သုတ္တံကျမ်း 30
30
အာဂုရ၏ဩဝါဒစကားများ
1ယာကေ၏သားအာဂုရ၏ဩဝါဒစကားများ။
အာဂုရသည် ဣသေလအား၊ ဣသေလနှင့်ဥကလတို့အား မိန့်ကြားသည်ကား
2အကယ်စင်စစ် ငါသည် လူတကာတို့ထက်
အသိတရားမဲ့၍ ငါ၌လူ့အသိဉာဏ်မရှိ။
3ငါသည် ဉာဏ်ပညာကိုမသင်ယူ။
သန့်ရှင်းသောအရှင်ကိုသိသောဉာဏ်လည်း ငါ၌မရှိ။
4မည်သူသည် ကောင်းကင်သို့တက်ပြီး ပြန်ဆင်းလာသနည်း။
မည်သူသည် လေကို မိမိလက်ခုပ်ထဲ ထည့်ထားသနည်း။
မည်သူသည် ရေကို မိမိ၏အဝတ်ဖြင့် ထုပ်ထားသနည်း။
မည်သူသည် ကမ္ဘာမြေအစွန်းရှိသမျှကို တည်ထားသနည်း။
ထိုသူ၏အမည်ကား မည်သို့နည်း။
သူ့သား၏အမည်ကား မည်သို့နည်း။ သင်သိသလော။
5ဘုရားသခင်၏မိန့်တော်မူချက်ရှိသမျှသည် ခိုင်လုံမှန်ကန်၏။
ကိုယ်တော်ကိုခိုလှုံသောသူတို့အတွက် ကိုယ်တော်သည် ဒိုင်းလွှားဖြစ်တော်မူ၏။
6ကိုယ်တော်၏နှုတ်ကပတ်တော်တို့အပေါ် ထပ်မံ၍မဖြည့်စွက်နှင့်။
ဖြည့်စွက်လျှင် ကိုယ်တော်သည် သင့်ကိုဆုံးမသဖြင့် သင်သည် လိမ်လည်သောသူဖြစ်သွားလိမ့်မည်။
7ကိုယ်တော်ထံမှဆုနှစ်ပါးကို အကျွန်ုပ်တောင်းလျှောက်ပါ၏။
အကျွန်ုပ်မသေမီ ထိုအရာတို့ကို အကျွန်ုပ်အားမပေးဘဲနေတော်မမူပါနှင့်။
8မဟုတ်မမှန်သောအရာနှင့် လိမ်လည်သောစကားကို
အကျွန်ုပ်နှင့်ဝေးကွာစေတော်မူပါ။
ဆင်းရဲခြင်းကိုလည်းကောင်း၊ ကြွယ်ဝချမ်းသာခြင်းကိုလည်းကောင်း
အကျွန်ုပ်အား ပေးတော်မမူပါနှင့်။
အကျွန်ုပ်အတွက်လိုအပ်သောအစာကိုသာ
အကျွန်ုပ်အား ပေးတော်မူပါ။
9သို့မဟုတ်လျှင် အကျွန်ုပ်သည် ပြည့်စုံကြွယ်ဝ၍
“ထာဝရဘုရားသည် မည်သူနည်း”ဟု ဆိုလျက် ကိုယ်တော်ကိုငြင်းပယ်မိပါလိမ့်မည်။
သို့တည်းမဟုတ် အကျွန်ုပ်သည် ဆင်းရဲ၍ခိုးယူကာ
အကျွန်ုပ်ဘုရားသခင်၏နာမတော်ကို ထိခိုက်မိစေပါလိမ့်မည်။
10အစေအပါးအကြောင်းကို သူ့သခင်ထံ မတရားစွပ်စွဲပြောဆိုခြင်းမပြုနှင့်။
ထိုသို့ပြုလျှင် ထိုအစေအပါးသည် သင့်ကိုကျိန်ဆဲ၍ သင်၌အပြစ်သင့်ရောက်လိမ့်မည်။
11မိမိ၏ဖခင်ကိုကျိန်ဆဲ၍
မိမိ၏မိခင်ကို ကောင်းချီးမပေးသောသူများရှိ၏။
12မိမိ၏အညစ်အကြေးကို မဆေးကြောဘဲ
ကိုယ့်ကိုယ်ကိုယ်စင်ကြယ်သည်ဟု ထင်မြင်သောသူများရှိ၏။
13မျက်နှာအလွန်ထောင်လွှား၍
မိမိမျက်လွှာကို ပင့်ထားသောသူများရှိ၏။
14အဖိနှိပ်ခံရသောသူတို့ကို မြေကြီးပေါ်မှလည်းကောင်း၊
နွမ်းပါးသောသူတို့ကို လူထုထဲမှလည်းကောင်း ဝါးမျိုပစ်ရန်
သန်လျက်ကဲ့သို့သောသွားနှင့် ဓားကဲ့သို့သောအစွယ်ရှိသောသူများရှိ၏။
15မျှော့၌ “ပေးပါ၊ ပေးပါ”ဟု ဆိုသောသမီးနှစ်ယောက်ရှိ၏။
အလိုမပြည့်စုံနိုင်သောအရာသုံးပါးမက “တော်ပါပြီ”ဟု မဆိုတတ်သောအရာလေးပါးမှာ
16မရဏာနိုင်ငံ၊ မြုံသောဝမ်း၊ ရေမဝနိုင်သောမြေကြီးနှင့်
