Dɛnnda kiilaa 15

Bɔŋan bɛndu biinun Yerusalɛm a dɛnɛ tooma vanpiaandua o kɔɔ-o

1Mí vanaa pum fula Yuda a Antiɔs, má va puapilɛa pɛɛkoo aa: «Te la dii toomaa mɛɛ tɔŋ Moise-o dimi yɛ le, la tiwba mi la sɔla cindaa le.» 2Pol, Barnabas a vanaa kan cɛlan o dɛnɛ kon coo le, má sɛɛgian taw. O kon má tuu maa Pol, Barnabas a vanaa pum a kɔ Yerusalɛm, mà kɔ komal kiilaa a kaasoŋaa kɔlkalua kunda vanaa laalannda le sɔɛi kalɛi. 3Mí vanaa Hala-a Antiɔs liila nda. Má kei Fenisi a Samari, má dimul vannda mɛɛ vanaa co N'Yuifi le-a a va Hala hɔlla mulullo yɛ. Mí puapilɛa kan kpow a dɔawnun ɲaale taw a tuu kon. 4Mɛɛ nda tiiyaa Yerusalɛm, mí kunda vanaa laalannda, kiilaa a kaasoŋaa kɔlkalua kunda vanaa laalannda sɛɛna nda, má dɔawnun kona a dɛnnda Hala tosa a nda lan o kɔɔ. 5Kɛ mí Faliisia pum, aa siŋnun vanaa laalannda-a a va dimio aa: «Mɛɛ mì vanaa laalaŋaa co N'Yuifi le-a dii toomaa, mì vana dimul nda vɛlɛ le tɔŋ Moise-o biyɔɔ.» 6O kon mí kiilaa a kaasoŋaa kɔlkalua kunda vanaa laalannda cuungian le sɔɛi kalɛi tofaa lenin. 7Mɛɛ nda viow sɛɛngianndo tei, mí Piɛr can, mó dimi aa: «Puapilɛa nia, la sina maa o co lɛhau le Hala hɛli ya niaa tɛɛn le vanaa co N'Yuifi le-a Yoongu Kɛndɔɔ tiiyallo le, haliko ma tuei, ma laalan. 8Hala, o sinà yiyannda vanndacieea-o cɔm maa o cɛl nda le tùú o ke nda Hala Kɔl-Diandaa maa naa-o. 9O hiyan naa le, o cii nda kɔltan dindi le laalan nda laalanndo. 10Le yɛɛ nɛ niaa co yɛ niko Hala kɔllo tɛɛmbuuo? La yeema mì la siilu vanaa laalannda volɔɔ fuɲaa naa mamaa, te kon te niaa pilaa tiwba cuaa loo? 11Kɛ ɲɛ naa n bɛnda mì n laalanndo co hoo ni: o kɛndɛi Maalii Yeesu-e bɛngu naa n sɔla cindaa ni, nduyɛ lende koni nda bɛɛ sɔla ndu ni.»

12O kon mí nda kpow a mei, má yaŋ Barnabas nda Pol nilan, má cɔm nda dɛnnda kaamaalan a dɛnnda kɔndɔfilta Hala tosa a nda vanaa co N'Yuifi le-a tɛɛn ndan. 13Ndáà ciiyo, mí Nsaki cua sɔɛi, mó dimi aa: «Puapilɛa nia, la yaŋ ya nilan. 14Simɔn langa cii cɔm mɛɛ Hala hɛli fɔlɔn vanaa-mangalaa-isɔɔa sina Hala le-a, má siŋnun vanaa ndɔa yɛ. 15Nduyɛ, lende ɲɛ vanaa-tɛɛngaa-diom Hala-a soo-o co ni, kani o co o sɛvaa aa:

16‹O kon kɔɔli, i hunnin vɛlɛ mì mingi cɛi David del-lo toosiaa,

i minginin ndu tangul,

mì mingi ndu simi.

17O kon vanaa tɔ̀a kpow a nuwviaanin ya Mɛlɛka,

vanaa-mangalaa-isɔɔa diola nilan la co biilɔnndo tɛɛn-nda.›

Mɛlɛka dimi lende ni,

18o cɔm vannda tuula ndɔlan kabi sindɛ-o pɛɛn.

