Dɛnnda kiilaa 22

1«Puapilɛa nia a fuɲaa nia, la tuei ɲɛ ya co niaa dimul le vuunɔnndo le sɔɛi he-o.» 2Mɛɛ nda tuei ndu sɔɛi o aramei nin, má mɛi kpili. O kon mí Pol dimi aa: 3«Yuifinɔɔ ya co ni, Tarse ya velun ni, o lɛŋnde Silisii len nin. Kɛ Yerusalɛm nanu ya sul ni, Kamaliɛl o ba bɛngu, mó pɛɛku ya ɲɛkɛndɛi le kelaa o nɛila tɔŋnda fuɲaa naa mamaa coo. Mɛɛ niaa kpow nɔ hau dialun fulan le Hala nuaa yɛ yáà nɔ mun ni. 4I saangiaa vanaa va kelaa o nɛi Yeesu-o ho coo-a, mí mɛɛlu nda pɛɛngu piɔ́mndo. Mí bii vanpiaandua a vanlaandua, mí mal nda o kaasoo. 5Bolle vanaa-solia-lasálàá a kunda kaasoŋaa kɔlkalua co lesei. Yáà cii nin bɛɛ sɛbɛlan lapum sɔla fulaa nda o ba le puapilɛa Yuifia va Damas-a, mì yáà kɔɛ, mì yáà bii nda, mì yáà yiw nda, mì yáà hin a nda Yerusalɛm nanu le nda saangiaa.»

Pol cɔm mɛɛ o sɔla sɔɛi Hala-e yɛ

(Dɛnnda kiilaa 9.1-19, 26.12-18)

6Tuma ya va kɔlan mí va le tiiyaa Damas-o, paalen léè va nin le tiiyaa o pol, mí pangele bɛndoo fula o lepilɔɔ o halataala, mó balu ya sɔ́. 7Mí del lɛŋ, mí tuɛi diomndo pum ya dimullo aa: «Sol, Sol, le yɛɛ nɛ n co yɛ ya yɛlen tollo?» 8Mí ɲuna aa: «Nɔm nɛ̀ɛ́-nɛ̀, Maalii?» Mí diom kon muli aa: «Ya Yeesu fula Nasarɛt-o ni, ya n co yɛlen tollo-o pɛɛn.» 9Mí vanaa va ya kɔɔli-a ca pangeloo, kɛ a tui diom vana va sɔɛi o ya lo-o le. 10O kon mí ɲuna aa: «Yɛɛ ya tosa yɛ Maalii?» Mí Maalii dimul-la aa: «Cɔn ma kɔɛ Damas, lon nda dimulnin nɔm ɲɛ n bɛnda le tosaa-o ni.» 11Mɛɛ pangele bɛndu kon suumiaa ya, mí vanaa va ya kɔɔli-a bii ya baa, má kɔa a ya Damas.

12Langbanɔɔ pum va lon diolan Ananias, vana óò vo Hala-o a vana va tɔŋndan ndɔlan biyɔɔ-o o yɔŋnun ni, vanaa va Damas-a kpow a va seile ndɔle kɛndɛlen tɛndaa. 13Mó komal-la, mó sim ya ikɛi, mó dimul-la aa: «Puapilɛ nuu Sol, cɔ!» Fɔ́ɔ́fɔ̀, mí tofa, mí ca ndu. 14Mó dimi vɛlɛ aa: «Hala fuɲaa naa mamaa cii nɔm hɛli, mà tosa hɛnan ndɔɔ, mà ce vana sandaa ndu pilɛ kpé, mà tuei sɔɔn co ndu pila fulaa o sondo-on. 15Kani a vanin sei ndɔɔ vannda kpow o hɔl le ɲɛ n ce mà tuɛi-yo. 16Yɛɛ nɛ n co yɛ nihau cum? Cɔn ma sɔla yinɔɔ, mà dendu le hakila nɔmndan, mà biilu Hala o diola Maalii lan.»

