔɔ pum o bɛngu coo, diolan Hira. 2Mó saalun cuaambɔle laandule pilɛ lon, fuɲa ndɔ diolan Sua, Kanannɔɔ o va ni. Mó yil ndu o nɔ̀u nin, mó sina ndu vanalanɔ. 3Mí cuaambɔɔ cua folio, mó vilul ndu hɔ́ɔ́ piaandoo, mí Yuda ke ndu diolan aa Ɛr. 4Mó cua vɛlɛ folio, mó vialu hɔ́ɔ́ piaandoo, mó ke ndu diolan aa Onan. 5Mó vialu vɛlɛ po yàándɔɔ, mó ke ndu diolan aa Sela. Tuma laa ndɔ velu po yàándɔ kon-ndo, Yuda va Kesib.

6Mí Yuda yil lanɔɔ le Ɛr, po ndɔ tasoo pɛɛn. Lanɔ kon diolan aa Tamar. 7Mí Ɛr, po tase Yuda kon siŋnun vana vɔɔndo Mɛlɛka o hɔl, mí ndu Mɛlɛka cii yoomu ndɔɔ. 8O kon mí Yuda dimul Onan po ndɔ aa: «A sina ɲɛ n bɛnda le tosaa le bɛ nɔm-ndo: luɛi bɔla nɔm coo mì la va niaa ndu, haliko ma vilul bɛ nɔm cuawva.» 9Onan ndóò sina maa cuavaa o va violɔɔ-a ndáà venin cuavaa ndɔ le. Lelan, lɔ́ɔ́-lɔ́ɔ̀ ndáà bɔŋa pɛ nda bɔla ndɔ o kpelemɔɔsaa nin, ndóò cuiŋi mɛmma ivanapɔnɔyama ndɔan lɛŋ, yɔŋii ndóò vilul bɛ ndɔ vi-o cuawva. 10Mí dɛnɛ ndɔ kon nɛinun Mɛlɛka. Ndu bɛɛ mí Mɛlɛka cii yoomu ndɔɔ. 11O kon mí Yuda dimul Tamar aa: «Le tùú pɔnɔ nɔm vi-o, kɔ pɔɔ mà kɔ cal fuɲa nɔm o bɛngu coo háá mì Sela sul le lanɔɔ cuaa.» Kani nuaa ndu Yuda o va dimio o kɔl ndɔɔ nin ni aa: «O bɛnda lɛ mi hoo ndu vi vɛlɛ maa bɛndaa ndɔa le.» O kon, mí Tamar muungu o fuɲa ndɔ lo, mó kɔ va lon.

12Telen vilɛi o kon kɔɔli, mí lanɔɔ Yuda, cua Sua-o vu. Mɛɛ biisi kon cuu, mí Yuda kɔa Timna nda Hira caan ndɔ fula Adulam-ndo, le vanaa va saa ndɔa yiinde kilio-a tofaa. 13Mí vanndo kɔ dimul Tamar aa: «Má cè fuɲaa pɔnɔ nɔm kɔlan Timna le saa ndɔa yiinde kilio!» 14O kon mí Tamar solin volɔɔla ivii pɔnɔlan lekɔɔ, mó kuumbun kola vaan-vaando o hɔl, vanáà sina lɛ ndu le. Mó kɔ cal o nɛi-lábándoo Enaim ciee-lekɔɔ, o nɛi Timna-o coo. Kani mó ca maa Sela sul le lanɔɔ cuaa, kɛ vana ke ndu ndu mò siŋnun pɔnɔ ndɔ le.

