Lukə 2
2
Jesus hɔlɔɓo mɛ̨nį
(Matie 1.18-25)
1Nąąlɔwai Sesarə Augustə ə mo yɛ: «Ɓɛi kpɔ ŋą heeɓo laa ə həli laa, di nąą nuą kəlee lono.» 2Nono ɓo tɔlɔɔ tii ə kɛ ɓɛlɔwai Kiriniusə ə kɛ la a tɔɔmun Siri lɔi nwun na. 3Nu kəlee ə kɛi li bɔ taai diɛ nono.
4Ɉosɛfə ə həɠə Nazarɛtə daai Galile lɔi hu, yɛ li Bɛtleɛmə daai Ɉude lɔi hu, Davidə pɔ taai. Mąąhɔlɔɓo, Ɉosɛfə ə kɛ a Davidə yəi bɛlɛ́n mun da, də li, əgɛ, di di lono. 5Ɉosɛfə nwɔ wɛlii Mari, koo kɛnɛ̨i kɛa kɛ. 6Ɓɛlɔwai di kɛ la Bɛtleɛmə daai, Mari laa yɛɛi lɔwai ə ɉəli; 7ə non dɔlɔɔ kaa a hulɔnu. Ə mąą kpinįn gɛ a həɠə, ə naa ɓɛi daatɛlɛɛɠaa di kɛi di laa mį́i laa. Mąąhɔlɔɓo, di hvo laai hɔlɔɓo nwɛ̨ąą laa pɛlɛ mu.
Malaka ə kulɔ ponoŋą ɓɛlaa pulu nuą diɛ
8Bɛtleɛmə daa kwɛlɛ, ɲɛa kɔ́wɔ ta hu, ɓɛlaa pulu nuą di kɛ laa a kpinį, diɛ di wɔ ɓɛlaaɠaai mąąkpɛ. 9Ną́mu ŋą malaka tɔ̨nɔ̨ ə gbɔwɔ lɛ diɛ, Ną́mu nwɔ mąąwiɛ ə di mąą pono, di ɲɔ̨w kpɔ kɛnɛ̨. 10Kɛlaa, malakai tii ə mo diɛ; yɛ diɛ: «Ka hvo ɲɔ̨w, mąąhɔlɔɓo, ŋą pa wɛlɛɛ woo lɛlɛɛ ɓoi kaa yii pai nu kəlee kwəinɛ̨ɛ̨. 11Daa ka Nwun mąąɓomun gaa, háákələi, Davidə ŋą taaleei hu, naa ɓaa a Kristə, mɛ̨nį kəlee nąmu. 12Ka tɛ taai, bələi ka gɔlɔn na, bələ ka: ka káá li lokolo ta kaai mąą kpinįn gɛɛ a həɠə, naa taatɛlɛɛɠaa mį́i hɛn ɲąŋą hu.»
13Ɲąąɓa kpɔlɔ tii, malaka kpulu kɛnɛ̨ ə yɛɛ diɛ Yálá mąąwiɛ diɛ kɛ mą:
14«Mąąwiɛ kaa Yálá ɓa yələkɔlɔn mɛ̨i pələ;
Nuąi Yálá aa di wɛli la kɛ lɔi mɛ̨i, liilaa aa tɛɛ di pɔ.»
Ɓɛlaa pulu nuą də li Bɛtleɛmə
15Yii kɛa malakaɠaa tii di pənə di tɛ yələi, mɛlaa pulu nuą diɛ di kee ɓa: «Ka gu tɛ taai, mɛ̨nįi ŋɛ̨i Ną́mu ə nɛ guɔ gu gaa.»
16Di di mąąhulɔ də li, lii di mo, di Mari da Ɉosɛfə di kaa, ɛlɛɛ, nokoloi tii laa di lííla daatɛlɛɛɠaa laa mį́i. 17Nokoloi kaa di, mɛ̨nįi malaka ə mo diɛ yɛ hvilɛn na mą, di ɉukulɔ nuą diɛ. 18Nuą kpɔ mɛlaa pulu nuą di wɔ woo hukulɔ woo mɛ̨n, di kwəi ə pili diɛ. 19Kɛlaa, Mari nwɛi, ə yiliɠaa kəlee lɛɛ gwəi yɛ giliŋąhiɛ mą. 20Yili pulu, mɛlaa pulu nuą di di pulu pənə diɛ li. Di kɛi Yálá hɛɠɛɛɓo, ɛlɛɛ, diɛ nwɔ kɛnɛ̨ laa da nwɔ mąąwiɛ lɛ; mɛ̨nįɠaai di mɛ̨n, da yiiɠaai di gaa, mąą mɛ̨nį ɓa. Mąąhɔlɔɓo, pələi kpɔlɔ tii malaka ə ɉukulɔ la diɛ, pələ kpɔlɔ ɓə di gaa la.
