ဓမ္မရာဇဝင်တတိယစောင် 9

ထာဝရဘုရားထံတော်မှ စကားသံကြားရခြင်း

1ရှောလမုန်မင်းကြီးသည် ထာဝရဘုရား၏အိမ်တော်၊ ရှင်ဘုရင်နန်းတော်နှင့် မိမိဆန္ဒအတိုင်းတည်ဆောက်လိုသမျှကို တည်ဆောက်ပြီးစီးသောအခါ 2ထာဝရဘုရားက ဂိဗောင်မြို့၌ ကိုယ်ထင်ရှားပြခဲ့သကဲ့သို့ ရှောလမုန်မင်းကြီးအား ဒုတိယအကြိမ် ထင်ရှားပြတော်မူ၏။ 3ထာဝရဘုရားက သူ့အား “ငါ့ရှေ့မှောက်တွင် သင်ဆုတောင်းအသနားခံသည်ကို ငါနားညောင်းပြီ။ သင်တည်ဆောက်သောဤအိမ်တော်ကို ငါသန့်ရှင်းစေမည်။ ငါ့နာမအဖို့ အစဉ်တည်စေမည်။ ဤအိမ်တော်ကို ငါအစဉ်အမြဲကြည့်ရှုနှလုံးသွင်းမည်။ 4သင့်ခမည်းတော်ဒါဝိဒ်မင်းကြီး အသက်ရှင်လျှောက်လှမ်းခဲ့သည့်အတိုင်း၊ သင်သည် ငါမိန့်မှာထားသည့်အတိုင်း လုပ်ဆောင်၍ ငါ၏ပညတ်ချက်၊ စီရင်ထုံးဖွဲ့ချက်တို့ကို စောင့်ထိန်းလျက် ငါ့ရှေ့မှောက်တွင် စိတ်နှလုံးတည်ကြည်ဖြောင့်မတ်စွာ အသက်ရှင်လျှောက်လှမ်းလျှင် 5သင့်ခမည်းတော်ဒါဝိဒ်အား ‘အစ္စရေးရာဇပလ္လင်ပေါ်တွင် သင်၏မျိုးဆက်မပြတ်ရ’ဟု ငါကတိထားခဲ့သည့်အတိုင်း အစ္စရေးလူမျိုးကိုအုပ်စိုးရန် သင်၏ရာဇပလ္လင်ကို ငါအစဉ်တည်စေမည်။ 6သို့သော် သင်နှင့်သင့်သားမြေးတို့သည် ငါ့ထံမှကျောခိုင်းသွားပြီး သင်တို့အား ငါမိန့်မှာထားသောပညတ်ချက်များ၊ ပြဋ္ဌာန်းချက်များကို မစောင့်ထိန်းဘဲ အခြားဘုရားများကို သွား၍ဝတ်ပြုကိုးကွယ်မည်ဆိုလျှင် 7အစ္စရေးလူမျိုးတို့ကို ငါပေးထားသောပြည်ပေါ်မှ ငါဖယ်ရှားပစ်မည်။ ငါ့နာမအဖို့ ငါသန့်ရှင်းစေသောအိမ်တော်ကိုလည်း ငါ့ရှေ့မှောက်မှ ဖယ်ရှားပစ်မည်။ အစ္စရေးလူမျိုးတို့သည် လူမျိုးတကာတို့အလယ်တွင် ပုံခိုင်းစရာ၊ ပြောင်လှောင်စရာ ဖြစ်ရလိမ့်မည်။ 8ဤသန့်ရှင်းမြင့်မြတ်သော#9:8 အချို့မူကွဲကျမ်း၌ “အပျက်အစီးပုံကြီးဖြစ်သွားသော”။အိမ်တော်အနားမှ ဖြတ်သွားသောသူတိုင်း အံ့အားသင့်လျက် ကဲ့ရဲ့ကြလိမ့်မည်။ ‘ဤပြည်နှင့် ဤအိမ်တော်ကို အဘယ်ကြောင့် ထာဝရဘုရား ဤသို့ပြုတော်မူသနည်း’ဟု ဆိုကြလိမ့်မည်။ 9ထိုအခါ လူတို့က ‘သူတို့၏ဘိုးဘေးတို့ကို အီဂျစ်ပြည်မှထုတ်ဆောင်လာခဲ့သော သူတို့၏ဘုရားသခင်ထာဝရဘုရားကို သူတို့စွန့်ပယ်၍ အခြားသောဘုရားတို့ကို ဆည်းကပ်လျက် ပျပ်ဝပ်ကိုးကွယ်ကြသောကြောင့် ထာဝရဘုရားသည် သူတို့အား ဤဘေးအန္တရာယ်အပေါင်းနှင့် ကြုံတွေ့စေတော်မူပြီ’ဟူ၍ ပြန်ပြောကြလိမ့်မည်”ဟု မိန့်တော်မူ၏။

