Dɛnnda kiilaa 20

Pol kɔɛ o lɛŋnde Maseduan-nden a o lɛŋnden Krɛs-len nin

1Vɔkɔvɔkɔɔ cuvɔɔ, mí Pol bɔɔŋiaa vanaa laalannda, mó luei nda yoomuan. O kon kɔɔli, mó congun nda, mó kɔa Maseduan. 2Mó kei o lɛŋnde len nin, mó luei nda yoomuan a pɛɛkulan taw-taw. O kon kɔɔli, mó kɔa Krɛs, 3nɛɛ o cii paangon mún yáá-a. Telen o cii toosianndo le kɔlan Siri-o, mó tuɛi maa Yuifia yii ndu dúmbú. O kon mó tuu le keiyo Maseduan o muungoo. 4Mí Sopatɛr po Pirus fula Beeree-o, Aritarke, Sekundus fula Tesalonike-o, Kaus fula Dɛrbe-o, Timote, Tisik a Trofim, a fula o lɛŋnde Asii len nin-nda a liila ndu. 5Má hiaw naa laci, má kɔ cum naa Troas. 6Naa naa, kafo bulu toosian a lɛvɛn too hiovɔɔ, mí n koma luɛi o dɛ̀ndɔ̀ɔ́ nin Filipe. Palɛi ŋuɛɛnu o kon kɔɔli, mí n kɔ komal nda Troas. Mí n cii palɛi ndii ŋɔmmɛw lon.

Kɔla mɛɛlaala Pol kɔɛ Troas lan

7O paale tasele lɔ́ɔ́ coo, mí n bɔɔŋian le ɲɛdiaa dioo, mí Pol va sɔɛi o vannda lo. Ndóò yeema le hiovɔɔ diimandɔɔ, mó lo pɛɛkoo háá di-tɛɛndo. 8Fitinalan la va taw nɛɛ náà n bɔɔŋian o cɛi coocoo nin-nda. 9Langbanɔ felengoo pum va icali o kèédei dio-pɔmbɔɔ, diolan Etikɔs, mó hiawnun o lɔan cundun telen Pol va hiovɔɔ laci a pɛɛkoo-o. Mɛɛ o lɔl tei, mó hialun, mó del fulaa o cɛi coocoo yàándɔɔ. Mí vannda hun le ndu simio, kɛ a komal o vinnun. 10Mí Pol toal, mó kɔ tundun ndu coo, mó saa ndu baa, mó dimi aa: «Siòòŋii bii niaa le, o co yoomu.» 11O kon kɔɔli, mó hel vɛlɛ, mó yimiyimi buloo, mó dia. Mó sɔaa vɛlɛ háá mí paalen se sia, o kon mó kɔannun. 12O kon kɔɔli, mí vannda hun a langbanɔ felengi kon, o va yoomu, mí dɛnɛ kon luei nda kpow yoomuan.

Pol cɛn Troas mó kɔa Milɛt

13Mí n hiaw nda laci le luɛyɔɔ o dɛ̀ndɔ̀ɔ́ nin le kɔlan Asɔs, nɛɛ naa n kɔ cua Pol-la. Lende ndóò tuu ni, kani ndóò yeema mì ndóò kɔɛ a n'pelu. 14Ndóò komallo naa Asɔs, mí n cua ndu o dɛ̀ndɔ̀ɔ́ nin, mí n kɔa Mitilɛn. 15Mí can ndon, mí n tiiya diimandɔɔ Kio. Paale len hiovɔɔ, mí n kei Samɔs. O kon kɔɔli, mí n tiiya Milɛt. 16Nduyɛ Pol ndóò cii nin tuu le keiyo o dɛ̀ndɔ̀ɔ́ nin Efɛs, mì ndóò hiownun, oo yeema le telen hivi o lɛŋnde Asii len nin te. O va keleŋaa le keiyo o nɛi oo nɛi coo, mì ndóò tiiya Yerusalɛm o paale kafo koavaalen coo.

