ထွက်မြောက်ရာကျမ်း 16

မန္နမုန့်နှင့် ငုံး စားရခြင်း

1တစ်ဖန် အစ္စရေးအမျိုးသားလူထုအပေါင်းတို့သည် ဧလိမ်အရပ်မှခရီးပြုကြ၏။ အီဂျစ်ပြည်မှထွက်လာပြီးနောက် ဒုတိယလ၊ တစ်ဆယ့်ငါးရက်နေ့၌ ဧလိမ်အရပ်နှင့်သိနာတောင်ကြားရှိ သိန်တောကန္တာရသို့ ရောက်ကြ၏။ 2ထိုတောကန္တာရထဲ၌ အစ္စရေးအမျိုးသားလူထုအပေါင်းတို့သည် မောရှေနှင့်အာရုန်တို့ထံသို့လာ၍ 3အစ္စရေးအမျိုးသားတို့က မောရှေနှင့်အာရုန်အား “ငါတို့သည် အီဂျစ်ပြည်တွင် အသားဟင်းအိုးဘေး၌ထိုင်၍ မုန့်ကိုဝစွာစားလျက်နေစဉ် ထာဝရဘုရား၏လက်တော်ဖြင့် ငါတို့သေရလျှင်ကောင်း၏။ ယခုမူကား သင်တို့သည် ဤလူအစုအဝေးအပေါင်းတို့ကို ငတ်မွတ်၍ သေစေရန် ဤတောကန္တာရထဲသို့ ခေါ်ဆောင်ခဲ့ကြသည်တကား”ဟု ညည်းညူပြကြ၏။

4ထိုအခါ ထာဝရဘုရားက မောရှေအား “ငါသည် သင်တို့အတွက် မုန့်ကို မိုးကောင်းကင်မှရွာကျစေမည်။#ထွ 16:15၊ ယော 6:31။ လူတို့သည် ထွက်၍ တစ်နေ့စာတစ်နေ့ကောက်ယူကြရမည်။ ဤသို့သောအားဖြင့် ငါ၏တရားတော်အတိုင်း သူတို့လိုက်လျှောက်မည်၊ မလိုက်လျှောက်မည်ကို ငါစမ်းသပ်မည်။ 5ဆဋ္ဌမနေ့၌ နေ့စဉ်ထက် နှစ်ဆကောက်၍ ယူဆောင်လာပြီး ပြင်ဆင်ထားရမည်”ဟု မိန့်တော်မူ၏။

6ထို့ကြောင့် မောရှေနှင့်အာရုန်က အစ္စရေးအမျိုးသားအပေါင်းတို့အား “ထာဝရဘုရားသည် သင်တို့အား အီဂျစ်ပြည်မှထုတ်ဆောင်တော်မူကြောင်းကို နေဝင်ချိန်၌ သင်တို့သိရကြလိမ့်မည်။ 7နံနက်အချိန်၌လည်း ထာဝရဘုရား၏ဘုန်းအသရေတော်ကို သင်တို့တွေ့မြင်ရကြလိမ့်မည်။ အကြောင်းမူကား ထာဝရဘုရားအား သင်တို့မြည်တွန်တောက်တီးသောအသံကို ထာဝရဘုရားကြားတော်မူပြီ။ ငါတို့ကား မည်သူဖြစ်၍ ငါတို့ကို ညည်းညူပြရသနည်း”ဟု ဆိုလေ၏။ 8တစ်ဖန် မောရှေက “ထာဝရဘုရားသည် နေဝင်ချိန်၌ သင်တို့စားစရာအသားကိုလည်းကောင်း၊ နံနက်အချိန်၌ လုံလောက်သောမုန့်ကိုလည်းကောင်း ပေးတော်မူမည်။ အကြောင်းမူကား ထာဝရဘုရားထံ သင်တို့ညည်းညူ၍ မြည်တွန်တောက်တီးသောအသံကို ထာဝရဘုရား ကြားတော်မူပြီ။ ငါတို့သည် မည်သူဖြစ်၍နည်း။ သင်တို့မြည်တွန်တောက်တီးသောအသံသည် ငါတို့ကိုဆန့်ကျင်သည်မဟုတ်၊ ထာဝရဘုရားကိုဆန့်ကျင်နေခြင်းပင်ဖြစ်၏”ဟု ဆိုလေ၏။

9ထို့နောက် မောရှေက အာရုန်အား “အစ္စရေးအမျိုးသားလူထုအပေါင်းတို့အား ‘သင်တို့မြည်တွန်တောက်တီးသောအသံကို ထာဝရဘုရားကြားတော်မူပြီဖြစ်၍ ရှေ့တော်သို့ ချဉ်းကပ်ကြလော့’ဟူ၍ ဆင့်ဆိုလော့”ဟု ဆို၏။ 10အာရုန်သည် အစ္စရေးအမျိုးသားလူထုအပေါင်းတို့အား ဆင့်ဆိုစဉ် သူတို့သည် တောကန္တာရဘက်သို့လှည့်ကြည့်သောအခါ မိုးတိမ်ထဲ၌ ထာဝရဘုရား၏ဘုန်းအသရေတော် ထင်ရှားနေသည်ကိုမြင်ရကြလေ၏။

11ထာဝရဘုရားက မောရှေအား

12“အစ္စရေးအမျိုးသားတို့မြည်တွန်တောက်တီးသောအသံကို ငါကြားပြီ။ သူတို့အား ‘သင်တို့သည် နေဝင်ချိန်၌ အသားကိုစားရ၍ နံနက်အချိန်၌ မုန့်ဖြင့်ဝလင်ကြလိမ့်မည်။ ထိုအခါ ငါသည် သင်တို့၏ဘုရားသခင်ထာဝရဘုရားဖြစ်ကြောင်း သင်တို့သိမြင်ကြလိမ့်မည်’ဟူ၍ ဆင့်ဆိုလော့”ဟု မိန့်တော်မူ၏။

13နေဝင်ချိန်၌ ငုံးတို့သည် တက်လာ၍ တပ်စခန်းကိုဖုံးလွှမ်းကြ၏။ နံနက်အချိန်၌လည်း တပ်စခန်းပတ်ပတ်လည်တွင် နှင်းကျလေ၏။ 14နှင်းကွဲပြီးမှ တောကန္တာရ၏မြေမျက်နှာပြင်ပေါ်တွင် မြေပေါ်မှသေးငယ်သောနှင်းခဲသဖွယ် အချပ်အလွှာကလေးများကိုတွေ့ရ၏။ 15ထိုအရာကို အစ္စရေးအမျိုးသားတို့တွေ့မြင်သောအခါ မည်သည့်အရာဖြစ်သည်ကိုမသိသောကြောင့် “မည်သည့်အရာနည်း”ဟု အချင်းချင်းမေးမြန်းကြ၏။

ထိုအခါ မောရှေက “ဤအရာသည် သင်တို့ စားဖို့ ထာဝရဘုရားပေးတော်မူသောမုန့်ဖြစ်၏။#ထွ 16:4၊ ယော 6:31။ 16ထာဝရဘုရားက ‘တစ်ဦးစီစားနိုင်သလောက် ကောက်ယူကြလော့။ သင်တို့၏လူအရေအတွက်အလိုက် မိမိတဲ၌ရှိသောသူတစ်ဦးစီအတွက် တစ်ယောက်တစ်ဩမဲ#16:16 “2.2 လီတာ”။စီ ယူကြရမည်’ဟူ၍ မိန့်တော်မူ၏”ဟု ဆိုလေ၏။

17အစ္စရေးအမျိုးသားတို့သည်လည်း ထိုသို့ပြု၍ အနည်းအများအလိုက် ကောက်ယူကြ၏။ 18သူတို့သည် ဩမဲဖြင့် ခြင်တွယ်သောအခါ များများရသောသူမပို၊ နည်းနည်းရသောသူမလိုချေ။#၂ကော 8:15။ တစ်ဦးစီစားနိုင်သလောက် ကောက်ယူကြ၏။ 19မောရှေက သူတို့အား “မည်သူမျှ ထိုမုန့်ကို နံနက်တိုင်အောင်မကြွင်းကျန်စေရ”ဟု ဆိုသော်လည်း 20သူတို့သည် မောရှေ၏စကားကိုနားမထောင်ကြ။ လူအချို့တို့သည် နံနက်တိုင်အောင် ချန်ထားသဖြင့် ပိုးထိုး၍ အပုပ်နံ့ထွက်လေ၏။ မောရှေသည်လည်း သူတို့ကို အမျက်ထွက်လေ၏။

21သူတို့သည် တစ်ဦးစီစားနိုင်သလောက် မုန့်ကိုနံနက်တိုင်းကောက်ယူကြ၏။ နေပူလာသောအခါ ထိုမုန့်သည် အရည်ပျော်လေ၏။ 22ဆဋ္ဌမနေ့ရောက်သောအခါ မုန့်ကို တစ်ယောက်နှစ်ဩမဲ#16:22 “4.4 လီတာ”။စီ နှစ်ဆကောက်ယူကြ၏။ ထိုအကြောင်းကို လူထုခေါင်းဆောင်အပေါင်းတို့သည်လာ၍ မောရှေအားပြောကြားကြ၏။ 23မောရှေကလည်း “ဤအရာကား ထာဝရဘုရားမိန့်ဆိုတော်မူသောအရာဖြစ်၏။ မနက်ဖြန်သည် ငြိမ်ဝပ်စွာနေရသောနေ့၊ ထာဝရဘုရား၏သန့်ရှင်းသောဥပုသ်နေ့ဖြစ်၏။ ထိုမုန့်ကို သင်တို့ဖုတ်လိုလျှင် ဖုတ်လော့။ ပြုတ်လိုလျှင် ပြုတ်လော့။ ပိုသမျှကို သင်တို့အတွက် ချန်ထားပြီး နံနက်တိုင်အောင်သိမ်းထားလော့”ဟု သူတို့အားဆို၏။