Di nokolo laa hee a Jesus
21Lɔwɔ tɔ̨nɔ̨ tɛɛ pulu, di nokoloi tii hee kɛ́nɛ̨ ɓa, di naa hee a Jesus; yɛ pələi malaka ə mo la nee ɓa, gɛɛ hvo mąą goo həɠə.
Di Jesus laa həli Yálá ɓa, Yálá hee pɛlɛ́ mu
22Yili pulu, ɓɛlɔwai mąąnɛ̨ɛ̨ kɛ di Mari da non di mąą haláá kulɔ la, əgɛ, di mąą ə həɠə yɛ bələi Moisə ə bɛ̨ɛ̨ la dɔ́n ɉɛɓɛ́ hu, ɲələ ə ɉəli, Ɉosɛfə da Mari də li Ɉerusalɛmə Yálá hee pɛlɛ́ mu; nąąlɔwai ɓə di nokoloi tii laakwɛlanmo la Ną́mu Yálá ɓa. 23Mąąhɔlɔɓo, bɛɛi dɔ́n ɉɛɓɛ́ hu Ną́mu yəi, yɛ diɛ: «Lon ɉulɔnu tɔlɔɔ yii lɔpee a hɔlɔɓo gaa a Yálá nwɔɔ.» 24Ɉaláá yii Ną́mu ə vaaɓo, di yili kulɔ, ya ɓaa: «Tonwələn veelɛ da ɓopo hveelɛ.»
25Nąąlɔwai hulɔnu ta ə kɛ Ɉerusalɛmə daai, diɛ kɛ naa ɓa Simeɔn. Ɉulɔnui tii ə kɛ a nu yii ɉɔn nɛlɛɛ, ə lɛɛ, yɛ ɲɔ̨w Yálá ɓa, ə kɛi Israɛlə nwun mąąɓomun mąąkpɔn; Kili-Mąąhəɠɛɛ ə kɛ mɛ̨i. 26Yálá ə gbɛa giliŋą pono yɛ mą: «Hvo pai haai hvo kɛli ya ə́ ɲɛ̨i tɔɔ Israɛlə Nwun mąąɓomun ma, yai Ną́mu Yálá ə dɔɔ.» 27Yálá nwɔ Kilii ə gɛ Simeɔn ə pa Yálá hee pɛlɛ́ mu. Nąąlɔwai, Jesus nwɔ nuą di ɉəɠə di paa la, əgɛ, mɛ̨nį dɔ́n di bɔ mɛ̨nį kɛ. 28Simeɔn ə nokoloi tii hon ə naa ɲee kɔ̨nwɔ̨n ɉu, ə Yálá hɛɠɛɛɓo yɛ kɛ mą:
29«Yiihu kɛa, Ną́mu Yálá, mɛ̨nįi ə́ mo naa aa hvon;
ə́ wɔɔ tímun nɛɛ laa ə li nąnni pɔ liilaa hu.
30Hvó gaai, ɲɛ̨́i aa tɔɔ ɓalomun ma,
31yaai ə́ dɔɔ nu kəlee mąą mɛ̨nį ɓa.
32Gaa a kɛɛ pono yii gaa pai ə́ lɛi yɛnɛ̨ɛ̨ hį́i kəlee ɓa,
ə kɛ a Israɛlə mąą ɲįnɛ̨n.»
Simeɔn ə Yálá kwəi mɛ̨nį hukulɔ
33Mɛ̨nįɠaai tii Simeɔn ə kɛi mo yɛ hvilɛn na Jesus ɓa, yili ə Ɉosɛfə da Jesus nee di kwəi pili diɛ. 34Simeɔn ə lúwɔ́ too diɛ, ə mo Mari ɓa yɛ mą: «Yálá aa ə́ lon ŋɛ̨i həɠə ɉu, əgɛ, ə kɛ a Israɛlə nuą tamąą too kwɛni, ɛlɛɛ, da damąą muhəɠə hɛn. Gaa pai kɛi a Yálá ŋą kɔ́lɔn ɉɛn yii nu tamąą da lənə mą. 35Gaa pai nuą kwəi mɛ̨nį loɔɠaa kəlee kulɔi ponoŋą. Mari, yɛi ŋɛ̨i ɓaa a nee, lííholi kɛnɛ̨ kaa pai ə́ lii kələn ɉi ə́ kwəi.»
