ဟေရှာယအနာဂတ္တိကျမ်း 7

အာခတ်မင်းကြီးအတွက်သတင်းစကား

1ဩဇိမင်းကြီး၏သားတော်ယောသံ၊ ယောသံမင်းကြီး၏သားတော် ယုဒဘုရင်အာခတ်မင်းကြီး၏လက်ထက်တွင် ဆီးရီးယားဘုရင်ရေဇိန်မင်းကြီး၊ ရေမလိ၏သား အစ္စရေးဘုရင်ပေကာမင်းကြီးတို့သည် ဂျေရုဆလင်မြို့ကို ချီတက်တိုက်ခိုက်၏။ သို့သော် မအောင်နိုင်ခဲ့ပေ။ 2“ဆီးရီးယားပြည်သည် ဧဖရိမ်ပြည်နှင့် မဟာမိတ်ဖွဲ့သည်”ဟု ဒါဝိဒ်အမျိုးအနွယ်ကြားသိသောအခါ တောထဲမှသစ်ပင်တို့သည် လေတိုက်၍လှုပ်ခါသကဲ့သို့ အာခတ်မင်းကြီးနှင့် ပြည်သူပြည်သားတို့၏စိတ်နှလုံးသည် လှုပ်ခါသွားလေ၏။ 3ထိုအခါ ထာဝရဘုရားက ဟေရှာယအား “သင်သည် သင်၏သားရှာယာရှုပ်#7:3 “ကြွင်းကျန်သောသူပြန်လာလိမ့်မည်”ဟူသောအဓိပ္ပာယ်ရှိ၏။နှင့်အတူ ခဝါသည်၏လယ်သို့သွားသောလမ်းမကြီးတွင်ရှိသည့် အထက်ရေကန်ရေသွယ်မြောင်းအဆုံး၌ အာခတ်မင်းကြီးနှင့် သွားရောက်တွေ့ဆုံ၍ 4‘သတိပြုလျက် ငြိမ်ဝပ်စွာနေလော့။ မီးခိုးထွက်နေသောထင်းစနှစ်ခုနှင့်တူသော ဆီးရီးယားဘုရင်ရေဇိန်မင်းကြီးနှင့် ရေမလိ၏သားတို့ ပြင်းစွာအမျက်ထွက်သည်ကို မကြောက်နှင့်။ စိတ်မပျက်နှင့်။ 5ဆီးရီးယားပြည်သည် ဧဖရိမ်ပြည်သားဖြစ်သောရေမလိ၏သားနှင့်အတူ သင့်ကို မကောင်းကြံစည်လျက် 6ငါတို့သည် ယုဒပြည်သို့စစ်ချီပြီး ထိုပြည်ကို တစ်စစီဖြိုခွဲ၍ ခွဲဝေယူကြစို့။ တဗာလ၏သားကို ထိုပြည်၏ရှင်ဘုရင်အဖြစ်တင်မြောက်ကြစို့ဟု ဆိုကြ၏။ 7ဘုရားရှင်ထာဝရဘုရားက ထိုအကြံအထမမြောက်ရ၊ ထိုသို့မဖြစ်ရ။ 8အကြောင်းမူကား ဆီးရီးယားပြည်၏ဦးခေါင်းသည် ဒမတ်စကပ်မြို့၊ ဒမတ်စကပ်မြို့၏ဦးခေါင်းသည် ရေဇိန်မင်းကြီးဖြစ်၏။ ဧဖရိမ်သည် ခြောက်ဆယ့်ငါးနှစ်အတွင်း လူမျိုးတစ်မျိုးအဖြစ်မှ တစ်စစီပြိုကွဲသွားရလိမ့်မည်ဟု မိန့်တော်မူပြီ။ 9ဧဖရိမ်ပြည်၏ဦးခေါင်းသည် ရှမာရိမြို့၊ ရှမာရိမြို့၏ဦးခေါင်းသည် ရေမလိ၏သားဖြစ်၏။ သင်တို့၌ ယုံကြည်ခြင်းမရှိလျှင် သင်တို့တည်မြဲလိမ့်မည်မဟုတ်’ဟူ၍ ဆင့်ဆိုလော့”ဟု မိန့်တော်မူ၏။

ဧမာနွေလနှင့်ပတ်သက်သော ပရောဖက်ပြုဟောပြောချက်

10တစ်ဖန် ထာဝရဘုရားက အာခတ်မင်းကြီးအား 11“သင်၏ဘုရားသခင်ထာဝရဘုရားထံ နိမိတ်လက္ခဏာကို တောင်းလော့။ နက်သောမရဏာနိုင်ငံမှဖြစ်စေ၊ မြင့်သောအထက်အရပ်မှဖြစ်စေ တောင်းလော့”ဟု မိန့်တော်မူ၏။ 12သို့သော် အာခတ်မင်းကြီးက “အကျွန်ုပ်မတောင်းပါ။ ထာဝရဘုရားကို အကျွန်ုပ်မစမ်းသပ်ပါ”ဟု ပြန်လျှောက်၏။ 13ထိုအခါ ဟေရှာယက “ဒါဝိဒ်အမျိုးအနွယ်တို့၊ နားထောင်လော့။ သင်တို့သည် လူတို့ကိုစိတ်ပင်ပန်းစေသည်မှာ နည်းသေး၍ ငါ၏ဘုရားသခင်ကိုပါ စိတ်ပင်ပန်းစေကြမည်လော။ 14ဘုရားရှင်ကိုယ်တော်တိုင် သင်တို့အား နိမိတ်လက္ခဏာပေးတော်မူမည်။ ကြည့်ရှုလော့။ အပျိုကညာသည် သန္ဓေတည်၍ သားယောက်ျားကိုဖွားမြင်လိမ့်မည်။ ထိုသား၏အမည်ကို ဧမာနွေလ#7:14 “ငါတို့နှင့်အတူရှိတော်မူသောဘုရားသခင်”ဟူသောအဓိပ္ပာယ်ရှိ၏။ဟုခေါ်ကြလိမ့်မည်။#မ 1:23။ 15သူသည် အဆိုးကိုပယ်၍ အကောင်းကိုရွေးချယ်တတ်သည်အထိ ထောပတ်နှင့်ပျားရည်ကိုသာ စားသုံးရလိမ့်မည်။ 16အကြောင်းမူကား ထိုသူငယ်သည် အဆိုးကိုပယ်၍ အကောင်းကိုမရွေးချယ်တတ်မီ သင်တို့ကြောက်ရွံ့သောရှင်ဘုရင်နှစ်ပါး၏ပြည်သည် စွန့်ပစ်ခြင်းခံရလိမ့်မည်။ 17ထာဝရဘုရားသည် အဆီးရီးယားဘုရင်ကို သင့်ထံသို့လည်းကောင်း၊ သင့်လူမျိုးထံသို့လည်းကောင်း၊ သင့်ဖခင်၏အမျိုးအနွယ်ထံသို့လည်းကောင်း ခေါ်ဆောင်လာတော်မူမည်ဖြစ်၍ ယုဒအမျိုးထံမှ ဧဖရိမ်အမျိုးထွက်သွားသောနေ့မှစ၍ မကြုံဖူးသောနေ့ရက်များကို သင်တို့ကြုံရလိမ့်မည်။ 18ထိုနေ့ရက်၌ ထာဝရဘုရားသည် အီဂျစ်ပြည်ရှိနိုင်းမြစ်ဖျားမှယင်ကောင်များကိုလည်းကောင်း၊ အဆီးရီးယားပြည်မှပျားများကိုလည်းကောင်း လေချွန်၍ခေါ်တော်မူမည်။ 19ထိုအကောင်အားလုံးသည် လူသူကင်းမဲ့သောချိုင့်ဝှမ်း၊ ကျောက်ကြား၊ ဆူးချုံ၊ စားကျက်#7:19 သို့မဟုတ် “စမ်းရေ”။ ရှိသမျှတို့၌ စွဲနေကြလိမ့်မည်။ 20ထိုနေ့ရက်၌ ဘုရားရှင်သည် ယူဖရေးတီးမြစ်#7:20 တိုက်ရိုက်ပြန်ဆိုလျှင် “မြစ်”။တစ်ဖက်မှ အဆီးရီးယားဘုရင်တည်းဟူသော သင်တုန်းဓားကိုငှား၍ ခေါင်းနှင့်ခြေမွေးကို ရိတ်တော်မူလိမ့်မည်။ မုတ်ဆိတ်ကိုလည်း သုတ်သင်တော်မူလိမ့်မည်။ 21ထိုနေ့ရက်၌ လူတစ်ဦးသည် နွားမတမ်းတစ်ကောင်နှင့် သိုးနှစ်ကောင်ကိုမွေးမြူလျှင်ပင် 22နို့များစွာထွက်သဖြင့် သူသည် ထောပတ်ကိုစားရလိမ့်မည်။ အကယ်စင်စစ် ထိုပြည်၌ ကြွင်းကျန်သောသူအပေါင်းတို့သည် ထောပတ်နှင့်ပျားရည်ကို စားရကြလိမ့်မည်။ 23ထိုနေ့ရက်၌ စပျစ်ပင်တစ်ထောင်ပါရှိသော တစ်ထောင်တန်စပျစ်ခြံတိုင်းသည် ချုံတော၊ ဆူးတောများဖြစ်သွားလိမ့်မည်။ 24မြေတစ်ပြင်လုံး ချုံတော၊ ဆူးတော ဖြစ်သွားသောကြောင့် လူတို့သည် ထိုနေရာသို့သွားလျှင် လေး၊ မြား ဆောင်လျက် သွားရလိမ့်မည်။ 25ပေါက်တူးဖြင့်တူးဆွခဲ့သော တောင်ယာရှိသမျှတို့သည် ဆူးတော၊ ချုံတောများသာ ဖြစ်သွားသောကြောင့် ထိုနေရာသို့ သင်သွားဝံ့မည်မဟုတ်။ ထိုနေရာသည် နွားလွှတ်ရာ၊ သိုးများသွားလာရာနေရာ ဖြစ်သွားလိမ့်မည်”ဟု ဆိုလေ၏။

Currently Selected:

ဟေရှာယအနာဂတ္တိကျမ်း 7: MSBU

Highlight

Copy