24သူတို့သည်လည်း မောရှေမိန့်မှာသည့်အတိုင်း နံနက်တိုင်အောင်ချန်ထားကြရာ အပုပ်နံ့ထွက်ခြင်းလည်းမရှိ၊ လောက်တက်ခြင်းလည်းမရှိ။ 25မောရှေက “ချန်ထားသောမုန့်ကို ယနေ့စားကြလော့။ ယနေ့သည် ထာဝရဘုရား၏ဥပုသ်နေ့ဖြစ်၍ ထိုမုန့်ကို ယနေ့ မြေပေါ်၌တွေ့ရမည်မဟုတ်။ 26သင်တို့သည် ခြောက်ရက်ပတ်လုံး မုန့်ကို ကောက်ယူကြရမည်။ ဥပုသ်နေ့ဖြစ်သောသတ္တမနေ့၌မူကား ရှိမည်မဟုတ်”ဟု ဆိုလေ၏။

27သတ္တမနေ့၌ လူအချို့တို့သည် ကောက်ယူရန်ထွက်သွားကြသော်လည်း ရှာမတွေ့ကြ။ 28ထိုအခါ ထာဝရဘုရားက မောရှေအား “သင်တို့သည် ငါ၏ပညတ်တော်နှင့် ဥပဒေသများကို မည်သည့်အချိန်ထိ မစောင့်ထိန်းဘဲ နေကြမည်နည်း။ 29ငါထာဝရဘုရားသည် သင်တို့အား ဥပုသ်နေ့ကို သတ်မှတ်ပေးတော်မူပြီ။ ထို့ကြောင့် ဆဋ္ဌမနေ့၌ သင်တို့အား မုန့်ကို နှစ်ရက်စာပေးတော်မူ၏။ လူတိုင်းမိမိနေရာ၌နေကြလော့။ သတ္တမနေ့၌ မည်သူမျှ မိမိနေရာမှမထွက်သွားကြနှင့်”ဟု မိန့်တော်မူ၏။ 30သို့ဖြစ်၍ လူတို့သည် သတ္တမနေ့၌ ငြိမ်ဝပ်စွာနေကြ၏။

31အစ္စရေးအမျိုးသားတို့သည် ထိုမုန့်၏အမည်ကို မန္နဟုခေါ်ကြ၏။ နံနံစေ့နှင့်တူပြီး အဖြူရောင်ဖြစ်၏။ အရသာကား ပျားရည်ပါသောမုန့်ကြွပ်ပြားနှင့်တူ၏။ 32မောရှေက “ထာဝရဘုရားသည် သင်တို့ကို အီဂျစ်ပြည်မှ ထုတ်ဆောင်လာသောအခါ တောကန္တာရထဲ၌ သင်တို့အား ကျွေးမွေးခဲ့သောမုန့်ကို သင်တို့၏မျိုးဆက်အစဉ်အဆက်သိမြင်နိုင်ရန် သူတို့အတွက် ထိုမုန့်ကို တစ်ဩမဲအပြည့် သိမ်းထားရမည်။ ဤသည်ကား ထာဝရဘုရားမိန့်မှာတော်မူသောအရာဖြစ်သည်”ဟု ဆိုပြီး

33အာရုန်အား “အိုးတစ်လုံးကိုယူလော့။ ထိုအထဲ၌ မန္နမုန့်တစ်ဩမဲအပြည့်ထည့်ပြီးလျှင် သင်တို့၏မျိုးဆက်အစဉ်အဆက်အတွက် ထိန်းသိမ်းရန် ထာဝရဘုရားရှေ့တော်၌ ထားလော့”ဟု ဆိုလေ၏။ 34မောရှေအား ထာဝရဘုရားမိန့်မှာတော်မူသည့်အတိုင်း အာရုန်သည် မန္နမုန့်ကိုထိန်းသိမ်းရန် သက်သေခံချက်ရှေ့တွင် ထားလေ၏။

35အစ္စရေးအမျိုးသားတို့သည် သူတို့အခြေချနေထိုင်မည့်ပြည်သို့မရောက်မချင်း အနှစ်လေးဆယ်ပတ်လုံး မန္နမုန့်ကိုစားကြ၏။ သူတို့သည် ခါနာန်ပြည်နယ်နိမိတ်သို့မရောက်မချင်း မန္နမုန့်ကိုစားကြ၏။ 36(တစ်ဩမဲကား တစ်ဧဖာ#16:36 “တစ်ဧဖာ = 22 လီတာ”။၏ဆယ်ပုံတစ်ပုံဖြစ်၏။)

Currently Selected:

ထွက်မြောက်ရာကျမ်း 16: MSBU

Highlight

Copy