Gɛlaɠaa 7
7
Etiɛnə woo hukulɔ woo
1Ɉaláá laa həli mun gɛnɛ̨ ə Etiɛnə mąąni kɛ yɛ mą: «Tɛ̨ą ɓə ti di kaa moi a ə laai?»
2Etiɛnə ə nwoo ɲąąpənə yɛ mą: «Káái ɓaa a Nąnni da nąnnonnii, 'ká ka wəli tɔɔ; mąąwiɛ-Yálá ə gbɔwɔ lɛ gu kalaɓɔlɔ Abrahamə ɓa, Mesopotami lɔi hu, ɓɛlɔwai hvo ni kɛ hee li la Haran lɔi hu. 3Yálá ə mo mą yɛ mą: Həɠə ə́ pɔ lɔi, ə́ pɔ taai, ə́ kulɔ ə́ nąn ɲəi bɛlɛ́n ə́ li ɓɛi gáá pai nąą lɛi yɛ́. 4Nąąlɔwai, Abrahamə ə həɠə Kalde nuą pɔ lɔi ə li ə hee Haran daai. Nąą ɓə ə lɛɛ laa nąn ə haa, Yálá ə gulɔ laa ə pa ə ɉee ɓɛi ŋɛ̨i háákələi ka heɛi laa. 5Yálá hvo kpɛli nɔi hu hɛn ta dɛɛ bɔ, ə ma kpɛli kɛ gɔwɔ hvilɛn tɔ̨nɔ̨. Kɛlaa, Yálá ə naakwɛlan mo mą yɛ mą, gaa nɔi ŋɛ̨i tɛɛi bɔ, yaa da ɉuwu, bələi mąn lon və ni kɛ la mą. 6Kɛlaa, yii Yálá ə mo mą ya ka, yɛ mą: 'Gɔlɔn yɛ kɛ: Ə́ huwu kaa pai kɛi nwɛ̨ą lɔi hu a luwɔ, diɛ di mɔ̨nɔ̨ɓo kwɛlan nwun-nąąn ɲee mu. 7Kɛlaa, Yálá ə kɛ mą: ‹Nɔi ti di kaa pai kɛi ɉu luwɔlaa hu, gáá pai gití teei, yili pulu, da kulɔ laa di pa ɓɛ diɛ kwɛli hvilɛn mą́ą́ ɓɛ Ɉerusalɛmə.› 8Yili pulu, Yálá da Abrahamə di mįnɛ̨ həɠə, mįnɛ̨i ti kɔlɔn ɉɛn maa kɛ́nɛ̨ mɛ̨nį. Yili ɓə gɛ, Abrahamə ə Isaakə hee kɛ́nɛ̨ ɓa a voló mɛ̨i haaɓa yələ. Isaakə yaa kpɛli, pələ lɔ ɓə ə gɛ la a Ɉakɔbə, Ɉakɔbə yaa, ə gɛ, ti a gu kalaɓɔlɔ pow kɔ́w hveelɛi.
9«Gu kalaɓɔlɔni ti gu di kɔ́lɔn a nɛlɛɛ, di tolo hee di ləɠə Ɉosɛfə ɓa, di nɔwɔtɔɔ, nui Ɉosɛfə ya, ə ɉəɠə ə li la Eziptə lɔi hu yɛ ɓo laa di yəi luwɔlaa laa hu. Kɛlaa, Yálá ə kɛ bɔ. 10Yálá ə gulɔ ŋą mɔ̨nɔ̨ɠaa kəlee hu, ə gɔ a kili, ə nwɛli too Eziptə tɔɔmun ma, yili ə Ɉosɛfə hee Eziptə lɔi nwun na da nwɔ pɛlɛ́i kəlee. 11Ya ɓə, pulu kɛnɛ̨ ə too Eziptə lɔi hu da Kanaan lɔi hu. Bulu kpɔlu pələ, gu kalaɓɔlɔni di hvo kɛi kɔ̨nɔ̨n ɉɔlɔɓo. 12Ɉakɔbə ə bələ mɛ̨n, diɛ kɛ kɔ̨nɔ̨n gaa Eziptə lɔi hu, gu kalaɓɔlɔni tɔɔ laa ɉiɛ dɔlɔɔ tɔlɔɔ ɓa. 13Veeveelɛnąą, Ɉosɛfə ə gbɔwɔ lɛ niɛni diɛ, nąlɔwai ɓə Eziptə tɔɔmun ə Ɉosɛfə huwu həɠəi kɔ́lɔn na. 14Ɉosɛfə ə nɛɛmą ə nuą tɔɔ diɛ li pa a nąn Ɉakɔbə da ɲəi bɛlɛ́n nuą kəlee, di pɛlɛɛ di kee ɓa di kɛ a nu pow mɛ̨ihveelɛ gɔw lɔɔli. 15Yili ɓə gɛ, Ɉakɔbə yɛ li Eziptə lɔi hu, ə lɛɛ laa ə haa, da gu kalaɓɔlɔni. 16Di di powa həɠə di paa diɛ Sisɛmə daai di di loo gámąi ti Abrahamə ə ɲá a wali, Ɛmɔrə lonnii yəi, Ɛmɔrə Sisɛmə nąn.
