O Kandɔɔ 37

DƐNƐ YOSƐF-O

(37—50)

Lɔma Yosɛf sɔl-lan

1Yakɔb va icali o lɛŋnde Kanaan-nden nin, nɛɛ Isaak fuɲa ndɔ va-a. 2Dɛnɛ yungu ndɔɔ yɔŋnun hoo ni: Yosɛf po ndɔ ndóò nɔ vɔsilan tɔ́ a laŋɔmmɛw, má va saa a cuinnda mandaa nda bɛndaa ndɔa latulu, poaa Bilha nda Silpa-a, laandaa fuɲa ndɔa pɛɛn. Sɔɛi-sɔɛi vɔɔn bɛndaa ndɔa kan ndáà dimi pɛ, ndóò kɔ cɔɔmuu nda o fuɲa nda lo. 3Mí Israɛl kaola Yosɛf hiovɔɔ poaa ndɔa tɔ̀a kpow. Kani o yuuvɛi nin o velu ndu ni. Mó sondul ndu doma keese bɛndu kɛndɛ-kɛndɔɔ a pongan. 4Mɛɛ bɛndaa ndɔa ce maa ndu fuɲa nda hiow kaola a nda, má cua nɛyɔnndo a ndu. Ndáà dimul lɛ ndu isɔɔ a kɔlɲulu le.

5Paale pilɛ, mí Yosɛf sɔl lɔan, mó cɔm bɛndaa ndɔa man. Mó nɛinun nda vɛlɛ hiovɔɔ maa paandu. 6Kani nuaa ndóò dimul nda ni aa: «La yaŋ-ndɔ nilan mì cɔm niaa lɔma ya sɔl-lan. 7Naa niaa kpow, n va maalon yiiyo tumbulan o panga. Mí tumbu nuu can ɲaali mó sim, mí tumbula niaalan la balu tumbu ni kon, mí la tundun ndu o hɔl.» 8Mí bɛndaa ndɔa ɲuna ndu aa: «Bàà nuaa n co yiyanndo ni maa nɔm vanin masaa naa coo ni?» Mó cɔɔlu nda kuisin o kɔl le lɔma sɔlaama ndɔma man a le sɔɔn ndɔn.

9Paale pum, mó sɔl vɛlɛ lɔma celen, mó cɔm bɛndaa ndɔa man, mó dimul nda aa: «Mí la ce mɛɛ ya sɔl vɛlɛ lɔma celen yɛ. Mí ca paalen, paangei o loeon tɔ́ a ipilɛ tundɔnndo ya o labɛngunin.» 10Mó kɔ cɔm vɛlɛ fuɲa ndɔ lɔma sɔlaama man. Kɛ mí fuɲa ndɔ cenelan ndu, mó ɲuna ndu aa: «Lɔma súú yɛɛ n sɔl-lɛ man? Mò va maa kon co dimio ni maa ya pila, kala nɔm a bɛndaa nɔmnda, n co hunɔɔ vulan baŋɔɔ nɔm o labɛngunin?» 11Bɛndaa ndɔa va ndu paŋalaa taw, kɛ mí fuɲa ndɔ mandan sɔɛi ken o kɔl.

Bɛndaa Yosɛf-a pisi ndu Yosɛf

12Mí bɛndaa Yosɛf-a kɔa cɔlua fuɲa nda-a mandaa o tàndàá Sikɛm nin. 13Mí Israɛl koma dimul Yosɛf aa: «Bɛndaa nɔmnda kɔɛ cɔlua mandaa Sikɛm, lelan i co nɔm vomɔɔ mà kɔɛ nɛɛ nda co-a.» Mí Yosɛf dimul ndu aa: «Mɛɛ congun ya i kɔa.» 14Mí Israɛl fuɲa ndɔ dimul ndu aa: «Kɔ mà kɔ tofa mɛɛ bɛndaa nɔmnda co lon yɛ, mà mɛɛndan vɛlɛ mɛɛ cɔlua co yɛ. A cii pɛ, a muungu nanu, a hun downun ya kona.» O kon, mí Yosɛf can nɛɛ nda va o dɛɛlaa Hebrɔn nin-nda, mó kɔ tiiya Sikɛm.

15Tuma o va hiŋnɔnndo yondoo nin-ndo, má bɔŋan nda langbanɔɔ pum. Mí langbanɔ kon ɲuna ndu aa: «Yɛɛ n co yɛ nuwviaa?» 16Mí Yosɛf dimul ndu aa: «Bɛndaa niaa ya co nuwviaa ni. A sina nɛɛ nda yɛɛ cɔlua diólan-nda mà cɔm ya lon?» 17Mí langbanɔ kon dimul ndu aa: «A faŋan nanu, i tuei nda dimio le kɔlan kpengii Dotan-nde.» O kon, mí Yosɛf kɔa bɛndaa ndɔa nuwviaa, mó kɔ komal nda Dotan.

