Dɛnnda kiilaa 21

Pol kɔɛ Yerusalɛm

1Tuma naa n sɛyan naa ndaa-o, mí n luɛi o dɛ̀ndɔ̀ɔ́ nin, mí n kɔa sanaa Kɔs. Diimandɔɔ, mí n tiiya Rɔde, mí n can ndon, mí n kɔa Patara. 2Mí n kɔ komal dɛ̀ndɔ̀ɔ́ lon, o va kɔlan Fenisi. Mí luɛi, mí n kɔa. 3Naa n tiiya Siipre ikɛi, mí n kei kobi kon a matow, mí n kɔa a kpengii lɛŋnde Siri len. Mí n kɔ simi dɛ̀ndɔ̀ɔ́ Tir, nɛɛ volɔɔla va o dɛ̀ndɔ̀ɔ́ nin-ndan láà bɛnda le tolɔɔ-a. 4Mí n komal kaandennda pum, mí n hivi palɛi ndii ŋɔmmɛw lon naa ndaa. Mí Hala Kɔl-Diandaa cɔmnun nda, má dimul Pol maa o kɔa Yerusalɛm te. 5Kɛ palɛi ken hiovɔɔ, mí n bii nɛiyo le kɔlan. Mí nda kpow a liila naa, laandua ndaa a cuavaa ndaa, háá má soli naa o cieo kɔɔli. Mí n baŋ vulan o mɛmma ihɛllan kɔngɔ, mí n piɛi Hala. 6O kon kɔɔli, mí n congan vellaa-velle, mí n luɛi o dɛ̀ndɔ̀ɔ́ nin, mí nda nda muungun o la nda lo. 7Mí n can Tir, mí n hiaw laci, mí n kɔa Ptolemais. Mí n yil puapilɛa naa lon, mí n hivi paalen naa ndaa. 8Diimandɔɔ, mí n muungu, mí n tiiyaa Sesaree. Mí n kɔ luɛi o Filipe vana yondaa diom Hala-o lo cɛinin, mó yiya naa. Filipe kon va vana pilɛ o vanaa ŋɔmmɛvaa naa n hɛli Yerusalɛm-nda tɛɛn. 9Ndóò nɔ cuavaa felengia nda hiɔɔlu, aa sina vɔ dɛnɛ vanapɔnɔ le-a, a va diom Hala-o tɛɛnguuo. 10Mí n hivi palɛi bɔɔ-bɔɔ lon, mí vana-tɛɛngaa-diom Hala-o pum fula Yuda diolan Akabus. 11Mó hun nɛɛ naa n va-a, mó cua yaule Pol-ten, mó yiwnun balan a pelon, mó dimi aa: «Hala Kɔl-Diandaa dimi maa nuaa Yuifia co vana nɔ yáwlen-nden ndo yii Yerusalɛm ni. O kon kɔɔli, a malnin ndu vanaa sina Hala le-a o ba.» 12Mɛɛ naa a vanaa va Sesaree-a tuei sɔɔn mun, mí n tɛɛlun Pol maa o kɔa Yerusalɛm te. 13Kɛ mó muli aa: «Le yɛɛ nɛ niaa co yɛ caŋndo mì la va ya kɔllo tɛɛmbuuo? Kani o co le ya yiiyo daama le ya co o bɛɛndianndo le, kɛ haliko mi sɔla vɛlɛ piɔ́mndo Yerusalɛm o diola Maalii Yeesu lan.» 14Mɛɛ naa n bumba ndu, mí n mɛinun, mí n dimi aa: «Màá Mɛlɛka tosa hɛnan ndɔɔ!»

15Palɛi ken hiovɔɔ, mí n toosian, mí n kɔa Yerusalɛm. 16Mí kaandennda Sesaree pum a liila naa lon. Má yaa naa o langbanɔ va naa yiya-o lo, diolan ndu Mnasɔn, fulaa Siipre, vana óò laalan Hala kabi sindɛ-o.

Pol kɔɛ Nsaki yilɔɔ

17Naa n tiiyaa Yerusalɛm, mí puapilɛa sɛɛna naa a ɲaaloo. 18Diimandɔɔ, mí Pol kɔa o Nsaki lo naa ndaa, mí kaasoŋaa kɔlkalua kunda vanaa laalannda kpede a cuungian. 19Pol ciiyo nda yilɔɔ, mó downun nda kona o lepola dɛnnda Hala tosa o baala ndɔɔ nin vanaa ve N'Yuifi le-a tɛɛn ndan, mó cɔm tɔmaseloo a ndu pila o kɔɔ. 20Mɛɛ nda tuei sɔɔn mun, má candu Hala. O kon kɔɔli, má dimul Pol aa: «Puapilɛ naa, a ce mɛɛ Yuifia taw a siŋnun vanaa Krista-aa yɛ, nda kpow a co vɛlɛ tɔŋndo biyɔɔ ɲɛkɛndɛi. 21Nduyɛ, vannda dimul nda maa nɔm co Yuifia co vanaa celen tɛɛn-nda pɛɛkoo maa a mulul tɔŋ Moise-o kɔɔ, maa nɔm dimul nda vɛlɛ aa a díì cuavaa ndaa tooma le, maa a kelà vɛlɛ o naamula Yuifia coo le. 22Vɛɛ naa n tosa yɛnin? Kani a co tueyɔɔ maa a tiiya nanu. 23Lelan, tosà ɲɛ naa n co nɔm dimullo. N nɔ langbaa pum nanu nda hiɔɔlu, a cii yoolen bàá o Hala lo. 24Kɔ niaa ndaa, mì la tosà faleŋun dindianndon, mà sala ɲɛ nda nɔ le salaa-o, haliko ma sendi niaa. O kon, vannda kpow a sinanin maa o co sɔɔn toɲa le nda dimi a nɔm o kɔɔ le, kɛ mà sinà maa nɔm bɛɛ, o tɔŋ Moise-o coo n co kelaa ni. 25Le vanaa co yɛ N'Yuifi le-a yɛ, a siŋnun vanaa laalannda-a, n co nda sɛbɔɔ sɛval, mì n dimul nda yiyan naa maa o bɛnda mà de visin nda co sálàlan solio o máánndan nin-ndon te, a dia visin cɔlua nda ŋɔw bololan mó vu-o le, maa a mandan vɛlɛ a dɛnɛ suundaa.»

