2 Makabe 15
15
Nikanɔrə ə vįitɔɔ yələ láá pú
1Nikanɔrə ə bələ mɛ̨n diɛ kɛ Ɉudasə da nwɔ nuąi di kaa Samari lɔi hu pələ, ə gili ɲą hiɛ, yɛ kɛ a wóló diɛ a vįitɔɔ yələ, mɛ̨nį hva gaa. 2Ɉuifəɠaai kɛ Nikanɔrə pɔ a di kpaan mɛ̨nį, diɛ mą: «Hvo di paa tii a ɲɔ̨nwɔ̨ɔ̨ yɛ huɔɠaa; kɛlaa volói tii Hɛn gəlee Laahɔnmomun ə mąąhəɠə, yɛ mąąwiɛ, 'mąąwiɛ yɛ́ kpɛlimąn.»
3Kɛlaa nu kpoloon gbɛli-kpɛli ti ə di mąąnikɛ, a kɛ tɔɔmun da kaa yələkɔlɔn ɉu, yɛ kɛ di hvįįtɔɔ yələ mąąhəɠə. 4Yiliɠaai diɛ mą: «Nąmu, Hvulúmąą yaa kpįnįi lee, yələkɔlɔn ɲąąwooɓomun, ɓə mo yɛ di voló mɛ̨ihveelɛ yələ mąąhəɠə.»
5Nikanɔrə yɛ diɛ: «Ɛlɛɛ ɲą́ą́n, a lɔi ɲąąwooɓomun, gɛ́ di kɔ́-kɔ hɛnŋąą həɠə, ɛlɛɛ di tɔɔmun nwɔ kóló kɛ.» Kɛlaa hvo pɛli nwɔ kili ɲɔ̨nwɔ̨ ti pɔ mɛ̨nį kɛi.
Ɉudasə mɛlaa hvaŋąlɔ mɛ̨ni da nwɔ hįiwoo
6Nikanɔrə ə nwun dɛ a kpɔwɔ ɲąąkɛnɛ̨ huwu ta; ə mo yɛ gaa pai gɔ nɛ̨ɛ̨ mɛ̨nį mą pɛlɛ́ tɔɔi a Ɉudasə da mɛlaa di yei hɛnŋąą. 7Makabe yan nwɛi, gili tɔɔi kpɔ kɛ a nwala-walaa yɛ kɛ Nąmu kaa pai kpɔnmąą tɛɛi bɔ. 8Nuąi kɛ bɔ, ə kɛi di hvaŋą lɔ, yɛ kɛ diɛ, di hvo ɲɔw ɉalipulunuą di wɔ kɔ́ ɓa, kɛlaa bələi yələkɔlɔn ə kpɔnmąą tɛɛ la di pɔ gɔ́ yiiɠaai daa tɛɛ ɉu, di di kili hvilɛn mą, ɛlɛɛ di kili ə kɛ ɉu, ə mą kɛ yii hu, diɛ kɛ gɔ́ kaa pai nɛ̨ɛ̨i diɛ a nui a pɛli mɛ̨nį kəlee ɓa vaŋą. 9Ə kɛi di hvaŋą lɔ ti a Dɔn nwoo da Yálá kwəi mɛ̨nį hu kulɔ nuą, gɔ́ɠaai daa gbɛa gɔ yɛ di kili too di ɲą, yɛ hvaŋą ninɛ tɛɛ di pɔ. 10Ə di hvaŋą lɔ, ə nwoo laa kulɔ yɛ kɛ diɛ ɉalipulunuą daa di woo kala, mɛ̨nįi di naa kwɛlan mo, di hvo gɛ li. 11Ə kpɛɛ a di lii kpələ wooɠaa ɓoɔ diɛ. Kɔ́ kɔ́ kwɛli hɛnŋąą hvə da nii kpələ taalei ti tɛɛ nu pɔ, Kɛlaa kaalon vaa pələ ɓə a nu lii kpələ tii. Ɉudasə ə hįį ta hu kulɔ diɛ, yii da pɛli laai na, yili ə di kəlee di kwəi nɛ̨ɛ̨. 12Mɛ̨nįi ə gaa ya ka: Oniasə, yai aa ta kɛ a ɉalaa laa həli mun gɛnɛ̨, nu lɛlɛɛ ta, duwó la nɛ̨ɛ̨, nu mąą nwunmąą ta, ə muhəɠə lɔ a kaalon duwo pələ kəlee kɛɛ, Oniasə ə kɛi ɲee haŋąn, yɛ Yálá hvɛli Ɉuifəɠaa kəlee mąą mɛ̨nį ɓa. 13Yili pulu hulɔnu ta ə gbɔwɔ lɛ lɔ ti Ɉudasə ɓa, nwun bowaa, mąąwiɛɛ, ɲee muhəɠɛɛ, mąąɲinɛ̨n gɛnɛ̨ ə ɓo mą. 14Oniasə ə naa tɛ bələ mu, yɛ mą: «Ɉulɔnui ŋɛ̨i kaa a nąn nonnii di wɛlikɛmąąmun, a Yálá hvɛli kɛnɛ̨ nu huwu ɓa da daa mąąhəɠɛɛ ɓa, Ɉeremi, Yálá kwəi mɛ̨nį hukulɔ mun.»
15Ɉeremi ə kɔ́ kɔ́ ɓowa haŋan Ɉudasə pɔ pələ, a mámįiyee, ə ɓo a hɛni, ə nɔ ɲee ɲą, yɛ kɛ mą: 16«Gɔ́ kɔ́ ɓowa mąąhəɠɛɛ ŋɛ̨i hon; Yálá yei mɛ̨inɛ̨ɛ̨ li; ə kaa pai ə́ yowoɠaa hu woloi la.»
Gɔ kala mɛ̨ni Nikanɔrə ɓa, da ɉaa mɛ̨nį
(1 Makabe 7.39-50)
17Ɉudasə woo lɛlɛɛɠaa ti ə nuą liilaa, yan da pɛli kɛ hvaŋą da lii kpələ tɛɛi lanŋaa pɔ; Ɉuifəɠaa di mo diɛ di gɔ́ yili kpɔlɔ ɲą, ɛlɛɛ, di di ɲɛ̨i kɛ naa kulɔi lɛlɛɛ tɔwɔ a gɔ́i da mo a huwalawalalaa; hvo gaai, daa, da ɉɛnŋaa mąąhəɠɛɛ, da ɉɛli pɛ́lɛ nwun mąą kɔnwɔ̨ mɛ̨nį li. 18Nɛ̨ąą da nɛapɛlɛɛ da di nąn nonnii da di kaayɔwɔɠaa da mąą lii hvo kɛ walawala li kpɔ ŋɛ̨i di ɲɛ̨i mu; ɉɛli pɛ́lɛ mąąhəɠɛɛ ɓə di kɛi ɲɔw kpɔ kɛnɛ̨ mąą mɛ̨nį ɓa, mɛ̨nį kəlee tɔwɔ. 19Nuąi kɛ daa kwəi pələi, di wɔ lii hɛlɛn və kɛ kolo li nuąi kɛ gɔ́ mɛ̨i, gbomoi, di mąą mɛ̨nį ɓa. 20Di kəlee di ɲɛ̨i ə kɛ naa kulɔ pələ tɔwɔ, di yowoɠaa daa gbɛa kɛ di ɲąąkpɔn, daa ɉolahiɠaa tɔɔi kulɔ gɔ́ mɛ̨nį ɓa. Daa kɛ ɉə́lə́ɠaa tɔɔi gulo kpɔ a nɛlɛɛ; ɉoogilɛ həɠə nuą di kɛ tɔɔni di koo ɓa. 21Makabe ə ɲɛ̨i hee nu kpuluɠaa diɛ, gɔ́ kɔ́ hɛnŋąą ɲɛ̨i tamą pələ, da ɉələɠaa ɲɛ̨i ɲɔnwɔ bələ. Ə ɲee tɛ yelei pələ; ə Nąmu yai a kpɔlu mɛ̨nįɠaa kɛ, vɛli; gili ə kɛ ɉu yɛ kɛ, kwɛli hɛn vəi a kɔ́ nɛ̨ɛ̨ nu ɓa, Kɛlaa, Yálá liiɓa ɓə kɔ́ a nɛ̨ɛ̨ la nui mąąnɛ̨ɛ̨ ə nɛ̨ɛ̨ mą, mą. 22Ə kɛi Yálá hvɛli ŋɛ̨i: «E kə! Ku Nąmu; Yɛ́i a hɛn gəlee ɲąąwooɓomun, yɛ́ ɓə yɛ́ malakai tɔɔ a Ɉude tɔɔmun Ezekiasə nwɔɔ yələi, yɛ nu waa nwun dɔnɔ̨ nu waa pow mɛ̨ihaaɓa yee lɔɔli paa Senakeribə nwɔ kɔlaɠai hu. 23Yələkɔlɔn ɲąąwooɓomun, malaka ta tɔɔ lɔ ti yiihu, ku ɲɛ̨i tɔwɔ, yɛ nuą ɲɛ̨i mąą ɲɔw, yɛ di hu pu diɛ. 24Ə́ yee kɔnwɔ̨n vaŋa kɛnɛ̨, ə nuą ŋɛ̨i kɛlɛ; di kɛi pa kɔ́ pɛlɛ yɛ́ nu huwu mąąhəɠɛɛ ɓa, diɛ ə́ lalan!»
Bələ ɓə ə nwoo laa kulɔ la.
