ဒံယေလအနာဂတ္တိကျမ်း 2
2
နေဗုခဒ်နေဇာမင်းကြီး၏အိပ်မက်
1နေဗုခဒ်နေဇာမင်းကြီးသည် နန်းစံဒုတိယနှစ်တွင် အိပ်မက်မက်သဖြင့် စိတ်သောကရောက်၍ စက်တော်မခေါ်နိုင်ဘဲဖြစ်၏။ 2ထို့ကြောင့် ရှင်ဘုရင်၏အိပ်မက်များကို ဖော်ပြရန် ရှင်ဘုရင်သည် နတ်ဝိဇ္ဇာဆရာများ၊ ဂမ္ဘီရဆရာများ၊ မှော်ဆရာများနှင့်ခါလဒဲပညာရှိတို့ကို ဆင့်ခေါ်စေ၏။ သူတို့သည်လည်း ရှင်ဘုရင်ရှေ့မှောက်၌ လာ၍ရပ်နေကြ၏။ 3ထိုအခါ ရှင်ဘုရင်က သူတို့အား “ငါသည် အိပ်မက်မက်ပြီး ထိုအိပ်မက်ကို သိလိုသောကြောင့် စိတ်သောကရောက်ရ၏”ဟု မိန့်ဆို၏။
4ခါလဒဲပညာရှိတို့ကလည်း အာရမိတ်ဘာသာစကားဖြင့် ရှင်ဘုရင်အား “အို အရှင်မင်းကြီး၊ သက်တော်ထာဝရတည်ပါစေသော။ ကျွန်တော်မျိုးတို့အား အိပ်မက်ကိုပြောပြတော်မူပါ။ ကျွန်တော်မျိုးတို့ အနက်အဓိပ္ပာယ်ကို ဖွင့်ပြပါမည်”ဟု ပြန်လျှောက်ကြ၏။
5ရှင်ဘုရင်ကလည်း ခါလဒဲပညာရှိတို့အား “ငါ့အမိန့်တော်သည် အတည်ဖြစ်၏။ ငါ့အိပ်မက်နှင့် အိပ်မက်အနက်အဓိပ္ပာယ်ကို သင်တို့မဖော်ပြနိုင်လျှင် သင်တို့ကို အပိုင်းပိုင်းခုတ်ဖြတ်မည်။ သင်တို့အိမ်များကိုလည်း မစင်ပုံဖြစ်စေမည်။ 6သို့သော် သင်တို့သည် ငါ့အိပ်မက်နှင့် အိပ်မက်အနက်အဓိပ္ပာယ်ကို ဖော်ပြနိုင်လျှင် သင်တို့အား လက်ဆောင်များနှင့်တကွ ဆုလာဘ်ကိုလည်း ငါပေးမည်။ ခမ်းနားစွာဂုဏ်ပြုမည်။ ထို့ကြောင့် အိပ်မက်နှင့် အိပ်မက်အနက်အဓိပ္ပာယ်ကို ဖော်ပြကြလော့”ဟု မိန့်ဆို၏။
7သူတို့ကလည်း “အရှင်မင်းကြီး၊ ကျွန်တော်မျိုးတို့အား အိပ်မက်ကို အမိန့်ရှိတော်မူပါ။ ကျွန်တော်မျိုးတို့က အနက်အဓိပ္ပာယ်ကို ဖော်ပြပါမည်”ဟူ၍ တစ်ဖန် လျှောက်ကြ၏။
8ရှင်ဘုရင်ကလည်း “ငါအမိန့်ချပြီးသည်ကို သိလျက်နှင့် သင်တို့အချိန်ဆွဲနေကြသည်ကို ငါသိ၏။ 9သင်တို့သည် ငါ့အိပ်မက်ကို မဖော်ပြနိုင်လျှင် သင်တို့အဖို့ အပြစ်ဒဏ်တစ်ခုကို ငါချမှတ်ထားပြီးဖြစ်၏။ အခြေအနေပြောင်းလိုပြောင်းငြား သင်တို့ပူးပေါင်းပြီး ငါ့ကို မလိမ့်တပတ် လျှောက်တင်ကြ၏။ ငါ့အား အိပ်မက်ကိုသာ ပြောပြလော့။ သင်တို့သည် အိပ်မက်ကိုပြောပြနိုင်လျှင် အနက်အဓိပ္ပာယ်ကိုလည်း ဖွင့်ပြနိုင်မည်ကို ငါသိရမည်”ဟု မိန့်ဆို၏။