19Mó hiaw laci a dimio aa: ‹Lelan, o ya yiyan-ndo co hoo ni, n saangian vanaa sina Hala le-a le, a co Hala hɔlla mulullo-a. 20Kɛ n sɛvɛlan nda sɛbɔɔ, mì n dimulun nda maa a dia ɲɛm vannda co halaa fondoa sálàlan solullo-on te, a suunda le, a dia visin visi nda kundikundi mì koovan ma lo ndu nin-ndo le, a dia vɛlɛ koovan te. 21Kani o co nin lɔ́ɔ́ levil, mí vannda co tɔŋ Moise-o vanaa celen pɛɛkoo o kobila yɛ́-yɛ́lan nin, a co vɛlɛ ndu dimio o cɛila lekaandan nin o palɛi pɛngiɛi coo lɔ́ɔ́-lɔ́ɔ̀.›»

A sɛval vanaa laalaŋaa co N'Yuifi le-a sɛbɔɔ

22O kon, mí kiilaa, kaasoŋaa kɔlkalua kunda vanaa laalannda a vanaa Hala-a kpow a tuu le vanaa pum o nda pila tɛɛn hɛlio, le nda vomɔɔ Antiɔs nda Pol a Barnabas-a. Má hɛli Yuda o ndáà veelu vɛlɛ aa Barsabas-o nda Silas, a va simlacia puapilɛa ndaa tɛɛn-nda. 23Má viam nda le sɛbɔɔ ho yɔɔ, o va o sɛvaa aa:

«Naa kiilaa, kaasoŋaa kɔlkalua kunda vanaa laalannda a naa puapilɛa niaa, n yil niaa puapilɛa naa co vanaa co N'Yuifi le-a tɛɛn Antiɔs, Siri a Silisii-a. 24N tuei maa vanaa pum cɛn naa tɛɛn nanu, má kɔ luei niaa kɔndɔfillo a buulanndo o lakɔl a sɔɔn ndan. Nduyɛ, n vim vana-vana le. 25Lelan, naa kpow n cii cɛlan, mí n hɛli vannda le nda vomɔɔ o niaa lo nda puapilɛa naa hɛnan naa-a: Barnabas nda Pol, 26a yɔngun le baala Maalii naa Yeesu Krista-o tosaa-a. 27N co vɛlɛ Yude nda Silas vomɔɔ o niaa lo, mà kɔ tiinda diomndo o sɔɔn naa n co mun sɛvaa-on coo. 28Kani Hala Kɔl-Diandaa a naa pilaa bɛnda mì n handu niaa sangala celen coo, faŋanndo o sɔɔn n co niaa mun kuee kangalan-ndon coo le: 29la dia visin nda co halaa fondoa sálàlan solullo-on te. La dia kooma cɔlua te kon te visin visi nda kundikundi mí koovan ma lo ndu nin-ndo le, la suunda le. Te la kpakpala pɛ dɛnndan ndan kpow, mɛɛ o naŋ. La lɔl kɛndɛ!»

30O kon mí vanaa nda vem kan-nda bii nɛiyo, má kɔa Antiɔs. Má kɔ bɔɔŋiaa vanaa laalannda nɛɛ pilɛ, má yɔngu nda sɛbɔɔ. 31Má dimi sɛbɛ kalaa, mí vannda kpow a dɔawnun ɲaale a sɔɔn va lenin, mí n luei nda yoomuan-ndon. 32Mí Yude nda Silas va vanaa-tɛɛngaa-diom Hala-a dimul vanaa laalannda sɔɔn taw le nda yoomuan lueiyo, a le nda simio yili o laalanndo coo. 33Telen pum o kon kɔɔli, mí vanaa laalaŋaa kan a dɔaw nda duaa, le mɛɛ nda muungu kɛndia vanaa vem nda-a o ibuŋ yɛ. 34Kɛ mí Silas ca maa o va fisa mì ndóò lonnun Antiɔs. 35Mí Pol nda Barnabas lo Antiɔs, a va hiovɔɔ laci a vanaa celen sɔɛi Maalii-e pɛɛkoo.

Pol nda Barnabas sɛiyan

36Telen pum o kon kɔɔli, mí Pol dimul Barnabas aa: «N muungu mì n kɔ yil puapilɛa naa o kobila naa n kei sɔɛi Maalii-e dimi lan nin kpow, mì n sina mɛɛ nda koma va yɛ.» 37Barnabas ndóò yeema mì Nsaŋ, o nda veelu vɛlɛ aa Marke-o ndóò kɔɛ nda kɔɔli, 38kɛ mí Pol ca maa o ve yiyan kɛndɛ le, kani a va vɔ Pamfilii, mó faŋan nda kɔɔli, o liila lɛ nda o baala ndaa nin te. 39Má sɛɛngian taw. O mɛɛlulan, má sɛiyan. Mí Barnabas cua Marke o dɛ̀ndɔ̀ɔ́ nin le kɔlan Siipre. 40Mí Pol ndu hɛli Silas. Vanaa laalannda ciiyo Mɛlɛka piɛiyo le nda, má kɔannun. 41Mí Pol kei Siri a Silisii, mó luei vanaa Hala-a yoomuan.

Currently Selected:

Dɛnnda kiilaa 15: BKG

Highlight

Copy