Gɔwɔ tɔɔi 6
6
Nu lonnii kɔ́hɔɓo mɛ̨nį
1Ɓɛlɔwai nuą di gɔwɔ tɔɔ la diɛ lɔi mɛ̨i laahvɛɛ, diɛ lon nɛ̨ąą hɔlɔɓo, 2Yálá lon ɉinąą di lɔi mɛ̨i nɛ̨ąą lɛlɛi kaa, diɛ daɠaa həɠə a di nɛ̨ąni. 3Nąąlɔwai, Yai-Laa ə mo gbɔwɔ ɓa yɛ diɛ: «Ɲɛnɛ̨ɛ̨ kɛ hvaŋąi ŋɛ̨i ŋį́ bu nu lonnii hu, mąą hvo nɛ̨ɛ̨li kɛa və́ nɛɛ di yəi. Mąąhɔlɔɓo, di kɛɛ mɔ̨ɔ̨ tii, mąąnɛ̨ɛ̨ lɔ di haa. Ə həɠə kɛa yiihu ɓa, di kaa kwɛlan gaa pai kɛi lɔ kɛa a: kwɛlan nwun dɔ̨nɔ̨ kwɛlan bow hveelɛ, diɛ haa.» 4Nąąlɔwai tii hu, nu kwɛa-kwɛa di kɛ lɔi mɛ̨i. Nuąi tii di hɔlɔɓo Yálá lonnii da lɔi mɛ̨i nɛ̨ąą di wɔ hilɛtaa yii hu. Nuąi tii ɓə wɔlɔ kɛ di laa tɛɛ lɔi mɛ̨i.
5Yai-Laa ə gaa yɛ diɛ: Nu lonnii kwəi kiliŋąhiɛ kaa lɔ kɛa mɛ̨nį ɲɔ̨n ma a hvóló kəlee. 6Yili ə Yai-Laa lii too pulu kpɔ kɛnɛ̨, nu pɛlii ŋɛ̨i ə mo lɔi mɛ̨i mąą mɛ̨nį ɓa, ə viikpɛɛ. 7Ə mo gbɔwɔ ɓa, yɛ diɛ: «Hvo kɛ li ŋį́ nu lonnii kəlee nwun napili, ŋį́ di həɠə lɔi mɛ̨i, da huwɔɠaa, ə mą kɛ nwɛ̨niɠaa. Di pɛlii ŋɛ̨i ŋį́ mo, a tɛ̨ą, yili aa níí too pulu.» 8Kɛlaa, Yai-Laa ə ɲɛ̨i lɛlɛɛ hee Noe ɓa.
Ɲánwąną pa mɛ̨nį
9Pələi Noe mąą mɛ̨nį hukulaa ə kɛ la, bələ ka: Noe ə kɛ a nu haŋąą, 10Noe tii ə lon ɉinąą haaɓa hɔlɔɓo, dɔ̨nɔ̨ ɓaa: Sɛmə, veelɛnąą Kamə, ɉaaɓanąą Ɉafɛtə.
11Kɛlaa, Yálá ɲɛ̨i ɓa, yɛnɛ̨ɛ̨ nąą kəlee kalai kɛ a mɛ̨nį ɲɔ̨n, da nwąnąlɔɔ mɛ̨nį lɔ ɓə kɛ lɔi mɛ̨i nąą kəlee. 12Yálá ə ɲɛ̨i hee lɔi mɛ̨i, ə nąą kaa, nu tɔ̨nɔ̨ kpɛli hvo kɛi Yálá kwɛli, nu kəlee lii lɔɔ mɛ̨nį ɲɔ̨n ɉu diɛ gɛ. 13Nąąlɔwai, Yálá ə mo Noe ɓa, yɛ mą: «Noe! Ŋą́ą́ gaa gɛ́ diɛ: yɛnɛ̨ɛ̨ hɛnŋaa kəlee ŋąąkpɛɛi lɔwai aa ɉəli ɲɛ̨́i ɓa; di hɔn aa ɲɔ̨n, nwąnąlɔ aa lɔi mɛ̨i laa hvɛɛ. Gáá gəlee nwun na pilii. 14Kələn gɛnɛ̨ ta pɛli, a gofɛrə wulu. Ya gɛ ɉu a bɛlɛɛ pɛlɛɛ tamąą. Ya kpɛɛ a bɛliɛ, ə́ mąląąn ɲą lɔ mą nąą kəlee, ɉu pələ da gɔlɔ ɓa pələ. 15Bələi ə́ kaa pai bɛlii la, bələ ka: Akɛ hvilɛn ni nɔi ɓa, goloon gwɛa yee a kɛ a yee laa mą nwun ɉaaɓa, ɲee la kwɛa a yee laa mą pow lɔɔli, dɔɔmɛ̨i yɛ ɓo a yee laa mą pow haaɓa. 16Ə́ kaa pai mɛ̨i kɛi. Ya don gɛ a yee laa mą tɔ̨nɔ̨, ə́ naaləi kulɔ bomo tɔ̨nɔ̨ ɓa. Ya bɛli pələ kɛ yɛ yələi pɛlɛ, ɉeɛ gee mɛ̨i haaɓa. 17Gáá pai yánwąną kulɔi lɔi mɛ̨i, ə nɔ̨ɔ̨-nɔ̨ɔ̨ hɛnŋaa kəlee nwun napili lɔi mɛ̨i. 18Kɛlaa, ə́ wɛi, gáá nwóó kwɛlɛi yɛ́: Hvó pai lɛɛi ɲánwąnąi tii hu, yɛ́-o, ə́ nɛ̨ą-o, da ə́ lon ɉinąą haaɓai, ə mą kɛ, da di nɛ̨ąni, ka lɔ gələn tii hu. 19Huwɔ huwui lɔpee gəlee, ɉuwu tɛitɛi, ɉilɛ da ɉaa, ə́ di lɔ ə́ pɔ gələn ɉu. 20Nwɛ̨ni huwu tɛitɛi kəlee, ɉilɛ da ɉaa, huwɔ huwu tɛitɛi kəlee, ɉilɛ da ɉaa, ə́ di həɠə, ka diɛni ka lɔ gələn ɉu, əgɛ, di huwu ə lɛɛ yɛnɛ̨ɛ̨. 21Kɔ̨nɔ̨n ɉuwu lɔpee da mį́i, gəlee ta həɠə, yili ə kɛ a ka diɛni ka kɔ̨nɔ̨n.» 22Bələi kpɔlɔɔ Yálá ə mo la Noe ɓa, bələ ɓə ə gɛ la.
Currently Selected:
Gɔwɔ tɔɔi 6: BKPDCG
Highlight
Share
Copy
Want to have your highlights saved across all your devices? Sign up or sign in
