Dɛnnda kiilaa 5

Ananias nda Safira laa ndɔ

1Kɛ nduyɛ, langbanɔ pilɛ va lon diolan Ananias, má cɛlan nda Safira laa ndɔ le yondo ndaa pisio. 2Má cɛlan vɛlɛ, mó faŋa volion baa pilɔɔ le ndu pila. Mó kɔa a n tɔ̀un, mó kɔ yɔngu kiilaa. 3Kɛ mí Piɛr ɲuna ndu aa: «Ananias, le yɛɛ nɛ n kumbil-lɛ Setana kɔl nɔmndo le Hala Kɔl-Diandaa còòlan dimullo, má faŋa volin n pisi yondoo-on baa pilɔɔ le nɔm pila? 4Nɔm óò tiwba mí nɔm óò manda yondo kon, te kon te, mɛɛ nɔm óò cii ndu pisi yɛ, mí nɔm óò manda volin mun. Kɛ le yɛɛ nɛ n tosa yɛ dɛnɛ vaa nuaa? O co vanaciee le n dimul còòlan te, kɛ Hala n dimul còòlan nuaa ni.» 5Ananias tueyɔɔ sɔɔn mun, mó del, mó vu. Mí siòòŋii bɛnduei bii vanaa tuei dɛnɛ kon-nda kpow. 6Mí langbaa felengia hun simbulu dialun ndɔn o kolaa nin, má kɔ kumbu ndu.

7Lɛɛlɛla yaa hiovɔɔ o kon kɔɔli, mí laa ndɔ luɛi, o sina ɲɛ óò yɔŋnun-ndo le. 8Mí Piɛr ɲuna ndu aa: «Dimul-lɔ ya, vɛ̀ɛ̀ vɔngu niaa pisi yondo niaa-o co hoo ni?»

Mó muli aa: «Oi, ndu ni.» 9O kon mí Piɛr dimul ndu aa: «Le yɛɛ nɛ niaa cɛlan yɛ le Hala Kɔl-Diandaa huiyo? Tofa vɔ! Vanaa kumbu pɔnɔ nɔm-nda co o dio nuaa ni. Nɔm bɛɛ a co lakɔ a nɔm.» 10Fɔ́ɔ́fɔ̀, mó del lɛŋ kiilaa o hɔl, mó malnun kɔl. Mɛɛ langbaa felengia luɛi, má komal ndu o vilɔɔ. Má kɔa a ndu, má kɔ kumbu ndu pɔnɔ ndɔ ikɛi. 11Mí siòòŋii bɛnduei bii vanaa laalannda kpow a vanaa-vanaa tuei dɛnnda lan.

Dɛnnda kaamaala kiilaa tosa lan

12Dɛnnda kaamaalan a dɛnnda kɔndɔfiltan taw kiilaa tosa vannda tɛɛn ni. Vanaa laalannda va cuungianndo o tongo Salomɔn-ndo bɛngu lɔ́ɔ́-lɔ́ɔ̀. 13Kɛ vana-vana celen ve tɔɔndan le nda luɛyɔɔ tɛɛn te. Nduyɛ vannda va sɔɔn kɛndɔn dimio taw a nda o kɔɔ. 14Sɛ́lɔ́ɔ́ va hiovɔɔ laci a kuiyo, vanpiaandua a vanlaandua va Maalii laalanndo, mí kunda vanaa laalannda va cɔɔlɔnndo. 15Mí vannda kandu hunɔɔ a vanaa lanàá o nɛilan coo, má va nda yɛɛmbuuo o ɲɛla hinialan coo a o valalan coo, o kon te Piɛr ndóò va pɛ hiovɔɔ, vundule ndɔlen léè pilan vana pum o nda tɛɛn. 16Mí vanaa bɔɔ-bɔɔ fula vɛlɛ o cieon va Yerusalɛm balɔɔ-on, má hun a vanaa lanàá, a vanaa ɲinaa vɔɔnda va kɔɔli-a. Mí nda kpow a sɔla siongɔɔ.

A tol kiilaa yɛlen

17O kon mí bolle vanaa-solia-lasálàá a Sadusia va ndu ikɛi-ya kpow pia a paŋalaa ca, má yiyan le ɲɛ pum tosaa. 18O kon má bii kiilaa kalaa, má kinda nda o cɛi kaasu lelɛŋndo nin. 19Kɛ icɔllo, mí mɛlɛkanɔ Maalii-o kumbi diola luɛyaala cɛi kaaso kalaa, mó soli nda, mó dimul nda aa: 20«La kɔ sim o Cɛi-Hala-o nin, mì la kɔ dimul vannda sɔɔn ke vana yoomu sɛnɛiyo-on kpow.» 21Mí kiila tosa mɛɛ nda dimul nda yɛ. Paalen siɔu dɔ́ɔ́, má kɔa o Cɛi-Hala-o nin, má kandu vannda pɛɛkoo.