Yálá kwəi mɛ̨nį hukulɔ nɛ̨ɛ̨nu Anə ə Jesus mąą mɛ̨nį ɓo
36Asɛrə yəi bɛlɛ́n mun da, yii da kɛ mą: Fanuɛlə, non nɛ̨ɛ̨nu ta ə kɛ laa diɛ kɛ naa ɓa: Anə. Anə tii ə kɛ a Yálá kwəi mɛ̨nį hukulɔ nɛ̨ɛ̨nu, bɔlɔɔ kpɔ kɛ a mɔlɔɔ. Gɛɛ a nɛ̨ɛ̨non da ɉilɛ kwɛlan mɛ̨ihveelɛ lɔ ɓə di gɛ di kee ɓa. 37Yili pulu, ə too galanən naa hu, ɛlɛɛ la ɉu, gaa kwɛlan ə kɛ pow mɛ̨ihaaɓa kɔ́w nąąn ə kɛi lɔ pa Yálá hee pɛlɛ́ mu a hvóló kəlee yɛ hin, nɔ yɛ Yálá hvɛli. 38Volói ŋɛ̨i di kɛi Jesus laa həli la Yálá ɓa, Anə ə pa Yálá hee pɛlɛ́ mu a volói tii, ə lɛɠɛ di kwɛlɛ, yɛ Yálá hɛɠɛɛɓo nokoloi tii mąą mɛ̨nį ɓa. Ɛlɛɛ, nuą kpɔ kɛi Ɉerusalɛmə taa nwun mąąɓomun mąą kpɔn, Anə hvaŋą lɔɔi lɔ kɛ yɛ nokoloi tii mąą mɛ̨nį hukulɔ diɛ.
Ɉosɛfə da Mari di pənə də li Nazarɛtə
39Ɉosɛfə da Mari yii kɛa di kpɛɛ a ɉaláá kəlee kulaa Yálá hee pɛlɛ́ mu, di pənə a di lon, də li la di pɔ taai Nazarɛtə Galile lɔi hu. 40Nokoloi tii ə kɛi kɛnɛ̨, kili yɛ ɓo mą kpɔ kɛnɛ̨, ɛlɛɛ, ɉu yɛ walawala, Yálá nwɔ mɛ̨inɛ̨ɛ̨ yɛ ɓo mɛ̨i.
Jesus kaa kwɛlan ə kɛ pow kɔ́w hveelɛ
41Kwɛlan ɉəli pələ tɛitɛi kəlee, Jesus gaa nuą di kɛi li Ɉerusalɛmə, diɛ pakə pu. 42Jesus kaa kwɛlan gɛɛ kɛa pow kɔ́w hveelɛ da nwɔ nuą kəlee də li Ɉerusalɛmə daai, pakə pu mɛ̨nį ɓa yɛ pələi da gɛ la a bɔlɔ. 43Ɓɛlɔwai kɛa ɉɛli puɔ ə kpɛɛ la, Jesus nwɔ nuą di di pulu pənə, di nɛɛ laa di tɛɛ diɛ li di pɔ taai, di kili hvó pu ɉu. 44Ə kɛ di kwəi, Jesus aa lɛɛ ɉiɛ kulɔ nuą yiiɠaa tii pɔ, da diɛni daa li. Yii kɛa di hvóló tɔ̨nɔ̨ hiɛ ɓo, di gɔɠɔ tɔɔ kɛa diɛ gwɛli nuą lɔwai, da di ɓɛlaa ni pɔ. 45Kɛlaa, di gwɛli di hvo gaa, hvo kɛ li di pənə diɛ li Ɉerusalɛmə daai, gwɛli. 46Voló haaɓa yələ, də li di gaa Yálá hee pɛlɛ́ mu, ɉiɛ Ɉuifə kalamɔ̨ɔ̨ɠaa lɔwai, nwəli tɔɔ di woo ɓa, ɛlɛɛ, yɛ di mąąni kɛ. 47Nuą kpɔ kɛi Jesus nwɔ woo pulu pənə wooɠaa mɛ̨n, da gili pələɠaai ə kɛi mo, di kwəi ə pili kpɔ diɛ kɛnɛ̨. 48Ɓɛlɔwai Ɉosɛfə da Mari di gaa la, di kwəi ə pili diɛ; Mari ə mo Jesus ɓa yɛ mą: «Nón, lə mɛ̨nį ɓə ŋɛ̨i ə́ gɛ a kuɔi? Kwa ə́ nąn kwaa ə́ kwɛli kpɔ kɛnɛ̨.»
49Jesus ə di woo pulu pənə yɛ diɛ: «Lə mɛ̨nį ɓa ka káá gwɛ́li, ka hvo gɔlɔn kaa diɛ mąąnɛ̨ɛ̨ ŋą kɛ Ną́n ɲəi pɛlɛ́n?»
50Kɛlaa, mɛ̨nį tii ə mo diɛ, di hvo gbaɠala kaa.
51Jesus ə di woo hon, ə muhəɠə, ə lɛɛ di pɔ da diɛni də li di pɔ taai Nazarɛtə. Kɛlaa, Mari nwɛ́i ə gili lɛɛ mɛ̨nįɠaa tii kəlee hu. 52Jesus ə kɛi kɛnɛ̨, kili yɛ ɓo mą, yɛ Yálá da nuą di lii hon a nɛlɛɛ.
Currently Selected:
Lukə 2: BKPDCG
Highlight
Share
Copy
Want to have your highlights saved across all your devices? Sign up or sign in