17«Mɛ̨ni Yálá ə naakwɛlanmo Abrahamə ɓa yɛ gwɛla ɉu, kɛi lɔwai ə kɛɛ kɛa lɛɠɛi, di huwu hu ə kɛnɛ̨ Eziptə lɔi hu; 18ə lɛɛ ɉu, tɔɔmun da kpɛli ə hee Eziptə lɔi nwun na, hvo kɛ Ɉosɛfə kɔ́lɔn. 19Dɔɔmun ti ə kɔ pɛlɛ guɔ nąnni diɛ a gbąnąlaa ɲɔ̨nwɔ̨ɔ̨, gwəi kili ɲɔ̨nwɔ̨ pələ gu nąnni pɔ, ə mo diɛ di lon gaa nįnɛ̨ɠaa pili di hvo nəi pa ɓaloi. 20Nąąlɔwai ti ɓə Moisə ə hɔlɔɓo la, ə kɛ a lokolo lɛlɛɛ Yálá ɲɛ̨i ɓa. Ɲąnįn ɲąąɓa ɓə ə gɛ nąn ɲəi bɛlɛ́n. 21Ɓɛlɔwai gaa nuą di nɛɛ la laa, Eziptə tɔɔmun lon nɛ̨ɛ̨nu, ə ɉəɠə, ə gulɔ ɉu, yɛ non. 22Di Moisə mąąkwɛli Eziptə nuą di wɔ kilikɛɲəilaa kəlee ɓa, ə kɛ a vaŋą kɛnɛ̨ɛ̨ nwooɠaa ti hu, da gɛmɛ̨nįɠaa.
23«Yii kɛa gaa kwɛlan ə kɛ pow nąąn, ni mɛ̨nį ə ɲɛ̨i tɔɔ nąn nonnii a Israɛlə lonnii diɛ gili ə too ɲą. 24Lii ə mo, ə nąn nonnii tɔ̨nɔ̨ kaa Eziptə mun da yɛ mɔ̨nɔ̨ ɓo, Moisə ə nąn nonnii tɔɔ bulu kɛ, ə nwɔ kwələ kulɔ, ə Eziptə mun ti paa. 25Ə kɛ Moisə kwəi, gaa nɛi gaayɔwɔɠaa diɛ yɛ kɛ: Yálá kaa pai di nwun mąąɓoi a yaa. Kɛlaa, yiliɠaa di hvo gbaɠala kaa li ti. 26Mąą yələ laa ɓoɔ, Moisə ə pənə ə pa, ə gaayɔwɔɠaa hveelɛ kaa diɛ gɔ́ a di kee, Moisə ə kɛ bɔ ə di ɲąąkwɛlɛ, ə di yee lɔ gee hu, yɛ diɛ: ‹Mɛ́laani, kɛlɛi, ka káá a nąn non danɔ̨n, lə mɛ̨nį ɓa ka káá gɔi a ka kee?› 27Kɛlaa, nui ŋɛ̨i kɛ mɛlan mɔ̨nɔ̨, ə Moisə woo hutoo, yɛ mą: Gbɛɛ ɓə ə́ kɛ a ku nwun nąmu da ku kiti tee mun? 28Ə́ kaa bɔ ə́ báá, yɛ bələi wɛi ə́ Eziptə mun ti paa lai? 29Nwooɠaai ti mɛ̨n Moisə ə mo, ə pu, ə li ə mąąkilɛ Madian lɔi hu, nąą ɓə ə lɛɛ laa ə lon ɉinąą hveelɛ hɔlɔɓo.