Mɛɛ bolle vanaa-solia-lasálàá a vanaa va ndu ikɛi-ya hin, má veelu vanaa kialaa n'yamaa lelɛŋnda a simlacia lelɛŋnda Israɛl kpow. Má viam vannda le kɔlan kiilaa kan cuaa o kaasoo le hunɔɔ a nda. 22Kɛ buɛyaa kan kɔlan, a komal nda lon te. Má muungu, má kɔ dɔawnun kona aa: 23«N komal cɛi kaasoo o kindaa ɲɛkɛndɛi, kpalilaa cumulaa va o fondala ndalan o diola luɛyaalan sondolan. Kɛ mɛɛ naa n kumbi, n komal vana-vana lenin te.» 24Bolle vanaa va Cɛi-Hala-o cumullo-a a bolii vanaa-solia-lasálàá tueyɔɔ sɔɔn mun, a dimi mɛ̀ɛ́-mɛ̀ɛ́ le. Má ɲunan le ɲɛ va hunɔɔ tosan a dɛnɛ kon o kɔɔ-o. 25O kon kɔɔli, mí vanndo hun, mó dimul nda aa: «La tofa vɔ, vanaa niaa kinda o kaasoo-a co nihau o Cɛi-Hala-o nin, a co vannda pɛɛkoo.»

26O kon, mí bolle kpalilaa cumulaa kɔa a vanaa cɔwva, má hun a kiilaa kan o bɛɛn-bɛɛndo nin, kani siòònde va nda yɔŋii vannda vii nda a powtan.

27Mɛɛ nda hin a kiilaa kalaa, má kɔ simi nda vanaa kialaa n'yamaa lɛlɛŋnda o hɔl. Mí bolle vanaa-solia-lasálàá can nda sɔɔn hɛɛnduuo coo aa: 28«N kuuna niaa ndi pɛ́-pɛ́ maa la pɛɛku lɛ vannda o diola Yeesu lan te. Kɛ la tofa vɔ mɛɛ niaa pei Yerusalɛmnda pɛɛkula niaala lan nin yɛ. La yeema vɛlɛ mì la mingi naa kooma piɔ́m langbanɔ kon o lebol.» 29Mí Piɛr nda kiilaa tɔ̀a a muli aa: «Diom Hala-o biyɔɔ co fisa a diom vanndacieea biyɔɔ. 30Hala fuɲaa naa mamaa mingi Yeesu yoomu fulaa vanvílɛ́iya tɛɛn, Yeesu niaa baŋ o yɔm singafilaa coo-o. 31Mó heelun ndu ikɛi, mó kɔ kɛsin ndu o ba ndɔ kɛndɔɔ coo, mó siinguu ndu Masaa a Vana Ciindiaa, haliko mi Israɛlla mal yɔŋ vɔɔndo, mà mangalan, mì hakila ndalan la malnun haki. 32Naa n co seiya le dɛnnda lan ni, naa a Kɔl-Diandaa Hala yɔngu vanaa co sɔɛi ndɔɛi biyɔɔ-a pɛɛn.»

33Vanaa kialaa n'yamaa tueyɔɔ sɔɔn mun, má tambu kɔltan, o kon má tuu le nda diwvo. 34Kɛ vana pilɛ va o vanaa kialaa n'yamaa lelɛŋnda tɛɛn, diolan Kamaliɛl, faliisinɔ a vana dɛnɛ sinaa bɛndu latɔŋndo o va ni, o vannda kpow a va bɛɛlen keu-vo. Mó can, mó dimi maa a sòli vɔ kiilaa le telen bingi. 35O kon kɔɔli, mó dimul nda aa: «Niaa Israɛlla sei, la caa taw a ɲɛ niaa yeema le tosaa a vannda ha-o. 36O co nin lɔ́ɔ́ levil, mí Teudas can, mí ndu pila siingun vana lebɛɔ, mí vannda del ndu kɔɔli, a va le n'van kɛmɛ lehiɔɔlu. Kɛ má dii ndu, mí vanáà del ndu kan kɔɔli-a piɔl, o kon vana tui lɛ ɲɛ-ɲɛ a ndu o kɔɔ le. 37O ndu kɔɔli, mí Yuda fula Kalile-o hun telen nda va vannda diolan sɛvaa-o. Mí vannda taw a del vɛlɛ ndu kɔɔli. Ndu bɛɛ, má dii ndu. Mí vanáà del ndu kan kɔɔli-a bɛɛ a piɔl. 38Lelan sunsun, yiyan nuu co hoo ni, la mulul lɛ vannda ha le, la mal nda mà kɔɛnnun. Kani te yiyannda ivanacieea lan tuula ndalan a dɛnnda ndalan la co ni, la co hunɔɔ itambu. 39Kɛ te Hala o ba la co yɛ fulaa ni, la nɔlanin ndan tɛɛmbuu le. Lelan la caa dɛ, yɔŋii niaa pila simul Hala!»

O kon mí vanaa kialaa n'yamaa lelɛŋnda cɛl yiyan Kamaleɛl cɔm kon-ndo, 40má kɔ veelu kiilaa kalaa, má dimul vannda, má lɔaa nda. O kon kɔɔli, má kuuna nda le sɔɛi o diola Yeesu lan, má mal nda, má kɔannun. 41Mí kiilaa faŋan vanaa kialaa n'yamaa o hɔl a ɲaaloo taw le tùú Hala cɛl má sɔla sangaa o diola Yeesu lan-ndo. 42Lepalaa-lepala, a ve pɛngi hiovɔɔ laci a vannda pɛɛkoo o Cɛi-Hala-o nin a o la nda lo cɛilan nin te. A va nda vɛlɛ Yoongu Kɛndɛ Yeesu Krista-o tiiyallo.

Currently Selected:

Dɛnnda kiilaa 5: BKG

Highlight

Copy