25Nikanɔrə nwɔ holahiɠaa di kɛi pa, gɔ́ tulu woo ɓa, diɛ kɔ́ wələɠaa too. 26Ɉudasə nwɔ nuą di wɛi, Yálá mąąnɛ̨ɛ̨ ɓə di kɛli mo, diɛ vɛli, diɛ wolo la di yowoɠaa diɛ. 27Di kɛi gɔ a di yee, diɛ Yálá hvɛli di kwəi pələ, nuą di di paa da pɛli nu waa pow haaɓa kɔw lɔɔli kulɔi; Yálá aa kɛ gbɔwɔ lɛ di kwəi ə nɛ̨ɛ̨ kpɔ ɉu kɛnɛ̨. 28Di kpɛɛ a golo kɛɛ, di kɛi kɛa pənə diɛ li di kwəinɛ̨ɛ̨, diɛ Nikanɔrə powa kaa laani, nwɔ kɔ́ kɔ́ həɠə ə ɓo mą. 29Di tómą, nąą ə kɛ lɔ ɉuwu-ɉuwu, diɛ lúwɔ kɛ Nąmu kɛnɛ̨ ɓa di nąnni hvaa woo hu. 30Nui nu kəlee tɔwɔ, ə gbįnįlee ɲąą pɛliɛ tɛɛ nwɔ lɔi hu nuą di mąą mɛ̨nį ɓa, yɛ di wɛlilakɛ a wɛlikɛmalaa kɛnɛ̨ɛ̨, ə mo di Nikanɔrə nwun dee ɲą, di ɲee tee monwon ɉu, di li a diɛ Ɉerusalɛmə. 31Ɉəliɛ laa yaa kpįnįlee ə nwɔ lɔi hu nuą ɲąąkpɔn, ə ɉalaa laa həli nuą tɔɔ ɉaláá kulɔi lii la, nuą kɛ gɔ́ pɛ́lɛ́ mu, ə nuą tɔɔ di pulu, di pa. 32Ə gɛɛ-kalamun Nikanɔrə, a nu ɲɔ̨nwɔ̨ɔ̨ ti nwun ganin nɛ, da ɲeei ə ɉaŋan a tɛɠɛɓoɉulaa Mɛ̨ni kəlee ŋą Heeɓomun nwɔ pɛ́lɛ mąąhəɠɛɛi ɓa, 33ə Yálá lalan mun Nikanɔrə nɛn dee, ə mo di dee a gbuo pɛlɛɛ, di dɛɛ nwɛ̨niɠaa pɔ; ɛlɛɛ, di nwɔ ɓowoi vɛla hɛlɛn ɉɛli pɛ́lɛ ɲɛ̨itɔwɔ. 34Di kəlee di yələkɔlɔn ɉu Yálá mąąwiɛɛlaa tɛ a lúwɔ, diɛ kɛ: «Nui ŋą kɛɛnąą mąąhəɠɛɛ laa hɔn mo mąąluwu mɛ̨nį tɔwɔ, lúwɔ ə kɛ mą!»
35Ɉudasə ə mo di Nikanɔrə nwun ganin kpulon gɔ́ pɛ́lɛ ɓa, a gbɔnmąą ti Nąmu ə dɛɛ kɔlɔn ɉɛn, nu kəlee yɛ gaa. 36Di woo ə laa mą, di kəlee kpun, diɛ kɛ voloi ti hvo kea tɛɛ lɔ ti kpɛli-kpɛli, kɛlaa, di hɛli pu a mąą yələ, a ɲąnįn bow gɔw hveelɛ nwɔ hvoló bow gɔw haaɓanan, yai da kɛ mą Aramə woo hu Adarə, voloi da kɛ mą Mardose nwɔ hvoló mąąyíi yələ.
Ɉɛɓɛ́ kɛmun nwoo laa kulɔ woo
37Mɛ̨nįɠaai hvilɛn Nikanɔrə ɓa, bələ ɓə di kɛ la; yii yan ə həɠə ɲələ ɓa daa ə lɛɛ Hebreuɠaa yee kɔn ma, ɲą́ą́ gbɛlimąn, nąą ɓə gáá nwɔ́ hɛɓɛ́i kpəlai laa. 38Akɛ, bɛ̨ɛ̨ pələ lɛlɛɛi, ɛlɛɛ ə pɛli ɉu, yili ɓə ɲą́ą́ gbɛlimąn ŋą́ kɛ bɔ; akɛ dɔlɔɔ hvo mą kɛnɛ̨, ə ɓo lɔ a kolo hviikpɛɛ, yii ɲéé a pɛli mą, ya ka ti. 39Hvo gaai, yá yá pu lɔɔ hu, yɛ́ gbələ, hva nɛ̨ɛ̨, ɛlɛɛ, hva kpələ wɛli kulɔ; bələ lɔ ɓə gaa la, mɛ̨nį heɛ gee la a nɛlɛɛ hɛɓɛ́ hu ɓə a momun kwəinɛ̨ɛ̨. Ɓɛ ɓə gáá kpəlai laa.
Currently Selected:
2 Makabe 15: BKPDCG
Highlight
Share
Copy
Want to have your highlights saved across all your devices? Sign up or sign in