10ခါလဒဲပညာရှိတို့ကလည်း ရှင်ဘုရင်အား “အရှင်မင်းကြီးသိလိုသောအရာကို ဖော်ပြနိုင်မည့်သူ ဤကမ္ဘာမှာ တစ်ယောက်မျှရှိမည်မဟုတ်ပါ။ မည်သည့်တန်ခိုးကြီးသောရှင်ဘုရင်ကမျှလည်း မှော်ဆရာ၊ ဗေဒင်ဆရာ၊ ခါလဒဲပညာရှိတို့ကို ဤသို့ မေးမြန်းလေ့မရှိပါ။ 11အရှင်မင်းကြီး မေးသောမေးခွန်းမှာ ခက်ခဲလှ၏။ လူတို့ကဲ့သို့ရှင်သန်နေထိုင်ခြင်းမရှိသော နတ်ဘုရားများမှလွဲ၍ မည်သူမျှ အရှင်မင်းကြီး၏မေးခွန်းကို ဖော်ပြနိုင်သူမရှိပါ”ဟု ပြန်လျှောက်ကြ၏။ 12ရှင်ဘုရင်သည် ထိုစကားကြောင့် အမျက်ဒေါသပြင်းစွာထွက်၍ ဘေဘီလုံပညာရှိအားလုံးကို ကွပ်မျက်ရန် အမိန့်ပေးလိုက်လေ၏။ 13ထိုသို့ ပညာရှိတို့ကိုကွပ်မျက်ရန် အမိန့်ထုတ်လိုက်သဖြင့် ဒံယေလနှင့်အပေါင်းပါတို့ကိုလည်း ကွပ်မျက်ရန် ရှာဖွေကြ၏။
14ဒံယေလသည် ဘေဘီလုံပညာရှိတို့ကို ကွပ်မျက်ရန်လာသော ဘုရင့်ကိုယ်ရံတော်မှူးအာရုတ်အား အမြော်အမြင်ရှိရှိ၊ လိမ္မာပါးနပ်စွာ မေးမြန်းပြောဆို၏။ 15ဘုရင့်ကိုယ်ရံတော်မှူးအာရုတ်အား “အဘယ်ကြောင့် ဘုရင့်အမိန့်တော် ဤမျှပြင်းထန်ရသနည်း”ဟု မေးမြန်းသောအခါ အာရုတ်က ဒံယေလအား ဖြစ်ကြောင်းကုန်စင်ကို ပြောပြ၏။ 16ထိုအခါ ဒံယေလသည် ရှင်ဘုရင်ထံ အခစားဝင်၍ ရှင်ဘုရင်၏အိပ်မက်အနက်အဓိပ္ပာယ်ကို ဖော်ပြနိုင်ရန် အချိန်ပေးပါမည့်အကြောင်း တောင်းခံလေ၏။
17ထို့နောက် ဒံယေလသည် အိမ်သို့ပြန်လာ၍ မိမိအပေါင်းအဖော်ဖြစ်သော ဟာနနိယ၊ မိရှေလ၊ အာဇရိတို့အား ထိုအကြောင်းအရာကို ပြောပြ၍ 18ဤနက်နဲသောအရာကြောင့် ဒံယေလနှင့် သူ၏အပေါင်းအဖော်တို့သည် အခြားဘေဘီလုံပညာရှိတို့နှင့်အတူ ကွပ်မျက်မခံရစေရန် ကောင်းကင်ဘုံရှင်ဘုရားသခင်ထံ ဆုတောင်းအသနားခံကြမည့်အကြောင်း တိုက်တွန်းလေ၏။ 19ထိုညတွင် ဒံယေလအား ဤနက်နဲသောအရာကို စိတ်အာရုံထဲတွင် ဖွင့်ပြတော်မူ၏။ ထို့ကြောင့် ဒံယေလက ကောင်းကင်ဘုံရှင်ဘုရားသခင်အား 20“ဘုရားသခင်၏နာမတော်ကို ကာလအစဉ်အဆက်ချီးမွမ်းကြပါစေသော။ ဉာဏ်ပညာနှင့် အစွမ်းတန်ခိုးသည် ကိုယ်တော့်ထံမှဖြစ်ပါ၏။ 21ကိုယ်တော်သည် အချိန်နှင့် ရာသီဥတုကို ပြောင်းလဲစေနိုင်၏။ ရှင်ဘုရင်တို့ကိုလည်း နန်းတင်နန်းချ ပြုနိုင်၏။ ပညာရှိကို ဉာဏ်ပညာပေးတော်မူ၏။ ဉာဏ်ရှိသူကိုလည်း အသိပညာပေးတော်မူ၏။ 22ခက်ခဲနက်နဲသောအရာ၊ လျှို့ဝှက်သောအရာတို့ကို ဖွင့်ပြတော်မူ၏။ မှောင်မိုက်ထဲ၌ရှိသောအရာတို့ကိုလည်း သိတော်မူ၏။ အလင်းသည် ကိုယ်တော်နှင့်အတူရှိ၏။ 23အို ဘိုးဘေးတို့၏ဘုရားသခင်၊ ကိုယ်တော်၏ကျေးဇူးတော်ကို ချီးမွမ်းပါ၏။ ကိုယ်တော့်ကို ချီးမွမ်းထောမနာပြုပါ၏။ ကိုယ်တော်သည် အကျွန်ုပ်အား ဉာဏ်ပညာနှင့် အစွမ်းတန်ခိုးကိုပေး၍ အကျွန်ုပ်တောင်းလျှောက်သောအရာကို ဖွင့်ပြတော်မူပြီ။ အကျွန်ုပ်တို့အား ရှင်ဘုရင်၏အိပ်မက်ကို သိစေတော်မူပါပြီ”ဟူ၍ ချီးမွမ်းမြွက်ဆိုလေ၏။
24ဒံယေလသည် ဘေဘီလုံပညာရှိတို့ကိုကွပ်မျက်ရန် ရှင်ဘုရင်ခန့်ထားသောအာရုတ်ထံသို့ သွား၍ “ဘေဘီလုံပညာရှိတို့ကို မကွပ်မျက်ပါနှင့်။ အကျွန်ုပ်ကို ရှင်ဘုရင်ထံခေါ်သွားပါ။ ရှင်ဘုရင်၏အိပ်မက်အနက်အဓိပ္ပာယ်ကို ဖော်ပြပေးပါမည်”ဟု ဆိုလေ၏။
25အာရုတ်ကလည်း ဒံယေလကို ရှင်ဘုရင်ထံ အလျင်အမြန်ခေါ်သွားပြီးလျှင် “အရှင်မင်းကြီး၏အိပ်မက်အနက်အဓိပ္ပာယ်ကို ဖော်ပြပေးနိုင်မည့် ယုဒအမျိုးသုံ့ပန်းတစ်ဦးကို အကျွန်ုပ်တွေ့ပါပြီ”ဟု လျှောက်လေ၏။
26ရှင်ဘုရင်ကလည်း ဗေလတရှာဇာခေါ် ဒံယေလအား “ငါမက်သောအိပ်မက်နှင့် အိပ်မက်၏အနက်အဓိပ္ပာယ်ကို ဖော်ပြနိုင်သလော”ဟု မေးလျှင်
27ဒံယေလက ရှင်ဘုရင်အား “အရှင်မင်းကြီးမေးသည့် နက်နဲသောအရာကို ပညာရှိများ၊ ဗေဒင်ဆရာများ၊ မှော်ဆရာများ၊ နက္ခတ်ဗေဒပညာရှင်များက အရှင်မင်းကြီးအား ဖော်ပြနိုင်မည်မဟုတ်ပါ။ 28သို့သော် နက်နဲသောအရာကို ဖွင့်ပြပေးနိုင်သောဘုရားသခင်တစ်ပါး ကောင်းကင်ဘုံတွင် ရှိတော်မူ၏။ ထိုဘုရားက နောင်ကာလဖြစ်ပျက်မည့်အရာများကို နေဗုခဒ်နေဇာမင်းကြီးအား ဖော်ပြတော်မူပြီ။ သလွန်တော်ပေါ်တွင် ရှင်ဘုရင်မြင်မက်တော်မူသောအိပ်မက်နှင့် တွေးတောရင်း စိတ်အာရုံတွင်မြင်ရသောအရာကား ဤသို့ဖြစ်၏။ 29အို အရှင်မင်းကြီး၊ မင်းကြီးသည် သလွန်တော်ပေါ်တွင်လဲလျောင်းလျက် နောင်ကာလတွင် မည်သို့ဖြစ်ပျက်မည်ကို တွေးတောမိသောအခါ နက်နဲရာကိုဖွင့်ပြပေးနိုင်သောအရှင်က နောင်ဖြစ်ပျက်မည့်အရာတို့ကို အရှင်မင်းကြီးအား သိစေတော်မူပြီ။ 30အကျွန်ုပ်အား ဤနက်နဲသောအရာကို ဖွင့်ပြသည်မှာလည်း အကျွန်ုပ်သည် သက်ရှိလူသားအပေါင်းတို့ထက်ပို၍ ဉာဏ်ပညာရှိသောကြောင့်မဟုတ်ဘဲ အရှင်မင်းကြီးအား အိပ်မက်အနက်အဓိပ္ပာယ်ကို ဖော်ပြ၍ မင်းကြီးစိတ်ထဲရှိအတွေးတို့ကို မင်းကြီးအား သိစေရန် ဖြစ်၏။
အိပ်မက်အနက်ကိုဖွင့်ပြခြင်း
31အို အရှင်မင်းကြီး၊ မင်းကြီးသည် ရုပ်တုကြီးတစ်ခုကို မြင်မက်ပါ၏။ အလွန်ကြီးမားတောက်ပပြောင်လက်သော ထိုရုပ်တုသည် မင်းကြီးရှေ့တွင်ရပ်လျက် တည်ရှိပါ၏။ ထိုရုပ်တု၏ပုံသဏ္ဌာန်သည် အလွန်ကြောက်မက်ဖွယ်ကောင်းပါ၏။ 32ထိုရုပ်တု၏ဦးခေါင်းမှာ ရွှေစင်၊ ရင်ဘတ်နှင့်လက်မောင်းမှာ ငွေ၊ ဗိုက်နှင့်ပေါင်မှာ ကြေးနီ၊ 33ခြေသလုံးနှစ်ဖက်မှာ သံ၊ ခြေမှာ သံတစ်ပိုင်းနှင့် ရွှံ့စေးတစ်ပိုင်း ဖြစ်၏။ 34အရှင်မင်းကြီး ကြည့်နေစဉ် လူ့လက်ဖြင့်မဟုတ်ဘဲ ထုခွဲထားသောကျောက်တုံးတစ်တုံးသည် သံနှင့် ရွှံ့စေးဖြစ်သောရုပ်တု၏ခြေတို့ကို ဝင်တိုက်၍ တစ်စစီကျိုးပဲ့သွား၏။ 35ထိုနည်းတူ သံ၊ ရွှံ့စေး၊ ကြေးနီ၊ ငွေ၊ ရွှေတို့သည်လည်း တစ်စစီကျိုးပဲ့သွား၍ နွေကာလတွင် တလင်းပြင်ရှိအဖျင်းအမှော်ကဲ့သို့ ဖြစ်လေ၏။ လေတိုက်သောအခါ လွင့်ပါသွားသဖြင့် အစအနပင် မတွေ့တော့ပေ။ ရုပ်တုကြီးကို ဝင်တိုက်သောကျောက်တုံးမူကား တောင်ကြီးဖြစ်လာပြီး မြေတစ်ပြင်လုံး၌ ပြည့်လေ၏။
36ဤသည်ကား အရှင်မင်းကြီး မြင်မက်သောအိပ်မက် ဖြစ်ပါ၏။ ယခု အိပ်မက်၏အနက်အဓိပ္ပာယ်ကို အကျွန်ုပ်တို့ ဖွင့်ပြလျှောက်တင်ပါမည်။ 37အို အရှင်မင်းကြီး၊ မင်းကြီးသည် ဘုရင်တကာတို့၏ဘုရင် ဖြစ်ပါ၏။ ကောင်းကင်ဘုံရှင်ဘုရားသခင်သည် မင်းကြီးအား နိုင်ငံတော်နှင့်တကွ တန်ခိုးအာဏာ၊ အစွမ်းသတ္တိ၊ ဂုဏ်သရေတို့ကို ပေးတော်မူပြီ။ 38အရပ်ရပ်ရှိလူသားများ၊ တောတိရစ္ဆာန်များ၊ မိုးကောင်းကင်ငှက်များကို အရှင်မင်းကြီးလက်သို့ အပ်တော်မူသဖြင့် အရှင်မင်းကြီးသည် အလုံးစုံကို အုပ်စိုးရပါ၏။ ရုပ်တု၏ရွှေဦးခေါင်းသည် အရှင်မင်းကြီးပင် ဖြစ်ပါ၏။
39အရှင်မင်းကြီးနောက်တွင် အရှင်မင်းကြီးထက်အင်အားနည်းသော နိုင်ငံတစ်ခု ပေါ်ထွန်းလိမ့်မည်။ ထို့နောက် တတိယနိုင်ငံတစ်ခုဖြစ်သော ကြေးနီနိုင်ငံပေါ်ထွန်းပြီး မြေတစ်ပြင်လုံးကို အုပ်စိုးလိမ့်မည်။ 40ထို့နောက် သံကဲ့သို့ခိုင်မာသော စတုတ္ထနိုင်ငံ ပေါ်ထွန်းလိမ့်မည်။ သံသည် အခြားအရာတို့ကို ခြေမွှနိုင်သကဲ့သို့ ဤနိုင်ငံသည်လည်း အခြားနိုင်ငံအားလုံးကို တစ်စစီခြေမွှပစ်လိမ့်မည်။ 41ရုပ်တု၏ခြေနှင့် ခြေချောင်းတို့မှာ အိုးဖုတ်ရွှံ့စေးတစ်ပိုင်းနှင့် သံတစ်ပိုင်းဖြစ်သည်ကို အရှင်မင်းကြီးမြင်ခဲ့၏။ ဤနိုင်ငံသည် အချင်းချင်းကွဲပြားသောနိုင်ငံ ဖြစ်လိမ့်မည်။ အရှင်မင်းကြီးမြင်ရသည့်အတိုင်း ရွှံ့စေးနှင့် သံရောထားသည်ဖြစ်၍ ဤနိုင်ငံသည် သံကဲ့သို့ မာကျောလိမ့်မည်။ 42ခြေချောင်းတို့မှာ သံတစ်ပိုင်း ရွှံ့စေးတစ်ပိုင်းဖြစ်၍ ထိုနိုင်ငံတစ်ဝက်သည် ခိုင်မာ၍ တစ်ဝက်သည် ပျက်စီးလိမ့်မည်။ 43ထိုသို့ သံနှင့်အိုးဖုတ်ရွှံ့စေး ရောနှောထားသည်ကို အရှင်မင်းကြီး မြင်ခဲ့၏။ ဤသည်မှာ သူတို့သည် အခြားလူမျိုးနွယ်တို့နှင့် ရောနှောနေထိုင်ကြလိမ့်မည်။ သို့သော် သံနှင့်ရွှံ့စေး ရောနှော၍မရသကဲ့သို့ သူတို့သည်လည်း အချင်းချင်းပူးပေါင်း၍ ရမည်မဟုတ်။