18O lo levil, mí bɛndaa ndɔa ca ndu. Tuma pá mó tiiya nda ikɛi, má yii ndu dúmbú le ndu diyɔɔ. 19Má dimulan vellaa-velle aa: «Má cè vana sɔlaa malɔɔ ho hunɔɔ! 20N kɔ delnun ndu coo mì n diinun ndu, mì n viownun ndu o soon yingilaa nin, mí n kɔ dimin aa visi biyaa cii ndu biyɔɔ. O kon mì n ce ɲɛ fulanin o lɔma sɔlaama ndɔan nin-ndo.» 21Mɛɛ Rubɛn tuei sɔɛi ken, mó kindin le Yosɛf ciindiaa. Mó dimul nda aa: «N diinun ndu le.» 22Mó cɔɔlu nda dimul aa: «La sóli ndu koovan te. La kɔ viow ndu o soon yingilaa co hoo o lɛŋnde veselɛilen nin-ndo nin. Kɛ la pilan ndu le ndu diyɔɔ le.» Rubɛn ndóò yeema le ndu ciindiaa mì ndóò mingi ndu o fuɲa nda lo.

23Mɛɛ Yosɛf tiiya dɔ́ɔ́ o bɛndaa ndɔa lo, má bii ndu, má yunga ndu, má soli ndu doma ndɔ kɛndɛ-kɛndɔɔ lekɔɔ. 24Má kɔ mal ndu o soon yingilaa nin, mɛmma ve o soon kalaa nin te.

25O kon kɔɔli, má cal le ɲɛdiaa dioo. Mɛɛ nda heelu hɔlla, má ca Ismaɛlla hunɔɔ nɔnnde bɛndulen nɛɛ levil, a va fulaa o tàndá Kalaad-o nin. Ɲɛm cun kɛndɔn pum va ɲɔɔmɛaa ndaa o lakɔɔ: kɔm, bom a mir. A va kɔlan a mun o lɛŋnde Esipte len nin. 26O kon mí Yuda dimul puapilɛa ndɔa aa: «Tɔnɔ yɛɛ naa n sɔ̀là yɛnin te n dii pɛ pɔmbɔ naa, mì n ven piɔ́m ndɔɔ? 27O co fisa mì n pisin ndu Ismaɛlla ha o ba. N diinun ndu le, kani pɔmbɔ naa o co ni. Kooma pilɛan naa n co naa ndaa ni.» Mí puapilɛa ndɔa cɛl sɔɛi o dimul nda-e. 28Tuma yulaa fula kan Madian-nda va hiovɔɔ-o, má nan Yosɛf, má soli ndu o soondo nin, má pisi ndu cuaa-imamaa ismaɛl-laa kan o ba le volin latámán bidiin. Mí yulaa kan kɔannun a ndu o lɛŋnde Esipte len nin.

Yakɔb caŋ taw le Yosɛf po ndɔ

29Tuma Rubɛn muungu o soon kon-ndo, o komal lɛ Yosɛf lon te. Mí mɔnɛi bii ndu, mó sɛɛsiaa volɔɔla ndɔla cuɛinanndan. 30Mó kɔa o pɔmbɔa ndɔa lo, mó ɲuna nda aa: «Poombɔɔ co lɛhau o soondo nin te, kuɛɛ ya co yɛ lakɔ a hee?» 31O kon, má kialu cuin toovio bololan, má cua doma bɛndu Yosɛf-o, má linda ndu o kooma cuin toovi kon nin. 32Má yoo fuɲa nda doma kon, má dimul ndu aa: «Nua vɔ doma naa n kei saalɔn-ndo, tofa vɔ ndu, ko doma po nɔmndo ni.» 33Mí Yakɔb sina maa doma po ndɔɔ ni, mó deŋi aa: «Oi, doma po nuu ni. Visi biyaa bii ndu. Kpòkóó, visio sɛɛsiaa Yosɛf fɔ́!» 34O kon, mó sɛɛsiaa volɔɔla ndɔla cuɛinanndan, mó yiinun volɔɔla biisilan o caŋ, mó caŋ po ndɔɔ taw. 35Mí poaa ndɔa kpow hun ndu ɲɔɔloo, kɛ mó kɛɛ. Mó dimi aa: «I mei le, mɔnɛi co ya lo biyɔɔ háá mì komal po nuu ciee-piɔ́m.» Mó hiaw laci a Yosɛf caŋndo tuŋ-tuŋ.

36Mí yulaa kan Madian bɛɛ a kɔ pisi Yosɛf langbanɔ pilɛ o ba diolan Potifar, vana bɛndoo o va o masale Faraɔnnɔɔ nin ni. Ndu va bolle vanaa kándà masaa-a ni.

Currently Selected:

O Kandɔɔ 37: BKG

Highlight

Copy