Gɛlaɠaa 6
6
Nu mɛ̨ihveelɛ hee mɛ̨nį
1Naalɔwai, galan nɛa kpulu hu ə kɛi kɛnɛ̨, Ɉuifə yiiɠaai kɛi Grɛkə woo ɓo, di kɛi Hebreuɠaa laa ɓo, kɔ̨nɔ̨n mɛ̨nį hu, mąąhɔlɔɓo, di hvo kɛi di wɔ kalaninŋaai mąą mɛ̨nį ɲɛ̨i kulɔ a dənən gɔ̨nɔ̨n ɲąąkwɛlɛi lɔwai. 2Gɛla pow kɔ́w hveelɛi di galan nɛa kəlee ɲąąkpɔn, diɛ diɛ: «Ku mąą hvo nɛ̨ɛ̨li ku hvo Yálá lawoo laa həliɛ lɛɛ laa, kuɔ ku yee lɔ kɔ̨nɔ̨n ŋąąkwɛlɛ mɛ̨nį hu. 3Yili ɓa, Nán nonnii, ka nu mɛ̨ihveelɛ həɠə ka lɔwai a nuąi Kili-Mąąhəɠɛɛ kaa di yəi, mɛ̨nį hukpɛ kili ə ɓo diɛ, ə gɛ, ku gɔ̨nɔ̨n ŋąąkwɛlɛ kolói ŋɛ̨i tɛɛ di pɔ. 4Ku wɛi, ku kaa ku ɲɛ̨i lɛɛi Yálá hvɛliɛ da Yálá lawoo laa həliɛ ɓa.»
5Nwóó ti ə nɛ̨ɛ̨ kpɔ galan nɛa kəlee wəlii. Di nɛɛmą di, Etiɛnə həɠə ɉu, yai Kili-Mąąhəɠɛɛ kaa ɲəi, da laa na laa, ɛlɛɛ, Filipə, Prokorə da Nikanɔrə, Timɔn, Parmenasə da Nikolasə yai a Antiɔsə mun yaai wɔlɔ lɔ Ɉuifəɠaa di wɔ kalan hu. 6Di pa a nuą ti gɛlaɠaai pɔ, di di yee pɛlɛ di mɛ̨i, di Yálá hvɛli diɛ.
7Yálá lawoo ə kɛi taɠa kɛɛnąą kəlee, kalan nɛa kpulu hu yɛ kɛnɛ̨ Ɉerusalɛmə, ɛlɛɛ, ɉaláá laa həli nuą tamąą diɛ di yee hee Jesus mąą mɛ̨nį mu.
Etiɛnə hon mɛ̨nį
8Etiɛnə pilaai kɛ a Yálá ŋą mɛ̨inɛ̨ɛ̨, huwalawala ə ɓo yei, yɛ kpalo mɛ̨nį da kwəi pilimąą mɛ̨nį kpɛa-kpɛaɠaa kɛ nuą lɔwai. 9Kɛlaa, di lɔwai, galan gbɔn ti da kɛ mą: luwɔ pɔlɔɠaa, da Sirɛnə nuą Alɛsandri nuą Silisi ɛlɛɛ, Asi nuą, hvaa ə too Etiɛnə ni lɔwai. 10Kɛlaa, di yee hvo lɔ Etiɛnə ɓa, mąąhɔlɔɓo, Kili-Mąąhəɠɛɛ ə kɛ bɔ, yɛ mɛ̨nį ɓo la a kilikɛɲəi laa. 11Yili ɓə gɛ, di lɔ nuą hu di lɛɛ pɛlɛ a Etiɛnə laa, diɛ kɛ mą: «Ku nwoo mɛ̨n yɛ Moisə da Yálá di ɓɛlɛtoo wooɠaa ɓo.» 12Bələ ɓə di lɔ la nuą hu, da galanɉonŋąa ə mą kɛ tɔ́n galamɔ̨ɔ̨ɠaa. Di Etiɛnə hon də li la tɔ́n vili nąmįną lííla. 13Di liɛ, di lɛɛ hvaa tamąą ɓo a Etiɛnə laa di kɛ mą:
Nui ŋɛ̨i ka káá gaai, hvo ta kpəla li woo ɲɔ̨n moɔ ɓa a guɔ Yálá hee pɛlɛ́i laa da Moisə nwɔ tɔ́n laa. 14Ku nwoo mɛ̨n yɛ kɛ diɛ Jesus Nazarɛtə mun ti kaa pai Yálá hee pɛlɛ́ pui, dɔ́nŋąai Moisə ə dɛɛ gu pɔ, ə gəlee mąąhvalin.
15Nuąi kpɔ kɛ dɔ́n gələ mu, di kəlee di di ɲɛ̨i hee Etiɛnə ɓa, ɲɛ̨ilaai ə ɓo yɛ Yálá nwɔ malaka ta.
Currently Selected:
Gɛlaɠaa 6: BKPDCG
Highlight
Share
Copy
Want to have your highlights saved across all your devices? Sign up or sign in