30«Kwɛlan bow nąąn dɛɛ pulu, malaka ta ə gbɔwɔ lɛ Moisə ɓa nwɔ̨n nən gɛnɛ̨ hu, nɔi pun ɉu, Sinai yee nwuɔ̨ wulu lon da ɓa. 31Gɛɛ ti Moisə ə gaa, yili ə gwəi pili mą, ə kɛ bɔ ə lɛɠɛ laa ə mąąkpɛɛ. Gu Ną́mu woo ə tɔɔ, yɛ kɛ mą: 32‹Ɲą́ą́ ɓə a ə́ kalaɓɔlɔni di wɔ Yálá, diɛi ɓaa: Abrahamə, Isaakə da Ɉakɔbə.› Moisə mąą kpəlin bələ, hvo kɛa pɛli nąą kaai. 33Ya ɓə, gu Ną́mu a kɛ mą: ‹'Gɔlɔi ti ə́ kɔ́wɔ ŋą, 'gulɔ, mąąhɔlɔɓo, lɔi mąąhəɠɛɛ ka ti ə kaa tɔɔni mɛ̨i. 34A tɛ̨ą, mɔ̨nɔ̨i nwɔ́ nuą kaa mįi Eziptə lɔi hu, ŋą́ą́ gaa, ŋą́ą́ di ɲiŋɛ̨ woo mɛ̨n, ŋą́ yɛɛ, ə gɛ, ŋą́ di nwun mąąɓo. Yiihu kɛa, gáá ə́ tɔɔi ə́ li Eziptə lɔi hu.›
35«Moisə tanɔ̨n ti di lənə mą, diɛ kɛ mą: ‹Gbɛɛ ɓə ə́ kɛ a ku nwun nąmu da ku kiti tee mun!› Yaa lɔ ɓə Yálá ə pənə ə dɔɔ, ə kɛ a di nwun nąmu da di nwun mąąɓomun, malaka ti gɔwɔ lɛ mą nwɔ̨n nən ɉu, nwɔ kpɔnmąą háálai. 36Yaa ti ɓə di kulɔ Eziptə lɔi hu, a kpalo mɛ̨nį da kwəi pili mąą mɛ̨nįɠaa ə di kɛ Eziptə lɔi hu, gboloyá kpɔlu hu, ə mą kɛ, nɔi pun hu, kwɛlan bow nąąn ɲeemu. 37Moisəi ti ɓə kɛ Israɛlə nu huwu ɓa: ‹Yálá kaa pai gwəi mɛ̨nį hukulɔ mun da həɠəi ka nąn nonnii lɔwai, yɛ ɲą́ą́.› 38Yaa ti lɔ ɓə nwɔ̨nɔ̨ kɛ ɲąąkpɔn gɛnɛ̨ɛ̨ hu, gu nąnni da malakai ti bələɓo mą Sinai yee nwuɔ̨, di lɔwai; yaa lɔ ɓə ɓalo hva kpɛɛ woo mɛ̨n, yɛ dɛɛ gu pɔ.
39«Kɛlaa, gu nąnni di hvo gɛ, di hvo lɛɛ nwoo pulu, di lənə nwooi ti ɓa, a di pənə kilii kɛ diɛ, diɛ kɛ də li Eziptə lɔi hu. 40Ya ɓə gɛ, diɛ kɛ Aarɔn ɓa: ‹Yálá pɛlɛɛɠaa pɛli kuɔ, di hvilɛn ku tɔwɔ, hvo gaai, Moisəi ŋɛ̨i ku kulɔ Eziptə lɔi hu, mɛ̨nįi aa həli mą, ku hvo gɔlɔn.› 41Mąą yələi tii, di nįŋɛ̨ lon bɛli, diɛ hálaa kulɔ ɉalii ti ɓa, diɛ di kɛ kólói tii mąą kwəinɛ̨ɛ̨ kulɔ. 42Yili ɓə gɛ Yálá ə di lɛɛ laa, diɛ kɛa kwɛli hvilɛn yələi hɛnŋąa diɛ, yɛ bələi bɛ̨ɛ̨ la Yálá kwəi mɛ̨nį hukulɔ nuą di wɔ hɛɓɛ́i hu, diɛ kɛ mą:
«‹Israɛlə nu huwu! Gwɛlan bow nąąn ka gɛ nɔi pun ɉu,
ɲą́ą́ ɓə mɔ̨ɔ̨ ká kɛli gɔ́, a ka wɔ haláá hɛn, da kɔ́ɓo hɛn?
43Kɛlɛi, Molokə ŋą pɛlɛ́ lon mə ka kɛi gbəɠə kaa hiɛ la,
da ka wɔ yálá Refan nwɔ pɛmɛ̨lɛ̨n-gɔw;
a ɉɛn mąąnįnįnŋaa ti ká bɛli, káá kwɛli hvilɛn mą.