44ထိုရှင်ဘုရင်များအုပ်စိုးသည့်ကာလတွင်ပင် ကောင်းကင်ဘုံရှင်ဘုရားသခင်သည် မည်သည့်အခါမျှမပျက်စီးနိုင်မည့်နိုင်ငံတစ်ခုကို တည်ထောင်တော်မူလိမ့်မည်။ ဤနိုင်ငံသည် အခြားသူတို့လက်သို့ ရောက်ရမည်မဟုတ်။ အခြားနိုင်ငံအားလုံးကို တစ်စစီခြေမွှဖျက်ဆီးပစ်မည်။ ဤနိုင်ငံသည် အစဉ်အမြဲတည်လိမ့်မည်။#ဒံ 7:14၊ ဗျာ 11:15။ 45လူ့လက်ဖြင့်မဟုတ်ဘဲ ထုခွဲထားသောကျောက်တုံးတစ်တုံးသည် တောင်ပေါ်မှလိမ့်ကျလာပြီး သံ၊ ကြေးနီ၊ ရွှံ့စေး၊ ငွေ၊ ရွှေတို့ကို တစ်စစီကျိုးပဲ့စေသည်ကို အရှင်မင်းကြီး မြင်ခဲ့သည်မှာ ကြီးမြတ်တော်မူသောဘုရားသခင်သည် နောင်ကာလ၌ဖြစ်ပျက်မည့်အရာတို့ကို အရှင်မင်းကြီးအား ဖော်ပြပေးခြင်းဖြစ်၏။ အိပ်မက်သည် မှန်ကန်ပါ၏။ အနက်အဓိပ္ပာယ်မှာလည်း ယုံကြည်ရပါ၏”ဟု လျှောက်ဆိုလေ၏။
နေဗုခဒ်နေဇာမင်းကြီး၏တုံ့ပြန်မှု
46ထိုအခါ နေဗုခဒ်နေဇာမင်းကြီးသည် ဒံယေလအား ပျပ်ဝပ်ရှိခိုးပြီးလျှင် ဘောဇဉ်ပူဇော်သက္ကာနှင့် အမွှေးနံ့သာကို သူ့အားဆက်သကြရန် အမိန့်ပေးလေ၏။ 47ထို့ပြင် ရှင်ဘုရင်က ဒံယေလအား “စင်စစ် သင်၏ဘုရားသခင်သည် ဘုရားတကာတို့၏ဘုရား၊ ဘုရင်တကာတို့၏အရှင်သခင်၊ နက်နဲသောအရာကို ဖွင့်ပြနိုင်သောအရှင် ဖြစ်တော်မူ၏။ ထို့ကြောင့် သင်သည်လည်း ဤနက်နဲသောအရာကို ဖွင့်ပြနိုင်ခြင်း ဖြစ်၏”ဟု မိန့်ဆို၏။ 48ထို့နောက် ရှင်ဘုရင်သည် ဒံယေလအား ရာထူးတိုးမြှင့်ပေး၍ လက်ဆောင်များစွာကို ပေး၏။ သူ့အား ဘေဘီလုံပညာရှိတို့အထက်၌ ဝန်ကြီးချုပ်အဖြစ် ခန့်ထား၍ ဘေဘီလုံနယ်မြေတစ်ဝန်းလုံးကို အုပ်စိုးစေ၏။ 49ဒံယေလကလည်း ရှာဒရက်၊ မေရှက်၊ အဗေဒနေဂေါတို့အား ဘေဘီလုံနယ်မြေတွင် အုပ်ချုပ်ရေးမှူးအဖြစ်ခန့်ထားပေးရန် ဘုရင်ထံတောင်းလျှောက်၏။ ဒံယေလမူကား နန်းတွင်း၌ အမှုထမ်းရလေ၏။
Currently Selected:
ဒံယေလအနာဂတ္တိကျမ်း 2: MSBU
Highlight
Share
Copy
Want to have your highlights saved across all your devices? Sign up or sign in
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