ဟိရံမင်းကြီးအား မြို့နှစ်ဆယ်ကိုပေးခြင်း

10ရှောလမုန်မင်းကြီးသည် ထာဝရဘုရား၏အိမ်တော်နှင့် ရှင်ဘုရင်နန်းတော်တည်းဟူသော အဆောက်အအုံနှစ်ခုကို တည်ဆောက်ချိန် အနှစ်နှစ်ဆယ်ကြာသောအခါ 11တိုင်ရာဘုရင်ဟိရံမင်းကြီးသည် ရှောလမုန်မင်းကြီးအား သစ်ကတိုးသား၊ ထင်းရှူးသားနှင့် ရွှေတို့ကို အလိုရှိသမျှပံ့ပိုးပေးခဲ့သဖြင့် ရှောလမုန်မင်းကြီးသည် ဟိရံမင်းကြီးအား ဂါလိလဲပြည်ရှိ မြို့နှစ်ဆယ်မြို့ကိုပေးလေ၏။ 12ထို့ကြောင့် ဟိရံမင်းကြီးသည် တိုင်ရာမြို့မှထွက်လာ၍ ရှောလမုန်မင်းကြီးပေးသောမြို့များကို သွားရောက်ကြည့်ရှုရာ ထိုမြို့များကို စိတ်တိုင်းမကျဖြစ်လျက် 13“ညီတော်၊ သင်ပေးသောမြို့ကား အဘယ်သို့နည်း”ဟု ဆို၏။ ထို့ကြောင့် ထိုမြို့များကို ကာဗုလမြေဟု ယနေ့တိုင် ခေါ်ဝေါ်ကြလေ၏။ 14ဟိရံမင်းကြီးသည် ရှင်ဘုရင်အား ရွှေတာလန်တစ်ရာ့နှစ်ဆယ်#9:14 “2652 ပိဿာ သို့မဟုတ် 4080 ကီလိုဂရမ်”။ကို ဆက်သခဲ့သေး၏။

ရှောလမုန်မင်းကြီး လုပ်သားအင်အားတိုးထားခြင်း

15ဤသို့ ရှောလမုန်မင်းကြီးသည် ထာဝရဘုရား၏အိမ်တော်၊ သူစံမြန်းရန်နန်းတော်၊ မိလ္လော#9:15 “အဓိပ္ပာယ်မသေချာပါ။ ခံတပ်၊ သို့မဟုတ် ကတုတ်၊ သို့မဟုတ် မြို့ ဖြစ်နိုင်သည်”။၊ ဂျေရုဆလင်မြို့ရိုး၊ ဟာဇော်မြို့၊ မေဂိဒ္ဒေါမြို့၊ ဂေဇာမြို့တို့ကို တည်ဆောက်ရန် အလုပ်ကြမ်းသမားများကို ခေါ်ယူခဲ့ရ၏။ 16အီဂျစ်ဘုရင်ဖာရောမင်းကြီးသည် ဂေဇာမြို့ကို ချီတက်သိမ်းပိုက်ပြီး မီးရှို့၍ ထိုမြို့သားခါနာန်လူမျိုးတို့အား သတ်ပြီးလျှင် ထိုမြို့ကို မိမိသမီးတော် ရှောလမုန်မင်းကြီး၏မိဖုရားအား လက်ဖွဲ့အဖြစ် ပေးခဲ့၏။ 17ရှောလမုန်မင်းကြီးသည် ဂေဇာမြို့အပါအဝင် အောက်ဗေသောရုန်မြို့ကိုလည်း ပြန်လည်တည်ဆောက်၏။ 18ထို့ပြင် မိမိပိုင်နက်ထဲရှိ ကန္တာရအရပ်တွင် ဗာလတ်မြို့၊ တာဒမော်မြို့၊ 19ရှောလမုန်ဘဏ္ဍာသိုလှောင်ရာမြို့များ၊ စစ်ရထားမြို့များ၊ မြင်းစီးသူရဲမြို့များသာမက ဂျေရုဆလင်မြို့၊ လက်ဘနွန်တောင်အပါအဝင် မိမိအုပ်စိုးရာနယ်မြေရှိသမျှတို့တွင် ဆောက်လိုသောအဆောက်အအုံများကိုလည်း စိတ်တိုင်းကျဆောက်လုပ်လေ၏။