Pol soo o kaasoŋaa kɔlkalua Efɛs lo

17Pol lo Milɛt, mó veelu kaasoŋaa kɔlkalua va o kunda vanaa laalannda tɛɛn Efɛs ciee-a. 18Ndáà tiiyaa ndu ikɛi, mó dimul nda aa: «Kabi paale tasele ya hin Asii len, la sinà mɛɛ ya va kelaa a niaa o telenndan kpow bɛngu yɛ. 19I tosal Mɛlɛka baalaa o tuisin bɛndoo nin, a mɛmɛan o lahɔl, mí sɔla sangalan le dúmbúla Yuifia va ya yiiyo lan. 20La sinà maa i vin niaa ɲɛ-ɲɛ le, o bɛnda le niaa-o pɛɛn. I pɛɛku niaa ndu vannda kpow o hɔl, mí kei vɛlɛ niaa ndu cɔm cɛilan nin. 21I veelu Yuifia a vanaa co N'Yuifi le-a le vulan baŋɔɔ Hala o labɛngunin, a le Maalii naa Yeesu laalanndo. 22Sunsun, i co lakɔ Yerusalɛm mɛɛ Hala Kɔl-Diandaa co ya baŋɔɔ yɛ, i sinà ɲɛ komalnin ya lon te. 23O ya sina daama-o co ni, o kobi oo kobi nin, Hala Kɔl-Diandaa co ya cɔmndo maa kaasoo a sangalan la co ya cumndo. 24Kɛ yoomu nuu co ɲɛ-ɲɛ ya o hɔl te, haliko sii i tosa baala nuu a ɲaaloo, mì tosa ɲɛ Maalii Yeesu vem ya tosaa-o: kon co vannda Yoongu kɛndɛ kɛndɛi Hala-e tiiyallo-o ni.

25I kei niaa kpow tɛɛn, mí pɛɛku niaa a Masale Hala len o kɔɔ, kɛ i sinà nihau maa vana ci lenin ya niaa tɛɛn te. 26Lelan, mì dimul niaa hau toɲaa, te vana pilɛ o niaa tɛɛn mal pɛ nɛiyo, o ve lɛnin sɔɛi ni le. 27Kani i cɔm niaa tuula Hala lan kpow, i vin niaa ɲɛ-ɲɛ le. 28Niaa pila mandan, mì la nɔ hɔlten kunda saa Hala Kɔl-Diandaa yɔngu niaa le mandaa-o coo, mì la manda kunda vanaa laalaŋaa Hala kila a piɔ́m po ndɔ ndu pila-o o kɔɔ-o. 29Kani i sinà maa i faŋan pɛ, vannda hun luɛinin niaa tɛɛn maa mɛɛ tunaa yondoa luɛi kunda cɔlua tɛɛn a hɛli o kɛ́-kɛ̀ le yɛ. 30Niaa tɛɛn bɛɛ, vannda vanin còòlan dimio haliko mi vanaa laalannda del nda kɔɔli. 31Lelan, la va lahɔl mì la loonun maa vɔsilan tan yáá co hoo ni, niinoo a lɔan, i va niaa kanalanndo, hali a mɛmɛan o hɔl.

32Nihau, i sɔɔ niaa Hala o ba a o kɛndɛi ndɔɛi bɛngu. O nɔ kpaayaa le niaa yoomuan lueiyo, mò tosal niaa dɛnɛ kɛndɔɔ taw, kpaaya o kɛsi teengen le vanaa co le ndu-a kpow-vo. 33I fula ɲɛ pila lehɔl te, o va n'voli, te kon te a n'siani, te kon te vɛlɛ a volɔɔ-cuɛinan. 34Niaa pila sinà maa ya pila va baalaa tosaa le o ya nɔ makoo-o sɔlaa ni, a le makola vanaa va ya kɔɔli-a nɛŋio. 35O dɛnndan nin kpow, mí cɔm niaa maa mɛɛ mì vana tosa baalaa le vanaa bala fondoa-a malaa, mì vana loonun a sɔɔn Maalii Yeesu pila dimi-on aa: Vanndo ɲɔɔ keo hiow vana dɛnɛ kɛndɔɔ yɔngoo a vanndo nɔm ɲɔɔ keo.»

36Pol ciiyo sɔɔn mun dimio, mó baŋ vulan, má tosa piɛilen nda ndaa kpow. 37Mí nda kpow a caŋ, má kɔman ndu le ndu congɔnndo. 38Le tùú o dimul nda maa ndáà ci lɛnin ndu loo mɔnɛi va nda ni. O kon kɔɔli, má liila ndu nɛɛ dɛ̀ndɔ̀ɔ́ va-a di.

Currently Selected:

Dɛnnda kiilaa 20: BKG

Highlight

Copy