“တော်ပါပြီ”ဟု မဆိုတတ်သောမီးတို့ဖြစ်ကြ၏။
17ဖခင်ကိုပြက်ရယ်ပြု၍ မိခင်အားနာခံခြင်းကို မထီမဲ့မြင်ပြုတတ်သောမျက်စိကို
လျှိုမြောင်၌ရှိသောကျီးကန်းတို့သည် ဖောက်ထုတ်၍ လင်းတ၏သားပေါက်တို့သည် စားကြလိမ့်မည်။
18ငါအံ့မခန်းဖြစ်ရသောအရာသုံးပါးမက
ငါနားမလည်နိုင်သောအရာလေးပါးမှာ
19မိုးကောင်းကင်၌လင်းယုန်သွားရာလမ်း၊
ကျောက်ဆောင်ပေါ်၌မြွေသွားရာလမ်း၊
ပင်လယ်အလယ်၌သင်္ဘောသွားရာလမ်းနှင့်
မိန်းမပျိုနှင့်အတူယောက်ျားသွားရာလမ်းတို့ဖြစ်ကြ၏။
20အိမ်ထောင်ရေးဖောက်ပြန်သော မိန်းမ၏လမ်းသည်လည်း ထိုနည်းတူဖြစ်၏။
သူသည် စားသောက်ပြီးမှ မိမိ၏ပါးစပ်ကိုသုတ်ပြီး “မည်သည့်အပြစ်ဒုစရိုက်ကိုမျှ ငါမပြု”ဟု ဆိုတတ်၏။
21မြေကြီးလှုပ်ခတ်ရသောအကြောင်းခြင်းရာသုံးပါးမက
မြေကြီးမခံနိုင်သောအကြောင်းခြင်းရာလေးပါးမှာ
22ကျွန်က မင်းပြုခြင်း၊ မိုက်မဲသောသူက အစာဝခြင်း၊
23မုန်းစရာကောင်းသောမိန်းမက လက်ထပ်ရခြင်းနှင့်
ကျွန်မက သူ့သခင်မ၏အမွေကိုဆက်ခံရခြင်းတို့ဖြစ်ကြ၏။
24ကမ္ဘာမြေကြီးပေါ်မှာ သေးငယ်သော်လည်း
အလွန်ပညာရှိသည့် အရာလေးပါးမှာ
25ခွန်အားကြီးသောအမျိုးမဟုတ်သော်လည်း
နွေရာသီ၌ မိမိတို့၏အစားအစာကို ပြင်ဆင်တတ်သောပုရွက်ဆိတ်များ၊
26အင်အားကြီးသောအမျိုးမဟုတ်သော်လည်း
မိမိတို့အိမ်ကို ကျောက်ထဲတွင်တည်တတ်သော ရှာဖန်ယုန်များ၊
27ဘုရင်မရှိသော်လည်း
တစ်စုတစ်ပေါင်းတည်း စီတန်းသွားလာတတ်သောကျိုင်းကောင်များနှင့်
28လက်ဖြင့်ပင်ဖမ်းယူနိုင်သော်လည်း
ဘုရင့်နန်းတော်တို့တွင်နေတတ်သောအိမ်မြှောင်တို့ ဖြစ်ကြ၏။
29ခံ့ညားစွာခြေလှမ်းလှမ်းတတ်သောအရာသုံးပါးမက
ခံ့ညားစွာလှမ်းလျှောက်တတ်သောအရာလေးပါးမှာ
30တိရစ္ဆာန်ထဲတွင်ခွန်အားကြီး၍
မည်သည့်အရာ၏ရှေ့ကမျှ နောက်ပြန်မလှည့်တတ်သောခြင်္သေ့၊
31ဟန်ပါမာန်ပါလျှောက်တတ်သောကြက်ဖ#30:31 “ခွေးသမင်”ဟူ၍လည်း ပြန်ဆိုနိုင်၏။၊ သို့မဟုတ်
ဆိတ်ထီး၊ စစ်သည်အလုံးအရင်းခြံရံထားသော#30:31 “သူ့ကိုဆန့်ကျင်တွန်းလှန်သူမရှိသော”ဟူ၍လည်း ပြန်ဆိုနိုင်၏။ ရှင်ဘုရင်တို့ဖြစ်ကြ၏။
32သင်သည် မိမိကိုယ်ကိုချီးမြှောက်လျက် မိုက်မဲစွာပြုမူခဲ့လျှင်၊
သို့မဟုတ် မကောင်းကြံစည်ခဲ့လျှင် သင်၏နှုတ်ကိုလက်နှင့်ပိတ်ထားလော့။
33အကြောင်းမူကား နို့ကိုမွှေလျှင် ထောပတ်ကိုရ၍
နှာခေါင်းကိုဆွဲလိမ်လျှင် သွေးထွက်တတ်သကဲ့သို့ ဒေါသကိုမွှေလျှင် ခိုက်ရန်ဖြစ်ပွားတတ်၏။
Currently Selected:
သုတ္တံကျမ်း 30: MSBU
Highlight
Share
Copy
Want to have your highlights saved across all your devices? Sign up or sign in
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative