Gɔwɔ tɔɔi 7
7
Noe ə lɔ gələn ɉu
1Yai-Laa ə mo Noe ɓa yɛ mą: «'Lɔ gələn ɉu, yɛ́ ka ə́ yəi bɛlɛ́n nuą kəlee. Hvo gaai, ŋą́ą́ ə́ kaa ə́ ɓɛlaa lɔwai, ə́ tələnmoɔi ɲɛ̨́i ɓa. 2Huwɔ mąąhəɠɛɛ ɉilɛ da ɉaa mɛ̨ihveelɛ həɠə, kɛlaa, huwɔ kɔ́hɔɓoɔ nwɛi, ɉilɛ tɔ̨nɔ̨ da ɉaa tɔ̨nɔ̨ həɠə lɔ. 3Nwɛ̨niɠaa lɔwai, nwɛ̨ni hilɛ da ɉaa ɉuwu heei mɛ̨ihveelɛ həɠə, əgɛ, di huwu nwun mąą ə ɓo. 4Hvo gaai, aa lɛɛ pulu a lɔwɔ tɔ̨nɔ̨, gáá pai tulɔ pui hvóló pow nąąn kpinį pow nąąn ɲee mu, nɔ̨ɔ̨nɔ̨ɔ̨ hɛnŋąąi kpɔ ŋį́ di pɛli, ŋį́ gəlee nwun na pili.» 5Mɛ̨nį tii Yai-Laa ə mo Noe ɓa, ə gɛ, kpɔlɔɔ yɛ bələi di mo la mą.
Ɲánwąną pai lɔwai
6Noe kaa kwɛlan ə kɛ a kwɛlan nwun mɛ̨ida, ɓɛlɔwai ɲánwąną ə kɛi paa la lɔi mɛ̨i. 7Noe ə lɔ gələn ɉu, nɛ̨ą da nonnii ə mą kɛ, da di nɛ̨ąni, əgɛ, di hvo pa lɛɛ ɲánwąną hu. 8Huwɔ mąąhəɠɛɛɠaa, da yiiɠaai di mąą hvo həɠə li, yələi nwɛ̨niɠaa da tala huwɔɠaa kəlee, 9di həli Noe nwɔ kələn ma. Gəlee ɉilɛ da ɉaa, yɛ bələi Yálá ə Noe tí la. 10Lɔwɔ tɔ̨nɔ̨ tɛɛ pulu, ɲánwąnąi tii ə laa lɔi mɛ̨i nąą kəlee.
11Noe kaa kwɛlan nwun mɛ̨idanąą, ɲąnin veelɛ, voló pow gɔw mɛ̨ihveelɛ yələ, lɔi laa ə ɓo, yələkɔlɔn naa ə ɓo, yá yɛ kulɔ nąą kəlee. 12Tulɔ ə pu lɔi mɛ̨i, hvóló pow nąąn kpinį pow nąąn ɲee mu. 13Volói tii ɓə, Noe, nɛ̨ą, non ɉinąą haaɓai Sɛmə, Kamə da Ɉafetə da di nɛ̨ąni haaɓai di lɔ la gələn ɉu; 14ə mą kɛ, huwɔ huwu kəlee, tala huwɔɠaa kəlee, da nwɛ̨niɠaa kəlee, ə mą kɛ koon-koon ɉɛnŋaa kəlee. 15Nɔ̨ɔ̨-nɔ̨ɔ̨ henŋaa kəlee, ɉilɛ da ɉaa di pa Noe pɔ, ə di lɔ gələn ɉu. 16Ɉɛnŋaa tii, ɉuwu kəlee tɛitɛi ɉilɛ da ɉaa ɓə kɛi lɔ gələn ɉu, yɛ bələi Yálá ə Noe tí la. Yili pulu, Yai-Laa ə gələn naa kpulu Noe ɓa.
17Ɲánwąnąi tii ə hvóló pow nąąn gɛ lɔi mɛ̨i. Ɲá ə hvɛɛ, ə gələn muhəɠə. 18Ɲá ə hvɛɛ, ə tɛ lɔi mɛ̨i nąą kəlee, gələn yɛ ɓo ɲa ŋą. 19Ɲá ə hvɛɛ, kpɔ ə laŋin yee kpɛa kpɛaɠaa mɛ̨i. 20Ɲá hvɛɛ, ə laŋin yeeɠaa mɛ̨i a yee laa mą pow kɔ́w lɔɔli. 21Nɔ̨ɔ̨nɔ̨ɔ̨ ɉɛnŋaai kpɔ kɛ lɔi mɛ̨i, gəlee di haa; nwɛ̨niɠaa, huwɔɠaa, da nɔ̨ɔ̨nɔ̨ɔ̨ ɉɛnŋaa kəlee, ə mą kɛ, nuą, diɛi kpɔ kɛ lɔi mɛ̨i, gəlee di haa. 22Hɛn kpɔ kɛi nɔ̨ɔ̨, diɛi kpɔ kɛ lɔi kpalan ma, gəlee di haa 23Bələ ɓə lɔi mɛ̨i hɛnŋaa kəlee nwun na ə pili la, ə gɔwɔ tɔɔ nu ɓa, ə li la huwɔɠaa pɔ, nwɛ̨niɠaa da tala huwɔɠaa kəlee; gəlee di haa, ə lɛɛ lɔ a Noe da yiiɠaai kɛ bɔ gələn ɉu. 24Ɲá hvɛɛ ə lɛɛ lɔi mɛ̨i, a hvóló nwun dɔ̨nɔ̨ hvóló pow lɔɔli.
Currently Selected:
Gɔwɔ tɔɔi 7: BKPDCG
Highlight
Share
Copy
Want to have your highlights saved across all your devices? Sign up or sign in