Bələ lɔ ɓə gáá pai lii la a káá, kpɔ Babilonə pulu pələ.›
44«Ku nąnni kɛɛ nɔi pun hu, ɉəɠə pɛlɛ lon Yálá nwɔ mįnɛ̨ hɛnŋąa di kɛ mu; ə kɛ laa di yəi. Nui kɛli bələ ɓo Moisə ɓa, ə kɛ mą: Bɛli kpɔlɔɔ yɛ bələi ɲą́ giliin na yɛ́. 45Ɉɔlɔɓoi gu nąnni di mo, Ɉosue ə tɔɔ di tɔwɔ, di lɔ la nɔi Yálá ə ɉu nuą kpɛ di tɔwɔ, ɉu, ə lɛɛ laa, ə lɛɛ ɉu, Davidə nwɔ yələi ə ɉəli. 46Yili yaan, Yálá ə ɲɛ̨i lɛlɛɛ hee mą, ə ɉu hvɛli, yɛ kɛ ə pɛlɛ́ tɔɔ a Ɉakɔbə nwɔ Yálái nwɔɔ. 47Kɛlaa, Salomɔn ɓə pɛlɛ́ tɔɔ mą.
48«Kɛlaa ə mą kɛ tii, hɛn gəlee mɛ̨imun, hva hee nu tɔɔ pɛlɛ́ mu. Yɛ bələi Yálá kwəi mɛ̨nį hukulɔ mun ə mo la, yɛ kɛ:
49«‹Yələ kɔ́lɔn mə gaa a nwɔ́ tɔɔ kpəlin, lɔi ə ɓo a gɔ́wɔ tɔɔi.
Pɛlɛ́ lə kɛɛ kpɔ ɓə kɛa ka pɛli dɔɔi mą́ą́?
Kɛɛnąą wolo lə kɛɛ kpɔ ɓə, ŋą́ pɛli vįi tɔɔi laa?
Gu Nąmu woo li!
50Kɛlɛi, ɲą́ą́ ɓə ɉɛnŋaa ti kəlee pɛli-ee?›
51«Ká wəlii kpɔlɔ nu huwui ŋɛ̨i, ká kili da ka wəli mąą kuu hvo kɛ li, yələ kəlee, ká tɔɔ lɔ tai-tai kilaa pono Kili-Mąąhəɠɛɛ la, ka káá kpɔlɔ yɛ ka nąnni. 52Yálá kwəi mɛ̨nį hukulɔ nuą nɛlɛ kpɔ ɓə ka nąnni di hvo mɔ̨nɔ̨ɓo? Nuąi kɛli dələnmomun ti pa mɛ̨nį laa həli, 'ka nąnni, di gəlee paa. Dələnmomun ti, ká lɔ mąąkilii, ká baa. 53Kaa ŋɛ̨i dɔ́n ɉɔlɔɓo malakaɠaa yee ɲą, ká hvo bɔ mɛ̨nį kɛ li.»
Etiɛnə paa mɛ̨nį
54Nwooɠaa ti ə di liikələn di kwəi, diɛ di ɲįn ɲą mįi, diɛ di laa hvaną a Etiɛnə. 55Kɛlaa, Yálá ə kɛ Etiɛnə pɔ, ɲɛ̨i heɛ ɲələi pələ; ə Yálá nwɔ mąąwiɛ laa kaa, Jesus ə ɓo tɔɔni Yálá yee lɛlɛɛ hu pələ, 56yɛ diɛ: «'Ka ɓɛ kaa, gáá yələkɔlɔn gaai naa ɓoɔ, Nu Lon ə ɓo tɔɔni Yálá yee lɛlɛɛ mɛ̨i pələ.»
57Nuą kəlee di tomą kpɔ a di woo kɛnɛ̨ɛ̨, di di yee lɔ di wəlii. Di kəlee di kpuluun di wolo Etiɛnə ɓa, 58di ɉon, di kulɔ la daa pulu pələ, diɛ ɉɔɔ a kwɛni. Nuąi kɛi gwɛni pili, di di mąą həɠəɠaa kulɔ di kwaną, di dɛɛ hulɔnon da pɔ, diɛ kɛ mą: Solə. 59Di kɛɛ Etiɛnə hɔɔi a gwɛni, ə kɛi kpɔlɔ Yálá hvɛli yɛ kɛ mą: «Ną́mu Jesus, ə́ yee hee nį́į́ mu.»
60Yili pulu, ə pu gbəlin na, ə tomą kpɔ a nwoo kɛnɛ̨ɛ̨, yɛ mą: «Ną́mu! 'Hvó nɛ̨ŋɛ̨n ŋɛ̨i pɛ̨ɛ̨ di nwuɔ̨.»
Moi ə mo tii, ə haa.
Currently Selected:
Gɛlaɠaa 7: BKPDCG
Highlight
Share
Copy
Want to have your highlights saved across all your devices? Sign up or sign in