Pol cɔm mɛɛ o looku kɔlan vanaa-mangalaa-isɔɔa tɛɛn yɛ

17«Lɔ́ɔ́ ya muungu Yerusalɛm mí va Hala piɛiyo o Cɛi-Mɛlɛka kon nin-ndo, mí ca vundulen, 18mí ca Maalii sɔɛi o ya lo, mó dimul-la aa: ‹Keleŋa, faŋan Yerusalɛm fɔ́ɔ́fɔ̀, kani vannda cɛlnin seile nɔmnden a ya o kɔɔ le.› 19Mí muli aa: ‹Maalii, vannda ha sínà maa i va keiyo o cɛila lekaandan nin, mí va vanaa laalan nɔm-nda malɔɔ o kaasoo, mí va nda lɔɔ. 20Tuma nda va vɛlɛ Etiɛn sei nɔmndo diyɔɔ-o, ya bɛɛ i va isisi lon. Mí sim vanaa va ndu diyɔɔ-a kɔɔli, mí manda volɔɔla ndalan.› 21O kon mí Maalii dimul-la aa: ‹Kɔ, i viamnin nɔm o vanaa co N'Yuifi le-a lo.›»

Pol nda simlacinɔ vanaa cɔvaa kɛmɛa rɔmnda

22Haa mí Pol cii diomndan ndan dimi, sɛ́lɔ́ɔ́ va ndu yaŋnɔnndo. O kon kɔɔli, má can yondaa aa: «La dii langbanɔɔ ho, la dii ndu! O bɛnda mò lo yoomu le.» 23A va yondaa, má va volɔɔla ndala cuɛinanndan viiyo, mí cundoo va cɔnɔnndo. 24Mí bolle simlacia vanaa cɔvaa kɛmɛa rɔmnda dimul vannda maa a luei Pol o kpakio nin, mà lɔɔ ndu, mà baŋ ndu mò soo, haliko mi vana sínà kɔlɔ sɛ́lɔ́ɔ́ va ndu yonda kon coo-o. 25Kɛ ndáà ciiyo ndu yiiyo le ndu lɔɔ, mí Pol dimul simlacinɔ va kon lon-ndo aa: «Vɛ̀ɛ̀ a nɔ pá dí le pilacieo Rɔm yamɛi ndɔɛi kilun bɛɛ loo lɔɔ?» 26Mɛɛ simlacinɔ kon tuei sɔɔn mun, mó kɔ dimul simlacinɔ vanaa cɔvaa kɛmɛa aa: «Vɛɛ n co yɛ tosa? Rɔmnɔɔ langbanɔɔ ho co ni?» 27Mí simlacinɔ simlacia-cɔvaa kɛmɛa kan sɔɔnguu Pol ikɛi, mó ɲuna ndu aa: «Dimul-la, pilacieo Rɔm n co kpeekpei ni?»

Mí Pol muli aa: «Oi». 28O kon mí simlacinɔ simlacia vanaa cɔvaa kɛmɛa kan dimi aa: «Volion calan ya sala le pilacieyɛi sɔlaa Rɔm ni.»

Mí Pol muli aa: «Ya yɛ, pilacieo Rɔm ya co kabi o violɔn nuu ni.» 29Fɔ́ɔ́fɔ̀, mí vanaa va le ndu lɔɔ haliko mi ndóò soo-a a faaŋian. Mɛɛ simlacinɔ simlacia vanaa cɔvaa kan síná maa pilacieo Rɔm Pol co ni, maa ndáà cii nin ndu yii o yɔlɔn, mí siòònde bii ndu.

A kɔɛ a Pol o simlacia kialaa n'yamaa lelɛŋnda lo

30Simlacinɔ vanaa cɔwva ndóò yeema mì ndóò sina le kɔlɔ kpeekpei Yuifia va Pol sɔɔn hɛɛnduuo coo-o. Lelan, diimandɔɔ, mó dimul vannda, má timbi ndu yɔlɔn. Mó veelu simlacia vanaa-solia-lasálàá a vanaa kialaa n'yamaa lelɛŋnda kpow, má bɔɔŋian. O kon kɔɔli, mó hun a Pol, mó simi ndu nda o hɔl.

Currently Selected:

Dɛnnda kiilaa 22: BKG

Highlight

Copy