15Mɛɛ Yuda komal Tamar icali lon, o ce ko aa vanalanɔ suundɛiyo ni. Kani hɔlla va ndu a kumbaa a kola vaan-vaando. 16Mó sɔɔnguu ndu ikɛi o nɛiyo dangalaa, mó dimul ndu aa: «I yeema mì n va naa ŋiɔn.» Kani ndóò sina maa lanɔɔ po ndɔɔ le. Mí cuaa ɲuna ndu aa: «Taa va pɛ a ya, yɛɛ nɛ n co yɛ ya ke?» 17Mí Yuda mulul ndu aa: «Mì bii cuin téndóó o cɔlua niaa tɛɛn mì cuu nɔm.» Mí Tamar dimi aa:

«I cɛl, kɛ nduyɛ yɔngu ya pɔɔ landei pum telen pá mà hin a cuin kon.» 18Mí Yuda ɲuna ndu aa: «Landii yɛɛ n yeema yɛ mì yɔngu nɔm?» Mí Tamar muli aa: «Yɔngu tampɔn co hoo nɔm o labolo-o, ma yɔngu vɛlɛ yɔlɔn nɔmndon a tinda nɔmndo.» Mí Yuda yɔngu ndu ɲɛm mun, mó va a ndu, mí folio luɛi nda tɛɛn o bɔŋa kon. 19Mí Tamar can, mó kɔannun. Mó kɔ soli kola vaan-vaan va ndu lekɔɔ-o, mó mingin volɔɔla ivii pɔnɔla ndɔlan lekɔɔ.

20Mí Yuda viam caan ndɔ fula kon Adulam-ndo le kɔlan cua kon cuin téndóó yɔngoo a le ɲɛm o yɔngu ndu o landei nin-ndon baŋaa. Kɛ o seelun cua kalaa le. 21Mí Hira ɲuna pilacieea lon aa: «Kuɛɛ nɛ cua suundɛi va hoo o nɛi-lábándoo Enaim coo-o co yɛ?» Mí vanaa kan mulul ndu aa: «Kabi bɛɛ vanalanɔ suundɛi cel-lɔ o fonda kon te.» 22Mó muungu, mó kɔ dimul Yuda aa: «I seelun ndu le, mí pilacieaa kan ndon a dimul-la bɛɛ aa vanalanɔ suundɛi cel-lɔ o fonda kon te.» 23O kon, mí Yuda mulul ndu aa: «Mɛɛ ɲɛm ya yɔngu ndu landei-yon va ndu o ba. Naa pila n tosa mì vannda mam naa le. Halikpe ya i yɔngu cuin téndóó ho mí nɔm kɔa a ndu, kɛ a seelun ndu le.»

24Paangon mún yáá o kon kɔɔli, má hun dimul Yuda aa: «Tamar, lanɔɔ po nɔm suunda, mó cua folio o suunda kon nin.» Mí Yuda dimi aa: «A soli ndu mà lom ndu kpúlúká!» 25Tuma nda va ndu solio o bɛ́ɛ̀-o, mó yɔŋ yoongoo o fuɲaa pɔnɔ ndɔ lo, mó dimi aa: «Vana nɔ ɲɔɔn mun-ndo ke ya folio ni. Nɔm pila mɛɛndan-ndɔ ma sina vana nɔ tampɔnndo ho, yɔlɔn mun a tindaa ho-o.» 26Mí Yuda sina maa ɲɛla ndɔlan ni, mó dimi aa: «Ndu hiow sandei a ya. O tosa dɛnɔɔ ho fondo le, le tùú ya yɔngu ndu Sela po ni mo va pɔnɔ ndɔ loo o tosa hee ni.» O sina lɛ ndu vanalanɔ o kon kɔɔli le.

27Mɛɛ telen ndɔ vialaa tiiya, mí pulei biŋin ndu, má ca maa pɛndua va ndu o dembe ni. 28Telen o va o sanga vialaa nin-ndo, mí pɛndunɔɔ pilɔɔ soli baa, mí sokonɔ-vialaa bii ndu ba kon, mó yii kɛi siaŋaa lon, mó dimi aa: «Hoo fɔlɔn co fula.» 29Kɛ mó mingi ba ndɔɔ, mí caan ndɔɔ pilɔɔ ndu vialun. O kon, mí sokonɔ-vialaa deŋi aa: «Nɔm buli nɛiyo ni má hun.» Má ke ndu diolan aa Perɛs. 30O kon kɔɔli, mí o lo kɔɔli-o bɛɛ vialun, kɛi siaŋaa va ndu o yiyaa o ba. Má ke ndu diolan aa Serak.

Currently Selected:

O Kandɔɔ 38: BKG

Highlight

Copy