26Diimandɔɔ, mí Pol kɔa a vanaa hiɔɔlua kan, mó tosa faleŋii dindiannde nda ndaa. O kon kɔɔli, mó kɔa o Cɛi-Hala-o, mó dimul nda telenndo a palɛi dindin kon va cuvɔɔ-e, kon co ni maa telen vana-vana oo bɛnda le sálàá solio-o.

A bii Pol o Cɛi-Hala-o nin

27Palɛi ŋɔmmɛvii dindiaŋii ken va nin le cuvɔɔ, mí Yuifia va o lɛŋnde Asii len nin-nda a ca Pol o Cɛi-Hala-o nin. Má luei sɛ́lɔ́ɔ́ kpow sɔɔn nin, má bii ndu, 28má yonda aa: «Israɛlla sei, la mala naa! Langbanɔɔ ho co keiyo vannda pɛɛkoo nɛɛ-nɛɛ ka le vanaa naa, tɔŋ naa, a le Cɛi-Hala naa hoo simullo ni. Sunsun, o cii vanaa co N'Yuifi le-a luei o Cɛi-Hala-o nin, mó nɔɔliaa fonda-diandaa hoo.» 29Le tùú ndáà ce Trofime fula Efɛs-o nda Pol o kobi kon nin-ndo nda va dimio lende ni. A va yiyanndo maa Pol óò luei ndu o Cɛi-Hala-o nin ni.

30Mí vɔkɔ-vɔkɔɔ tiw o kobio nin kpow, vannda va kɔlan ba-ba fee. Má bii Pol, má soli ndu o Cɛi-Hala-o nin. Fɔ́ɔ́fɔ̀, má kindiaa diolan. 31A lo nɛilan nuwviaa le ndu diyɔɔ, mí vannda kɔ dimul simlacinɔ simlacia vanaa cɔvaa kɛmɛa rɔmnda maa poopoo cɛn Yerusalɛm ciee kpow. 32Fɔ́ɔ́fɔ̀, mó cua simlacinɔ vanaa cɔwva a vanaa cɔwva, má kɔa a kiltan kpengii sɛ́lɔ́ɔ́ va-e. Sɛ́lɔ́ɔ́ cɔu simlacinɔ kon a vanaa cɔwva, má pɛngi Pol lɔɔ. 33O kon mí simlaci-vanaa cɔwva kan sɔɔnguu Pol ikɛi, mó simi ndu, mó dimul vannda le ndu yiiyo o yɔlɔn kundalan tan tiɔn. O kon kɔɔli, mó ɲuna le sinaa vana súú Pol va-o a ɲɛ o va tosaa-o. 34Kɛ vana-vana va sɔɛi ndɔ dimi o sɛ́lɔ́ɔ́ tɛɛn. Simlacinɔ cɔw kon bii ɲɛ-ɲɛ bila o vɔkɔ-vɔkɔ kon nin te. O kon mó dimul vannda maa a yɔɔ Pol o kpakio nin. 35Ndáà tiiyaa a Pol o sɛmtɔɔ coo, mí vanaa cɔwva kɔa a ndu, kani sɛ́lɔ́ɔ́ va a kɔl tambɛiyo, 36má va ndu kɔlan kɔɔli a yondaa aa: «La dii ndu!»

Pol soo o puapilɛa ndɔa Yuifia lo le ndu pila cɛvɔnndo

37Mɛɛ nda va Pol lueiyo o kpakio nin, mó ɲuna simlacinɔ vanaa cɔvaa kɛmɛa aa: «Vɛ̀ɛ̀ a cɛl pá mì dimi ɲɛ pum?» Mí simlacinɔ kon ɲuna ndu aa: «Vɛ̀ɛ̀ a soaa krɛkiei? 38Vɛ̀ɛ̀ o co nɔm te co langbanɔ Esiptenɔ cɛn pɛi, mó luei vannda seesiɛi, mó kɔa a vanaa diuvaa n'vannda vàála hiɔɔlu o lɛŋnde veselɛilen nin-ndo le?» 39Mí Pol muli aa: «Yuifinɔɔ ya co ni, Tarse o lɛŋnde Silisii len nin ya velun ni, Tarse kobi tɔ́ɔ́ pɛɛn. A yandi, cɛl mì soo o vannda ha lo.» 40Mí simlacinɔ kon cɛl. O kon mí Pol sim o sɛmtɔɔ coo, mó kpaa vannda a ba. Ndáà meiyo, mó soaa o nda lo o aramei nin aa:

Currently Selected:

Dɛnnda kiilaa 21: BKG

Highlight

Copy