20အစ္စရေးလူမျိုးမဟုတ်သော အာမောရိလူမျိုး၊ ဟိတ္တိလူမျိုး၊ ဖေရဇိလူမျိုး၊ ဟိဝိလူမျိုး၊ ယေဗုသိလူမျိုးတို့ထဲမှ ကြွင်းကျန်သောလူမျိုးအားလုံးနှင့် 21အစ္စရေးအမျိုးသားတို့ အကုန်အစင်မသုတ်သင်နိုင်ခဲ့ဘဲ တိုင်းပြည်တွင်ကြွင်းကျန်နေခဲ့သောသူတို့၏သားမြေးများကို ရှောလမုန်မင်းကြီးသည် အလုပ်ကြမ်းသမားများအဖြစ် ယနေ့တိုင်အောင်ထားရှိ၏။ 22ရှောလမုန်မင်းကြီးသည် အစ္စရေးလူမျိုးတို့ကို ကျွန်အဖြစ်မထားရှိဘဲ စစ်သူရဲများ၊ မင်းမှုထမ်းများ၊ အကြီးအကဲများ၊ တပ်မှူးများ၊ ရထားမှူးများ၊ မြင်းစီးသူရဲများအဖြစ် ထားရှိ၏။ 23ရှောလမုန်မင်းကြီး၏ဆောက်လုပ်ရေးလုပ်ငန်းတွင် အလုပ်သမားများကိုကြီးကြပ်သော အကြီးအကဲအယောက်ငါးရာ့ငါးဆယ်ရှိ၏။

ရှောလမုန်မင်းကြီး လုပ်ဆောင်ခဲ့သောအခြားအရာများ

24ဖာရောမင်းကြီး၏သမီးတော်သည် ဒါဝိဒ်မြို့မှထွက်၍ သူ့အတွက် ရှောလမုန်မင်းကြီးဆောက်လုပ်ပေးသော နန်းဆောင်သို့ ပြောင်းနေ၏။ ရှောလမုန်မင်းကြီးသည် မိလ္လောကိုလည်း တည်ဆောက်၏။

25ရှောလမုန်မင်းကြီးသည် ထာဝရဘုရားအဖို့တည်ဆောက်သောယဇ်ပလ္လင်ပေါ်တွင် မီးရှို့ရာယဇ်၊ မိတ်သဟာယယဇ်တို့ကို တစ်နှစ်လျှင် သုံးကြိမ်ပူဇော်၏။ နံ့သာပေါင်းကိုလည်း ထာဝရဘုရားရှေ့တော်တွင် မီးရှို့ပူဇော်၏။ ဤသို့ဖြင့် အိမ်တော်ကို လက်စသတ်လေ၏။

26ထို့ပြင် ရှောလမုန်မင်းကြီးသည် ဧဒုံပြည်၊ ပင်လယ်နီကမ်းခြေရှိ ဧလတ်မြို့အနီး ဧဇယုန်ဂါဗာမြို့တွင် သင်္ဘောကိုတည်ဆောက်၏။ 27ဟိရံမင်းကြီးသည် ပင်လယ်ပြင်အကြောင်းကို သိနားလည်သော မိမိ၏အမှုထမ်းသင်္ဘောသားတို့ကို ရှောလမုန်မင်းကြီး၏အမှုထမ်းတို့နှင့်အတူ သင်္ဘောလိုက်စေ၏။ 28သူတို့သည် ဩဖိရမြို့သို့ရွက်လွှင့်သွားပြီး ရွှေတာလန်လေးရာ့နှစ်ဆယ်#9:28 “9282 ပိဿာ သို့မဟုတ် 14280 ကီလိုဂရမ်”။ယူဆောင်လာ၍ ရှောလမုန်မင်းကြီးကိုဆက်သကြ၏။

Currently Selected:

ဓမ္မရာဇဝင်တတိယစောင် 9: MSBU

Highlight

Copy